ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་ཟླ་11ཚེས་19ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་19ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ལི་གཡོད་རེ་ནེ་ལུའུ་རུ་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ལ་ཞུགས་རིང་ཧྥ་རན་སེའི་ཙུང་ཐུང་མཱ་ཁེ་ལུང་དང་མཇལ་འཛོམས་གནང་བ་རེད།
ཞི་ཅིན་ཕིང་གིས་གསུངས་དོན། ཀྲུང་ཧྥ་རྒྱལ་ཁབ་གཉིས་པོ་ནི་རང་བཙན་དང་། འཐུས་ཚང་། འགན་འཁྲི་འཁུར་མཁན་བཅས་ཀྱི་རྒྱལ་ཁབ་ཆེན་པོ་གཉིས་ཡིན་པས་རྒྱལ་ཁབ་གཉིས་པོའི་འབྲེལ་བར་དམིགས་བསལ་གྱི་འཐབ་ཇུས་རིན་ཐང་དང་གོ་ལ་ཧྲིལ་པོའི་དོན་སྙིང་ལྡན་ཡོད། ད་ལོའི་ཟླ་ལྔ་པར། ང་ཚོས་ཀྲུང་ཧྥའི་འབྲེལ་བའི“ལོ་དྲུག་ཅུ་གསར་པར”རྒྱང་ལྟ་བྱས་པ་དང་འབྲེལ། གོ་ལ་ཧྲིལ་པོའི་རང་བཞིན་གྱི་འགྲན་སློང་དང་གླེང་མང་བའི་གནད་དོན་ལ་ཐུན་མོང་ཐོག་འབོད་སྒྲ་གྲགས་པས་རྒྱལ་སྤྱིར་དགེ་མཚན་ལྡན་པའི་ཤུགས་རྐྱེན་རྒྱ་ཁྱབ་ཐེབས་ཡོད།
མིག་སྔའི་རྒྱལ་སྤྱིའི་དུས་བབ་ལ་འགྱུར་ལྡོག་གསར་པ་མང་པོ་འབྱུང་བཞིན་ཡོད་པས། རྒྱལ་སྤྱིའི་སྤྱི་ཚོགས་ལ་མཐུན་སྒྲིལ་སྣེ་ཁྲིད་བྱས་ཏེ་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་རྒྱུ་དེ་ནི་ཀྲུང་ཧྥ་རྒྱལ་ཁབ་གཉིས་པོས་ཐུན་མོང་ཐོག་འཁུར་དགོས་ངེས་ཀྱི་རྒྱལ་ཁབ་ཆེན་པོའི་འགན་འཁྲི་ཞིག་རེད། ཕྱོགས་གཉིས་པོས་འཐབ་ཇུས་སྦྲེལ་མཐུད་ཟབ་ཏུ་གཏོང་བ་དང་ཕན་ཚུན་རྒྱབ་སྐྱོར་ལ་ཤུགས་སྣོན་བརྒྱབ་སྟེ་ཀྲུང་ཧྥའི་འབྲེལ་བ་བརྟན་པོ་དང་འཕེལ་རྒྱས་ཀྱི་རྣམ་པ་བཟང་པོ་ཡོད་པ་རྒྱུན་འཁྱོངས་བྱས་ནས་ཀྲུང་གོ་དང་ཡོ་རོབ་དབར་གྱི་འབྲེལ་བ་འཕེལ་རྒྱས་ཡག་པོ་དང་འཛམ་གླིང་ཞི་བདེ་དང་བརྟན་ལྷིང་ཆེད་ལེགས་སྐྱེས་དེ་བས་ཆེ་བ་འབུལ་དགོས།
ཞི་ཅིན་ཕིང་གིས་ནན་བཤད་གནང་དོན། ཀྲུང་གོ་ཕྱོགས་ཀྱིས་ཧྥ་རན་སེ་ཕྱོགས་དང་མཐོ་རིམ་དབར་འགྲོ་འོང་མུ་མཐུད་ཟབ་ཏུ་བཏང་ནས་རིག་གནས་དང་། སློབ་གསོ། ས་གནས། གཞོན་ནུ་སོགས་མི་ཆོས་རིག་གནས་ཁྱབ་ཁོངས་ཀྱི་སྤེལ་རེས་མཉམ་ལས་རྒྱུན་མཐུད་ཟབ་ཏུ་བཏང་སྟེ་ཀྲུང་ཧྥའི་དམངས་སེམས་གཅིག་མཐུན་ཡོང་བར་སྐུལ་འདེད་གཏོང་འདོད་ཡོད། ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག ཀྲུང་གོའི་རེས་སྐོར་གསར་པའི་སྒྱུར་བཅོས་སྒོ་དབྱེའི་འཕེལ་རིམ་འགོ་བཙུགས་པ་དེས་ཀྲུང་ཧྥའི་མཉམ་ལས་ལ་གོ་སྐབས་གསར་པ་མཁོ་འདོན་བྱས་པ་དང་ཕྱོགས་གཉིས་པོའི་དངོས་སྒྲུབ་མཉམ་ལས་ལ་མདུན་ལམ་ཆེན་པོ་ལྡན་ཡོད། ཕྱོགས་གཉིས་པོས་རིམ་པ་མཐོ་བའི་དཔལ་འབྱོར་དང་། ནོར་སྲིད། དངུལ་རྩ་བཅས་ཀྱི་ཐད་སྐད་ཆ་ཤོད་རེས་དང་དཔལ་འབྱོར་ཚོང་དོན་མཉམ་འདྲེས་ཨུ་ཡོན་ལྷན་ཁང་སོགས་ཀྱི་ལམ་སྲོལ་གང་ལེགས་སྤྱད་དེ་མཉམ་ལས་ཀྱི་མངོན་མེད་སྟོབས་ཤུགས་སྔོག་འདོན་གཏིང་ཟབ་དང་། ལེགས་ཆ་གསབ་རེས་ལ་ཤུགས་སྣོན། མི་མཐུན་པའི་ཆ་ཐག་གཅོད་འོས་འཚམ་བཅས་བྱས་ཏེ་གཉིས་ཁེ་གཉིས་ཕན་ཡོང་བའི་རེ་བ་ཡོད།
མཱ་ཁེ་ལུང་གིས་གསུངས་དོན། ད་ལོའི་ཟླ་5པར་ཀྲུའུ་ཞི་ཞི་ཅིན་ཕིང་གིས་ཧྥ་རན་སེར་གྲུབ་འབྲས་ཐོབ་པའི་ངང་འཚམས་འདྲི་གནང་བ་དང་ང་ཚོས་ཐུན་མོང་ཐོག་ཧྥ་ཀྲུང་དབར་ཕྱི་འབྲེལ་བཙུགས་ནས་ལོ་60འཁོར་བར་རྟེན་འབྲེལ་གཟབ་རྒྱས་ཞུས་པ་ཡིན། དེང་གི་འཛམ་གླིང་ལ་བརྟན་པོ་མེད་པ་དང་གཏན་འཁེལ་མེད་པའི་རྒྱུ་རྐྱེན་སྣ་ཚོགས་ཀྱིས་ཁེངས་ཡོད། ཧྥ་རན་སེ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་རྒྱལ་ཁབ་གཉིས་པོའི་གཙོ་བདག་དབར་གཅིག་མཐུན་བྱུང་བའི་ཐུན་མོང་ངོས་འཛིན་དོན་འཁྱོལ་ནན་ཏན་བྱས་ཏེ་མཐོ་རིམ་དབར་འགྲོ་འོང་མུ་མཐུད་ཟབ་ཏུ་གཏོང་བ་དང་། མི་ཆོས་རིག་གནས་སྤེལ་རེས་ཟབ་ཏུ་གཏོང་བ། སྲོལ་རྒྱུན་མཛའ་གྲོགས་རྒྱུན་མཐུད་བཅས་བྱས་ཏེ་རྒྱལ་ཁབ་དང་རྒྱལ་ཁབ་དབར་གྱི་འབྲེལ་བ་གསར་པ་གཏོད་འདོད་ཡོད། ཧྥ་རན་སེས་འཐབ་ཇུས་རང་བརྟེན་མཐའ་འཁྱོངས་བྱས་ནས་ཕན་ཚུན་བརྩི་འཇོག་གི་དགོངས་དོན་མཐའ་འཁྱོངས་བྱས་ཏེ་ཀྲུང་གོ་ཕྱོགས་དང་སྐད་ཆ་ཤོད་རེས་དང་མཉམ་ལས་བྱེད་པ་དང་། དཔལ་འབྱོར་ཚོང་དོན་གྱི་རྩོད་གཞི་ཐག་གཅོད་འོས་འཚམ་བྱེད་པ། ཕྱོགས་གཉིས་པོའི་དཔལ་འབྱོར་ཚོང་དོན་གྱི་འབྲེལ་བ་སྐྱོན་བྲལ་ངང་འཕེལ་རྒྱས་འགྲོ་བར་སྲུང་སྐྱོང་བྱེད་པ། གནམ་གཤིས་ཀྱི་འགྱུར་ལྡོག་ལ་ཁ་གཏད་གཅོག་པ་དང་མི་ཐབས་རིག་ནུས་ལ་བརྟེན་ནས་གོ་ལ་ཧྲིལ་པོ་བཅོས་སྐྱོང་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་པ་བཅས་བྱེད་འདོད་ཡོད།
ཕྱོགས་གཉིས་པོས་ཡུག་རེན་གྱི་ཉམས་ཉེན་ཐད་དགོངས་ཚུལ་བརྗེ་རེས་གནང་བ་རེད། ཞི་ཅིན་ཕིང་གིས། ཀྲུང་གོ་ཕྱོགས་ཀྱིས་ཡུག་རེན་གྱི་ཉམས་ཉེན་གནད་དོན་ཐད་འཛིན་པའི་ལངས་ཕྱོགས་ཐོག་མཐའ་བར་གསུམ་དུ་གཅིག་མཚུངས་ཡིན། གདོང་གཏུག་གི་དུས་བབ་ཞི་ལྷོད་དུ་འགྲོ་རྒྱུའི་རེ་བ་བྱེད་པ་ལས་ཉམས་ཉེན་མཆེད་པ་དང་དམག་འཁྲུག་རྒྱ་ཆེ་རུ་འགྲོ་བ་མཐོང་འདོད་མེད། མུ་མཐུད་རང་ཉིད་ཀྱི་བྱེད་སྟངས་ཐོག་ནས་དམག་མཚམས་འཇོག་རྒྱུར་དགེ་མཚན་ལྡན་པའི་ནུས་པ་འདོན་གྱི་ཡིན་ཞེས་གསུངས་པ་རེད།
ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་ཟླ་11ཚེས་19ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་19ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ལི་གཡོད་རེ་ནེ་ལུའུ་རུ་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ལ་ཞུགས་རིང་པོ་ལི་ཝེ་ཡའི་ཙུང་ཐུང་ཨར་སའེ་དང་མཇལ་འཛོམས་གནང་བ་རེད།
ཞི་ཅིན་ཕིང་གིས་གསུངས་དོན། ཀྲུང་གོ་དང་པོ་ལི་ཝེ་ཡ་ནི་གྲོགས་པོ་བཟང་པོ་དང་སྤུན་ཟླ་ཡག་པོ་ཞིག་རེད། ད་ཕན་ལོ་ཤས་རིང་། རྒྱལ་ཁབ་གཉིས་པོའི་འབྲེལ་བའི་འཕེལ་ཕྱོགས་བཟང་པོ་རྒྱུན་འཁྱོངས་ཐུབ་ནས། ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་བྱེད་པའི་གནད་དོན་གལ་ཆེན་དང་འབྲེལ་བ་ཡོད་པའི་ཐད་ཕྱོགས་གཉིས་པོས་བློ་བརྟན་འགྱུར་མེད་ངང་ཕན་ཚུན་རྒྱབ་སྐྱོར་བྱས་པས“རྒྱུད་གཅིག་ལམ་གཅིག”མཉམ་སྐྲུན་ལ་གྲུབ་འབྲས་གཡུར་དུ་ཟ་བ་ཐོབ་སྟེ་རྒྱལ་ཁབ་གཉིས་པོའི་མི་དམངས་ལ་དངོས་དངོས་རྗེན་རྗེན་གྱི་ཕན་པ་བསྐྲུན་ཡོད། པོ་ལི་ཝེ་ཡ་ཕྱོགས་ཀྱིས་རང་ཚུགས་རང་བདག་ངང་རང་རྒྱལ་ཁབ་ཀྱི་རྒྱལ་བབ་དང་འཚམ་པའི་འཕེལ་རྒྱས་ཀྱི་འགྲོ་ལམ་འཚོལ་ཞིབ་བྱེད་པར་ཀྲུང་གོ་ཕྱོགས་ཀྱིས་རྒྱབ་སྐྱོར་བྱེད་ཀྱི་ཡོད་ལ། ཕྱི་ལོ་ཀྲུང་གོ་དང་པོ་ལི་ཝེ་ཡ་དབར་ཕྱི་འབྲེལ་བཙུགས་ནས་ལོ་40འཁོར་བ་གོ་སྐབས་སུ་བཟུང་ནས་པོ་ལི་ཝེ་ཡ་ཕྱོགས་དང་མཉམ་དུ་སྲོལ་རྒྱུན་མཛའ་གྲོགས་དར་སྤེལ་དང་། འཐབ་ཇུས་ཐད་ཕན་ཚུན་ཡིད་ཆེས་བྱེད་ཟབ་ཏུ་གཏོང་བ། གཉིས་ཕན་མཉམ་ལས་བྱེད་རྒྱ་ཆེ་རུ་གཏོང་བ་བཅས་བྱས་ཏེ། ཀྲུང་གོ་དང་པོ་ལི་ཝེ་ཡའི་འཐབ་ཇུས་རོགས་ཟླའི་འབྲེལ་བ་སྐས་རིམ་གསར་པ་ཞིག་ཏུ་སླེབས་པར་སྣེ་ཁྲིད་བྱེད་འདོད་ཡོད།
ཞི་ཅིན་ཕིང་གིས་ནན་བཤད་གནང་དོན། ཕྱོགས་གཉིས་པོས་སྲིད་གཞུང་དང་། ཁྲིམས་འཛུགས་སྒྲིག་གཞི། སྲིད་ཏང་། ས་གནས་བཅས་དབར་འགྲོ་འོང་བྱེད་ཤུགས་ཆེ་རུ་བཏང་ནས་རྒྱལ་སྐྱོང་སྲིད་འཛིན་སྐོར་གྱི་ཉམས་མྱོང་སྤེལ་རེས་གཏིང་ཟབ་དང་། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་པོ་ལི་ཝེ་ཡའི་2025ལོའི་འཕེལ་རྒྱས་ཀྱི་འཆར་འགོད་སྦྲེལ་མཐུད་བྱེད་པ། རྨང་གཞིའི་སྒྲིག་བཀོད་འཛུགས་སྐྲུན་དང་། ས་མཐོའི་ཞིང་ལས། ལྗང་མདོག་འཕེལ་རྒྱས། གྲངས་འཛིན་དཔལ་འབྱོར་སོགས་ཁྱབ་ཁོངས་ཀྱི་མཉམ་ལས་བྱེད་རྒྱ་ཆེ་རུ་གཏོང་བ། མཉམ་འབྲེལ་རྒྱལ་ཚོགས་དང་འབོ་གསེར་རྒྱལ་ཁབ་སོགས་ཕྱོགས་མང་ལམ་སྲོལ་གྱི་རོགས་ལས་བྱེད་ཟབ་ཏུ་གཏོང་བ་བཅས་བྱས་ནས་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་མཐུན་སྒྲིལ་ཡར་ཐོན་དང་ཐུན་མོང་འཕེལ་རྒྱས་ལ་སྐུལ་འདེད་གཏོང་དགོས། ཀྲུང་གོ་ཕྱོགས་ཀྱིས་ལ་ཏིང་མེ་གླིང་ས་ཁུལ་གཞི་གཅིག་ཅན་འཛུགས་སྐྲུན་ལ་རྒྱབ་སྐྱོར་བྱེད་ཀྱི་ཡོད་ལ། པོ་ལི་ཝེ་ཡ་ཕྱོགས་དང་མཉམ་དུ་ཀྲུང་ལའི་གླེང་སྟེགས་ལམ་སྲོལ་འཛུགས་སྐྱོང་ལ་ཤུགས་སྣོན་རྒྱག་འདོད་ཡོད།
ཨར་སའེ་ཡིས་གསུངས་དོན། པོ་ཀྲུང་རྒྱལ་ཁབ་གཉིས་པོར་སྤུན་ཟླའི་མཛའ་གྲོགས་ཟབ་མོ་ལྡན་ཡོད། ཀྲུང་གོ་ཕྱོགས་ཀྱིས་པོ་ལི་ཝེ་ཡ་ཏོག་གསར་རིམས་ནད་ལས་རྣམ་པར་རྒྱལ་རོགས་བྱས་ནས་པོ་ལི་ཝེ་ཡའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་བཏང་བར་ཐུགས་རྗེ་ཆེ་ཞུ་གི་ཡིན། ཀྲུའུ་ཞི་ཞི་ཅིན་ཕིང་གི་འགོ་ཁྲིད་འོག་ཀྲུང་གོའི་ལུགས་ཀྱི་དེང་རབས་ཅན་ལ་གྲུབ་འབྲས་ཧ་ཅང་ཆེན་པོ་ཐོབ་ནས་པོ་ལི་ཝེ་ཡ་སོགས་རྒྱལ་ཁབ་ཀྱི་འཕེལ་རྒྱས་ལ་དཔེ་ལྟ་ས་མཁོ་འདོན་དང་མཛུབ་ཁྲིད་གལ་ཆེན་བྱས་ཡོད། ཉིན་ཤས་གོང་ཀྲུའུ་ཞི་ཞི་ཅིན་ཕིང་ཕེ་རུའི་ཆན་ཁའེ་གྲུ་ཁ་སྒོ་དབྱེའི་མཛད་སྒོར་ཞུགས་པར་རྟེན་འབྲེལ་ཞུ་གི་ཡིན། པོ་ལི་ཝེ་ཡ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་ཕྱི་ལོ་ཕྱི་འབྲེལ་བཙུགས་ནས་ལོ་40འཁོར་བར་རྟེན་འབྲེལ་ཞུས་ཏེ་འཐབ་ཇུས་རོགས་ཟླའི་འབྲེལ་བ་སྔར་བས་ཟབ་ཏུ་དང་། རྨང་གཞིའི་སྒྲིག་བཀོད་མཉམ་སྦྲེལ་མཉམ་མཐུད་སོགས་ཁྱབ་ཁོངས་ཀྱི་མཉམ་ལས་བྱེད་ཤུགས་ཆེ་རུ་གཏོང་བ། པོ་ལི་ཝེ་ཡའི་རྒྱལ་ཁབ་འཕེལ་རྒྱས་ལ་རམ་འདེགས་བཅས་བྱས་ནས་མི་དམངས་ཀྱི་བདེ་རྩ་ཆེ་རུ་གཏོང་འདོད་ཡོད། པོ་ལི་ཝེ་ཡ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་འབོ་གསེར་རྒྱལ་ཁབ་དང་ཀྲུང་ལའི་གླེང་སྟེགས་སོགས་ཕྱོགས་མང་ལམ་སྲོལ་གྱི་མཉམ་ལས་ལ་ཤུགས་སྣོན་རྒྱག་འདོད་ཡོད།
ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་ཟླ་11ཚེས་19ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་19ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ལི་གཡོད་རེ་ནེ་ལུའུ་རུ་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ལ་ཞུགས་རིང་ཨ་ཀེན་ཐིན་གྱི་ཙུང་ཐུང་སྨི་ལའེ་དང་མཇལ་འཛོམས་གནང་བ་རེད།
