འདི་ནི་ཀག་ནའི་ཧྲེན་ནུས་ཨན་སུའོ་ཀུའུ་གློག་ཁང་དུ་ས་གནས་དེ་གའི་ལས་མིས་གནོན་ཤུགས་ཆུ་ཚོད་ལ་ཚོན་བྱུག་བཞིན་པ།
ཀི་ནེ་ཡའི་མཚོ་ཁུག་གི་ཅ་ན་གྲུ་ཁའི་གྲོང་ཁྱེར་ཐེ་མཱ་རུ་ཁོད་སྙོམས་པའི“ཀྲུང་ཀག་གི་མཛའ་གྲོགས་ལམ་བུ”ཞིག་ཡོད། ཧྲེན་ཀྲེན་ནུས་རྒྱུ་ཨན་སུའོ་ཀུའུ་གློག་ཤུགས(ཀག་ན)ཚད་ཡོད་ཀུང་སིའི(གཤམ་དུ་ཧྲེན་ནུས་ཨན་སུའོ་ཀུའུ་ཞེས་བསྡུ་རྒྱུ)གློག་ཁང་ལམ་བུ་དེའི་སྣེ་མོར་ཆགས་ཡོད།
དེང་རབས་ཅན་གྱི་གློག་ཁང་བསྐྲུན་པ་ལས“གློག་དཀོན་པའི་གནད་དོན”ཐག་གཅོད་ཐུབ་པ།
“རང་ཉིད་ཀྲུང་གོར་མཉམ་ལས་རོགས་ཟླ་འཚོལ་བར་ཡོང་སྐབས་ཀག་ནར་གློག་ཤུགས་མི་འདང་བའི་གནད་དོན་ཚབས་ཆེན་ལྷགས་འདུག”ཧྲེན་ནུས་ཨན་སུའོ་ཀུའུ་གློག་ཁང་བསྐྲུན་པའི་པའི་རྒྱབ་ལྗོངས་སྐོར་གླེང་སྐབས་ཀག་ནའི་རྒྱལ་ཡོངས་ཚོ་དཔོན་ཁང་གི་ཀྲུའུ་ཞི་དང་ཨ་ཁེ་ལ་འཛམ་གླིང་ཚོང་དོན་ལྟེ་གནས་ཀྱི་ལས་འགན་ཁུར་བཞིན་པའི་ལག་བསྟར་ཀྲུའུ་ཞི་ཐོ་པེ·ཨ་ཧྥེ་ཏིའི་སེམས་སུ་གསལ་པོར་ངེས་ཀྱི་ཡོད།
ཀག་ནའི་གློག་ཤུགས་ཀྱི་དཀའ་གནད་སེལ་ཆེད་ཨ་ཧྥེ་ཏིས་ཀྲུང་གོའི་ཧྲེན་ཀྲེན་དུ་རྟོག་ཞིབ་བྱེད་པར་བསྐྱོད་ཡོད། ཨ་ཧྥེ་ཏིས“ཀྲུང་གོས་དཔལ་འབྱོར་དམིགས་བསལ་ཁུལ་གཉེར་བར་གྲུབ་འབྲས་ཐོབ་པ་དེ་ཀག་ནས་འཕེལ་རྒྱས་ཐད་དཔྱད་གཞིར་འཛིན་རྒྱུར་དོན་སྙིང་ཆེན་པོ་ལྡན་ཡོད”ཅེས་བཤད། ཁོང་གིས་ཧྲེན་ཀྲེན་ནུས་རྒྱུ་ཚོགས་པར་རྟོག་ཞིབ་ཐེངས་མང་བྱས་པ་དང་དེ་བཞིན་ཚོང་དོན་གྲོས་མོལ་ཐེངས་མང་བྱས་པ་བརྒྱུད། ཕྱོགས་གཉིས་པོས་མ་དངུལ་བཏང་ནས་ཐེ་མཱར་སོལ་རླངས་སྒུལ་ཤུགས་འཕྲུལ་འཁོར་མཉམ་འབྲེལ་འཁོར་རྒྱུག་གློག་ཁང་ཞིག་བསྐྲུན་རྒྱུའི་གཏན་འཁེལ་བྱས་པ་རེད།
