“གོ་ལ་ཧྲིལ་པོའི་ལྷོ་ཕྱོགས”སྨྱན་སྦྱོར་གྱི་ཇུས་འདོན་ཚོགས་པའི་མཐོ་རིམ་གླེང་སྟེགས་པར་ཙིར་དུ་གཉེར་བ།
སྤེལ་དུས 2024-11-15
ཡོང་ཁུངས། ཤིན་ཧྭ་གསར་འགྱུར་ཁང་།
རྩོམ་པ་པོ།
ཤིན་ཧྭ་གསར་འགྱུར་ཁང་ཧྲེང་པའོ་ལུའོ་ནས་གློག་འཕྲིན་འབྱོར་གསལ། ཉེ་ཆར། “‘གོ་ལ་ཧྲིལ་པོའི་ལྷོ་ཕྱོགས’བརྗོད་དོན་མཆོག་ཏུ་བཟུང་ནས། འཕེལ་རྒྱས་དང་དར་རྒྱས་ཀྱི་རྒྱང་ལམ་གསར་པ་གཏོད་དགོས”ཞེས་པ་བརྗོད་དོན་གཙོ་བོར་བྱས་པའི“གོ་ལ་ཧྲིལ་པོའི་ལྷོ་ཕྱོགས”སྨྱན་སྦྱོར་གྱི་ཇུས་འདོན་ཚོགས་པའི་མཐོ་རིམ་གླེང་སྟེགས་སྐབས་དང་པོ་པར་ཙིར་ཧྲེང་པའོ་ལུའོ་རུ་གཉེར་ཞིང་། གླེང་སྟེགས་ཐོག་ཀྲུང་གོའི་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་པར་ཙིར་གྱི་ཙུང་ཐུང་ལུའུ་ལཱ་ཡི་རྟེན་འབྲེལ་འཕྲིན་ཡིག་སྒྲོག་སྦྱངས་བྱས་པ་རེད།
གླེང་སྟེགས་གཙོ་གཉེར་ཕྱོགས་ཀྱིས་བརྗོད་དོན། ཀྲུའུ་ཞི་ཞི་ཅིན་ཕིང་དང་ཙུང་ཐུང་ལུའུ་ལཱ་ཡིས་གླེང་སྟེགས་ལ་ཆེད་མངགས་རྟེན་འབྲེལ་འཕྲིན་ཡིག་སྤྲིངས་ནས“གོ་ལ་ཧྲིལ་པོའི་ལྷོ་ཕྱོགས”འཕེལ་རྒྱས་ཆེད་མཛུབ་ཁྲིད་གལ་ཆེན་གསར་པ་གནང་ཡོད། “གོ་ལ་ཧྲིལ་པོའི་ལྷོ་ཕྱོགས”ཀྱི་སྐད་གྲགས་ཆེ་རུ་ཕྱིན་ནས་རྒྱལ་སྤྱིའི་སྤྱི་ཚོགས་སུ་མེད་དུ་མི་རུང་བའི་འཛུགས་སྐྲུན་རང་བཞིན་གྱི་སྟོབས་ཤུགས་ཤིག་ཏུ་འགྱུར་བཞིན་ཡོད། རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ཐེངས་བཅུ་དགུ་པ་ཟླ་འདིར་པར་ཙིར་དུ་འཚོག་རྒྱུ་ཡིན་པ་དང་། རྒྱབ་ལྗོངས་དེའི་འོག་སྐབས་འདིའི་གླེང་སྟེགས་གཉེར་ནས་ཞི་བདེ་སྲུང་སྐྱོང་དང་། སྒོ་དབྱེ་འཕེལ་རྒྱས། གོ་ལ་ཧྲིལ་པོ་བཅོས་སྐྱོང་། ཤེས་དཔལ་དཔྱད་གཞིར་འཛིན་པ་སོགས་ཐད་སྨྱན་སྦྱོར་ཇུས་འདོན་ཚོགས་པས“ལྷོ་ཕྱོགས་ཀྱི་འབོད་སྒྲ”ཐུན་མོང་ཐོག་བརྒྱུད་བསྒྲགས་དང“ལྷོ་ཕྱོགས་ཀྱི་འགན་འཁྲི”མངོན་པར་བྱས་ཏེ། གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་དེང་རབས་ཅན་འཛུགས་སྐྲུན་ཆེད་སེམས་ཤུགས་གཅིག་ཏུ་བསྒྲིལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པར་མཉམ་དུ་སྐུལ་འདེད་གཏོང་རྒྱུའི་རེ་སྒུག་བྱེད་ཀྱི་ཡོད་པ་རེད།
མཉམ་འབྲེལ་རྒྱལ་ཚོགས་ལྷོ་ལྷོ་མཉམ་ལས་གཞུང་དོན་ཁང་གི་ཀྲུའུ་རེན་ཧ་ཐི་པུའུ་དང་། མོ་ཞི་ཁོའི་གྲོས་ཁང་གོང་མའི་ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོ་ཁུལ་ཨུ་ཡོན་ལྷན་ཁང་གི་ཀྲུའུ་ཞི་པོ་ལེ་ཝུན་སི་ཅི། ནི་ཀྲེ་རི་ཡའི་འཕྲིན་གཏོང་ཁང་གི་ཧྲེ་ཀྲང་ཨ་ལི་སོགས་སྐུ་མགྲོན་གྱིས་མིག་སྔར“གོ་ལ་ཧྲིལ་པོའི་ལྷོ་ཕྱོགས”དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་འཛམ་གླིང་གི་ལོ་རྒྱུས་འཕེལ་རིམ་ལ་ཤུགས་རྐྱེན་ཟབ་མོ་ཐེབས་ཡོད་ཅེས་བརྗོད་པ་རེད།