ཞི་ཅིན་ཕིང་གིས་གསུངས་དོན། ཀྲུང་གོ་དང་ཨ་ཀེན་ཐིན་དབར་ཕྱི་འབྲེལ་བཙུགས་ནས་དུས་རབས་ཕྱེད་ཀ་ལྷག་ཙམ་སོང་ཚུན། ཕྱོགས་གཉིས་པོས་ཕན་ཚུན་བརྩི་འཇོག་དང་། འདྲ་མཉམ་གྱི་ལྟ་སྟངས་འཛིན་པ། གཉིས་ཁེ་གཉིས་ཕན་བཅས་མཐའ་འཁྱོངས་བྱས་ཡོད། ཀྲུང་གོས་ཨ་ཀེན་ཐིན་ལ་འཛིན་པའི་སྲིད་ཇུས་ཐོག་མཐའ་བར་གསུམ་དུ་ཨ་ཀེན་ཐིན་གྱི་མི་དམངས་ཡོངས་ལ་ཕྱོགས་པ་དང་ཀྲུང་གོ་དང་ཨ་ཀེན་ཐིན་གྱི་མཉམ་ལས་ཀྱིས་ཀྱང་མི་དམངས་ཡོངས་ལ་བདེ་སྐྱིད་བསྐྲུན་ཡོད། འདི་ལོ་ནི་ཀྲུང་གོ་དང་ཨ་ཀེན་ཐིན་དབར་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་ལོ་10འཁོར་བའི་ལོ་ཡིན་པ་དང་རྒྱལ་ཁབ་གཉིས་པོའི་འབྲེལ་བ་སྔ་མཐུད་ཕྱི་སྐྱོང་དང་སྔ་འཛིན་ཕྱི་གཏོད་ཀྱི་མཚམས་ཚིགས་གལ་ཆེན་ཞིག་ཏུ་གནས་ཡོད། ཀྲུང་གོ་ཕྱོགས་ཀྱིས་རྒྱལ་ཁབ་གཉིས་པོའི་མི་དམངས་ཀྱི་སྲོལ་རྒྱུན་མཛའ་གྲོགས་ལ་གཅེས་འཛིན་དང་ཨ་ཀེན་ཐིན་ཕྱོགས་ཀྱིས་སྒྱུར་བཅོས་བརྒྱུད་རང་རྒྱལ་ཁབ་ཀྱི་རྒྱལ་བབ་དང་འཚམ་པའི་འཕེལ་རྒྱས་ཀྱི་འགྲོ་ལམ་འཚོལ་ཞིབ་བྱེད་པར་རྒྱབ་སྐྱོར་བྱས་ཡོད་ལ། ཨ་ཀེན་ཐིན་ཕྱོགས་དང་མཉམ་དུ་ཀྲུང་གོ་དང་ཨ་ཀེན་ཐིན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་ཡུན་རིང་འཕེལ་རྒྱས་བརྟན་པོ་འགྲོ་བར་སྐུལ་འདེད་བཏང་སྟེ་རང་ངོས་རྒྱལ་ཁབ་ཀྱི་འཕེལ་རྒྱས་ལ་དེ་བས་ལེགས་པའི་སྒོ་ནས་སྐུལ་འདེད་གཏོང་འདོད་ཡོད།
ཞི་ཅིན་ཕིང་གིས་ནན་བཤད་གནང་དོན། དེང་སྐབས་འཛམ་གླིང་གི་དུས་བབ་ལ་འགྱུར་ལྡོག་གཏིང་ཟབ་འབྱུང་བཞིན་ཡོད་པས། ཀྲུང་གོ་དང་ཨ་ཀེན་ཐིན་ཕྱོགས་གཉིས་པོས་ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་མུ་མཐུད་བློ་བརྟན་འགྱུར་མེད་ངང་རྒྱབ་སྐྱོར་བྱེད་པ་དང་། རིམ་པ་ཁག་དང་ཁྱབ་ཁོངས་ཁག་གི་འགྲོ་འོང་ཟབ་ཏུ་གཏོང་བ། མི་ཆོས་རིག་གནས་སྤེལ་རེས་དང་མཉམ་ལས་ལ་སྐུལ་འདེད་གཏོང་བ་བཅས་བྱས་ནས་ཀྲུང་གོ་དང་ཨ་ཀེན་ཐིན་གྱི་མཛའ་གྲོགས་དེ་བས་མི་སེམས་ལ་གཏིང་ཟབ་ཟུག་པར་བྱེད་དགོས། ཀྲུང་གོ་དང་ཨ་ཀེན་ཐིན་གྱི་དཔལ་འབྱོར་ཚོང་དོན་གྲུབ་ཆ་གསབ་རེས་ཐུབ་ཡོད་ལ། མཉམ་ལས་ཀྱི་མདུན་ལམ་ཡང་ཆེན་པོ་ལྡན་པས། ཨ་ཀེན་ཐིན་ཕྱོགས་ཀྱིས་ཀྲུང་གོའི་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་ལས་བྱུང་བའི་གོ་སྐབས་གལ་ཆེན་དམ་འཛིན་བྱས་ནས། ཀྲུང་གོར་ཡོད་པའི་ཁྲོམ་རའི་ཐོབ་སྐལ་སྔར་བས་ཆེ་རུ་གཏོང་བར་དགའ་བསུ་ཞུ་གི་ཡིན། ཀྲུང་གོ་ཕྱོགས་ཀྱིས་ཨ་ཀེན་ཐིན་ཕྱོགས་དང་མཉམ་དུ་སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་ལ་མུ་མཐུད་སྐུལ་འདེད་བཏང་ནས་ནུས་རྒྱུ་གཏེར་ལས་དང་། རྨང་གཞིའི་སྒྲིག་བཀོད། ཞིང་ལས། ཚན་རྩལ་གསར་གཏོད། གྲངས་འཛིན་དཔལ་འབྱོར་སོགས་ཁྱབ་ཁོངས་ཀྱི་མཉམ་ལས་ཟབ་ཏུ་གཏོང་འདོད་ཡོད། ཀྲུང་གོ་ཕྱོགས་ཀྱིས་ཀྱང་ཨ་ཀེན་ཐིན་ཕྱོགས་དང་མཉམ་དུ་དངུལ་རྩའི་མཉམ་ལས་ཀྱི་ལས་དོན་མུ་མཐུད་སྤེལ་ནས་ཨ་ཀེན་ཐིན་ཕྱོགས་ཀྱིས་དཔལ་འབྱོར་དངུལ་རྩ་བརྟན་པོ་སྲུང་བར་རོགས་རམ་བྱེད་འདོད་ཡོད།
