མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་ཕྱོགས་ཡོངས་དང་གཏིང་ཟབ་ངང་སྤེལ་དགོས།

          —— མཐུན་སྒྲིལ་བརྟན་ལྷིང་ནི་བདེ་སྐྱིད་དང་། ཁ་ཕྲལ་ཟང་ཟིང་ནི་ཆག་སྒོ་ཡིན་པའི་སྐོར་གྱི་རིམ་སྤེལ་དཔྱད་གཏམ་དྲུག་པ།
          ཆེས་རླབས་ཆེ་བའི་སྟོབས་ཤུགས་ནི་སེམས་མཐུན་མཉམ་ཤུགས་དང་། ཆེས་སྲ་ཞིང་བརྟན་པའི་རྨང་རྡོ་ནི་མི་རིགས་མཐུན་སྒྲིལ་ཡིན།
          རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པའི་ཐོག《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་རྒྱུའི་སྐོར་གྱི་སྲོལ་ཡིག》ལ་མོས་ཤོག་ཆ་ཚང་ཐོག་ནས་གྲོས་འཆམ་བྱུང་སྟེ་འདི་ལོའི་ཟླ་5ཚེས་1ཉིན་ནས་བཟུང་དངོས་སུ་ལག་ལེན་བསྟར་རྒྱུ་རེད། རང་ལྗོངས་ཀྱིས་རང་སྐྱོང་ལྗོངས་ཀྱི་རིམ་ངོས་ནས་མི་རིགས་མཐུན་སྒྲིལ་གྱི་ལས་དོན་ཐད་ས་གནས་རང་བཞིན་གྱི་ཁྲིམས་སྲོལ་ཐོག་མ་བཏོན་པ་འདིར་ལྟ་སྐབས། ལོ་ལྟར་གྱི་ཟླ་9པ་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དྲིལ་བསྒྲགས་བྱེད་སྒོའི་ཟླ་བར་གཏན་འཁེལ་བྱེད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སོགས་དྲིལ་བསྒྲགས་སློབ་གསོའི་ནང་དོན་གཙོ་བོར་གཏན་འཁེལ་བྱེད་པ། མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་གཏོད་པའི་དམིགས་ཚད་ལས་འགན་དང་། དམིགས་ཚད་མ་ལག འགན་ལེན་བྱ་ཐབས་སོགས་གཏན་འབེབས་བྱེད་པ། མི་རིགས་མཐུན་སྒྲིལ་ཡར་ཐོན་བྱ་གཞག་ཁྲོད་ཀྱི་མི་རིགས་ཁག་དང་ལས་རིགས་ཁག་གི་མི་སྣའི་དགེ་མཚན་ལྡན་པའི་ནུས་པར་སྔར་བས་སྐུལ་འདེད་གཏོང་བ་བཅས་གང་ཞིག་ཡིན་རུང་། ཚང་མ་ཏང་ཀྲུང་དབྱང་གི་དགོངས་དོན་དང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་དང་རྦད་དེ་མཐུན་པ་དང་། རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་འཕེལ་རྒྱས་ཀྱི་ངོ་བོའི་བླང་བྱ་དང་ཡོངས་སུ་མཐུན་པ་ཞིག་རེད། དེར་མངོན་གསལ་དོད་པའི་དུས་རབས་ཀྱི་ཁྱད་ཆོས་དང་རིན་ཐང་ཕྱོགས་སྟོན་ལྡན་ཡོད་པས། ངེས་པར་དུ་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་གཏོད་པ་དང་འཕེལ་རྒྱས་ལ་ཁྲིད་སྟོན་དང་སྐུལ་འདེད་གཏོང་ཆེད་སྒུལ་ཤུགས་ཆེན་པོ་གཅིག་སྒྲིལ་དང་རྨང་གཞི་བརྟན་པོ་འདིང་ངེས་ཡིན།
          མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་གཏོད་པ་ནི་ཕུགས་འཕེར་གྱི་ཇུས་གཞི་འདིང་བ་དང་། རྩ་བ་བརྟན་ཚུགས་ཀྱི་བྱ་ཐབས་སྤྱོད་པ། ཡུན་རིང་བདེ་འཁོད་ཀྱི་རྣམ་པ་གཏོད་པ། ཡུན་རིང་བཅོས་སྐྱོང་གི་བྱ་གཞག་གཏོད་པ་བཅས་ཀྱི་བྱ་ཐབས་གལ་ཆེན་ཞིག་རེད། དུས་ཡུན་རིང་པོའི་ནང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཏང་གི་མི་རིགས་ལས་དོན་གྱི་མཛད་ཕྱོགས་སྲིད་ཇུས་བློ་བརྟན་འགྱུར་མེད་ངང་ལག་བསྟར་དོན་འཁྱོལ་བྱས་ནས་མི་རིགས་མཐུན་སྒྲིལ་ལ་ཤུགས་སྣོན་རྒྱག་པ་དེ་འཐབ་ཇུས་རང་བཞིན་དང་། རྨང་གཞིའི་རང་བཞིན། ཡུན་རིང་རང་བཞིན་བཅས་ཀྱི་ལས་དོན་ལ་བརྩི་རྒྱུ་མཐའ་འཁྱོངས་བྱེད་པ་དང་། མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་ཏན་ཏིག་བཏང་བས། ལྗོངས་ཡོངས་སུ་མི་རིགས་ཁག་སྤུན་ཉེ་འཆམ་མཐུན་དང་། ལྟ་རེས་སྐྱོང་རེས། འཆམ་མཐུན་མཉམ་གནས། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ཀྱི་རྣམ་པ་བཟང་པོ་མངོན་ཡོད། དུས་རབས་གསར་པར་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་གཏོང་བར། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་རྒྱུ་མཐའ་འཁྱོངས་ཀྱིས་མི་རིགས་ལས་དོན་དང་མཐའ་སྐྱོང་བོད་བརྟན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། 《སྲོལ་ཡིག》གི་དགོངས་དོན་རྒྱུན་འཛིན་བྱེད་པ། 《སྲོལ་ཡིག》ནང་གི་བཀོད་སྒྲིག་དང་ཞིབ་ཕྲའི་བྱ་ཐབས་ལ་བརྩི་སྲུང་ནན་པོ་ཞུ་བ། མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་གཏོད་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ལ་སྐུལ་འདེད་གཏོང་བའི་དམ་འཛིན་བྱ་གཞི་གལ་ཆེན་ལ་བརྩི་བ། རྒྱུན་སྲིང་ལྷོད་མེད་དང་སྙིང་རུས་གཏན་འཁྱོངས་བཅས་བྱས་ནས་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་གི་རྣམ་པ་གསར་པ་རྒྱུན་ཆད་མེད་པར་གཏོད་དགོས།
