བརྗིད་ཉམས་ཀྱི་ལོ་རྒྱུས་ལམ་ཚད། རླབས་ཆེན་གྱི་གྲུབ་འབྲས་ཆེ་མོ།

          ཟླ་3པའི་ཚེས་25ཉིན་གྱི《བོད་ལྗོངས་ཉིན་རེའི་ཚགས་པར》དུ་བོད་ལྗོངས་ཉིན་རེའི་ཚགས་པར་གྱི་དཔྱད་གཏམ་མཁན་གྱིས་བོད་ལ་དམངས་གཙོའི་བཅོས་སྒྱུར་བྱས་ནས་ལོ་61འཁོར་བར་དྲན་གསོ་ཞུ་བའི་དཔྱད་གཏམ་གཉིས་པ《བརྗིད་ཉམས་ཀྱི་ལོ་རྒྱུས་ལམ་ཚད། རླབས་ཆེན་གྱི་གྲུབ་འབྲས་ཆེ་མོ》ཞེས་པའི་རྩོམ་ཡིག་སྤེལ་འདུག
          རྩོམ་ཡིག་ནང་བསྟན་དོན། རླབས་ཆེན་གྱི་འཕོ་འགྱུར་དང་། འོད་སྟོང་འབར་བའི་གྲུབ་འབྲས་ལ་སྐྱེ་བོ་ཀུན་གྱིས་དོ་སྣང་བྱེད། ལོ་61གི་གོང་དུ་གནམ་ས་བླ་འོག་ཏུ་འགྱུར་བ་ལྟ་བུའི་དམངས་གཙོའི་བཅོས་སྒྱུར་གྱིས་བོད་རྙིང་པའི་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ཞིང་བྲན་ལམ་ལུགས་རྦད་དེ་མེད་པ་བཟོས་ཏེ། ཞིང་བྲན་དང་བྲན་གཡོག་ཁྲི་ཚོ་བརྒྱར་བཅིངས་འགྲོལ་ཐོབ་པ་དང་ཁོང་ཚོར་འཚོ་བ་གསར་པ་སྐྱེལ་རྒྱུ་བྱུང་ནས་བོད་མི་དམངས་ཀྱིས་སྤྱི་ཚོགས་རིང་ལུགས་ཀྱི་ཡངས་ཤིང་རྒྱ་ཆེ་བའི་འགྲོ་ལམ་ཐོག་གོམ་ཞེང་ཆེན་པོས་མདུན་སྐྱོད་བྱས་ཏེ་རྒྱང་སྐྱོད་གསར་པ་བྱེད་འགོ་ཚུགས། ལོ་61རིང་ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་སྒེར་སེམས་མེད་པའི་རོགས་སྐྱོར་འོག་བོད་ཀྱི་མི་རིགས་ཁག་གི་མི་དམངས་ཀྱིས་ལྟ་རེས་སྐྱོང་རེས་དང་དྲིན་ཚོར་གྱི་སྒོ་ནས་དཔའ་མཛངས་རྟུལ་ཕོད་ངང་མདུན་དུ་བསྐྱོད་དེ། བྱ་གཞག་ཁག་དབྱར་མཚོ་རྒྱས་པ་བཞིན་གོང་དུ་འཕེལ་བ་དང་ཕྱོགས་ཡོངས་ནས་ཡར་རྒྱས་ཡོང་བར་སྐུལ་འདེད་བཏང་བས་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་སྟེ། མཐུན་སྒྲིལ་དང་། དམངས་གཙོ། འབྱོར་ཕྱུག ཤེས་དཔལ། ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་ཞིག་འཛམ་གླིང་གི་ཡང་རྩེར་འགྱིང་ངེར་གནས་ཡོད།
          རྩོམ་ཡིག་ནང་བསྟན་དོན། དམངས་གཙོའི་བཅོས་སྒྱུར་བྱས་པ་ལས་བོད་འདི་ཉིད་དར་རྒྱས་གོང་འཕེལ་གྱི་ལམ་བུའི་ཐོག་བསྐྱོད་ཡོད། ལམ་བུ་དེའི་ཐོག་བོད་ཀྱི་མི་རིགས་ཁག་གི་མི་དམངས་ཀྱིས་ཐོག་མཐའ་བར་གསུམ་དུ་སྤྱི་ཚོགས་ཀྱི་འགལ་ཟླ་གཙོ་བོ་སྟངས་འཛིན་ནན་པོ་བྱས་ནས་ཐོན་སྐྱེད་ནུས་ཤུགས་རྒྱུན་ཆད་མེད་པར་བཅིངས་འགྲོལ་དང་གོང་འཕེལ་བཏང་སྟེ། དཔལ་འབྱོར་དང་སྤྱི་ཚོགས་ཀྱི་བྱ་གཞག་ཁག་ལ་གཡུར་དུ་ཟ་བའི་གྲུབ་འབྲས་ཐོབ་རྒྱུར་སྐུལ་འདེད་བཏང་ཡོད།