སྨི་ལའེ་ཡིས་གསུངས་དོན། ཀྲུའུ་ཞི་ཞི་ཅིན་ཕིང་དང་མཇལ་འཛོམས་བྱུང་བར་ཧ་ཅང་དགའ་པོ་བྱུང་། ཀྲུང་གོ་ཕྱོགས་ཀྱིས་ཨ་ཀེན་ཐིན་གྱི་རྒྱལ་ནང་གི་དཔལ་འབྱོར་དང་དངུལ་རྩའི་དུས་བབ་བརྟན་པོ་ཡོང་ཆེད་རྩ་ཆེའི་རོགས་རམ་གནང་བར་ཐུགས་རྗེ་ཆེ་ཞུ་གི་ཡིན། ཨ་ཀེན་ཐིན་དང་ཀྲུང་གོའི་དབར་གྱི་སྲོལ་རྒྱུན་གྱི་མཛའ་གྲོགས་ཟབ་མོ་ཡོད་ཅིང་། ཨ་ཀེན་ཐིན་ཀྲུང་གོའི་བློས་འགེལ་ཆོག་པ་དང་འགྱུར་མེད་ཀྱི་མཉམ་ལས་རོགས་ཟླར་འགྱུར་བའི་རེ་བ་ཡོད། ཨ་ཀེན་ཐིན་ཕྱོགས་ཀྱིས་ཐའེ་དབན་གྱི་གནད་དོན་ཐད་ཀྱི་ཀྲུང་གོ་ཕྱོགས་ཀྱི་ལངས་ཕྱོགས་ལ་བློ་བརྟན་འགྱུར་མེད་ངང་རྒྱབ་སྐྱོར་བྱ་རྒྱུ་དང་ཀྲུང་གོ་གཅིག་གི་རྩ་དོན་བརྟན་པོར་སྲུང་རྒྱུ་ཡིན། ཨ་ཀེན་ཐིན་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་དཔལ་འབྱོར་ཚོང་དོན་དང་། ནུས་རྒྱུ་གཏེར་ཐོན། དངུལ་རྩ་སོགས་ཀྱི་ཁྱབ་ཁོངས་ཀྱི་མཉམ་ལས་སྔར་བས་ཟབ་ཏུ་གཏོང་རྒྱུའི་རེ་བ་བྱེད་ཀྱི་ཡོད་ལ། ཀྲུང་གོའི་ཁེ་ལས་དེ་བས་མང་བ་ཨ་ཀེན་ཐིན་དུ་མ་འཇོག་མཉམ་ལས་བྱེད་པར་ཡོང་རྒྱུར་དགའ་བསུ་ཞུ་རྒྱུ་མ་ཟད། ཨ་ཀེན་ཐིན་དུ་མ་འཇོག་བྱེད་མཁན་ཁེ་ལས་ལ་ཚོང་གཉེར་གྱི་ཁོར་ཡུག་བཟང་པོ་མཁོ་འདོན་བྱས་ནས་ཁེ་ལས་ཀྱི་ལུགས་མཐུན་ཁེ་དབང་ཁྲིམས་ལྟར་འགན་ལེན་བྱེད་འདོད་ཡོད། ཀྲུའུ་ཞི་ཞི་ཅིན་ཕིང་གིས་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ཐོག་གོ་ལ་ཧྲིལ་པོའི་བཅོས་སྐྱོང་སྐོར་རྒྱས་བཤད་གནང་བའི་གནད་སྨིན་འདོད་ཚུལ་ལ་ཨ་ཀེན་ཐིན་ཕྱོགས་ཀྱིས་བསྔགས་བརྗོད་ཆེན་པོ་བྱ་རྒྱུ་མ་ཟད། ཀྲུང་གོ་ཕྱོགས་དང་མཉམ་དུ་མཐུན་སྦྱོར་མཉམ་ལས་ལ་ཤུགས་སྣོན་རྒྱག་འདོད་ཡོད། ཨ་ཀེན་ཐིན་ཕྱོགས་ཀྱིས་ཀྲུང་གོ་དང་ལ་ཏིང་མེ་གླིང་གི་གླེང་སྟེགས་སྔར་བས་ཡག་པོ་གཉེར་བར་རྒྱབ་སྐྱོར་བྱས་ཏེ་ལ་ཏིང་མེ་གླིང་དང་ཀྲུང་གོའི་འབྲེལ་བ་ཟབ་ཏུ་འགྲོ་བར་སྐུལ་འདེད་གཏོང་ཆེད་དགེ་མཚན་ལྡན་པའི་ནུས་པ་འདོན་འདོད་ཡོད།
