སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཆེད་དོན་ཞིབ་བསྡུར་འཛིན་གྲྭ་ཚུགས་པའི་མཛད་སྒོའི་ཐོག་གསུང་བཤད་གལ་ཆེན་གནང་སྟེ། དུས་རབས་གསར་པར་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་བར་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་ལ་ཕྱོགས་སྡོམ་གཏིང་ཟབ་གནང་བ་དང་། ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་བར་བླང་བྱ་གསལ་པོ་བཏོན་གནང་ཡོད།
ཉིན་ཤས་བསྟུད་མར། རྒྱ་ཆེའི་ལས་བྱེད་མང་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ནན་ཏན་བྱས་ནས། བསམ་བློ་དང་བྱ་སྤྱོད་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་ཏན་ཏིག་བྱས་ཏེ། བསྒྱུར་བཅོས་ཀྱི་ཡིད་ཆེས་བརྟན་དུ་གཏོང་བ་དང་སེམས་ནུས་གཅིག་སྒྲིལ་གྱིས་བསྒྱུར་བཅོས་བརྟན་ཐོག་རྒྱང་བགྲོད་ཐུབ་རྒྱུར་སྐུལ་འདེད་གཏོང་རྒྱུ་ཡིན་ཞེས་བརྗོད་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། དུས་རབས་གསར་པར་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་བར་ལག་ལེན་གྱི་གྲུབ་འབྲས་དང་ལམ་ལུགས་ཀྱི་གྲུབ་འབྲས། རིགས་པའི་གཞུང་ལུགས་ཀྱི་གྲུབ་འབྲས་བཅས་གལ་ཆེན་ཐོབ་ནས། འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཚར་བ་དང“ངོ་མཚར་ཆེན་པོ་གཉིས”མུ་མཐུད་གཏོད་རྒྱུར་སྒུལ་ཤུགས་ཆེན་པོ་དང་ལམ་ལུགས་ཀྱི་འགན་ལེན་མཁོ་འདོན་བྱས་ཡོད་ལ། རྒྱང་སྐྱོད་ཀྱི་ལམ་བུ་གསར་པར་སྔར་ལས་ལྷག་པའི་ངང་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་རྒྱུར་རྨང་གཞི་བརྟན་པོ་དང་རྩ་ཆེའི་ཉམས་མྱོང་ཡང་མཁོ་འདོན་བྱས་ཡོད་ཅེས་བསྟན་གནང་ཡོད།
ནོར་སྲིད་པུའི་སྲིད་ཇུས་ཞིབ་འཇུག་ཁང་གི་ཀྲུའུ་རེན་གཞོན་པ་ཀྲའོ་ཙེ་ཡུང་གིས། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་སྲ་ཞིང་བརྟན་པའི་འགོ་ཁྲིད་འོག ནོར་ཁྲལ་སྒྲིག་གཞི་བསྒྱུར་བཅོས་གཏིང་ཟབ་ཏུ་གཏོང་བར་གྲུབ་འབྲས་གལ་ཆེན་ཐོབ་པ་དང་དེང་རབས་ཀྱི་ནོར་སྲིད་ལམ་ལུགས་ཀྱི་སྒྲོམ་གཞི་སྤྱིར་ན་གཏན་འཁེལ་བྱས་པ་དེས་ང་ཚོས་བསྒྱུར་བཅོས་གཏིང་ཟབ་ཏུ་གཏོང་རྒྱུར་རྨང་གཞི་བརྟན་པོ་དང་རྩ་ཆེའི་ཉམས་མྱོང་མཁོ་འདོན་བྱས་ཡོད། ང་ཚོས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་བླངས་ནས། ཀྲུང་གོའི་རྣམ་པའི་དེང་རབས་ཅན་དང་འཚམ་པའི་ནོར་སྲིད་ལམ་ལུགས་མགྱོགས་མྱུར་འཛུགས་པ་དང་འཐུས་ཚང་དུ་གཏོང་དགོས་ཞེས་གསུངས་ཡོད།
