ཞིང་ལས་དང་གྲོང་གསེབ་ཀྱི་ཤེས་ལྡན་པའི་དཔུང་ཁག་སྐྱེད་སྲིང་ཧུར་ཐག་བྱེད་དགོས།
སྤེལ་དུས 2020-05-14
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
གྲོང་གསེབ་ཕྱུག་པོ་ཆགས་མིན་གྱི་འགག་རྩ་ནི་ལས་བྱེད་པར་ཐུག་པ་དང་། གྲོང་གསེབ་སྟོབས་ཆེར་གཏོང་ཐུབ་མིན་ནི་རྦད་དེ་སྣེ་འདྲེན་པར་བརྟེན་དགོས།
“ཞིང་གསུམ”ལས་དོན་ལ་དམ་འཛིན་བྱེད་པའི་འགག་རྩ་ནི་མིར་ཐུག་ཅིང་། ཤེས་ལྡན་མི་སྣ་ནི་འཕེལ་རྒྱས་ཀྱི་ཐོན་ཁུངས་དང་པོ་ཡིན། “ཞིང་གསུམ”ལས་དོན་ལ་དམ་འཛིན་བྱེད་པར་ཤེས་ལྡན་པའི་འདེགས་སྐྱོར་དང་ཁ་འབྲལ་ཐབས་མེད། རྒྱ་ཆེའི་གཞི་རིམ་ལས་བྱེད་པ་ནི་མང་ཚོགས་ལ་འབྲེལ་གཏུག་དང་ཞབས་འདེགས་ཞུ་བའི“མཐའ་མའི་འགག་གནད”དང་། “ཞིང་གསུམ”ལས་དོན་ལ་དམ་འཛིན་གང་ལེགས་བྱེད་པའི“གཙོ་ཤུགས་དམག”ཡིན། དེ་བས་གཞི་རིམ་གྱི་ཤེས་ལྡན་པའི་གསོ་སྐྱོང་ལ་སྣང་ཆེན་བྱས་ཏེ“ཞིང་ལས་ཤེས་པ་དང་། གྲོང་གསེབ་ལ་དགའ་ཞེན། ཞིང་པར་དགའ་ཞེན”བཅས་ཀྱི་ཞིང་ལས་དང་གྲོང་གསེབ་ཀྱི་ཤེས་ལྡན་པའི་དཔུང་ཁག་ཅིག་སྐྱེད་སྲིང་ཧུར་ཐག་བྱེད་དགོས།
གཞི་རིམ་གྱི་ཤེས་ལྡན་པར་འདེགས་སྐྱོར་བྱེད་ཤུགས་ཆེ་རུ་གཏོང་དགོས་ཤིང་། གཞི་རིམ་གྱི་གཞུང་ཞབས་པ་བསྡུ་ཚད་མང་དུ་བཏང་ནས་འདེམས་སྒྱུར་སློབ་མ་གཞི་རིམ་གྱི་འཐབ་ས་དང་པོར་བསྐྱོད་ནས་སྐྱེད་སྲིང་སྦྱོང་བརྡར་བྱེད་པའི་ལམ་ལུགས་ལག་བསྟར་བྱེད་དགོས། དམིགས་བཙུགས་ལས་གནས་སོགས་ཀྱི་བྱེད་ཐབས་ལ་བརྟེན་ནས་གཞི་རིམ་ལ་ཉེར་མཁོ་ཆེ་ལ་དཀོན་པའི་ཆེད་ལས་ཤེས་ལྡན་མི་སྣ་ནང་འདྲེན་བྱེད་དགོས། ལས་གནས་དང་སྒྲིག་ཁོངས་འོས་འཚམ་གྱིས་ལོགས་དབྱེའི་ལམ་སྲོལ་ཁྱབ་གདལ་བཏང་ནས་འཕྲོད་བསྟེན་དང་སློབ་གསོ་སོགས་ལས་རིགས་སུ་གསར་དུ་བསྡུས་པའི་བྱ་གཞག་