དགེ་བཤེས་ལྷ་རམས་པའི་མཚན་གནས་སྤྲོད་པའི་དབྱར་རྒྱུགས་འགོ་ཚུགས་པ།
སྤེལ་དུས 2024-06-26
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
བོད་རང་སྐྱོང་ལྗོངས་མི་དམངས་སྲིད་གཞུང་དང་ལྗོངས་ཏང་ཨུད་འཐབ་ཕྱོགས་གཅིག་གྱུར་པུས་ཆོག་མཆན་གནང་བ་བརྒྱུད། བོད་རང་སྐྱོང་ལྗོངས་ཀྱི2025ལོ་འཁོར་གྱི་བོད་བརྒྱུད་ནང་བསྟན་གྱི་དཔེ་ཆ་བར་དགེ་བཤེས་ལྷ་རམས་པའི་མཚན་གནས་སྤྲོད་པའི་དབྱར་དུས་ཀྱི་སྔོན་རྒྱུགས་ལྷ་སའི་སེ་ར་དགོན་དུ་གཏོང་འགོ་ཚུགས་པ་རེད།
བོད་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་རྒྱུན་ལས་ཚོགས་གཙོ་གཞོན་པ། བོད་ལྗོངས་ནང་བསྟན་སློབ་གླིང་གི་ཡོན་ཀྲང་སྒྲུབ་ཁང་ཐུབ་བསྟན་མཁས་གྲུབ་ཀྱིས་ཡུལ་དངོས་སུ་མཛུབ་ཁྲིད་གནང་བ་དང་སྦྲགས་གསར་འགོད་པའི་བཅར་འདྲི་དང་ལེན་གནང་ནས། དབྱར་དུས་ཀྱི་སྔོན་རྒྱུགས་སྐོར་གྱི་གནས་ཚུལ་ངོ་སྤྲོད་གནང་བ་རེད།
སྲོལ་རྒྱུན་གྱི་ཆོས་ལུགས་ཀྱི་གོམས་སྲོལ་ལྟར་དབྱར་དུས་ཀྱི་སྔོན་རྒྱུགས་གཏོང་འགོ་འཛུགས་སྐབས་དང་ཐོག་ཆོས་ལུགས་ཀྱི་བྱེད་སྒོ་སྤེལ་བ་དང་། ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་གཞོན་པ་དགེ་བཤེས་ལྷ་རམས་པའི་མཚན་གནས་སྤྲོད་པའི་དཔྱད་བསྡུར་ཨུ་ལྷན་གྱི་ཀྲུའུ་རེན་གཞོན་པ་ལོ་སེམས་དཔའ་འཕྲིན་ལས་ཆོས་བཟང་ནས་རྒྱུགས་གཏོང་འགོ་ཚུགས་པའི་ཁྱབ་བསྒྲགས་གནང་ཞིང་། 2024ལོའི་ཟླ6པའི་ཚེས23ཉིན་ནས་ཚེས30ཉིན་བར། སེ་ར་དགོན་དང་། འབྲས་སྤུངས་དགོན། དགའ་ལྡན་དགོན། རྭ་སྟོད་དགོན། བཀྲས་ལྷུན་དགོན། བྱམས་པ་གླིང་དགོན། དཔའ་ཤོད་དགོན། དབྱེན་འདུམ་དགོན། བྱམས་ཁང་དགོན། འོག་ཐང་དགོན། རབ་བརྟན་དགོན། ཆོས་འཁོར་དགོན། ཡུན་ནན་བདེ་ཆེན་ཀྲོའུ་ཡི་སྲོང་བཙན་གླིང་དགོན་བཅས་ནས་ཡོང་བའི་རྒྱུགས་སྤྲོད་དགེ་འདུན་པ13དང་། དཔྱད་བསྡུར་ཨུ་ལྷན་གྱི་ཁོངས་མི30དང་། དཔང་བཞུགས་དགེ་འདུན་པ580ལྷག་ཙམ་བཅས་དབྱར་དུས་ཀྱི་སྔོན་རྒྱུགས་ལ་ཞུགས་རྒྱུ་ཡིན་པ་དང་། རྒྱུགས་སྤྲོད་དགེ་འདུན་པ13གྱིས་ཚད་མ་རྣམ་འགྲེལ་དང་། ཕར་ཕྱིན། དབུ་མ། མངོན་པ་མཛོད། འདུལ་བ་བཅས་གཞུང་ཆེན་བཀའ་པོད་ལྔའི་ནང་དོན་ཐད་རྟགས་གསལ་གཏོང་བ་དང་། དེ་ནས་རིག་གནས་ཤེས་བྱ་དང་སྐབས་དོན་ཆབ་སྲིད་ཀྱི་ཡིག་རྒྱུགས་བཏང་རྗེས་མཐར2025ལོ་འཁོར་གྱི་བོད་བརྒྱུད་ནང་བསྟན་གྱི་དཔེ་ཆ་བར་དགེ་བཤེས་ལྷ་རམས་པའི་མཚན་གནས་སྤྲོད་པའི་དམ་འཇོག་ལ་ཞུགས་མཁན་གྱི་མཚན་ཐོ་དང་སྦྱངས་འབྲས་ཀྱི་ཨང་རིམ་གཏན་འཁེལ་བྱ་རྒྱུ་ཡིན་པ་རེད།
རྩོམ་སྒྲིག་པ། རིག་གྲོལ།