རྒྱལ་ཁབ་འཕེལ་བསྒྱུར་ཨུ་ལྷན་སྒྲིག་གཞི་བསྒྱུར་བཅོས་ཕྱོགས་བསྡུས་སིའི་སི་ཀྲང་གཞོན་པ་ཧུའུ་ཁྲའོ་ཧུའེ་ཡིས། མིག་སྔའི་དཔལ་འབྱོར་འཁོར་རྒྱུག་ཁྲོད་ཐོན་པའི་གནས་ཚུལ་གསར་པ་དང་གནད་དོན་གསར་པར་དམིགས་ནས། ང་ཚོས་བསྒྱུར་བཅོས་རྒྱུན་ཆད་མེད་པར་རྒྱ་ཆེ་རུ་དང་གཏིང་ཟབ་ཏུ་གཏོང་བ་དང་། དཔལ་འབྱོར་འཁོར་རྒྱུག་ལ་ཚོད་འཛིན་བཟོ་བའི་འགག་གནད་ཤར་གཏོང་བྱེད་པ། གཉེར་སྐྱོང་བྱེད་པོའི་ནང་སྐྱེས་སྒུལ་ཤུགས་དང་གཅིག་གྱུར་ཁྲོམ་ར་ཆེན་པོའི་ནང་གནས་གསོན་ཤུགས། ཕྱོགས་སྒྱུར་རིམ་སྤོར་གྱི་མི་མངོན་པའི་སྟོབས་ཤུགས་ཆེན་པོ་བཅས་ནུས་ཤུགས་ཡོད་རྒུས་འཕེལ་བ་བཅས་བྱས་ཏེ། ཀྲུང་གོའི་རྣམ་པའི་དེང་རབས་ཅན་ལ་སྐུལ་འདེད་གཏོང་ཆེད་སྒུལ་ཤུགས་ཆེན་པོ་དང་ལམ་ལུགས་ཀྱི་འགན་ལེན་རྒྱུན་མཐུད་མཁོ་འདོན་བྱ་རྒྱུ་ཡིན་ཞེས་གསུངས་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། བསྒྱུར་བཅོས་ཀྱི་འགོག་རྐྱེན་སེལ་བ་དང་བསྒྱུར་བཅོས་ཀྱི་གྲུབ་འབྲས་བརྟན་དུ་གཏོང་བའི་ཁྲོད་ཁྲིམས་སྐྱོང་གི་དགེ་མཚན་ལྡན་པའི་ནུས་པ་དེ་བས་ལེགས་པའི་སྒོ་ནས་འདོན་སྤེལ་བྱེད་པ་དང་། ཁྲིམས་སྐྱོང་གི་བསམ་བློ་དང་ཁྲིམས་སྐྱོང་གི་བྱ་ཐབས་སྤྱོད་མཁས་པོ་བྱས་ཏེ་བསྒྱུར་བཅོས་ལ་སྐུལ་འདེད་བཏང་ནས། བསྒྱུར་བཅོས་གལ་ཆེན་ལ་ཁྲིམས་ཀྱི་གཞི་འཛིན་ས་ཡོད་པ་དང་སྤྱི་དམངས་དང་ཁྲིམས་མི་ཡོངས་ཀྱི་ཁྲིམས་མཐུན་ཁེ་དབང་འདྲ་མཉམ་ངང་སྲུང་སྐྱོང་བྱེད་དགོས་ཞེས་བསྟན་གནང་ཡོད།
ཀྲུང་དབྱང་སྲིད་ཁྲིམས་ཨུ་ལྷན་ཁྲིམས་སྐྱོང་ཅུས་ཀྱི་ཅུས་ཀྲང་གཞོན་པ་ཧྥང་ཝུའེ་ཡིས། བསྒྱུར་བཅོས་དང་ཁྲིམས་སྐྱོང་ཕན་ཚུན་གཅིག་གྱུར་ཡོང་བ་མཐའ་འཁྱོངས་བྱེད་པ་དང་། བསྒྱུར་བཅོས་ཀྱི་སྟོབས་ཤུགས་ལ་བརྟེན་ནས་ཁྲིམས་སྐྱོང་འཐུས་སྒོ་ཚང་དུ་བཏང་སྟེ། བསྒྱུར་བཅོས་གལ་ཆེན་ལ་ཁྲིམས་ཀྱི་གཞི་འཛིན་ས་ཡོད་པའི་འགན་ལེན་བྱེད་དགོས། ཁྲིམས་འཛུགས་དང་། ཁྲིམས་བསྟར། ཁྲིམས་འཛིན། ཁྲིམས་སྲུང་བཅས་ལྷུ་ཚིགས་ཁག་གི་བསྒྱུར་བཅོས་ཀྱི་ལས་འགན་གལ་ཆེན་ལ་མཐུན་སྦྱོར་ངང་སྐུལ་འདེད་གཏོང་བའི་ཁྲོད། ང་ཚོས་འགལ་ཟླ་དང་གནད་དོན་ལ་ཐད་ཀར་ཁ་གཏད་གཅོག་པ་ལས་དེར་གཡོལ་ཐབས་མི་བྱེད་པ་དང་། ངན་རེངས་དང་ཟ་ཟིར་རྩ་མེད་བཟོ་བར་ཐེ་ཚོམ་མི་བྱེད་པར་སྲིད་ཁྲིམས་ལས་དོན་དེང་རབས་ཅན་དུ་འགྱུར་བར་བརྟེན་ནས་ཀྲུང་གོའི་རྣམ་པའི་དེང་རབས་ཅན་ལ་འདེགས་སྐྱོར་དང་ཞབས་འདེགས་ཞུས་ཏེ། རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་ཁྲིམས་སྐྱོང་གི་འགན་སྲུང་བརྟན་པོ་བྱེད་དགོས་ཞེས་གསུངས་འདུག
