—— མ་ལེ་ཞི་ཡའི་ཙུང་ལི་ཨན་ཝར་ལ་བཅར་འདྲི་ཞུས་པ།
ཉེ་ཆར་ཀྲུང་གོར་ལས་དོན་འཚམས་འདྲི་གནང་བར་ཕེབས་པའི་མ་ལེ་ཞི་ཡའི་ཙུང་ལི་ཨན་ཝར་གྱིས་གསར་འགོད་པའི་ཆེད་དོན་བཅར་འདྲི་དང་ལེན་གནང་སྐབས། མིག་སྔར་མ་ཀྲུང་གི་ལས་དབང་གཅིག་མཐུན་ཚོགས་པ་འཛུགས་པའི་ཆུ་ཚད་ལོ་རྒྱུས་ཀྱི་མཐོ་ཚད་གསར་པར་སླེབས་ཡོད། མ་ལེ་ཞི་ཡ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཚོང་དོན་དང་། མ་འཇོག འཕྲིན་གཏོང་། གྲངས་འཛིན་དཔལ་འབྱོར། སློབ་གསོ་སོགས་ཁྱབ་ཁོངས་ཁག་གི་སྤེལ་རེས་མུ་མཐུད་རྒྱ་ཆེར་བཏང་ནས་གཉིས་ཁེ་གཉིས་ཕན་གྱི་མཉམ་ལས་གཏིང་ཟབ་ཏུ་གཏོང་འདོད་ཡོད་ཅེས་གསུངས་པ་རེད།
མ་ལེ་ཞི་ཡ་ནི་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་སྐབས་བདུན་པར་ཞུགས་པའི་གཙོ་མགྲོན་རྒྱལ་ཁབ་ཀྱི་གྲས་ཤིག་ཡིན་པ་དང་ཨན་ཝར་ནང་འདྲེན་དངོས་མང་སྟོན་ཚོགས་ཀྱི་འགོ་ཚུགས་མཛད་སྒོ་དང་འབྲེལ་ཡོད་བྱེད་སྒོར་ཞུགས་ཡོད། ཨན་ཝར་གྱིས་ནང་འདྲེན་དངོས་མང་སྟོན་ཚོགས་ལ་ཞུགས་པ་དེས་མ་ལེ་ཞི་ཡའི་ཁེ་ལས་ལ་ཀྲུང་གོའི་ཁྲོམ་ར་རྒྱ་ཆེར་གཏོང་རྒྱུར་གོ་སྐབས་མཁོ་འདོན་བྱས་ཡོད། “ནང་འདྲེན་དངོས་མང་སྟོན་ཚོགས་ཀྱིས་ཀྲུང་གོ་རང་ངོས་ཀྱི་འཕེལ་རྒྱས་གྲུབ་འབྲས་མངོན་པ་མ་ཟད། མ་ལེ་ཞི་ཡ་ཚུད་པའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཁེ་ལས་ལ་ཐོན་རྫས་འགྲེམས་སྟོན་དང་ཕྱིར་ཚོང་གི་ལས་སྟེགས་མཁོ་འདོན་བྱས་པས། མ་ལེ་ཞི་ཡའི་ཁེ་ལས་ལ་མཉམ་ལས་ཀྱི་བར་མཐོངས་གསར་པ་ཐོབ་ཡོད”ཅེས་གསུངས་པ་རེད།
2024ལོ་ནི་ཀྲུང་མའི་དབར་ཕྱི་འབྲེལ་བཙུགས་ནས་ལོ་50འཁོར་བ་དང“ཀྲུང་མའི་མཛའ་གྲོགས་ལོ”ཞིག་རེད། ན་ནིང་ཟླ་གསུམ་པར་ཨན་ཝར་གྱིས་ཀྲུང་གོར་དངོས་སུ་འཚམས་འདྲི་གནང་རིང་། རྒྱལ་ཁབ་གཉིས་པོའི་འགོ་ཁྲིད་དབར་ཀྲུང་མའི་ལས་དབང་གཅིག་མཐུན་ཚོགས་པ་མཉམ་དུ་འཛུགས་རྒྱུའི་ཐད་ངོས་འཛིན་གལ་ཆེན་གཅིག་མཐུན་བྱུང་ནས་རྒྱལ་ཁབ་གཉིས་པོའི་འབྲེལ་བའི་ལོ་རྒྱུས་ཀྱི་ལེའུ་གསར་པ་བརྩམས་ཡོད། ཨན་ཝར་གྱིས་ཀྲུའུ་ཞི་ཞི་ཅིན་ཕིང་གིས་བཏོན་གནང་བའི་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་འདུ་ཤེས་ནི་ཕན་ཚུན་བརྩི་འཇོག་དང་ཕན་ཚུན་ཡིད་ཆེས་ཀྱི་རྨང་གཞིའི་ཐོག་བཙུགས་པ་ཞིག་ཡིན་པ་དང་། མ་ལེ་ཞི་ཡ་སྲིད་གཞུང་གིས་བཏོན་པའི“དར་རྒྱས་ཆེ་བའི་མ་ལེ་ཞི་ཡ”ཡི་འདུ་ཤེས་དང་ཚད་མཐོའི་གཅིག་མཐུན་བྱུང་བའི་ངོས་འཛིན་གནང་ཡོད།
ཨན་ཝར་གྱིས“ལོ་གཅིག་ལྷག་ཙམ་རིང་མ་ཀྲུང་གི་ལས་དབང་གཅིག་མཐུན་ཚོགས་པ་འཛུགས་པའི་ཆུ་ཚད་ལོ་རྒྱུས་ཀྱི་མཐོ་ཚད་གསར་པར་སླེབས་ཡོད”ཅེས་གསུངས་པ་རེད།
ཨན་ཝར་གྱིས་ཀྲུང་གོས་བློ་བརྟན་འགྱུར་མེད་ངང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་བཏང་བར་ཚད་མཐོའི་གདེང་འཇོག་གནང་ཞིང་། ཁོང་གིས་ཀྲུང་གོའི་ལུགས་ཀྱི་དེང་རབས་ཅན་འཕེལ་རྒྱས་ཀྱི་གྲུབ་འབྲས་ལས་རྒྱལ་ཁབ་གཅིག་གིས་རང་ངོས་ཀྱི་ཁྱད་ཆོས་ལྡན་པའི་ལམ་བུའི་ཐོག་སྐྱོད་པ་དང་ཆབས་ཅིག་འཕེལ་རྒྱས་གཏོང་ཐུབ་པ་དང་འབྲེལ་འཛམ་གླིང་རྒྱལ་ཁབ་ཁག་ལ་ཉམས་མྱོང་དང་གྲུབ་འབྲས་ལོངས་སུ་སྤྱོད་ཐུབ་པ་དང་འཕེལ་རྒྱས་ཀྱི་གོ་སྐབས་གསར་པ་ཐོབ་པ་ར་སྤྲོད་བྱུང་ཡོད་ཅེས་ནན་བཤད་གནང་བ་རེད།
ཨན་ཝར་གྱིས་མ་ལེ་ཞི་ཡས་ཀྲུང་གོ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་འབྲེལ་བའི་མཐུན་སྦྱོར་རྒྱལ་ཁབ་ཀྱི་འགན་འཁུར་བ་དང་སང་ལོ་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རེས་སྐོར་ཀྲུའུ་ཞིའི་རྒྱལ་ཁབ་ཀྱི་འགན་འཁུར་བའི་གོ་སྐབས་སྤྱད་དེ་ཨེ་ཤེ་ཡ་ཤར་ལྷོའི་མནའ་འབྲེལ་གྱི་རྒྱལ་ཁབ་ཁག་དང་ཀྲུང་གོའི་དབར་གྱི་འབྲེལ་ཐག་ནུས་པ་འདོན་སྤེལ་བྱས་ནས། ཨེ་ཤེ་ཡ་ཤར་ལྷོའི་མནའ་འབྲེལ་གྱི་རྒྱལ་ཁབ་ཁག་དང་མཉམ་དུ་ཚོང་དོན་དང་མ་འཇོག་སོགས་ཁྱབ་ཁོངས་ཐད་ཀྲུང་གོ་དང་མཉམ་ལས་བྱ་རྒྱུར་ཤུགས་སྣོན་རྒྱག་གི་ཡིན་ཞེས་གསུངས་པ་རེད།
