ཏ་ལེན་མཚེའུ་ཞིང་ཆེན་རིམ་པའི་རང་བྱུང་སྲུང་སྐྱོབ་ས་ཁུལ་དུ་གྲུམ་པ་རྒྱུ་བ་ཐེངས་དང་པོར་མཐོང་བ།
སྤེལ་དུས 2024-10-09
ཡོང་ཁུངས། འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།
རྩོམ་པ་པོ།
ཏ་ལེན་མཚེའུ་ཞིང་ཆེན་རིམ་པའི་རང་བྱུང་སྲུང་སྐྱོབ་ས་ཁུལ་གྱི་སྐྱེ་ཁམས་སྤུས་ཚད་རྒྱུན་མཐུད་ངང་ཇེ་ལེགས་སུ་སོང་བ་དང་བསྟུན་ནས། རི་སྐྱེས་སྲོག་ཆགས་སྣ་ཚོགས་ཀྱི་ཁ་གྲངས་རིམ་བཞིན་ཇེ་མང་དུ་འགྲོ་བའི་འཕེལ་ཕྱོགས་མངོན་ཡོད་ཅིང་། རི་སྐྱེས་སྲོག་ཆགས་རྩ་ཆེན་མང་པོ་སྲུང་སྐྱོབ་ས་ཁུལ་གྱི་རྩྭ་ཐང་དང་མཚེའུ། རླན་སའི་ཁུལ་དུ་རྒྱུ་བའམ་ཚང་བཅས་ཏེ་རྒྱུད་སྤེལ་བཞིན་ཡོད། ཉེ་ལམ། མཚོ་སྔོན་གྱི་ཏ་ལེན་མཚེའུ་ཞིང་ཆེན་རིམ་པའི་རང་བྱུང་སྲུང་སྐྱོབ་ས་ཁུལ་གྱི་རྟོག་འཇལ་མ་ལག་གིས་གྲུམ་པ་ཞིག་རྒྱུ་བའི་བརྙན་པར་བླངས་འདུག
གྲུམ་པ་ནི་སྲེ་མོང་ཚན་པའི་གྲུམ་པའི་ཁོངས་སུ་གཏོགས་པའི་སྲོག་ཆགས་ཤིག་ཡིན་ལ། 《འཛམ་གླིང་རང་བྱུང་སྲུང་སྐྱོབ་མནའ་འབྲེལ》（IUCN）གྱིས2008ལོར་སྟོངས་ཉེའི་དངོས་རིགས་ཀྱི་མིང་ཐོ་དམར་པོ（LC）ཡི་ཁྲོད་དུ་བཞག་ཡོད། གྲུམ་པ་ནི་སྲེ་མོང་ཚན་གྱི་སྲོག་ཆགས་དག་ལས་གཟུགས་པོ་ཅུང་ཆེ་ལ་རྒྱགས་པ་དང་སྐེ་ཐུང་ཞིང་སྦོམ་པ། རྐང་ལག་ཐུང་ཞིང་བརྟན་ལ་རྔ་མ་ཐུང་བ་ཞིག་ཡིན། དེ་དག་རྒྱུན་པར་དཔྱིད་ཀ་དང་སྟོན་ཁར་འགུལ་སྐྱོད་བྱེད་ལ། གཤིས་ཀ་ཅུང་གཏུམ་དྲག་ཆེ་ཞིང་དགུན་ཉལ་བྱེད་པའི་གོམས་གཤིས་ཡོད། གྲུམ་པ་ནི་རྩྭ་ཤ་གཉིས་བཟའི་སྲོག་ཆགས་ཤིག་ཡིན་ལ་ས་དོང་བརྐོས་ཏེ་སྡོད་གནས་སུ་བྱས་ཡོད་ཅིང་། སྡོད་གནས་གཙོ་བོ་ནི་ནགས་ཚལ་དང་ཤིང་ཕྲན་ནགས། རི་ཐང་། མཚེའུ་འགྲམ་སོགས་ཀྱི་རང་བྱུང་ཁོར་ཡུག་ཡིན། མཚོ་སྔོན་གྱི་ཏ་ལེན་མཚེའུ་ཞིང་ཆེན་རིམ་པའི་རང་བྱུང་སྲུང་སྐྱོབ་ས་ཁུལ་གྱིས་རི་སྐྱེས་སྲོག་ཆགས་ཀྱི་རིམས་ཁུངས་རིམས་ནད་རྟོག་འཇལ་ས་ཚིགས་སྤྱད་དེ། རླན་སའི་སྐྱེ་ཁམས་རྟོག་འཇལ་ཁུལ་ཁོངས་ཀྱི་རི་སྐྱེས་སྲོག་ཆགས་ཀྱི་རིགས་དང་ཁ་གྲངས། ཁྱབ་ཚུལ། གནས་སྤོའི་ལམ་ཐིག འགུལ་སྐྱོད་ཆོས་ཉིད་སོགས་ཀྱི་འགག་རྩའི་ཆ་འཕྲིན་ལ་རྒྱུས་ལོན་ཡང་དག་བྱས་ནས། རླན་སའི་རི་སྐྱེས་སྲོག་ཆགས་ཀྱི་རིམས་ཁུངས་རིམས་ནད་ཀྱི་ཚན་རིག་ཅན་གྱི་རྟོག་འཇལ་ལ་སྲ་བརྟན་གྱི་རྨང་གཞི་བཏིང་། སྲུང་སྐྱོབ་ས་ཁུལ་གྱིས་ད་དུང་ཞིང་ཆེན་ནགས་ལས་དང་རྩྭ་ཐང་ཅུས་ལ་མཉམ་འབྲེལ་ངང་གཙོ་གནད་སྲུང་སྐྱོབ་རི་སྐྱེས་རྩི་ཤིང་གི་ཐོན་ཁུངས་ལ་ཞིབ་བཤེར་དང་རྟོག་འཇལ་དཔྱག་དཔོག་བྱས་ཏེ་རི་སྐྱེས་རྩི་ཤིང་སྲུང་སྐྱོབ་བྱ་བར་ཚན་རིག་གི་གཞི་འཛིན་ས་མཁོ་འདོན་བྱས་ཡོད།
མཚོ་སྔོན་ཏ་ལེན་མཚེའུ་རང་བྱུང་སྲུང་སྐྱོབ་ས་ཁུལ་ནི་ཡ་གླིང་དབུས་མའི་དུས་བྱའི་སྡོད་གནས་དང་གནས་སྤོའི་ལམ་ཐིག་གལ་ཆེན་ཞིག་ཡིན་ལ། སྲུང་སྐྱོབ་ཁུལ་བཙུགས་པ་ནས་བཟུང་། ལོ་ངོ་ཉི་ཤུ་ལྷག་གི་འཕེལ་རྒྱས་བརྒྱུད་སྲུང་སྐྱོབ་ས་ཁུལ་གྱིས་རིམ་བཞིན་ཐོན་ཁུངས་སྲུང་སྐྱོབ་ལམ་ལུགས་འཐུས་ཚང་དུ་བཏང་ནས། ཕྱོགས་ཡོངས་ཀྱི་རྟོག་འཇལ་མ་ལག་བཙུགས་ཏེ། རླན་སའི་ཐོན་ཁུངས་རྩ་ཆེན་ལ་བཀག་སྡོམ་རྣམ་པའི་དོ་དམ་ལག་བསྟར་བྱས་པས། ཁུལ་ཁོངས་ཀྱི་རི་སྐྱེས་སྲོག་ཆགས་སླར་གསོ་དང་རྒྱུད་སྤེལ་ཐུབ་པ་བྱུང་ཡོད།