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། དྲང་སྲུང་གསར་གཏོད་ནི་སྔར་ལས་ལྷག་པའི་ངང་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་བར་ངེས་པར་དུ་ཁོང་དུ་བརྟན་པོར་ཆུད་པ་དང་ཐོག་མཐའ་བར་གསུམ་དུ་བརྟན་སྲུང་བྱེད་དགོས་པའི་རྩ་དོན་གལ་ཆེན་ཞིག་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་མུ་མཐུད་འཐུས་ཚང་དང་འཕེལ་རྒྱས་གཏོང་བ་དང་། རྒྱལ་ཁབ་ཀྱི་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་རྒྱུར་སྐུལ་འདེད་གཏོང་བའི་བསྒྱུར་བཅོས་ཀྱི་སྤྱིའི་དམིགས་འབེན་མཐའ་འཁྱོངས་བྱས་ཏེ། ཐོག་མཐའ་བར་གསུམ་དུ་སྤྱིའི་དམིགས་འབེན་གྱིས་མཛུབ་ཁྲིད་བྱེད་པའི་ཕྱོགས་སུ་མདུན་སྐྱོད་བྱེད་དགོས་ཞེས་ནན་སྟོན་གནང་ཡོད།
ཧྲང་ཧའེ་ཕུའུ་ཏུང་ཁུལ་གསར་འཕེལ་རྒྱས་དང་བསྒྱུར་བཅོས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཀྲེང་ཧའེ་ཨའོ་ཡིས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་ལས་ང་ཚོར་འགན་འཁྲི་ལྕི་པོ་ཕྲག་ཏུ་ཡོད་པའི་ཚོར་སྣང་ཟབ་མོ་བྱུང་ཞེས་གསུངས་ཡོད།
ཅང་ཞི་ནན་ཁྲང་དཔལ་འབྱོར་གསར་སྤེལ་ཁུལ་གྱི་ལས་ཞུགས་ལས་གཏོད་ཞབས་ཞུའི་ལྟེ་གནས་ཀྱི་འགན་འཁུར་བ་ལི་ཤིང་གིས། སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་གྱི་དགོངས་དོན་གྱིས་ལས་ཞུགས་ཀྱི་སྒྲིག་གཞི་ལམ་སྲོལ་གྱི་བསྒྱུར་བཅོས་གཏིང་ཟབ་ཏུ་གཏོང་རྒྱུའི་ཐད་ཆོད་སེམས་ཆེ་རུ་དང་། སེམས་ཤུགས་ཆེར་སྐྱེད། དམངས་སེམས་གཅིག་འདུས་བཅས་བྱུང་སོང་ཞེས་གསུངས་ཡོད།
ཀན་སུའུ་ལན་ཀྲོའུ་ཁུལ་གསར་ཏང་གི་ལས་དོན་ཨུ་ཡོན་ལྷན་ཁང་གཞུང་ལས་ཁང་གི་ཀྲུའུ་རེན་གཞོན་པ་ཆིན་ཅན་ཧྲན་གྱིས། ང་ཚོས་ཁྱོན་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གསར་པ་དང་། ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་མུ་མཐུད་ལག་བསྟར་གཏིང་ཟབ་བྱས་ནས། སེམས་ཤུགས་བརྟན་དུ་གཏོང་བ་དང་དྲང་སྲུང་གསར་གཏོད་ཀྱིས་ཐོག་མཐའ་བར་གསུམ་དུ་ཚོང་གཉེར་ཁོར་ཡུག་ལེགས་སུ་གཏོང་རྒྱུ་དེ་སྤུས་མཐོའི་འཕེལ་རྒྱས་ཀྱི་གཞི་རྟེན་གལ་ཆེན་ལ་བརྩིས་ནས། གསར་གཏོད་རང་བཞིན་གྱི་སྒོ་ནས་བསྒྱུར་བཅོས་འཚོལ་ཞིབ་དང་དོན་འཁྱོལ་བྱས་ནས་ཕན་འབྲས་ཐོན་རྒྱུར་སྐུལ་འདེད་བཏང་ཐོག དེང་རབས་ཅན་འཛུགས་སྐྲུན་བྱ་ཆེད་རྒྱུན་མཐུད་ངང་སྒུལ་ཤུགས་ཆེན་པོ་མཁོ་འདོན་བྱ་རྒྱུ་ཡིན་ཞེས་གསུངས་ཡོད།
