བོད་དུ་ལོ་གསར་མཁོ་ཆས་སྒོ་འགྲམ་ནས་ཉོ་ཐུབ་པ།
སྤེལ་དུས 2020-02-20
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
བོད་ཀྱི་ལོ་གསར་འཆར་ཉེའི་མཚམས་སུ། ཏོག་གསར་ནད་དུག་གསར་པའི་གློ་ཚད་ཀྱི་སྨག་རུམ་ཡོངས་སུ་དྭངས་མེད་ཀྱང་། བོད་ལྗོངས་མི་དམངས་ཀྱིས་ལོ་གསར་དགའ་གཏོང་བྱེད་པར་ཤུགས་རྐྱེན་ཐེབས་མེད། བོད་ཀྱི་སྡེ་ཁུལ་དང་། གྲོང་ཚོ་ཁག་ཏུ་དམིགས་བསལ་གྱི་ལོ་གསར་ཁྲོམ་ར་ལས་ལོ་གསར་གྱི་མཁོ་ཆས་མཁོ་འདོན་བྱེད་ཀྱི་ཡོད།
ད་ཆ་སྐོར་བསྐྱོད་བྲིན་ཚོང་རླངས་འཁོར་གྱིས་ལོ་གསར་གྱི་མཁོ་ཆས་སྒོ་འགྲམ་དུ་སྐྱེལ་གྱི་ཡོད་པས་ཧ་ཅང་སྟབས་བདེ་པོ་འདུག་ཅེས་ལྷ་སའི་གྲོང་མི་རྣམ་རྒྱལ་གྱིས་བཤད་ཡོད།
ལྷ་ས་གྲོང་ཁྱེར་གྱིས་གྲོང་ཁྱེར་མ་འཇོག་ཀུང་སི་དང་ས་གཙང་ཀུང་སི་སོགས་ཁེ་ལས་སྒྲིག་འཛུགས་བྱས་ནས་ལོ་གསར་གྱི་མཁོ་ཆས་ཕྱིར་ཚོང་ས་ཚིགས་དང་སྐོར་བསྐྱོད་ཕྱིར་ཚོང་རླངས་འཁོར་མངགས་ཏེ་ཕྱེ་མར་དང་། སྡེར་ཁ། མེ་ཏོག་མཆོད་པ་སོགས་ལོ་གསར་གྱི་མཁོ་ཆས་གྲོང་མིའི་སྒོ་འགྲམ་དུ་བསྐྱལ་ཡོད་པ་རེད།
ལྷ་ས་གྲོང་ཁྱེར་ས་གཙང་ལོ་གསར་མཁོ་ཆས་བྲིན་ཚོང་དོ་དམ་འགན་ཁུར་བ་ངག་དབང་ནོར་བུས། མིག་སྔར་གྲོང་ཁྱེར་ནང་གཏན་འཇགས་ལོ་གསར་གྱི་མཁོ་ཆས་ཕྱིར་ཚོང་ས་ཚིགས་63ཡོད་པ་དང་། སྐོར་བསྐྱོད་བྲིན་ཚོང་རླངས་འཁོར་11ཡོད་པས་ལོ་གསར་གྱི་མཁོ་ཆས་སྒོ་འགྲམ་ནས་ཉོ་ཐུབ་ཀྱི་ཡོད་ཅེས་ངོ་སྤྲོད་བྱས་འདུག
ཤེས་རྟོགས་བྱས་པར་གཞིགས་ན། ལྷ་ས་གྲོང་ཁྱེར་ནང་གི་ཕྱིར་ཚོང་ས་ཚིགས་ཕུད་ཉེ་འཁོར་གྱི་རྫོང་དང་ཆུས་ཀྱིས་ཀྱང་ལོ་གསར་གྱི་མཁོ་ཆས་ཕྱིར་ཚོང་ས་ཚིགས་157བཙུགས་ཡོད་པས་མང་ཚོགས་ཀྱིས་རྫོང་དང་ཆུས་དེ་གའི་ས་ཁོངས་ནང་ཐག་ཉེ་ས་ནས་ལོ་གསར་གྱི་མཁོ་ཆས་ཉོ་ཐུབ་ཀྱི་ཡོད་པ་རེད།
དུས་མཚུངས་འབྲེལ་ཡོད་སྡེ་ཚན་གྱིས། བོད་ཀྱི་ལོ་གསར་རིང་། འདུ་འཛོམས་རང་བཞིན་ལྡན་པའི་སྒོ་ནས་དར་ལྕོག་འཛུགས་པ་དང་བསང་གཏོང་བའི་བྱེད་སྒོ་སོགས་མང་ཚོགས་མང་བ་དང་ས་ཁོངས་སྒྲོལ་ནས་འགྲུལ་བཞུད་བྱེད་ཤུགས་ཆེ་བ། དུས་ཡུན་རིང་བ་བཅས་ཀྱི་འདུ་འཛོམས་རང་བཞིན་གྱི་བྱེད་སྒོ་ཆེ་གྲས་ལ་ཞུགས་མི་ཆོག་པའི་གཏན་འབེབ་བྱས་ཡོད།