2007ལོར་ཧྲེན་ནུས་ཨན་སུའོ་ཀུའུ་གློག་ཁང་ཀག་ནར་དངོས་སུ་བསྐྲུན་པ་རེད། གློག་ཁང་གི་ཏུང་ཧྲི་ཀྲང་དབྱང་ཆུན་གྱིས་གསར་འགོད་པར་ཐོག་མར་གློག་ཁང་བསྐྲུན་སྐབས་ཀྲུང་གོའི་རྒྱལ་ནང་གི་ཁོར་ཡུག་སྲུང་སྐྱོང་གི་ཕྱིར་འབུད་ཚད་གཞི་ཅུང་མཐོ་པོ་སྤྱད་པ་དང་སྔོན་ཐོན་གྱི་སོལ་རླངས་དང་རླངས་པའི་མཉམ་འབྲེལ་འཁོར་རྒྱུག་ལག་རྩལ་སྤྱད་པས། འབུད་རྫས་ཟད་གྲོན་དང་སྦགས་བཙོག་དངོས་པོ་ཕྱིར་འབུད་ཚད་གཅིག་མཚུངས་ཡིན་པའི་གནས་ཚུལ་འོག་གློག་གཏོང་ཚད་50%ཙམ་མང་དུ་ཕྱིན་ནས་ཀག་ནར་ཁོར་ཡུག་སྲུང་སྐྱོང་དང་ལྗང་མདོག་འཕེལ་རྒྱས་ཀྱི་ཚད་གཞི་གསར་པ་ཞིག་བཏོད་ཡོད་ཅེས་བཤད་པ་རེད།
“དགེ་སློབ་ལམ་ལུགས”ཁྱབ་གདལ་བཏང་ནས་ས་གནས་དེ་གར་གློག་ཤུགས་ཤེས་ལྡན་པ་ཁག་གཅིག་གསོ་སྐྱོང་བྱས་པ།
“ཚང་མ་ངའི་རྗེས་སུ་ཡོང་ནས་རྐང་པའི་འོག་ཏུ་གཟབ་གཟབ་བྱེད་རོགས”བཅར་འདྲི་བྱེད་རིང་། ཧྲེན་ནུས་ཨན་སུའོ་ཀུའུ་གློག་ཁང་གི་བདེ་ཐང་དང་། བདེ་འཇགས། ཁོར་ཡུག་བཅས་པུའི་མེ་ཟོན་ཀྲུའུ་རེན་བཟོ་སྐྲུན་ཆེན་མོ་བ་པོ་ན་ཏེ·ཨའེ་ཅིར·ཨ་པ་པི་ཨའོ་ཡིས་བརྒྱུད་རིམ་ཧྲིལ་པོར་གསར་འགོད་པ་དང་མཉམ་དུ་སྐྱོད་ཡོད།
ཨ་པ་པི་ཨའོ་ཧྲེན་ནུས་ཨན་སུའོ་ཀུའུ་གློག་ཁང་དུ་ལས་ཀ་བྱས་ནས་ལོ་7ཕྱིན་ཡོད། སྐབས་དེ་དུས་མེ་ཟོན་པའི་ལས་གནས་ནས་ལས་འཁྱུར་བྱས་མ་ཐག་པའི་ཁོང་ཀྲུང་གོའི་ཁེ་ལས་སུ་ལས་ཀ་བྱེད་པར་ཡོང་བ་དང་། ཀྲུང་གོ་ཕྱོགས་ཀྱི་ལག་རྩལ་པའི་མཛུབ་ཁྲིད་འོག་གློག་ཁང་གི་བདེ་འཇགས་དོ་དམ་ལས་གནས་ཀྱི་རྩལ་ནུས་ཁག་རིམ་གྱིས་སློབ་སྦྱོང་དང་ཁོང་དུ་ཆུད་ཡོད།
ཀག་ནའི་རང་ཚུགས་གློག་གཏོང་ཁེ་ལས་དང་པོ་ཡིན་པའི་ཧྲེན་ནུས་ཨན་སུའོ་ཀུའུ་གློག་ཁང་ས་གནས་དེ་གའི་གློག་ཤུགས་ཤེས་ལྡན་པའི་གསོ་སྦྱོང་རྟེན་གཞིར་གྱུར་ཡོད། ད་ཆ་གློག་ཁང་གིས་ཐད་ཀར་རམ་ཡང་ན་གཞན་བརྒྱུད་ཐོག་ནས་གདན་ཞུ་བྱས་པའི་ས་གནས་དེ་གའི་ལས་མི་400ལྷག་ཙམ་ཟིན་གྱི་ཡོད། དབྱང་ཆུན་གྱིས་གློག་ཁང་གིས“དགེ་སློབ་ལམ་ལུགས”ཀྱི་གསོ་སྐྱོང་མ་ལག་ཁྱབ་གདལ་བཏང་ནས་ཀྲུང་གོ་ཕྱོགས་ཀྱིས་ཉམས་མྱོང་ཕུན་སུམ་ཚོགས་པའི་ལས་བཟོ་དགེ་རྒན་བྱེད་པར་མངགས་པ་དང་ཀག་ནའི་ས་གནས་དེ་གའི་སློབ་ཆེན་ནས་ཕུལ་བྱུང་གི་སློབ་ཆེན་ཐོན་པའི་སློབ་མ་དགེ་ཕྲུག་ཏུ་བསྡུས་ཏེ་བརྒྱུད་རིམ་ལྡན་པ་དང་། སྲོལ་ཡིག་ཅན། ཞིབ་ཕྲ་ཅན་བཅས་ཀྱི་སྒོ་ནས་ས་གནས་དེ་གའི་ལས་མི་གསོ་སྐྱོང་བྱས་ཡོད། དེ་ལྟར་བྱས་ཚེ་བདེ་འཇགས་དང་ནུས་ཆེའི་ཐོན་སྐྱེད་ལ་ཕན་པ་ཡོད་པ་མ་ཟད། ཀག་ནར་གློག་ཤུགས་ཀྱི་ཆེད་ལས་ལག་རྩལ་ཤེས་ལྡན་པ་འབོར་ཆེན་གསོ་སྐྱོང་ཐུབ་རྒྱུ་རེད། ད་ཆ་ཀག་ནའི་ས་གནས་དེ་གའི་ཤེས་ལྡན་པ་ཁག་གཅིག་ཨ་ཧྥེ་རི་ཁའི་རྒྱལ་ཁབ་གཞན་དུ་ལས་ཀ་བྱེད་པར་མངགས་ཡོད་ཅེས་ངོ་སྤྲོད་བྱས་པ་རེད།
ཡུན་རིང་གསོ་སྦྱོང་བྱས་པ་བརྒྱུད། ས་གནས་དེ་གའི་ལས་བཟོ་ཁག་གཅིག་གཅིག་རྗེས་གཉིས་མཐུད་ངང་དོ་དམ་ལས་གནས་སུ་བསྐྱོད་ཡོད། དབྱང་ཆུན་གྱིས་གློག་ཁང་གིས་ལོ་ལྟར་ས་གནས་དེ་གའི་ཕུལ་བྱུང་ལས་བཟོ་ཀྲུང་གོར་སྔོན་ཐོན་གྱི་དོ་དམ་ཉམས་མྱོང་སློབ་སྦྱོང་བྱེད་པར་གཏོང་གི་ཡོད། “ཀྲུང་གོའི་དགེ་རྒན་གྱིས་མཛུབ་ཁྲིད་བྱས་པ་དེས་ང་ཚོའི་ལག་རྩལ་མཐོ་རུ་འགྲོ་བར་ཕན་ཐོགས་ཡོད་པ་མ་ཟད། མཉམ་ལས་ཀྱི་ཁོར་ཡུག་ཀྱང་སྐྲུན་ཐུབ”ཅེས་བཤད། ཨ་པ་པི་ཨའོ་ཡིས“དགེ་སློབ་ལམ་ལུགས”ཀྱིས་ཀག་ནའི་ལག་རྩལ་ཤེས་ལྡན་པ་འཚར་ལོངས་ལ་སྐུལ་འདེད་གཏོང་རྒྱུའི་ཐད་ནུས་པ་གལ་ཆེན་ཐོན་ཡོད་ཅེས་བཤད།
ནུས་རྒྱུ་གསར་པར་དམིགས་ནས་ཀག་ནའི་ལྗང་མདོག་ཕྱོགས་སྒྱུར་འཕེལ་རྒྱས་ལ་སྐུལ་འདེད་བཏང་བ།
འདི་ལོའི་ཟླ་4པར་འཛམ་གླིང་དངུལ་ཁང་དང་ཨ་ཧྥེ་རི་ཁའི་གསར་སྤེལ་དངུལ་ཁང་གིས་འཆར་གཞི་ཞིག་ཁྱབ་བསྒྲགས་བྱས་པ་སྟེ། 2030ལོར་སླེབས་སྐབས་ཨ་ཧྥེ་རི་ཁའི་མི་དུང་ཕྱུར་3ལ་གློག་མཁོ་འདོན་བྱ་རྒྱུའི་ནང་མང་ཆེ་བ་ཁྱབ་ཚུལ་རྣམ་པའི་བསྐྱར་སྐྱེས་ཐུབ་པའི་ནུས་རྒྱུའི་མ་ལག་ལ་བརྟེན་ནས་མངོན་འགྱུར་བྱ་རྒྱུ་ཡིན་པ་རེད། ན་ནིང་ཀག་ནའི་ཙུང་ཐུང་ཨཱ་ཁུ་ཧྥུའུ-ཨ་ཏུའོ་ཡིས་རྒྱལ་ཁབ་དེའི་ནུས་རྒྱུ་གསར་པའི་ཕྱོགས་སྒྱུར་དང་མ་འཇོག་འཆར་གཞི་ཁྱབ་བསྒྲགས་བྱས་པ་དང་། སྣུམ་རླངས་དང་གློག་ཤུགས་སོགས་འགག་རྩའི་དཔལ་འབྱོར་སྡེ་ཚན་གྱིས་ཐཱན་ཉུང་ཐག་གཅོད་ཇུས་གཞི་ཁྱབ་གདལ་བཏང་བ་བརྒྱུད། 