ཉེ་ཆར། སྤྱི་བདེ་པུའུ་ཡི་དྲ་བའི་བདེ་འཇགས་ཅུས་ཀྱིས་རྒྱལ་སྟོན་གུང་གསེང་ནང་ཚང་མ་ཕྱི་རུ་རྩེད་མོ་རྩེ་རུ་འགྲོ་བ་དང་ཆབས་ཅིག ངེས་པར་དུ་དུས་དང་རྣམ་པ་ཀུན་ཏུ་དོགས་ཟོན་བྱེད་དགོས་རྒྱུར། མི་སྒེར་གྱི་ཆ་འཕྲིན་བདེ་འཇགས་ལ་སྲུང་སྐྱོབ་བྱ་རྒྱུར་དོ་སྣང་བྱས་ནས་མི་སྒེར་གྱི་ཆ་འཕྲིན་ཕྱིར་གྱར་བའི་རྐྱེན་གྱིས་རང་ཉིད་ལ་རྙོག་དྲ་དང་གྱོང་གུན་མི་ཕོག་པ་བྱེད་དགོས་པའི་དྲན་སྐུལ་བྱས་པ་རེད། ཆ་འཕྲིན་འདི་དག་བསྐུར་མི་རུང་།
འཛིན་ཤོག་འདི་འདྲ་བསྐུར་མི་རུང་།
དཔེར་ན་མེ་འཁོར་སྤ་སེ་དང་། གནམ་གྲུའི་སྤ་སེ། གནམ་གྲུའི་བྱང་བུ་སོགས་བསྐུར་མི་རུང་། དེར་ཐོབ་ཐང་ལག་ཁྱེར་གྱི་ཨང་གྲངས་སོགས་མི་སྒེར་གྱི་ཆ་འཕྲིན་ཚུད་ཡོད་པས། མི་གཞན་གྱིས་ཚན་རྩལ་མཐོ་བའི་ལག་རྩལ་སྤྱད་དེ་ཆ་འཕྲིན་རྐུ་བའི་ཉེན་ཁ་ཡོད།
ལྡེ་མིག་གི་པར་བསྐུར་མི་རུང་།
ད་ཆ་པར་ལེན་ལག་རྩལ་ཡར་རྒྱས་ཆེན་པོ་ཡོད་པས་འདྲ་པར་ཐོག་གི་ཞིབ་ཕྲའི་གནས་ཚུལ་གསལ་པོར་མཐོང་ཐུབ། གལ་ཏེ་ཁྱིམ་གྱི་ལྡེ་མིག་ཕྱིར་བསྟན་པ་མ་ཟད་ལྡེ་མིག་གི་གྲུབ་ཆ་རྙོག་འཛིང་མིན་ཚེ། ཁྲིམས་འགལ་བས་འདྲ་པར་ལ་གཞིགས་ནས་ལྡེ་མིག་འདྲ་བཤུས་རྒྱག་་སྲིད།
གནས་ཡུལ་བསྐུར་མི་རུང་།
གྲོགས་ཚོམས་སུ་གནས་ཡུལ་གྱི་ཆ་འཕྲིན་ཡོད་པའི་པར་རིས་བསྐུར་ན་མི་སྒེར་གྱི་སྡོད་གནས་ཕྱིར་གྱར་སླ་བ་དང་། དགོས་མེད་ཀྱི་དཀའ་ཚེགས་འབྱུང་སྲིད།
ལག་ཁྱེར་གྱི་འདྲ་པར་བསྐུར་མི་རུང་།
ཐོབ་ཐང་ལག་ཁྱེར་དང་། ལམ་ཡིག ཁ་ལོ་པའི་ལག་ཁྱེར། རླངས་འཁོར་བྱང་བུའི་འདྲ་པར་སོགས་ཚང་མར་མི་སྒེར་གྱི་གསང་བ་གལ་ཆེན་ཚུད་ཡོད། བྱང་བུ་རྫུན་བཟོ་བྱེད་རིགས་སྔོན་འགོག་བྱ་ཆེད། དྲ་ཐོག་ཏུ་རླངས་འཁོར་བསྐུར་རྒྱུ་དགའ་པོ་ཡོད་ན་རླངས་འཁོར་བྱང་བུ་འགེབས་དགོས།
རྒན་རྒོན་དང་བྱིས་པའི་ཆ་འཕྲིན་སྲུང་སྐྱོབ་བྱེད་དགོས།
གྲོགས་ཚོམས་ནང་དུ་རྒན་རྒོན་དང་བྱིས་པའི་འདྲ་པར་དང་མིང་སོགས་བསྐུར་མི་རུང་། ཁྲིམས་འགལ་བས་ཆ་འཕྲིན་འདི་དག་སྤྱིད་སྲིད། གལ་ཏེ་འདྲ་པར་ཁྲོད་ཀྱི་ས་ཁམས་ཁྱད་ཆོས་མངོན་གསལ་ཡིན་ཚེ། ཐ་ན་ཁོ་ཚོ་ནམ་རྒྱུན་འགྲོ་སའི་གནས་ཀྱང་ཆ་བསྡུ་ཡ་བསྡུ་བྱས་ནས་ཤེས་སྲིད།
སྤྱི་སྤྱོདWiFiབེད་སྤྱོད་བྱེད་སྐབས་གཟབ་གཟབ་བྱེད་དགོས།
རབ་ཡིན་ན་ཡོང་ཁུངས་གསལ་པོ་ཡོད་པའི་WiFiའདེམས་དགོས། སྤྱི་བའི་WiFiཁོར་ཡུག་ཏུ་ཆ་འཕྲིན་གལ་ཆེན་ལ་ལྟ་ཞིབ་དང་ཨང་རྟགས་གལ་ཆེན་ཐོ་འགོད་དམ། ཡང་ན་དྲ་ཐོག་གི་གཏོང་སྤྲོད་སོགས་བྱེད་མི་རུང་། ཁྲིམས་འགལ་བས་རིན་མི་དགོས་པའི་WiFiབརྒྱུད་ནས་འཛད་སྤྱོད་པའི་གསང་བའི་ཆ་འཕྲིན་རྐུ་བར་སྔོན་འགོག་བྱེད་དགོས།
