ཉེ་ཆར། སློབ་གསོ་པུའི་གཞུང་དོན་ཐིང་གིས་སློབ་གྲྭ་འབྲིང་ཆུང་གི་མི་ཐབས་རིག་ནུས་སློབ་གསོའི་ལག་བསྟར་ཐབས་ལམ་འཚོལ་ཞིབ་བྱས་ཏེ། སློབ་གྲྭ་འབྲིང་ཆུང་གི་མི་ཐབས་རིག་ནུས་སློབ་གསོར་ཤུགས་སྣོན་རྒྱག་རྒྱུའི་བརྡ་ཐོ་བཀྲམ་འདུག
བརྡ་ཐོའི་ནང་སློབ་གྲྭ་འབྲིང་ཆུང་གི་མི་ཐབས་རིག་ནུས་སློབ་གསོར་ཤུགས་སྣོན་རྒྱག་རྒྱུའི་སྤྱིའི་བླང་བྱ་ཁ་གསལ་བཏོན་ཡོད་པ་སྟེ། གཅིག་ནས་ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱ་རྒྱུ་མཐའ་འཁྱོངས་བྱེད་པ། ཏང་གི་སློབ་གསོའི་བྱེད་ཕྱོགས་ཕྱོགས་ཡོངས་ནས་ལག་བསྟར་བྱེད་པ། དུས་རབས་གསར་པ་དང་རྒྱང་ལམ་གསར་པའི་སློབ་གསོའི་ལས་འགན་ལ་དམ་པོར་དམིགས་པ་བཅས་བྱས་ཏེ་འབྱུང་འགྱུར་ལ་ཕྱོགས་པའི་གསར་གཏོད་རྣམ་པའི་ཤེས་ལྡན་མི་སྣ་གསོ་སྐྱོང་གི་དགོས་མཁོ་སྐོང་པ། གཉིས་ནི་མི་རྩ་བར་འཛིན་རྒྱུ་རྒྱུན་འཁྱོངས་བྱེད་པ། སློབ་གསོའི་ཆོས་ཉིད་དང་ཤེས་ལྡན་པ་འཚར་ལོངས་ཡོང་བའི་ཆོས་ཉིད་བརྩི་སྲུང་ཞུ་བ། མི་ཐབས་ཀྱི་ཤེས་ནུས་ལ་བརྟེན་ནས་མི་རྩ་བར་འཛིན་པའི་གསར་གཏོད་སློབ་གསོའི་སྐྱེ་ཁམས་འཛུགས་སྐྱོང་བྱེད་པར་སྣེ་ཁྲིད་བྱེད་པ། སློབ་མར་མི་དང་ལག་རྩལ་དང་། སྤྱི་ཚོགས་བར་གྱི་འབྲེལ་བ་ཐག་གཅོད་ཡང་དག་བྱེད་པར་ཁྲིད་སྟོན་བྱེད་པ། བསམ་གཞིག་འཕེལ་རྒྱས་ལ་སྐུལ་འདེད་དང་། གསར་གཏོད་ཀྱི་སྙིང་སྟོབས་གསོ་སྐྱོང་། དོན་དངོས་ཀྱི་གནད་དོན་ཐག་གཅོད་བྱེད་པའི་ནུས་པ་ཆེ་རུ་གཏོང་བ་བཅས་བྱེད་དགོས། གསུམ་ནི་སྤྲོ་སྣང་འཕེལ་བ་བྱ་རྒྱུ་མཐའ་འཁྱོངས། སློབ་མ་འཚོལ་ཞིབ་ལག་ལེན་ནང་རྒྱ་ཁྱབ་ངང་ཞུགས་རྒྱུར་ཁྲིད་སྟོན་བྱེད་པ་དང་། སློབ་སྦྱོང་དང་བེད་སྤྱོད་ཟུང་འབྲེལ་བྱ་རྒྱུ་ནན་བཤད་བྱས་ཏེ། སློབ་མའི་ཚན་རིག་ལ་དགའ་སྣང་དང་ཚན་རིག་གི་སྙིང་སྟོབས་སྐྱེད་སྲིང་བྱས་ནས་གྲངས་གཞིའི་བྱང་ཚད་དང་གྲངས་གཞིའི་རྩལ་ནུས་ཆེ་རུ་གཏོང་དགོས་པ། བཞི་ནི་སྤྱི་འདོམས་འཆར་འགོད་མཐའ་འཁྱོངས་བྱས་ནས་རྩེ་རིམ་ཇུས་འགོད་དང་སྡེ་ཚན་མཐུན་སྦྱོར་ལ་ཤུགས་སྣོན་རྒྱག་པ་དང་། ཧུར་ཐག་གིས་སྐུལ་སྤེལ་གཏོང་བ། ཆ་རྐྱེན་འཛོམས་པའི་ས་གནས་དང་སློབ་གྲྭར་སྔོན་ལ་ལག་བསྟར་དང་ཚོད་ལྟ་བྱེད་པར་ལྕག་སྐུལ་བྱེད་པ་བཅས་རེད།
བརྡ་ཐོའི་ནང་བསྟན་དོན། མ་ལག་ཅན་གྱི་སློབ་ཚན་མ་ལག་བསྐྲུན་ནས་རྒྱུན་རྣམ་ཅན་གྱི་སློབ་ཁྲིད་དང་གདེང་འཇོག་ལག་བསྟར་བྱེད་དགོས། འབྲེལ་ཡོད་སློབ་ཚན་ཁྲོད་ཀྱི་མི་ཐབས་རིག་ནུས་སློབ་གསོའི་བླང་བྱ་སྔར་ལས་འཐུས་ཚང་དུ་གཏོང་དགོས་ལ། སློབ་ཆུང་གི་ལོ་རིམ་དམའ་བའི་དུས་རིམ་ནང་དུ་མི་ཐབས་རིག་ནུས་ལག་རྩལ་ཤེས་ཚོར་དང་ཉམས་ལེན་བྱ་རྒྱུ་གཙོ་བོར་འཛིན་པ། སློབ་ཆུང་གི་ལོ་རིམ་མཐོ་བའི་དུས་རིམ་དང་དམའ་འབྲིང་དུས་མཚམས་སུ་མི་ཐབས་རིག་ནུས་ལག་རྩལ་ཤེས་རྟོགས་དང་བཀོལ་སྤྱོད་བྱ་རྒྱུ་གཙོ་བོར་འཛིན་པ། མཐོ་འབྲིང་གི་དུས་མཚམས་སུ་རྣམ་གྲངས་གསར་གཏོད་དང་མདུན་གྲལ་ཉེར་སྤྱོད་གཙོ་བོར་འཛིན་པ་བཅས་བྱ་རྒྱུ་ཡིན། ས་གནས་ཁག་གི་སློབ་གྲྭ་ཚང་མས་མི་ཐབས་ཀྱི་རིག་ནུས་སློབ་གསོ་དེ་སློབ་ཚན་གྲོལ་རྗེས་ཀྱི་ཞབས་ཞུའི་རྣམ་གྲངས་དང་ཞིབ་འཇུག་སློབ་སྦྱོང་གི་ལག་ལེན་ནང་འཇུག་རྒྱུའི་ལྕག་སྐུལ་བྱེད་པ་དང་། ཐོན་སློབ་ཞིབ་སྤྱོད་ཟུང་འབྲེལ་ལ་སྐུལ་འདེད་གཏོང་བ། མི་ཐབས་ཀྱི་རིག་ནུས་སློབ་གསོའི་སློབ་སྦྱོང་རིགས་ཀྱི་སློབ་ཚན་དང་སློབ་ཁྲིད་ཀྱི་དཔེ་མཚོན་ཁག་གཅིག་ཞིབ་བཟོ་བཅས་བྱས་ནས་སློབ་ཁྲིད་ལ་རྒྱབ་སྐྱོར་བྱ་རྒྱུ་རེད། ཆ་འཕྲིན་ཚན་རྩལ་དང་། ཚན་རིག་རིགས། ཕྱོགས་བསྡུས་ལག་ལེན་བྱེད་སྒོ། ངལ་རྩོལ་སོགས་ཀྱི་སློབ་ཚན་དང་སློབ་ཚན་རྗེས་ཀྱི་ཞབས་ཞུ་གཅིག་གྱུར་གྱིས་འཆར་འགོད་བྱས་ནས་གཞི་གཅིག་ཅན་དུ་ལག་བསྟར་བྱ་རྒྱུ། མི་ཐབས་རིག་ནུས་ལག་རྩལ་གྱི་ཁྱད་ཆོས་དང་ཟུང་འབྲེལ་བྱས་ཏེ་ལས་འགན་ཅན་དང་། རྣམ་གྲངས་ཅན། གནད་དོན་ཅན་བཅས་ལ་གཞིགས་པའི་སློབ་སྦྱོང་བྱེད་པའི་སློབ་ཁྲིད་ལ་སྐུལ་འདེད་ཤུགས་ཆེན་གཏོང་རྒྱུ་རེད།
བརྡ་ཐོའི་ནང་ནན་བཤད་བྱས་དོན། ཀུན་འཕྲོད་ཅན་གྱི་སློབ་ཁྲིད་ཐོན་ཁུངས་གསར་སྤེལ་བྱེད་པ་དང་། འཛུགས་སྐྲུན་སློབ་ཁྲིད་ཁོར་ཡུག་གི་ནང་ཁྱབ་པ། རྒྱལ་ཁབ་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་རིག་ལྡན་སློབ་གསོའི་སྟེགས་བུ་རུ་སློབ་གྲྭ་ཆེ་འབྲིང་ཆུང་གསུམ་གྱི་མི་ཐབས་རིག་ནུས་སློབ་གསོའི་ལེ་ཚན་བཙུགས་ནས་སྤུས་ལེགས་སློབ་གསོའི་ཐོན་ཁུངས་རྒྱ་ཁྱབ་ངང་གཅིག་སྡུད་བྱས་ཏེ་སྤུས་ལེགས་ཐོན་ཁུངས་མཉམ་སྐྲུན་མཉམ་སྤྱོད་ཐུབ་པ་བྱ་རྒྱུ་རེད། སློབ་གྲྭ་ཆེ་འབྲིང་ཆུང་གསུམ་གྱི་མི་ཐབས་རིག་ནུས་སློབ་གསོའི་རྟེན་གཞི་ཁག་བགོས་ནས་བཙུགས་ཏེ་མཐོ་སློབ་དང་། ཚན་ཞིབ་ཁང་དང་སུའོ། ཚན་རྩལ་མཐོ་བའི་ཁེ་ལས་བཅས་ཀྱི་མི་ཐབས་རིག་ནུས་ཚོད་ལྟ་ཁང་དང་འགྲེམས་ཁང་སོགས་སློབ་གྲྭ་འབྲིང་ཆུང་ལ་སྒོ་མོ་འབྱེད་རྒྱུར་སྐུལ་འདེད་བཏང་ནས་སློབ་གྲྭ་ཆེ་འབྲིང་ཆུང་གསུམ་གྱི་སློབ་མར་འཚམ་པའི་མི་ཐབས་རིག་ནུས་ཀྱི་སློབ་གསོའི་ཐོན་ཁུངས་གསར་སྤེལ་བྱེད་དགོས། སློབ་གྲྭ་ཆེ་འབྲིང་ཆུང་གསུམ་གྱིས་མི་ཐབས་རིག་ནུས་ཚོད་ལྟ་ཁང་གི་ཐོན་ཁུངས་དོ་སྙོམས་ངང་བཀོད་སྒྲིག་བྱེད་པ་དང་། ད་ཡོད་ཀྱི་གྲངས་འཛིན་ཅན་གྱི་སློབ་ཁྲིད་ཁོར་ཡུག་དང་སྒྲིག་བཀོད་སྒྲིག་ཆས་རིམ་སྤོར་དང་ལེགས་སུ་གཏོང་བ། སློབ་གྲྭའི་དབར་གྱི་ཐོན་ཁུངས་མཉམ་སྤྱོད་ལ་ཤུགས་སྣོན་རྒྱག་པ་དང་། སློབ་མར་མི་ཐབས་རིག་ནུས་ཉམས་ལེན་དང་། སློབ་སྦྱོང་། ཞིབ་དཔྱད། ལག་ལེན་བཅས་ཀྱི་བར་མཐོངས་མཁོ་འདོན་བྱ་རྒྱུ་རེད།