ཤིན་ཧྭ་གསར་འགྱུར་ཁང་གྲོང་ཁྱེར་ལི་གཡོད་རེ་ནེ་ལུའུ་ནས་ཟླ་11ཚེས་19ཉིན་གློག་འཕྲིན་འབྱོར་གསལ། ས་གནས་དེ་གའི་དུས་ཚོད་ཟླ་11ཚེས་19ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ལི་གཡོད་རེ་ནེ་ལུའུ་རུ་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ལ་ཞུགས་རིང་འཇར་མན་གྱི་ཙུང་ལི་ཧྲོར་ཚེ་དང་མཇལ་འཛོམས་གནང་བ་རེད།
ཞི་ཅིན་ཕིང་གིས་བསྟན་དོན། འདི་ལོའི་ཟླ་4པར་ཁྱེད་རང་ཀྲུང་གོར་འཚམས་འདྲིར་ཕེབས་སྐབས་ངེད་ཚོའི་དབར་ཟོལ་མེད་གཏིང་ཟབ་དང་ཕན་འབྲས་ལྡན་པའི་སྤེལ་རེས་བྱུང་སོང་། ལོ་ཕྱེད་ལྷག་ཙམ་རིང་རྒྱལ་ཁབ་གཉིས་པོས་ལྗང་མདོག་འཕེལ་རྒྱས་དང་། རྒྱུན་མཐུད་ཆོག་པའི་འགྲིམ་འགྲུལ། ཨ་ཧྥེ་རི་ཁའི་ཞིང་ལས་མཉམ་ལས་སོགས་ཁྱབ་ཁོངས་ཀྱི་མཉམ་ལས་ལ་གྲུབ་འབྲས་གལ་ཆེན་ཐོབ་པ་དང་། ཀྲུང་གོ་དང་འཇར་མན་གྱི་འབྲེལ་བར་མུ་མཐུད་སྐྱེ་སྟོབས་དང་གསོན་ཤུགས་གསར་པ་འཕེལ་ཡོད། མིག་སྔར་འཛམ་གླིང་ལ་ལོ་བརྒྱའི་འགྱུར་ལྡོག་མགྱོགས་མྱུར་འབྱུང་བཞིན་ཡོད་པས། གོ་ལ་ཧྲིལ་པོའི་འཕེལ་རྒྱས་འགག་རྩའི་ལམ་བཞི་མདོ་ཁར་སླེབས་ཡོད། འཛམ་གླིང་གི་དཔལ་འབྱོར་དངོས་ཚན་ཨང་གཉིས་པ་དང་གསུམ་པ་དང་ཤུགས་རྐྱེན་ཆེན་པོ་ལྡན་པའི་རྒྱལ་ཁབ་ཆེན་པོ་གཉིས་ཡིན་པའི་ཀྲུང་གོ་དང་འཇར་མན་གྱིས། ཕུགས་ཡུན་དང་འཐབ་ཇུས་ཀྱི་ཟུར་ཚད་ནས་ཀྲུང་གོ་དང་འཇར་མན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བརྟན་དུ་གཏོང་རྒྱུ་མཐའ་འཁྱོངས་བྱས་ཏེ། ཕན་ཚུན་དབར་གྲུབ་འབྲས་ཐོབ་པའི་མཉམ་ལས་ཀྱི་གཏམ་རྒྱུད་མུ་མཐུད་རྩོམ་དགོས།
ཞི་ཅིན་ཕིང་གིས་ནན་བཤད་གནང་དོན། ཀྲུང་གོ་ཕྱོགས་ཀྱིས་འཇར་མན་ལ་འཛིན་པའི་སྲིད་ཇུས་ཐད་ཚད་མཐོའི་བརྟན་ལྷིང་རང་བཞིན་དང་རྒྱུན་མཐུད་རང་བཞིན་མུ་མཐུད་རྒྱུན་འཁྱོངས་བྱེད་ཀྱི་ཡོད་ལ། འཇར་མན་ཕྱོགས་དང་མཉམ་དུ་ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་བརྩི་འཇོག་མཐའ་འཁྱོངས་དང་། མཐུན་པ་ཡོང་ཐབས་དང་མི་མཐུན་སོར་འཇོག སྤེལ་རེས་དཔྱད་འཛིན་བཅས་མཐའ་འཁྱོངས་ཀྱང་བྱེད་འདོད་ཡོད། ཀྲུང་འཇར་རྒྱལ་ཁབ་གཉིས་པོའི་དཔལ་འབྱོར་གྱི་ཁེ་ཕན་ཚད་མཐོའི་མཉམ་འདྲེས་ཡིན་པས་ཀྲུང་འཇར་རྒྱལ་ཁབ་གཉིས་པོའི་མཉམ་ལས་ནི་འཕེལ་རྒྱས་ལ་མཉམ་དུ་སྐུལ་འདེད་དང་འབྱུང་འགྱུར་མཉམ་དུ་གཏོད་པའི་གོ་སྐབས་ཤིག་རེད། ཀྲུང་གོ་ཕྱོགས་ཀྱིས་འཇར་མན་འདི་ཉིད་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་མཁན་གྱི་མཉམ་ལས་རོགས་ཟླ་གལ་ཆེན་ཞིག་ཏུ་བརྩིས་ཏེ། འཇར་མན་གྱི་ཁེ་ལས་ལ་ཡངས་ཤིང་རྒྱ་ཆེ་བའི་ཁྲོམ་རའི་གོ་སྐབས་མུ་མཐུད་མཁོ་འདོན་བྱེད་ཀྱི་ཡིན། ཕྱོགས་གཉིས་པོས་གྲངས་འཛིན་ཅན་དང་། རིག་ནུས་ཅན། ཐཱན་ཉུང་ཅན་བཅས་ལ་དམིགས་ནས་མཉམ་ལས་ཀྱི་སྤུས་ཚད་དང་རིམ་པ་མཐོར་གཏོང་ལ་སྐུལ་འདེད་བཏང་སྟེ། ལག་གདང་སྦྲེལ་ནས་ཕྱོགས་གསུམ་པའི་ཁྲོམ་ར་གསར་འབྱེད་ཀྱིས་མཉམ་ལས་གཉིས་ཕན་ཡོང་བ་བྱེད་དགོས། ཀྲུང་གོ་ཕྱོགས་ཀྱིས་སྣེ་མང་ཅན་གྱི་འཛམ་གླིང་གི་སྣེ་གལ་ཆེན་ཞིག་ཡིན་པའི་ཡོ་རོབ་ཀྱིས་ཡོ་རོབ་ཏུ་མཉམ་ལས་བྱེད་པར་གཞོལ་ནས། ལག་གདང་སྦྲེལ་ནས་འགྲན་སློང་ལ་ཁ་གཏད་བཅག་སྟེ་ཀྲུང་གོ་དང་ཡོ་རོབ་དབར་གྱི་འབྲེལ་བ་རྒྱུན་མཐུད་དང་། བརྟན་པོ། སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་དགོས་པའི་ངོས་འཛིན་བྱེད་ཀྱི་ཡོད། ཡོ་རོབ་མནའ་འབྲེལ་གྱིས་ཀྲུང་གོའི་གློག་སྒུལ་རླངས་འཁོར་ལ་སྒོ་ཁྲལ་འཕར་མ་བསྡུ་རྒྱུ་ཡིན་པའི་སྐོར་ལ་འཛམ་གླིང་ཧྲིལ་པོས་དོ་ཁུར་བྱེད་ཀྱི་ཡོད། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་སྐད་ཆ་ཤོད་རེས་དང་གྲོས་མོལ་བྱས་ནས་མི་མཐུན་པའི་ཆ་སེལ་རྒྱུ་མཐའ་འཁྱོངས་བྱེད་ཀྱི་ཡོད་ལ། འཇར་མན་ཕྱོགས་ཀྱིས་དེའི་ཐད་མུ་མཐུད་ནུས་པ་གལ་ཆེན་འདོན་རྒྱུའི་རེ་བའང་ཡོད།
ཧྲོར་ཚེ་ཡིས་གསུངས་དོན། ང་རང་དེ་གོང་ཀྲུང་གོར་འཚམས་འདྲིར་སོང་ཚུན་དུ་འཇར་ཀྲུང་དབར་གྱི་འབྲེལ་བ་འཕེལ་རྒྱས་ཡག་པོ་བྱུང་འདུག མིག་སྔའི་རྙོག་འཛིང་ཆེ་བའི་རྒྱལ་སྤྱིའི་དུས་བབ་འོག་འཇར་མན་དང་ཀྲུང་གོས་འབྲེལ་གཏུག་དང་མཉམ་ལས་ལ་ཤུགས་སྣོན་རྒྱག་རྒྱུ་གལ་འགངས་ཤིན་ཏུ་ཆེ་བ་རེད། འཇར་མན་ཕྱོགས་ཀྱིས་ཀྲུང་གོ་ཕྱོགས་དང་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྔར་བས་འཕེལ་རྒྱས་གཏོང་བ་དང་། འདྲ་མཉམ་དང་། ཟོལ་མེད། ཕན་ཚུན་བརྩི་འཇོག་བཅས་ཀྱི་དགོངས་དོན་ལ་བརྟེན་ནས་ཕྱོགས་གཉིས་དང་ཕྱོགས་མང་དབར་གྱི་སྐད་ཆ་ཤོད་རེས་དང་མཉམ་ལས་ལ་ཤུགས་སྣོན་རྒྱག་པ། མི་མཐུན་པའི་ཆ་འོས་འཚམ་སེལ་བ། གཉིས་ཁེ་གཉིས་ཕན་ཡོང་བ་བཅས་བྱས་ཏེ་འཛམ་གླིང་གི་དཔལ་འབྱོར་སླར་གསོ་དང་ཐུན་མོང་དར་རྒྱས་ཡོང་ཆེད་ལེགས་སྐྱེས་འབུལ་ཐུབ་པའི་རེ་བ་ཡོད། ཡོ་རོབ་དང་ཀྲུང་གོས་སྐད་ཆ་ཤོད་རེས་དང་གྲོས་མོལ་བརྒྱུད་གློག་སྒུལ་རླངས་འཁོར་གྱི་གནད་དོན་གང་མགྱོགས་ཐག་གཅོད་ཐུབ་རྒྱུའི་རེ་བ་ཡོད་ལ། འཇར་མན་ཕྱོགས་ཀྱིས་དེའི་ཐད་འབད་བརྩོན་ཧུར་ཐག་བྱེད་འདོད་ཀྱང་ཡོད།
ཕྱོགས་གཉིས་པོས་ད་དུང་ཡུག་རེན་གྱི་ཉམས་ཉེན་དང་དབུས་ཤར་ས་ཁུལ་གྱི་དུས་བབ་སོགས་གླེང་མང་བའི་གནད་དོན་ཐད་དགོངས་འཆར་བརྗེ་རེས་ཀྱང་གནང་བ་རེད།
