རྒྱལ་ཡོངས་མི་དམངས་འཐུས་ཚོགས་ཀྱིས་རྩ་ཁྲིམས་བཟོ་བཅོས་འཆར་ཟིན་གྱི་གསར་འགོད་པའི་ཆེད་དོན་ཚོགས་འདུ་སྐོང་འཚོགས་བྱས་པ།
སྤེལ་དུས 2018-03-12
ཡོང་ཁུངས། ཀྲུང་གོའི་བོད་སྐད་རླུང་འཕྲིན་དྲ་བ།
རྩོམ་པ་པོ། རིན་ཆེན་དབང་འདུས།
སྤྱི་ཚེས་༡༡ཉིན། སྐབས་བཅུ་གསུམ་པའི་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་དང་པོས་གསར་འགོད་པའི་སྣེ་ལེན་ཚོགས་འདུ་སྐོང་འཚོགས་བྱས་པ་དང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་ཧྲེན་ཁྲུན་ཡའོ་དང་ཀྲུའུ་རིན་གཞོན་པ་ཀྲེང་ཧྲུའུ་ན་ནས་རྩ་ཁྲིམས་བཟོ་བཅོས་འཆར་ཟིན་གྱི་འབྲེལ་ཡོད་གནད་དོན་ཐད་གསར་འགོད་པའི་དྲི་བར་ལན་བསྐྱོན་ཡོད་པ་རེད།
ཧྲེན་ཁྲུན་ཡའོ་ཡིས། ད་ཐེངས་ཀྱི་རྩ་ཁྲིམས་བཟོ་བཅོས་འཆར་ཟིན་ནི་ཁྲིམས་ལུགས་ནང་གཏན་འཁེལ་བྱས་པའི་གོ་རིམ་ལ་དམ་པོར་གཞིགས་ནས་བཟོ་བཅོས་བྱས་པ་ཞིག་ཡིན་པ་དང་། རྩ་ཁྲིམས་བཟོ་བཅོས་འཆར་ཟིན་ལ་ཁྱོན་དོན་ཚན་༢༡ཡོད་པ་རེད། རྩ་ཁྲིམས་བཟོ་བཅོས་འཆར་ཟིན་ནང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་དགོངས་པ་དེ་རྒྱལ་ཁབ་ཀྱི་ཆབ་སྲིད་དང་སྤྱི་ཚོགས་འཚོ་བའི་ཁྲོད་ཀྱི་མཛུབ་ཁྲིད་གོ་གནས་གཏན་འཁེལ་བྱས་ཡོད་ཅེས་གསུངས་པ་དང་། ཁོང་གིས། ད་ཐེངས་རྩ་ཁྲིམས་བཟོ་བཅོས་བྱས་པའི་ནད་དོན་གལ་ཆེན་ཞིག་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་དགོངས་པ་དེ་རྒྱལ་ཁབ་ཀྱི་རྩ་བའི་བཅའ་ཁྲིམས་ནང་བཅུག་པ་དེ་ཡིན་པ་དང་། དེས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་ཐུན་མོང་གི་སེམས་འདུན་མཚོན་པར་བྱས་ཡོད་ཅེས་བསྟན་ཡོད་པ་རེད།
རྩ་ཁྲིམས་བཟོ་བཅོས་འཆར་ཟིན་གྱི་མ་ཟིན་ལ་གཞིགས་ཏེ། རྩ་ཁྲིམས་ཀྱི་ལེའུ་དང་པོའི་སྤྱིའི་རྩ་འཛིན་གྱི་དོན་ཚན་དང་པོའི་ནང་ཀྲུང་གོ་གུང་ཁྲན་ཏང་གི་འགོ་ཁྲིད་ནི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་ཆེས་ངོ་བོའི་རང་བཞིན་གྱི་ཁྱད་ཆོས་ཡིན་ཞེས་པ་ཁ་སྣོན་བྱས་ཡོད། དེ་ནི་རྩ་ཁྲིམས་ཀྱི་གླེང་གཞི་ཕུད་ཀྲུང་གོ་གུང་ཁྲན་ཏང་ཞེས་པ་དང་། ཀྲུང་གོ་གུང་ཁྲན་ཏང་གི་འགོ་ཁྲིད་ཞེས་པ་རྩ་ཁྲིམས་ཀྱི་དཀྱུས་ཡིག་ནང་ཐོན་ཐེངས་དང་པོ་དེ་ཡིན་པ་དང་། གཏན་འབེབས་དེ་རིགས་བྱེད་དགོས་པའི་རྒྱུ་མཚན་གང་ཡིན་མིན་ཐད་ཧྲེན་ཁྲུན་ཡའོ་ཡིས། དང་པོ་ནི། ཀྲུང་གོ་གུང་ཁྲན་ཏང་གི་འགོ་ཁྲིད་བྱས་པའི་རྩ་བའི་རང་བཞིན་གང་ལེགས་མངོན་པར་བྱས་པ་དང་། གཉིས་པ་ནི། ཀྲུང་གོ་གུང་ཁྲན་ཏང་གིས་འགོ་ཁྲིད་བྱས་པའི་ཁྱོན་ཡོངས་རང་བཞིན་མངོན་པ། གསུམ་པ་ནི། ཏང་གིས་འགོ་ཁྲིད་བྱས་པའི་དུས་རབས་རང་བཞིན་མངོན་པ་བཅས་ཡིན། དེར་བརྟེན་ད་ཐེངས་ཀྱི་རྩ་ཁྲིམས་བཟོ་བཅོས་ནི་སྔར་ཡོད་ཀྱི་རྨང་གཞིའི་སྟེང་གོམ་གང་མདུན་སྤོས་ཀྱིས་ཤུགས་སྣོན་དང་། གཏིང་ཟབ། རྒྱ་བསྐྱེད་བཅས་བཏང་བ་ཞིག་ཡིན་པས། དེར་ཆབ་སྲིད་ཀྱི་དོན་སྙིང་དང་ཁྲིམས་སྐྱོང་གི་དོན་སྙིང་ཆེན་པོ་ལྡན་ཡོད་ཅེས་བསྟན་ཡོད།
ཧྲེན་ཁྲུན་ཡའོ་དང་ཀྲེན་ཧྲུའུ་ན་ནས་ད་དུང་རྒྱལ་ཁབ་ཀྱི་ལས་ཁུངས་ནང་ལྟ་ཞིབ་ཨུ་ཡོན་ལྷན་ཁང་སོགས་གསར་སྣོན་བྱས་པའི་གནད་དོན་ཐད་གསར་འགོད་པས་བཏོན་པའི་དྲི་བར་ལན་བསྐྱོན་ཡོད་པ་རེད།
