ཨུ་ཡོན་སྒྲོལ་དཀར་གྱིས་དམངས་གཉེར་ཁེ་ལས་ཐད་གྲོས་འགོ་འདི་འདྲ་བཏོན།
སྤེལ་དུས 2023-03-13
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
སྲིད་གཞུང་གི་ལས་དོན་སྙན་ཞུའི་ནང་། འཛད་སྤྱོད་སླར་གསོ་དང་རྒྱ་ཆེར་གཏོང་རྒྱུ་དེ་གལ་ཆེའི་གནས་བབ་ཐོག་བཞག་ནས་དམངས་ཁྲོད་ཀྱི་མ་རྩ་དེ་བས་མང་བ་རྒྱལ་ཁབ་ཀྱི་ལས་གྲྭ་གལ་ཆེན་དང་ཞན་ཆ་ཁ་གསབ་བྱེད་པའི་རྣམ་གྲངས་འཛུགས་སྐྲུན་ནང་ཞུགས་རྒྱུར་སྐུལ་ལྕག་དང་ཡིད་དབང་བཀུག་སྟེ་དམངས་ཁྲོད་ཀྱི་མ་འཇོག་གསོན་ཤུགས་འཕེལ་བ་བྱེད་དགོས་ཞེས་བསྟན་ཡོད། རྒྱལ་ཡོངས་སྲིད་གྲོས་ཀྱི་ཨུ་ཡོན། བོད་ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ། བོད་ལྗོངས་གཞོན་ནུ་ཁེ་ལས་མཁས་ཅན་ཚོང་ཚོགས་ཀྱི་ཚོགས་གཙོ། བོད་ལྗོངས་ཀྲུང་ཡོན་འཛུགས་སྐྲུན་རྒྱུ་ཆ་ཚོགས་པ་ཚད་ཡོད་ཀུང་སིའི་ལས་འཛིན་དཔོན་སྒྲོལ་དཀར་གྱིས་སྲིད་ཇུས་དེ་དག་གིས་དམངས་གཉེར་ཁེ་ལས་ཀྱི་བློ་སེམས་དེ་བས་བདེ་པོ་དང་དེ་བས་ཡིད་ཆེས་ཡོད་པ།དེ་བས་ཁ་ཕྱོགས་ཡོད་པར་བྱས་ཡོད། འདི་ལོ་ངས་ཀྱང་དམངས་གཉེར་ཁེ་ལས་མཁས་ཅན་གྱི་ཡིད་ཆེས་འཕེལ་རྒྱུའི་སྐོར་གྱི་གྲོས་འགོ་བཏོན་ནས་དམངས་གཉེར་ཁེ་ལས་དང་དམངས་གཉེར་ཁེ་ལས་མཁས་ཅན་གྱིས་ཏང་ཀྲུང་དབྱང་གི་བྱེད་ཕྱོགས་དང་སྲིད་ཇུས་ལ་གོ་བ་ཡང་དག་ལེན་རྒྱུར་ཁྲིད་སྟོན་བྱས་ཏེ། ཡིད་ཆེས་ཆེ་རུ་གཏོང་བ་དང་བློ་ཁོག་ཆེན་པོས་འཕེལ་རྒྱས་གཏོང་བ། སྐྱོན་བྲལ་ངང་འཕེལ་རྒྱས་གཏོང་བ། སྤུས་ཚད་མཐོ་པོས་འཕེལ་རྒྱས་གཏོང་བ་བཅས་བྱས་ནས་དམངས་གཉེར་ཁེ་ལས་བློ་སྟོབས་ཆེན་པོ་དང་བློ་རྩེ་གཅིག་སྒྲིམ་ངང་གཉེར་སྐྱོང་བྱས་ཏེ་འཕེལ་རྒྱས་གཏོང་ཐུབ་པ་བྱ་རྒྱུའི་རེ་བ་ཡོད་ཅེས་བཤད་ཡོད།
འདས་ཟིན་པའི་ལོ་གཅིག་ནང་། སྒྲོལ་དཀར་གྱིས་དམངས་གཉེར་དཔལ་འབྱོར་འཕེལ་རྒྱས་སྐོར་ལ་བརྟག་ཞིབ་ཐེངས་མང་བྱས་པ་དང་། ཁོང་གི་མྱོང་ཚོར་ཆེ་ཤོས་ནི་དམངས་གཉེར་ཁེ་ལས་འཕེལ་རྒྱས་གཏོང་བར་ཡིད་ཆེས་ཀྱིས་མི་འདང་བ་དེ་རེད། སྒྲོལ་དཀར་གྱིས་ཉེ་བའི་ལོ་ཤས་རིང་ཡུལ་སྐོར་དང་འཛད་སྤྱོད་སོགས་ལས་རིགས་དག་སླར་གསོ་ཡོང་བའི་སྣང་ཚུལ་ཆེན་པོ་ཡོད་ཀྱང་དངོས་ཚན་ཁེ་ལས་ཡོངས་ཁྱབ་ངང་འཕེལ་རྒྱས་ཀྱི་དམའ་སར་གནས་ཡོད་པས་ལས་རིགས་ཡོངས་སླར་གསོ་བྱེད་པར་སྔར་བཞིན་བརྒྱུད་རིམ་ཞིག་དགོས་ཀྱི་ཡོད་པ་དང་། དེའི་རིང་ལ་ཁེ་ལས་ཁ་ཤས་ཀྱིས་ཁ་ཕྱོགས་གསལ་པོ་མཐོང་གི་མི་འདུག་ཅེས་བཤད་ཡོད།
