ད་ལོའི་ལོ་གསར་ལ་ལྷ་སའི་ས་ཆ་འདི་ཚོར་ཤོག་སྦག་སྤར་ཆོག་གི་མི་འདུག
སྤེལ་དུས 2020-02-21
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
2020ལོའི་བོད་ཀྱི་ལོ་གསར་རིང་ཤོག་སྦག་སྤོར་བའི་རིགས་བཀག་སྡོམ་བྱེད་རྒྱུའི་སྐོར་གྱི་ལྷ་ས་གྲོང་ཁྱེར་མི་དམངས་སྲིད་གཞུང་གི་སྤྱི་བསྒྲགས།
མིག་སྔར། ལྷ་ས་གྲོང་ཁྱེར་གྱི་ཏོག་གསར་གློ་ཚད་ཀྱི་ནད་ཡམས་སྔོན་འགོག་ཚོད་འཛིན་གྱི་ལས་དོན་འགག་རྩའི་དུས་ཡིན་པས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགོ་ནད་འགོག་བཅོས་བཅའ་ཁྲིམས་དང་སྤྱི་པའི་འཕྲོད་བསྟེན་གྱི་ཐོལ་བྱུང་དོན་རྐྱེན་ཚབས་ཆེན་གྱི་བརྡ་ལན་རིམ་པ་དང་པོ་ལག་བསྟར་བྱེད་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་སྲིད་གཞུང་གི་སྤྱི་བསྒྲགས་དང་། ལྷ་ས་གྲོང་ཁྱེར་གྱི་གྲོང་ཁུལ་དུ་ཤོག་སྦག་སྤོར་རིགས་བཀག་སྡོམ་བྱེད་རྒྱུའི་གཏན་འབེབས་གཞིར་བཟུང་། རྒྱ་ཆེའི་མི་དམངས་མང་ཚོགས་ཀྱི་ཚེ་སྲོག་དང་གཟུགས་གཞིའི་བདེ་ཐང་ལ་འགན་ལེན་ཏན་ཏིག་དང་2020ལོའི་བོད་ཀྱི་ལོ་གསར་རིང་ནད་ཡམས་སྔོན་འགོག་དང་ཚོད་འཛིན་གྱི་ལས་དོན་གང་ལེགས་སྒྲུབ་ཆེད། ད་ལྟ་བོད་ཀྱི་ལོ་གསར་རིང་（སྤྱི་ལོ་2020ལོའི་ཟླ་2ཚེས་22ཉིན་ནས་ཟླ་2ཚེས་29ཉིན་བར）ཤོག་སྦག་སྤོར་རིགས་བཀག་སྡོམ་བྱེད་རྒྱུའི་སྤྱི་བསྒྲགས་སྤེལ་རྒྱུ་གཤམ་གསལ།
ལྷ་ས་གྲོང་ཁྱེར་གྱི་གྲོང་ཁུལ་རྙིང་པ་དང་། པོ་ཏ་ལའི་ཐང་ཆེན། གཡུ་ཐོག་ལམ། མཁར་རྔ་གདོང་ལམ། ཉང་བྲན་ལམ་དུམ་ལྷོ་མ། ཀྲུང་ཧོ་རྒྱལ་སྤྱིའི་གྲོང་། ཏང་སྲིད་ལས་ཁུངས། དཔུང་སྡེ་དང་ཉེན་རྟོག་པའི་སྒར་ས། སློབ་གྲྭ། སྨན་ཁང་། ཁྲོམ་ར། གློག་འཕྲིན། རླུང་འཕྲིན་བརྙན་འཕྲིན་གྱི་སྒྲིག་བཀོད། ཟམ་པ། མཛོད་ཁང་ཆེ་གྲས། གློག་སྒྱུར་ས་ཚིགས། སྣུམ་སྣོན་ས་ཚིགས། གཤེར་གྱུར་སོལ་རླངས་ས་ཚིགས། དེ་བཞིན་དེ་ཚོའི་མཐའ་འཁོར་གྱི་སྨི་200ནང་ཚུན་དང་། ལོ་རྒྱུས་ལྡན་པའི་ཁང་པའི་ཁུལ། རིག་དངོས་སུ་ཚུད་པའི་ཁང་པའི་ཁུལ། གྲོང་མིའི་སྡོད་ཁུལ་གཙོ་བོ། སྤྱི་དམངས་འདུ་འཛོམས་བྱ་ཡུལ་བཅས་སུ་ཤོག་སྦག་སྤོར་མི་ཆོག ཤོག་སྦག་རིགས་སྦར་མི་ཆོག་པའི་ས་ཆར་ཤོག་སྦག་སྦར་བའམ་ཡང་ན་སྤྱི་པའི་བདེ་འཇགས་དང་། མི་དང་རྒྱུ་ནོར་གྱི་བདེ་འཇགས་ལ་གནོད་སྐྱོན་གཏོང་བའི་རྣམ་པར་བརྟེན་ནས་ཤོག་སྦག་སྤར་ཚེ། 《ལྷ་ས་གྲོང་ཁྱེར་གྱི་གྲོང་ཁུལ་དུ་ཤོག་སྦག་སྤོར་རིགས་བཀག་སྡོམ་བྱེད་རྒྱུའི་གཏན་འབེབས》ཀྱི་འབྲེལ་ཡོད་གཏན་འབེབས་གཞིར་བཟུང་ཆད་པ་གཅོད་རྒྱུ།
ནད་ཡམས་སྔོན་འགོག་དང་ཚོད་འཛིན་བྱེད་རིང་། མཉམ་འགོག་མཉམ་འཛིན་གྱི་རྩ་དོན་ལྟར་ཕན་ཚུན་ནད་ཡམས་འགོ་བ་དང་མཆེད་པའི་ཉེན་ཁ་ནུས་ལྡན་སེལ་བ་དང་། མི་འགྲོ་འོང་ཉུང་དུ་གཏོང་བ། མི་མང་པོ་འདུ་འཛོམས་མི་བྱེད་པ། མཁའ་རླུང་གི་བཙོག་སྐྱོན་ཉུང་དུ་གཏོང་བ། མེ་སྐྱོན་གྱི་ལས་འཛོལ་མི་ཐོན་པ་བཅས་ཀྱི་ཆེད། རྒྱ་ཆེའི་མི་དམངས་མང་ཚོགས་ཚོས་ཤོག་སྦག་རིགས་སྤར་མི་ཆོག་པའི་ས་ཆ་མིན་སར་ཡང་ཤོག་སྦག་རིགས་མི་སྤོར་བའམ་ཤོག་སྦག་རིགས་ཉུང་ཙམ་སྤར་ནས། ཡ་རབས་ལྡན་པའི་ངང་ལོ་གསར་བཏང་སྟེ། ནད་ཡམས་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་ཆེད་མཉམ་དུ་སྟོབས་ཤུགས་ལེགས་སྐྱེས་འབུལ་དགོས།
རྒྱ་ཆེའི་མི་དམངས་མང་ཚོགས་ཀྱིས་དགོངས་བཞེས་དང་རྒྱབ་སྐྱོར་ཡོད་པ་ཞུ་རྒྱུ་མ་ཟད། ཕན་ཚུན་ལན་སྤྲོད་གནང་ཡོད་པ་ཞུ།
དེ་དོན་སྤྱི་བསྒྲགས་འདི་ཆེད་དུ་སྤེལ་བ་ཡིན།
ལྷ་ས་གྲོང་ཁྱེར་མི་དམངས་སྲིད་གཞུང་གིས།
སྤྱི་ལོ་2020ལོའི་ཟླ་2ཚེས་20ཉིན།
རྩོམ་སྒྲིག་པ།སྣང་རྡོར།