           རྩོམ་ཡིག་ནང་བསྟན་དོན། དམངས་གཙོའི་བཅོས་སྒྱུར་བྱས་པ་ལས་བོད་འདི་ཉིད་ཡུན་རིང་བདེ་འཁོད་ཀྱི་ལམ་བུའི་ཐོག་བསྐྱོད་ཡོད། ལམ་བུ་དེའི་ཐོག་བོད་ཀྱི་མི་རིགས་ཁག་གི་མི་དམངས་ཀྱིས་ཐོག་མཐའ་བར་གསུམ་དུ་བོད་ཀྱི་སྤྱི་ཚོགས་ཀྱི་དམིགས་བསལ་འགལ་ཟླ་སྟངས་འཛིན་ནན་པོ་བྱས་ནས་བཀས་བཀོད་རྒྱུད་འཛིན་ཞིང་བྲན་བདག་པོའི་གྲལ་རིམ་གྱི་རོ་ལངས་ཀྱི་སྟོབས་ཤུགས་ལྷག་འཕྲོས། བོད་དུ་སྤྱི་ཚོགས་ཟང་ཟིང་བཟོ་བའི་གྲལ་རིམ་གྱི་རྨང་གཞི་རྩ་བཀོག་བཏང་བ་དང་འབྲེལ་རྒྱུན་སྲིང་ལྷོད་མེད་ངང་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་བྱས་ནས་ཡུན་རིང་བདེ་འཁོད་ཀྱི་ལམ་ཆེན་ཐོག་སྐྱོད་འགོ་ཚུགས་ཡོད།
           རྩོམ་ཡིག་ནང་བསྟན་དོན། དམངས་གཙོའི་བཅོས་སྒྱུར་བྱས་པ་ལས་བོད་མི་དམངས་རྣམས་བདེ་སྐྱིད་ཁམས་བདེའི་ལམ་བུའི་ཐོག་བསྐྱོད་ཡོད། ལམ་བུ་དེའི་ཐོག་བོད་ཀྱི་མི་རིགས་ཁག་གི་མི་དམངས་ཀྱིས་ཉིན་རེ་བཞིན་ཕུན་སུམ་ཚོགས་སུ་འགྲོ་བཞིན་པའི་དེང་རབས་ཀྱི་ཤེས་དཔལ་གྲུབ་འབྲས་ལོངས་སྤྱོད་གང་ལེགས་ཐུབ་པ་དང་། བདེ་སྐྱིད་དང་མཛེས་སྡུག་ལྡན་པའི་འཚོ་བར་བཅངས་པའི་རེ་འདོད་དེ་རིམ་བཞིན་མངོན་འགྱུར་བྱུང་ཡོད། དམངས་གཙོའི་བཅོས་སྒྱུར་བྱས་ནས་ལོ་61སོང་རིང་། བོད་ཀྱི་མི་རིགས་ཁག་གི་མི་དམངས་ཀྱི་འཚོ་བའི་ཆ་རྐྱེན་ཕྱོགས་ཡོངས་ནས་འཐུས་སྒོ་ཚང་དུ་ཕྱིན་པ་དང་། འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་སོང་བ། བདེ་སྐྱིད་སྟོན་གྲངས་མཐོ་རུ་ཤུགས་ཆེན་ཕྱིན་པ་བཅས་བྱུང་ཡོད།
           རྩོམ་ཡིག་ནང་བསྟན་དོན། བརྗིད་ཉམས་ལྡན་པའི་ལོ་རྒྱུས་ལམ་ཚད་ཀྱིས་འགྱུར་ལྡོག་ཆེན་པོའི་དཔང་པོ་བྱེད་ཐུབ་པ་དང་། རླབས་ཆེན་གྲུབ་འབྲས་ཀྱིས་གངས་ལྗོངས་ས་མཐོར་ཕན་བདེ་བསྐྲུན་ཡོད། ལོ་61རིང་གི་བོད་ཀྱི་སྤྱིར་བཏང་མིན་པའི་འཕེལ་རྒྱས་ཀྱི་ལོ་རྒྱུས་ལམ་ཚད་དང་། མངོན་འགྱུར་བྱུང་བའི་རླབས་ཆེན་གྱི་མཆོང་སྐྱོད། འོད་སྟོང་འབར་བའི་གྲུབ་འབྲས་བཅས་ནི། ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་རྒྱལ་ཡོངས་མི་དམངས་ཀྱི་ཤུགས་ཆེའི་རྒྱབ་སྐྱོར་ལས་བྱུང་བ་ཞིག་ཡིན་པ་དང་། དེ་ཐོག་ནས་སྤྱི་ཚོགས་རིང་ལུགས་ལམ་ལུགས་ཀྱི་འགྲན་ཟླ་བྲལ་བའི་ཁྱད་འཕགས་མངོན་ཡོད་ལ་བོད་ཀྱི་མི་རིགས་ཁག་གི་མི་དམངས་ཀྱི་འབད་འཐབ་ལྷོད་མེད་ཀྱང་མཚོན་ཡོད། དུས་རབས་གསར་པའི་ཉི་འོད་བསུས་ནས་ལོ་བརྒྱ་དང་པོའི་འབད་འཐབ་དམིགས་ཚད་ཀྱི་ཕྱོགས་སུ་བསྐྱོད་དེ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་བོད་ཀྱི་མི་རིགས་ཁག་གི་མི་དམངས་ཀྱིས་བློ་སེམས་གཅིག་མཐུན་དང་ཕྱར་བ་གྲུ་འདེགས་ངང་དཔའ་མཛངས་རྟུལ་ཕོད་ཀྱིས་མདུན་དུ་བསྐྱོད་ཚེ། སྤྱི་ཚོགས་རིང་ལུགས་ཀྱི་བོད་ལྗོངས་གསར་པ་བསྐྲུན་པའི་རླབས་ཆེན་གྱི་བྱ་གཞག་ལ་རྒྱལ་ཁ་གསར་པ་དེ་བས་ཆེ་བ་ཐོབ་ངེས་ཡིན་ལ། མི་རིགས་ཁག་གི་མི་དམངས་ཀྱིས་མཛེས་སྡུག་ལྡན་པའི་འཚོ་བར་བཅངས་པའི་རེ་འདོད་མངོན་འགྱུར་ཐུབ་ངེས་ཡིན་པ་ང་ཚོར་ཡིད་ཆེས་བརྟན་པོ་ཡོད།

རྩོམ་སྒྲིག་པ། བདེ་སྒྲོལ།