ཟླ་བ་དང་པོ་ནས་བཅུ་གཅིག་པའི་བར་དངོས་ཟོག་ཚོང་དོན་ཕྱིར་གཏོང་ནང་འདྲེན་གྱི་སྤྱིའི་རིན་ཐང་སྒོར་དུང་ཕྱུར་ཁྲི་40ཙམ་ཟིན་པ།
སྤེལ་དུས 2024-12-18
ཡོང་ཁུངས། མི་དམས་ཉིན་རེའི་ཚགས་པར།
རྩོམ་པ་པོ།
འགག་སྒོ་ལས་ཁུངས་ཀྱི་བསྡོམས་རྩིས་ལ་གཞིགས་ན། འདི་ལོའི་ཟླ་བ་དང་པོ་ནས་བཅུ་གཅིག་པའི་བར་རང་རྒྱལ་གྱི་དངོས་ཟོག་ཚོང་དོན་ཕྱིར་གཏོང་ནང་འདྲེན་གྱི་སྤྱིའི་རིན་ཐང་སྒོར་དུང་ཕྱུར་ཁྲི་39.79ཟིན་པ་དེ་དུས་མཚུངས་ལས་4.9%འཕར་བ་དང་། དེའི་ཁྲོད་ཕྱིར་གཏོང་སྒོར་དུང་ཕྱུར་ཁྲི་23.04ཟིན་ནས་6.7%འཕར་བ་དང་ནང་འདྲེན་སྒོར་དུང་ཕྱུར་ཁྲི་16.75ཟིན་ནས་2.4%འཕར་ཡོད།
ཚོང་དོན་བྱེད་སྟངས་ནས་བལྟས་ཚེ། ཟླ་བ་དང་པོ་ནས་བཅུ་གཅིག་པའི་བར་རང་རྒྱལ་གྱི་སྤྱིར་བཏང་ཚོང་དོན་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་ཁྲི་25.5ཟིན་ནས་3.7%འཕར་ཏེ་རང་རྒྱལ་གྱི་ཕྱི་ཕྱོགས་ཚོང་དོན་གྱི་སྤྱིའི་རིན་ཐང་གི་64.1%བཟུང་ཡོད། དུས་མཚུངས་སུ་ལས་སྣོན་ཚོང་དོན་གྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་ཁྲི་7.22ཟིན་ནས་3.6%འཕར་ཏེ་18.1%བཟུང་ཡོད། ཚོང་དོན་རོགས་ཟླ་ནས་བལྟས་ཚེ་ཟླ་བ་དང་པོ་ནས་བཅུ་གཅིག་པའི་བར་ཨེ་ཤེ་ཡ་ཤར་ལྷོའི་མནའ་འབྲེལ་ནི་རང་རྒྱལ་གྱི་ཚོང་དོན་རོགས་ཟླ་ཆེ་གྲས་ཨང་དང་པོ་དེ་ཡིན་པ་དང་རང་རྒྱལ་དང་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ཚོང་དོན་གྱི་སྤྱིའི་རིན་ཐང་སྒོར་དུང་ཕྱུར་ཁྲི་6.29ཟིན་ནས་8.6%འཕར་ཡོད། དུས་མཚུངས་སུ་རང་རྒྱལ་གྱིས“རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་ལ་ཕྱིར་གཏོང་ནང་འདྲེན་བྱེད་ཚད་ཁྱོན་བསྡོམས་སྒོར་དུང་ཕྱུར་ཁྲི་18.74ཟིན་ནས་6%འཕར་ཞིང་། དེའི་ཁྲོད་ཕྱིར་གཏོང་བྱེད་ཚད་སྒོར་དུང་ཕྱུར་ཁྲི་10.52ཟིན་ནས་8.2%འཕར་བ་དང་། ནང་འདྲེན་བྱེད་ཚད་སྒོར་དུང་ཕྱུར་ཁྲི་8.22ཟིན་ནས་3.4%འཕར་ཡོད། ཚོང་དོན་བྱེད་པོའི་ངོས་ནས་བལྟས་ཚེ་ཟླ་བ་དང་པོ་ནས་བཅུ་གཅིག་པའི་བར་དམངས་གཉེར་ཁེ་ལས་ཀྱི་ཕྱིར་གཏོང་ནང་འདྲེན་བྱེད་ཚད་སྒོར་དུང་ཕྱུར་ཁྲི་21.99ཟིན་ནས་8.7%འཕར་ཏེ་རང་རྒྱལ་གྱི་ཕྱི་ཕྱོགས་ཚོང་དོན་གྱི་སྤྱིའི་རིན་ཐང་གི་55.3%བཟུང་བ་དང་ན་ནིང་གི་དུས་མཚུངས་ལས་བརྒྱ་ཆའི་གྲངས་2འཕར་ཡོད།