ཚན་པའི་མི་སྣར“རྫོང་གིས་བསྡུས་ནས་ཤང་གིས་སྤྱོད་པ”དང་། “རྫོང་གིས་དོ་དམ་དང་སློབ་གྲྭས་སྤྱོད་པ” “ཤང་གིས་བསྡུས་ཏེ་གྲོང་ཚོས་སྤྱོད་པ”བཅས་ལག་བསྟར་བྱེད་དགོས། གཞི་རིམ་གྱི་ཤེས་ལྡན་པར་གདེང་འཇོག་བྱེད་པའི་དམིགས་བསལ་རྒྱབ་སྐྱོར་སྲིད་ཇུས་ལག་བསྟར་གྱིས་གཞི་རིམ་དུ་ཡུན་རིང་པོར་ཞབས་འདེགས་ཞུས་ཁར། གྲུབ་འབྲས་གཟེངས་སུ་ཐོན་པའི་གཞི་རིམ་གྱི་ཤེས་ལྡན་པར་ལས་གནས་བཀོད་སྒྲིག་དང་། རྣམ་གྲངས་འདུན་ཞུ། གོ་མིང་དཔྱད་ཞིབ་སོགས་ཀྱི་ཐད་གཟིགས་སྐྱོང་བྱེད་དགོས།
མ་དངུལ་གཏོང་བར་འགན་སྲུང་བྱེད་ཤུགས་ཆེ་རུ་གཏོང་དགོས་ཤིང་། ནོར་སྲིད་ཀྱི་འགན་སྲུང་བྱེད་ཤུགས་ཆེ་རུ་གཏོང་བ་དང་སྦྲགས། ཐག་རིང་ས་ཁུལ་ལ་ཕྱོགས་དགོས། གྲོང་ཚོ་རིམ་པའི་སྒྲིག་ཁོངས་ལེགས་སྒྲིག་སྒྱུར་བཅོས་བྱས་རྗེས་གྲོང་ཚོའི་ལས་བྱེད་པའི་གཞི་རྩའི་གླ་ཆ་དང་གྲོང་ཚོ་རིམ་པའི་གཞུང་དོན་གྲོན་དངུལ་འོས་འཚམ་སྒོས་མང་དུ་བཏང་ནས་གྲོང་ཚོ་ཡོངས་ཀྱི་ལས་བྱེད་པའི་ཐོབ་ཆ་བརྟན་འཕར་ལམ་སྲོལ་བཟོ་བ་དང་འཐུས་སྒོ་ཚང་དུ་གཏོང་དགོས། སྡེ་ཁུལ་གྱི་ཆེད་འགན་ལས་དོན་པའི་ཆེད་ལས་ཅན་དང་ལས་རིགས་ཅན་གྱི་མ་ལག་འཛུགས་སྐྱོང་ཕྱོགས་ཡོངས་ནས་ཁྱབ་གདལ་བཏང་སྟེ་སྡེ་ཁུལ་གྱི་ཆེད་བསྐོས་ལས་དོན་པ་སྤྱི་ཚོགས་ལས་དོན་གྱི་ལས་རིགས་ཐོབ་ཐང་གདེང་འཇོག་དང་སློབ་རྒྱུས་སློབ་གསོ་སོགས་སུ་ཞུགས་རྒྱུར་རྒྱབ་སྐྱོར་བྱེད་པ། གྲོང་ཚོ（སྡེ་ཁུལ）ཡིས་ཆ་རྐྱེན་དང་མཐུན་པའི་མ་དངུལ་སྤྱི་འདོམས་བེད་སྤྱོད་བྱེད་པའི་རང་བདག་དབང་ཆ་ཆེ་རུ་གཏོང་བ་བཅས་བྱེད་དགོས། ཆ་རྐྱེན་ལྡན་པའི་ས་གནས་ཀྱིས་སྡེ་ཁུལ་གྱི་དཔལ་འབྱོར་གོང་འཕེལ་ཐབས་ལམ་འཚོལ་ཞིབ་བྱས་ཏེ་སྡེ་ཁུལ་རང་ངོས་ཀྱི་འཕེལ་རྒྱས་ནུས་པ་ཆེ་རུ་གཏོང་དགོས།