2060ལོར་སླེབས་སྐབས་ནུས་རྒྱུ་དང་འབྲེལ་བ་ཡོད་པའི་ཁྱབ་ཁོངས་ཀྱི་བཙོག་འབུད་གཏན་ནས་མེད་པའི་དམིགས་ཚད་མངོན་འགྱུར་ཐུབ་པའི་བརྩོན་ལེན་བྱ་རྒྱུ་རེད།
སྲིད་ཇུས་རབ་དང་རིམ་པའི་ཁྲིད་སྟོན་འོག“ལྗང་མདོག་ཕྱོགས་སྒྱུར”དེའང་ཧྲེན་ནུས་ཨན་སུའོ་ཀུའུ་གློག་ཁང་གི་འབྱུང་འགྱུར་འཕེལ་རྒྱས་ཀྱི་ཁ་ཕྱོགས་གལ་ཆེན་ཞིག་ཏུ་གྱུར་ཡོད། དབྱང་ཆུན་གྱིས་གློག་ཁང་གི་དུས་ཐེངས་དང་པོ་དང་གཉིས་པའི་ལས་གྲྭས་ཀག་ནའི་གློག་ཤུགས་དཀོན་པའི་གནད་དོན་ཐག་གཅོད་བྱེད་རོགས་བྱས་པ་དང་ས་གནས་དེ་གའི་བཟོ་ལས་ཅན་གྱི་འཕེལ་རིམ་ལ་སྐུལ་འདེད་གཏོང་བའི་རྨང་གཞིའི་ཐོག ཀུང་སིས་སླད་ཕྱིན་ཉི་ནུས་སོགས་ནུས་རྒྱུ་གསར་པའི་གློག་གཏོང་རྣམ་གྲངས་འཛུགས་རྒྱུར་མཐོང་ཆེན་བྱས་ནས་ཀག་ནའི་ནུས་རྒྱུ་གསར་པའི་ཐོན་ལས་འཕེལ་རྒྱས་ལ་སྐུལ་འདེད་གཏོང་རྒྱུ་རེད་ཅེས་ངོ་སྤྲོད་བྱས་པ་རེད།
ཀུང་སིས་ད་དུང་ཀག་ནའི་ལྷོ་རྒྱུད་ཀྱི་རླུང་ཤུགས་ཐོན་ཁུངས་སྤྱད་དེ་ཀྲའོ་ཝ་100ཟིན་པའི་རླུང་ཤུགས་གློག་འདོན་ཁུལ་གསར་སྤེལ་བྱས་ནས་ཀག་ནར་དེ་བས་སྣ་མང་ཅན་གྱི་དྭངས་གཙང་དང་བསྐྱར་སྐྱེས་གློག་ཤུགས་མཁོ་འདོན་བྱ་རྒྱུ་རེད། ཨ་ཧྥེ་ཏིས“ནུས་རྒྱུ་གསར་པའི་ཁྱབ་ཁོངས་སུ་ཀྲུང་གོར་ཕུན་སུམ་ཚོགས་པའི་ཉམས་མྱོང་དང་ལེགས་ཆ་མངོན་གསལ་དོད་པོ་ལྡན་ཡོད། ང་ཚོས་ཀྲུང་གོ་དང་མུ་མཐུད་རོགས་ཟླའི་མཉམ་ལས་བྱས་ཏེ་རླུང་ནུས་དང་འོད་ཤུགས་སོགས་ནུས་རྒྱུ་གསར་པའི་རྣམ་གྲངས་ཀག་ནར་ལག་ལེན་བསྟར་རྒྱུར་སྐུལ་འདེད་གཏོང་རྒྱུའི་རེ་བ་བྱེད་ཀྱི་ཡོད། དེས་ཨ་ཧྥེ་རི་ཁའི་འཕེལ་རྒྱས་ལ་དོན་སྙིང་གལ་ཆེན་ལྡན་ཡོད”ཅེས་བཤད།
