ཀྲུང་དབྱང་གི་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བཞི་བ།
སྤེལ་དུས 2020-09-04
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
2001ལོའི་ཟླ་6པའི་ཚེས25ནས་27བར་པེ་ཅིན་དུ་འཚོགས་ཤིང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཅང་ཙེ་རྨིན་ཚོགས་འདུར་ཞུགས་པ་མ་ཟད་གསུང་བཤད་གལ་ཆེན་གནང་། ཚོགས་འདུའི་ཐོག་དུས་རབས་གསར་བའི་དུས་འགོའི་བོད་ལྗོངས་ཀྱི་ལས་འགན་གཙོ་བོ་གཏན་འཁེལ་གནང་བ་སྟེ། ནུབ་རྒྱུད་གསར་སྤེལ་ཆེན་མོའི་འཐབ་ཇུས་ལག་བསྟར་བྱེད་རྒྱུ་དང་། བོད་ལྗོངས་ཀྱི་སྤྱི་ཚོགས་དུས་བབ་རྩ་བའི་བརྟན་བརླིང་ཡིན་པའི་གོ་སྐབས་བཟང་བོ་དེ་དམ་འཛིན་བྱས་ཐོག་བོད་ལྗོངས་འདི་དར་རྒྱས་དང་ཡུན་རིང་བདེ་འཁོད་ཡོང་རྒྱུར་དམིགས་ནས་བོད་ཀྱི་གོང་འཕེལ་དང་བརྟན་བརླིང་གི་ཁྱོན་ཡོངས་དང་འབྲེལ་བ་ཡོད་པའི་གནད་དོན་ཆེ་རིགས་ནུས་ཤུགས་གཅིག་སྡུད་ཀྱིས་ཐག་གཅོད་བྱེད་རྒྱུ་དང་། ཏང་འཛུགས་སྐྲུན་བྱེད་རྒྱུར་ཤུགས་སྣོན་ཏན་ཏིག་བརྒྱབ་ནས་བོད་ལྗོངས་ཀྱི་དཔལ་འབྱོར་མགྱོགས་མྱུར་གོང་འཕེལ་གཏོང་བ་ནས་མཆོང་སྐྱོད་ལྟ་བུའི་གོང་འཕེལ་གཏོང་རྒྱུ་དང་། བོད་ཀྱི་སྤྱི་ཚོགས་དུས་བབ་རྩ་བའི་ཆར་བརྟན་བརླིང་ཡིན་པ་ནས་ཡུན་རིང་བདེ་འཁོད་ཡོང་བ་བྱེད་དགོས་པ་དེ་ཡིན། བློ་མཐུན་ཅང་ཙེ་རྨིན་གྱིས “བོད་ཀྱི་གོང་འཕེལ་དང་། བརྟན་བརླིང། བདེ་འཇགས་བཅས་ནི་ནུབ་རྒྱུད་གསར་སྤེལ་ཆེན་མོའི་འཐབ་ཇུས་ལག་བསྟར་བྱེད་རྒྱུ་དང་འབྲེལ་བ་ཡོད་ལ་མི་རིགས་མཐུན་སྒྲིལ་དང་སྤྱི་ཚོགས་བརྟན་བརླིང་ཡོང་རྒྱུ་དང་། མེས་རྒྱལ་གཅིག་གྱུར་དང་བདེ་འཇགས་ཡོང་རྒྱུ་དང་འབྲེལ་བ་ཡོད་ལ་རང་རེའི་རྒྱལ་ཁབ་ཀྱི་མཚན་སྙན་དང་རྒྱལ་སྤྱིའི་འཐབ་རྩོད་དང་འབྲེལ་བ་ཡོད། ཏང་ཡོངས་ཀྱི་བློ་མཐུན་ཚོས་ངེས་པར་དུ་ཏང་དང་རྒྱལ་ཁབ་ཀྱི་ལས་ཀའི་ཁྱོན་ཡོངས་ལ་དམིགས་ཏེ་ཆབ་སྲིད་ཀྱི་འདུ་ཤེས་དང་། སེམས་ཁྲལ་བྱེད་སེམས། ཁྱོན་ཡོངས་ཀྱི་འདུ་ཤེས། འགན་འཁྲི་འཁུར་སེམས་བཅས་ཆེ་རུ་བཏང་སྟེ་བོད་ལྗོངས་ཀྱི་ལས་དོན་ཡག་པོ་བསྒྲུབ་རྒྱུའི་གལ་ཆེན་རང་བཞིན་ལ་ངོས་འཛིན་གཏིང་ཟབ་བྱེད་དགོས ”ཞེས་བཏོན་ཡོད་པ་རེད།