བརྡ་ཐོའི་ནང་བཏོན་དོན། གཞི་ཁྱོན་ཅན་གྱི་དགེ་རྒན་མཁོ་སྤྲོད་ལ་སྐུལ་འདེད་གཏོང་དགོས། མི་ཐབས་རིག་ནུས་སློབ་གསོའི་དགེ་རྒན་གསོ་སྦྱོང་བྱ་རྒྱུ་དེ་འཆར་གཞིའི་ནང་བཞག་ནས་དགེ་རྒན་གྱི་ཆེད་ལས་ཅན་གྱི་ཆུ་ཚད་མཐོ་རུ་གཏོང་དགོས། ཆ་རྐྱེན་ཡོད་པའི་ས་ཁུལ་དང་སློབ་གྲྭར་མི་ཐབས་ཀྱི་རིག་ནུས་སློབ་གསོའི་དགེ་རྒན་དཔུང་ཁག་འཐུས་སྒོ་ཚང་དུ་གཏོང་རྒྱུའི་ལྕག་སྐུལ་བྱས་ཏེ་མཐོ་སློབ་དང་། ཚན་ཞིབ་ཁང་དང་སུའོ། ཚན་རྩལ་མཐོ་བའི་ཁེ་ལས་བཅས་ཁྲོད་ཀྱི་ཆ་རྐྱེན་འཛོམས་པའི་ཆེད་ལས་ཤེས་ལྡན་མི་སྣ་མི་ཐབས་རིག་ནུས་ལྡན་པའི་གཅིག་ལྕོགས་དགེ་རྒན་དུ་ནང་འདྲེན་ཧུར་ཐག་བྱེད་དགོས།
བརྡ་ཐོའི་ནང་བསྟན་དོན། སྣ་མང་ཅན་གྱི་སྤེལ་རེས་བྱེད་སྒོ་སྒྲིག་འཛུགས་བྱེད་དགོས། སློབ་གྲྭས་རྣམ་པ་སྣ་མང་ཅན་གྱི་བྱེད་སྒོ་བརྒྱུད་ནས་མི་ཐབས་རིག་ནུས་དེ་སློབ་མ་སྒེར་གྱི་འཚོ་བ་དང་། སློབ་གྲྭའི་འཚོ་བ། སྤྱི་ཚོགས་ཀྱི་འཚོ་བ་བཅས་དང་ཟུང་འབྲེལ་དམ་ཚགས་བྱེད་པར་བསྔགས་སྐུལ་བྱས་ཏེ། མི་ཐབས་རིག་ནུས་ཀྱི་སློབ་གསོའི་ཁོར་ཡུག་ཟབ་མོ་བསྐྲུན་རྒྱུ་རེད།
བརྡ་ཐོའི་ནང་གྲོང་ཁྱེར་དང་གྲོང་གསེབ་སྤྱི་འདོམས་ཡག་པོ་བྱེད་པ་དང་། གྲོང་གསེབ་དང་ཐག་རིང་ས་ཁུལ་གྱི་སློབ་གྲྭར་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། དགེ་རྒན་སྐོར་སྐྱོད་ལ་སྐུལ་འདེད་གཏོང་བ། དྲ་རྒྱའི་ལས་སྟེགས་སྤྱད་དེ་གྲོང་ཁྱེར་དང་གྲོང་གསེབ་ཀྱི་སློབ་གྲྭའི་མི་ཐབས་རིག་ནུས་སློབ་གསོའི་འབྲེལ་ཡོད་སློབ་ཚན་ཕན་ཚུན་འབྲེལ་མཐུད་ཐུབ་པ་བཅས་བྱེད་དགོས་པའི་བླང་བྱ་བཏོན། གྲོང་ཁྱེར་དང་གྲོང་གསེབ་ཀྱི་སློབ་གྲྭས་ཆ་སྒྲིག་རོགས་སྐྱོར་བྱེད་སྒོ་སྤེལ་ནས་སློབ་ཁྲིད་ཉམས་མྱོང་མཉམ་སྤྱོད་དང་མི་ཐབས་རིག་ནུས་སློབ་གསོའི་སྤུས་ཚད་ཐུན་མོང་ཐོག་མཐོ་རུ་གཏོང་དགོས་པའི་བླང་བྱ་བཏོན་ཡོད།