དོན་དངོས་ཐོག འདས་ཟིན་པའི་ལོ་ལྔའི་ནང་། བོད་ལྗོངས་ཀྱི་དམངས་གཉེར་དཔལ་འབྱོར་གྱིས་ལྗོངས་ཡོངས་ཀྱི་35%ཡན་གྱི་GDPདང་། 80%ཡན་གྱི་ཁྲལ་བསྡུའི་ཡོང་འབབ། 80%ཡན་གྱི་ལས་ཞུགས་མཁོ་འདོན་བྱས་པ་དང་། དམངས་གཉེར་དཔལ་འབྱོར་ཁྲོམ་རའི་བྱེད་པོས་90%ཡན་བཟུང་ཡོད། རིམས་ནད་ཐོན་རིང་། བོད་ཀྱི་དམངས་གཉེར་ཁེ་ལས་ཀྱིས་དེ་བས་ཀྱང་རང་ངོས་ལ་དཀའ་ངལ་ཡོད་པའི་གནས་ཚུལ་འོག རང་འགུལ་ངང་ལས་མིས་ལས་གནས་སྒུག་རིང་གི་གླ་ཕོགས་དང་ཟས་སྡོད་སོགས་ཀྱི་ཁ་གསབ་དངུལ་སྤྲོད་འགན་འཁུར་བ་མ་ཟད། སྤྱི་ཚོགས་ལ་རིན་ཐང་སྒོར་དུང་ཕྱུར་ཟིན་པའི་དངོས་ཟོག་ཞལ་འདེབས་ཕུལ་ཏེ་སྤྱི་ཡོངས་ཀྱི་འདུ་ཤེས་ཧ་ཅང་ཆེན་པོ་མངོན་པར་བྱས་ཡོད། སྒྲོལ་དཀར་གྱིས་དམངས་གཉེར་དཔལ་འབྱོར་དེ་བོད་རང་སྐྱོང་ལྗོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བའི་རྒྱུ་རྐྱེན་གཙོ་བོ་དང་སྟོབས་ཤུགས་གལ་ཆེན་ཞིག་ཏུ་གྱུར་ཡོད། དེར་བརྟེན་དམངས་གཉེར་ཁེ་ལས་ལ་དངོས་འབྲེལ་མཐོང་ཆེན་བྱེད་པ་དང་། དམངས་གཉེར་ཁེ་ལས་འཚར་ལོངས་ཡོང་བར་ཕན་པའི་རྣམ་པ་བཟང་པོ་ཞིག་བཏོད་དེ། ཚོང་གཉེར་ཁོར་ཡུག་ལེགས་སུ་ཏན་ཏིག་གཏོང་བ་དང་། དམངས་གཉེར་ཁེ་ལས་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱས་ནས་དམངས་གཉེར་དཔལ་འབྱོར་དང་དམངས་གཉེར་ཁེ་ལས་ཀྱི་གསོན་ཤུགས་འཕེལ་བ་བྱེད་དགོས་ཞེས་བཤད་ཡོད།
གོ་གནས་མང་པོ་ཡོད་པའི་སྒྲོལ་དཀར་གྱིས་ལོ་མང་རིང་ནམ་ཡང་འདོར་མི་སྲིད་པའི་འགྱུར་མེད་རང་གཤིས་ལ་བརྟེན་ནས་མུ་མཐུད་རང་ཉིད་ཀྱི་ནུས་པ་རྒྱུན་ཆད་མེད་པར་ཆེ་རུ་བཏང་སྟེ། སེམས་སུ་ཉར་བའི་ཐོག་མའི་ཕུགས་འདུན་དེའི་ཆེད་དུ་སྔར་རྒྱུན་བཞིན་འབད་བརྩོན་ཧུར་ཐག་གནང་ཡོད། ད་ཆ་སྒྲོལ་དཀར་ནི་ཁེ་ལས་མཁས་ཅན་གྲགས་ཅན་ཞིག་ཏུ་གྱུར་ནས་ཁེ་ལས་མཁས་ཅན་ཁྲོད་ཀྱི་བློས་ཐུབ་གཅེན་མོ་དང་ལམ་སྣེ་བ་ལྟ་བུ་ཞིག་ཏུ་གྱུར་ཡོད། ལས་གཏོད་བྱེད་མ་ཐག་པའི་གཞོན་ནུ་ཚོར་དཀའ་ངལ་འཕྲད་དུས་བསམ་བློའི་ནང་ཐོག་མར་འཁོར་ཡོང་བ་ནི་ཨ་ཅག་སྒྲོལ་དཀར་ལགས་ཡིན་ལ་སྒྲོལ་དཀར་གྱིས་ཀྱང་ཤེས་ཚད་ཚང་མ་སྦ་གསང་མེད་པར་བཤད་ཀྱི་ཡོད། ཁོང་གིས་ང་ཚོར་ཁྱོན་ཡོངས་ཀྱི་འདུ་ཤེས་ཡོད་དགོས་པ་ལས་རང་ཉིད་ཀྱི་ཁེ་ཕན་ཁོ་ནར་བསམ་བློ་གཏོང་མི་རུང་། ཁོག་རྒྱ་ཇེ་ཆེར་བཏང་ན་ད་གཟོད་ཞི་མཐུན་མཉམ་ཁེའི་ཚོང་གཉེར་ཁོར་ཡུག་བཟང་པོ་ཞིག་བཏོད་ཐུབ་ལ། ང་ཚོ་ཡང་གཞི་ནས་བརྟན་ཐོག་རྒྱང་བགྲོད་བྱེད་ཐུབ་ཅེས་བཤད་ཡོད།
རྩོམ་སྒྲིག་པ། སངས་སྐྱབས།
