བྱེད་ཐབས་དངོས་བཏོན་ནས་ལས་ཞུགས་ལས་གཏོད་ཀྱི་གསོན་ཤུཌ་འཕེལ་བར་བྱེད་དགོས།

          ལྷ་ས་གྲོང་ཁྱེར་གྱི་ལས་ཞུགས་དང་ལས་གཏོད་ཀྱི་གཟིགས་སྐྱོང་སྲིད་ཇུས་དང་བྱེད་ཐབས་ཁག་ལག་བསྟར་གཏིང་ཟབ་བྱས་པ་དང་བསྟུན་ནས། སློབ་ཆེན་སློབ་ཐོན་སློབ་མ་དེ་བས་མང་བས་རང་ཉིད་ཀྱི་ལས་གནས་ཐོག་འབད་བརྩོན་ཆེན་པོས་མི་ཚེའི་རིན་ཐང་དང་ཕུགས་བསམ་མངོན་དུ་གྱུར་བར་བྱས་ཡོད། སྨྱུག་འཛིན་པས་ངོས་འཛིན་བྱས་དོན། མིག་སྔར། “གཉིས་གཏོད”དང་ལས་རིགས་ཁག་མཉམ་འདྲེས་འཕེལ་རྒྱས་གཏིང་ཟབ་བྱུང་བ་དང་། ཁྲོམ་རའི་དགོས་མཁོ་དང་སྤྱི་ཚོགས་གསར་གཏོད་ཀྱི་ཐོན་ཁུངས་གནད་སྨིན་སྦྲེལ་མཐུད་བྱུང་ནས་ཁྲོམ་རའི་གསོན་ཤུགས་དང་སྤྱི་ཚོགས་ཀྱི་གསར་གཏོད་འཇོན་ཐང་འཕེལ་བར་བྱས་ཡོད། སླད་ཕྱིན་བྱེད་ཐབས་དངོས་འདོན་རྒྱུ་མུ་མཐུད་མཐའ་འཁྱོངས་བྱས་ནས་ལས་ཞུགས་ལས་གཏོད་ཀྱི་གསོན་ཤུགས་དེ་བས་མང་བ་འཕེལ་བར་བྱེད་དགོས།
          ཞབས་ཞུའི་ཐོན་ལས་དང་ཤེས་ལྡན་པ་གསོ་སྐྱོང་ཟུང་འབྲེལ་བྱ་རྒྱུ་མུ་མཐུད་མཐའ་འཁྱོངས་བྱེད་དགོས་ཤིང་། སློབ་གཉེར་གྱི་སྒྲིག་གཞི་ལེགས་སྒྲིག་བྱས་ཏེ། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དགོས་མཁོ་དང་འཚམ་པ་དང་ཐོན་ལས་དང་ཁེ་ལས་འཕེལ་རྒྱས་ཀྱི་དགོས་མཁོ་སྐོང་ཐུབ་པའི་མཐོ་སློབ་སློབ་ཐོན་སློབ་མ་གསོ་སྐྱོང་ནུས་ལྡན་བྱེད་དགོས་པ་དང་། མཐོ་སློབ་སློབ་ཐོན་སློབ་མར་ཕན་པའི་ཁྲོམ་རའི་ལས་ཞུགས་དང་། རང་བརྟེན་ལས་གཏོད། གཞི་རིམ་ལ་ཁ་ཕྱོགས་པ་བཅས་ཀྱི་ཁོར་ཡུག་ཡག་པོ་ཞིག་བཏོད་དེ། མཐོ་སློབ་སློབ་ཐོན་སློབ་མ་དེ་བས་མང་བ་གཞི་རིམ་དུ་གཞི་ཚུགས་པ་དང་། ཁེ་ལས་ལ་ཞབས་ཞུ། རང་བརྟེན་ལས་གཏོད་བཅས་ལ་རྒྱབ་སྐྱོར་བྱེད་དགོས།
          ཁྲོམ་རའི་གཙོ་ཁྲིད་དང་སྲིད་གཞུང་གི་སྐུལ་འདེད་ཟུང་འབྲེལ་བྱ་རྒྱུ་མུ་མཐུད་མཐའ་འཁྱོངས་བྱེད་དགོས་ཤིང་། མི་ཤུགས་ཐོན་ཁུངས་བཀོད་སྒྲིག་ཁྲོད་ཀྱི་ཁྲོམ་རའི་ཐག་གཅོད་རང་བཞིན་གྱི་ནུས་པ་འདོན་སྤེལ་གང་ལེགས་བྱས་ཏེ། སྲིད་གཞུང་གི་སྐུལ་འདེད་ནུས་པ་དེ་བས་ལེགས་པའི་སྒོ་ནས་འདོན་སྤེལ་བྱས་ཏེ། མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ལ་སྐུལ་འདེད་གཏོང་དགོས།
          སྲིད་ཇུས་ཀྱི་རྒྱབ་སྐྱོར་དང་ཞབས་ཞུ་འགན་ལེན་ཟུང་འབྲེལ་བྱ་རྒྱུ་མུ་མཐུད་མཐའ་འཁྱོངས་བྱེད་དགོས་ཤིང་། ལྷུག་ཏུ་གཏོང་ཐུབ་རིགས་ལྷུག་ཏུ་གཏོང་བ་དང་རྩ་ཆག་གཏོང་ཐུབ་རིགས་རྩ་ཆག་གཏོང་བའི་རྩ་དོན་གཞིར་བཟུང་། མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ལ་རྒྱབ་སྐྱོར་བྱེད་ཤུགས་ཆེ་རུ་བཏང་ནས་ནོར་ཁྲལ་དང་། དངུལ་རྩ། སྤྱི་ཚོགས་འགན་བཅོལ་སོགས་ཀྱི་སྲིད་ཇུས་དང་བྱེད་ཐབས་སྔར་བས་འཐུས་སྒོ་ཚང་དུ་གཏོང་དགོས་པ་དང་། ལས་ཞུགས་ལས་དོན་གྱི་འགོ་ཁྲིད་ཚོགས་ཆུང་དང་མཐོ་སློབ་སློབ་ཐོན་སློབ་མའི་ལས་ཞུགས་མཉམ་ཞུགས་ཚོགས་འདུའི་ལམ་ལུགས་ཀྱི་ནུས་པ་འདོན་སྤེལ་གང་ལེགས་བྱས་ཏེ། མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ཀྱི་ཞབས་ཞུ་འགན་ལེན་གྱི་ལམ་སྲོལ་འཐུས་སྒོ་ཚང་དུ་གཏོང་དགོས།

རྩོམ་སྒྲིག་པ། བདེ་སྒྲོལ།