           བཅའ་ཁྲིམས་ཀྱི་ནུས་པ་དེ་ལག་བསྟར་ལ་ཐུག་པ་དང་། ལམ་ལུགས་ཀྱི་ནུས་པ་དེ་ལག་ལེན་བསྟར་རྒྱུར་ཐུག་ཡོད། མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་ཕྱོགས་ཡོངས་དང་གཏིང་ཟབ་ངང་སྤེལ་བར། ངེས་པར་དུ་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་བཏང་ནས་མི་རིགས་ཁག་གི་མི་དམངས་ཀྱི་ཐུན་མོང་གི་བསམ་པའི་ཁྱིམ་གཞིས་བསྐྲུན་རྒྱུ་གཅིག་འདོམས་སུ་བྱེད་དགོས། རིམ་པ་ཁག་དང་སྡེ་ཚན་ཁག་གིས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དར་སྤེལ་ཤུགས་ཆེན་བཏང་ནས་ཀྲུང་ཧྭའི་རིག་གནས་ནི་ཐོག་མཐའ་བར་གསུམ་དུ་བོད་ཀྱི་མི་རིགས་ཁག་གི་བརྩེ་དུང་གི་བརྟེན་ས་དང་། སེམས་ཆགས་ས། བསམ་པའི་ཁྱིམ་གཞིས་བཅས་ཡིན་པ་དང་། བོད་ཀྱི་རིག་གནས་ནི་ཀྲུང་ཧྭ་རིག་གནས་ཀྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པའི་བསམ་བློ་མང་ཚོགས་ཀྱི་སེམས་སུ་གཏིང་ཟབ་ཟུག་པ་བྱེད་དགོས། རང་ལྗོངས་ཀྱིས་མི་རིགས་མཐུན་སྒྲིལ་ཡར་ཐོན་གཏོད་པའི་བྱེད་སྒོ་སྤེལ་བའི་གཡུར་ཟའི་གྲུབ་འབྲས་ལ་གཞིགས་ནས། མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་། ཐུན་མོང་ཐོག་དར་རྒྱས་གོང་འཕེལ་ཡོང་བའི་བརྗོད་དོན་གཙོ་བོ་སྟངས་འཛིན་ནན་པོ་བྱེད་པ་དང་། ལས་ཁུངས་དང་། ཁེ་ལས། སྡེ་ཁུལ། ཤང་དང་གྲོང་རྡལ། གྲོང་ཚོ་གྲོང་ལྷན། སློབ་གྲྭ ལན་ཤོག ཆོས་ལུགས་བྱེད་སྒོ་སྤེལ་ཡུལ་སོགས་སུ་མི་རིགས་མཐུན་སྒྲིལ་དཔེ་བཟང་ཁུལ་གཏོད་པའི་བྱེད་སྒོ་སྤེལ་བ། མི་རིགས་ཁག་གི་ལས་བྱེད་པ་དང་མང་ཚོགས་ཚོས“ཁ་འབྲལ་ཐབས་མེད་པ་གསུམ”གྱི་བསམ་བློ་བརྟན་པོ་འཛུགས་པར་སློབ་གསོ་ཁྲིད་སྟོན་བྱེད་པ། མེས་རྒྱལ་གཅིག་གྱུར་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་པའི་མི་རིགས་ཁག་གི་མི་དམངས་ཀྱི་བསམ་བློའི་རང་རྟོགས་དང་། ཆབ་སྲིད་ཀྱི་རང་རྟོགས། བྱ་སྤྱོད་ཀྱི་རང་རྟོགས་བཅས་རྒྱུན་ཆད་མེད་པར་ཆེ་རུ་གཏོང་བ། མི་རིགས་ཁག་གི་མི་དམངས་ཀྱི“མོས་སེམས་ལྔ”རྒྱུན་ཆད་མེད་པར་ཆེ་རུ་གཏོང་བ། མི་རིགས་ཁག་གི་མི་དམངས་འོ་ཆུ་ལྟར་མཉམ་འདྲེས་དམ་ཟབ་ཡོང་བར་སྐུལ་འདེད་གཏོང་བ་བཅས་བྱས་ཏེ་བསྟུན་མཁས་རང་བཞིན་དེ་བས་ཆེ་བ་དང་གོང་བུ་འགྲིལ་ཤུགས་དེ་བས་ཆེ་བའི་ལས་དབང་གཅིག་མཐུན་འདུས་གྲུབ་ལ་འགྱུར་བ་བྱེད་དགོས།
          མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་ཕྱོགས་ཡོངས་དང་གཏིང་ཟབ་ངང་སྤེལ་བར། ངེས་པར་དུ་མི་རིགས་ཁག་གི་མི་དམངས་དབར་སྤེལ་རེས་དང་། འགྲོ་འོང་། མཉམ་འདྲེས་བཅས་ཡོང་བའི་ལས་དོན་ཞིབ་ཚགས་དང་། གཏིང་ཟབ། ཏན་ཏིག་བཅས་སྤེལ་དགོས། མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་དཔེ་མཚོན་སྐྱེད་སྲིང་ཤུགས་ཆེན་བྱས་ཏེ་རྨང་གཞི་བརྟན་དུ་གཏོང་བ་དང་། དཔེ་མཚོན་འོས་སྦྱོར་བྱེད་པ། ཤུགས་རྐྱེན་ཆེ་རུ་གཏོང་བ་བཅས་ལ་ཤུགས་རྒྱག་པ་དང་། ཉེ་འགྲམ་གྱི་མི་དང་གནས་ཚུལ་ལ་བརྟེན་ནས་མི་རྣམས་ཀྱི་ཡིད་དབང་འགུག་པ་དང་མི་རྣམས་ལ་ལྕག་སྐུལ་བྱེད་པ། མིག་ལྟོས་ཡར་འདྲེན་ལ་ཁྲིད་སྟོན་བྱེད་པ། སྔོན་ཐོན་དཔེ་མཚོན་གྱི་དཔེ་སྟོན་སྣེ་ཁྲིད་ཀྱི་ནུས་པ་འདོན་སྤེལ་ནུས་ལྡན་བྱེད་པ། ཁྱབ་ཁོངས་མི་འདྲ་བ་དང་། ཚན་པ་མི་འདྲ་བ། རིམ་པ་མི་འདྲ་བ་བཅས་སུ་དཔེ་མཚོན་དེ་བས་མང་བ་ཐོན་པའི་སྐུལ་ལྕག་བྱེད་དགོས། རྒྱུན་གཏན་གྱི་དོན་དག་ཆུང་ཙག་ནས་འགོ་བརྩམས་ཏེ་མི་རིགས་ཁག་ཐུན་མོང་ཐོག་ཐོན་སྐྱེད་དང་འཚོ་བ་སྐྱེལ་བ་དང་ལས་ཀ་དང་སློབ་སྦྱོང་བྱེད་རིང་ཕན་ཚུན་ཤེས་རྟོགས་དང་། ཕན་ཚུན་བརྩི་འཇོག ཕན་ཚུན་བཟོད་སྒོམ། ཕན་ཚུན་ཡི་རངས། ཕན་ཚུན་སློབ་སྦྱོང་། ཕན་ཚུན་རོགས་རམ་བཅས་ཡོང་བར་བྱེད་པ་དང་། བརྩེ་སེམས་རྒྱུན་ཆད་མེད་པར་ཟབ་ཏུ་འགྲོ་བར་ཁྲིད་སྟོན་བྱས་ནས་མི་རིགས་ཁག་གི་རིག་གནས་དང་ཧེ་བག་ལ་བརྩི་འཇོག་དང་བསྟུན་མཁས་སྣ་མང་གི་སྤྱི་ཚོགས་ཀྱི་ཁོར་ཡུག་ཅིག་གཏོད་དགོས།
          མི་རིགས་མཐུན་སྒྲིལ་ཡར་ཐོན་གཏོད་པའི་ལས་དོན་ཕྱོགས་ཡོངས་དང་གཏིང་ཟབ་ངང་སྤེལ་བར། ངེས་པར་དུ་རྩ་འཛུགས་ཀྱི་འགན་ལེན་བྱེད་ཤུགས་སྔར་བས་ཆེ་རུ་གཏོང་དགོས། རིམ་པ་ཁག་དང་སྡེ་ཚན་ཁག་གིས་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་གཏོད་པའི་ལོ་རྒྱུས་ཀྱི་དོན་སྙིང་དང་དངོས་ཡོད་ཀྱི་དོན་སྙིང་གལ་ཆེན་ལ་ངོས་འཛིན་གང་ལེགས་བྱས་ཏེ་འགན་འཁྲི་ཁུར་སེམས་དང་ལས་འགན་སྒྲུབ་སེམས་ཆེ་རུ་གཏོང་བ་དང་། འགོ་འཛུགས་ས་དང་ཤུགས་རྒྱག་ས་གནད་འཁེལ་འཚོལ་བ། ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་གཞིར་བཟུང་གཏོད་འཛུགས་ལས་དོན་ལ་སྤྱི་འདོམས་སྐུལ་འདེད་གཏོང་བ། ལས་ཀའི་ལམ་སྲོལ་འཛུགས་པ། འགན་འཁྲི་ཁག་བགོས་གསལ་པོ་བཟོ་བ། མི་རིགས་མཐུན་སྒྲིལ་ཡར་ཐོན་གཏོད་རྒྱུ་དེ་སྲོག་རྩ་ལྟ་བུར་བརྩིས་ནས་འཕེལ་རྒྱས་དང་། བརྟན་ལྷིང་། སྤྱི་ཚོགས་བཅོས་སྐྱོང་བཅས་ཕྱོགས་གང་ཅིའི་ཐད་ཁྱབ་པ་བྱས་ཏེ་མི་རིགས་མཐུན་སྒྲིལ་ཡར་ཐོན་གཏོད་པའི་མཉམ་ཤུགས་ཆེ་རུ་ཏན་ཏིག་གཏོང་དགོས། ཏང་གི་མི་རིགས་ཀྱི་རིགས་པའི་གཞུང་ལུགས་ཀྱི་སྲིད་ཇུས་ཁོང་དུ་ཆུད་པ་དང་། མི་རིགས་ལས་དོན་ལ་རྒྱུས་མངའ་ཆེ་བ། མི་རིགས་མཐུན་སྒྲིལ་ལག་ལེན་བསྟར་མཁན་བཅས་ཀྱི་ལས་བྱེད་པ་གསོ་སྐྱོང་བྱེད་པ་དང་། འདེམས་སྒྲུག བེད་སྤྱོད་བཅས་ཧུར་ཐག་བྱས་ཏེ་ལས་བྱེད་པ་དང་ཤེས་ལྡན་མི་སྣ་གསོ་སྐྱོང་འདེམས་སྒྲུག་དང་། གནས་སྦྱར་སྦྱོང་བརྡར། སྤེལ་རེས་བཅས་ཀྱི་ལམ་སྲོལ་འཐུས་སྒོ་ཚང་དུ་གཏོང་དགོས། མི་རིགས་མཐུན་སྒྲིལ་ཡར་ཐོན་ལས་དོན་ཁྲོད་ཀྱི་བཟོ་ཚོགས་དང་། བུད་མེད་མཉམ་འབྲེལ་ལྷན་ཚོགས། གུང་གཞོན་སྡེ་ཚོགས་བཅས་དང་དེ་བཞིན་ཁེ་ལས་བྱ་གཞག་ཚན་པ་དང་། གཞི་རིམ་རྩ་འཛུགས། སྤྱི་དམངས་སྨྱན་སྦྱོར། རིམ་པ་ཁག་དང་རིགས་ཁག་གི་སློབ་གླིང་དང་སློབ་གྲྭ་སོགས་ཀྱི་ནུས་པ་འདོན་སྤེལ་གང་ལེགས་བྱས་ཏེ་ཏང་ཨུད་ཀྱིས་གཙོ་ཁྲིད་བྱེད་པ་དང་། སྲིད་གཞུང་གིས་འགན་འཁུར་བ། གོང་འོག་མཉམ་འགུལ་བྱེད་པ། ཚང་མ་ཞུགས་པ་བཅས་ཀྱི་གཏོད་འཛུགས་ལས་དོན་གྱི་བཀོད་པ་ཞིག་ཆགས་པར་སྐུལ་འདེད་གཏོང་དགོས།
          “འཆམ་མཐུན་བྱུང་ན་དོན་དག་འགྲུབ། མཐུན་སྒྲིལ་བྱས་ན་སྟོབས་ཤུགས་འཕེལ”ཞེས་པ་ལྟར། མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ཡོང་བར་བྱེད་པ་ནི་ཀྲུང་ཧྭ་མི་རིགས་རྩ་བ་ཚུགས་ས་དང་ཚེ་སྲོག་གི་བརྟེན་ས་ཞིག་དང་། དེང་རབས་ཀྲུང་གོའི་ཕུགས་འདུན་དོན་གཉེར་གྱི་སྟོབས་ཤུགས་ཀྱི་འབྱུང་རྩ་དང་རེ་བ་གནས་ས་ཞིག་ཡིན། རང་ཉིད་ཀྱི་མིག་འབྲས་ལ་གཅེས་སྤྲས་བྱེད་པ་བཞིན་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་འཛིན་བྱེད་པ་བཞིན་མི་རིགས་མཐུན་སྒྲིལ་ལ་གཅེས་འཛིན་བྱས་ཏེ་འོ་ཆུ་ལྟར་མཉམ་འདྲེས་བྱུང་ཚེ། ང་ཚོས་མི་རིགས་མཐུན་སྒྲིལ་གྱི་དྲང་ནུས་ཆེན་པོ་གཅིག་ཏུ་བསྒྲིལ་ནས་བོད་ཀྱི་བདེ་སྐྱིད་དང་མཛེས་སྡུག་ལྡན་པའི་འབྱུང་འགྱུར་མཉམ་དུ་གཏོད་ཐུབ་ངེས་རེད།