ས་མདོས་ཆེན་མོ་འདི་ནི་ལོ་ལྟར་གྱི་བོད་ཟླ་བཅུ་གཅིག་པའི་ཚེས་ཉེར་གསུམ་ནས་བོད་ཟླ་བཅུ་གཉིས་པའི་ཚེས་གཅིག་བར་མཛད་སྲོལ་ཡོད་པ་དང་། ཐོག་མ་ཟླ་བཅུ་གཅིག་པའི་ཚེས་ཉེར་གསུམ་ཉིན་འཆམ་སྐུ་རྣམས་ཕྱོགས་སོ་སོའི་མགོན་ཁང་ནས་སྒྲུབ་ཁང་དུ་སྤྱན་འདྲེན་ཞུས་ཏེ་མགོན་པོའི་སྒྲུབ་པ་ཚོགས་པ་དང་། སྒྲུབ་མཆོད་ཉིན་རེ་བཞིན་འདོན་སྲོལ་དབྱངས་རྟ་མི་འདྲ་བའི་སྒོ་ནས་མགོན་པོའི་བསྟོད་ཚོགས་སྣ་ཚོགས་མཛད་སྲོལ་ཡོད་པ་དང་། ཚེར་ཉེར་དགུ་ཉིན་དངོས་སུ་འཆམ་རར་ཕེབས་ཏེ་གར་འཆམ་མཛད་སྲོལ་ཡོད་པ་ཡིན། མ་ཟད་དེ་ཉིན་སྤྱན་འདྲེན་གྱི་ཞལ་འདོན་དང་བསྟུན་ཏེ་ཆོས་སྐྱོང་མགོན་པའི་འཁོར་རུ་འདྲེན་སྡེ་བཞི་སྟེ། དགེ་མཁར་སིལ་ཐོགས་པ་དང་། སྔགས་ནག་བན་ཕུར་འཛིན་པ། བུད་མེད་འབར་མོ་ལྡིང་བ། སྐྱེས་པ་སྟག་ཆས་བརྒྱན་པ་བཅས་སྡེ་བཞི་ཕྱོགས་སོ་སོའི་གར་འཆམ་སྟངས་སྟབས་ཐུན་མོང་མ་ཡིན་པའི་གར་འཆམ་མཛད་པ་དང་ཟོར་གཏོར་འཕངས་ནས་སངས་རྒྱས་ཀྱི་བསྟན་པ་རིན་པོ་ཆེར་བར་དུ་གཅོད་པ་ཐམས་ཅད་དམིགས་མེད་དུ་ཞི་བ་དང་འཛམ་བུ་གླིང་འདིར་དམག་འཁྲུག་མུ་གེ་ལ་སོགས་པའི་མི་མཐུན་པ་ཀུན་ལས་རྣམ་པར་རྒྱལ་ཏེ་ཞི་བདེའི་དཔལ་ལ་སྤྱོད་པའི་སྨོན་པ་མཛད་ཀྱིན་ཡོད་པ་ཡིན། གནམ་གང་ཉིན་དད་ལྡན་མང་ཚོགས་ལ་ཚེ་དཔག་དུ་མེད་པའི་བཀའ་དབང་གནང་སྟེ་ལོ་གསར་པར་ནད་མེད་ཚེ་རིང་ཡོང་བའི་གསོལ་འདེབས་མཛད་པ་དང་མཐར་ཟླ་བཅུ་གཉིས་པའི་ཚེས་གཅིག་ཉིན་འཆམ་སྐུ་རྣམས་སྒྲུབ་ཁང་ནས་སོ་སོའི་མགོན་ཁང་ཁག་ཏུ་སྤྱན་འདྲེན་པ་ཡིན། སྐུ་འཆམ་དངོས་ཀྱི་ཉིན་གཡས་གཡོན་ཡུལ་ལུང་མང་པོའི་མང་ཚོགས་ཁྲི་ཕྲག་མཇལ་ཞུར་བཅར་སྲོལ་ཡོད་པ་དང་། སྤྱན་འདྲེན་ཉིན་གཉིས་ལ་ས་སྐྱའི་སྡེ་དམངས་མཉམ་དུ་བཅར་ནས་ལོ་གཅིག་གི་གེགས་བར་ཐམས་ཅད་ཞི་བའི་སྨོན་ལམ་འདེབས་སྲོལ་ཡོད་པ་ཡིན། ཁ་རྒྱུན་དུའང་ས་སྐྱའི་མདོས་ཆེན་མཇལ་བྱུང་། གེགས་དང་བར་ཆད་ཞི་སོང་ཞེས་པའི་བཤད་རྒྱུན་ཡོད་པ་རེད།
