རྒྱལ་ཡོངས་མི་དམངས་འཐུས་ཚོགས་ཀྱི་རྩ་འཛུགས་ཀྱི་ཁྲིམས་སྲོལ་བཟོ་བཅོས་འཆར་ཟིན་དང་གྲོས་དོན་སྒྲིག་སྲོལ་གྱི་བཟོ་བཅོས་འཆར་ཟིན་ལ་གྲོས་ཞིབ་གནང་བ།
སྤེལ་དུས 2021-03-10
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ཚེས་8ཉིན་གྱི་སྔ་དྲོ། བོད་ཀྱི་འཐུས་མི་ཚོགས་པས་བཞུགས་གནས་སུ་ཚང་འཛོམས་གྲོས་ཚོགས་འཚོགས་ནས་རྒྱལ་ཡོངས་མི་དམངས་འཐུས་ཚོགས་ཀྱི་རྩ་འཛུགས་ཀྱི་ཁྲིམས་སྲོལ་བཟོ་བཅོས་འཆར་ཟིན་དང་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་དོན་སྒྲིག་སྲོལ་བཟོ་བཅོས་འཆར་ཟིན་ལ་གྲོས་ཞིབ་གནང་བ་རེད།
བོད་ཀྱི་འཐུས་མི་ཚོགས་པའི་ཚོགས་གཙོ་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝུའུ་དབྱིང་ཅེ་དང་། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཨུ་ཡོན་ཀྲང་གཞོན་པ་པད་མ་འཕྲིན་ལས། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་བློ་བཟང་རྒྱལ་མཚན། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་ཀྱི་ཀྲུའུ་ཞི་ཆེ་དགྲ་ལྷ། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཕུར་བུ་དོན་གྲུབ་བཅས་གྲོས་ཞིབ་ནང་ཞུགས་པ་རེད།
འཐུས་མི་ཚོས་ངོས་འཛིན་མགྲིན་གཅིག་ཏུ་གནང་དོན། རྩ་འཛུགས་ཀྱི་ཁྲིམས་སྲོལ་དང་གྲོས་དོན་སྒྲིག་སྲོལ་དེ་མི་དམངས་འཐུས་མི་ཚོགས་ཆེན་གྱི་ལམ་ལུགས་ཀྱི་རྨང་གཞིའི་རང་བཞིན་གྱི་བཅའ་ཁྲིམས་དང་། རྒྱལ་ཡོངས་མི་དམངས་འཐུས་ཚོགས་དང་དེ་བཞིན་དེའི་རྒྱུན་ལས་ཨུ་ལྷན་གྱིས་ཁྲིམས་ལྟར་འགན་དབང་སྒྲུབ་པའི་ལམ་ལུགས་ཀྱི་འགན་ལེན་གལ་ཆེན་ཞིག་ཡིན་པའི་ངོས་ནས། 1982ལོ་དང་1989ལོར་ཡོངས་བསྒྲགས་བྱས་ཏེ་ལག་བསྟར་བྱས་ཚུན་མི་དམངས་འཐུས་ཚོགས་ཀྱི་ལས་དོན་ཁྲོད་ནུས་པ་གལ་ཆེན་བཏོན་ཡོད། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི་མཚམས་སུ་མི་དམངས་འཐུས་མི་ཚོགས་ཆེན་གྱི་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ་ཏང་གི་ལག་ལེན་གྱི་འཕེལ་རྒྱས་དང་རིགས་པའི་གཞུང་ལུགས་ཀྱི་གསར་གཏོད་ལ་གཞིགས་ནས་དུས་བསྟུན་མདུན་སྐྱོད་ངང་བཟོ་བཅོས་དང་འཐུས་སྒོ་ཚང་དུ་གཏོང་རྒྱུ་དེ་རྦད་དེ་དགོས་ངེས་དང་ཧ་ཅང་དུས་ཐོག་ཡིན་པས་ཡོངས་སུ་མོས་མཐུན་དང་བརྩི་སྲུང་མཐའ་གཅིག་ཏུ་ཞུ་རྒྱུ་ཡིན།
འཐུས་མི་ཚོས་མགྲིན་གཅིག་ཏུ་གསུངས་དོན། “བཅའ་ཁྲིམས་གཅིག་དང་ཁྲིམས་སྲོལ་གཅིག”གི་སྲོལ་ཡིག་ཁ་གསལ་བ་དང་། གོ་རིམ་ཚད་ལྡན། ནང་དོན་ཆ་ཚང་བ་བཅས་ཡིན་པས། ནང་དོན་ཆ་ཚང་ནང་མི་དམངས་འཐུས་མི་ཚོགས་ཆེན་གྱི་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏོང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་མཚོན་པ་དང་། རང་རེའི་ཏང་གི་རྒྱལ་སྲིད་སྐྱོང་ལུགས་སྐོར་གྱི་རིགས་པའི་གཞུང་ལུགས་ཀྱི་གྲུབ་འབྲས་དང་ལག་ལེན་གྱི་ཉམས་མྱོང་གཅིག་ཏུ་འདུས་པ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲན་ཟླ་བྲལ་བའི་ཁྱད་འཕགས་རང་བཞིན་མཚོན་པ། མི་དམངས་འཐུས་མི་ཚོགས་ཆེན་ལམ་ལུགས་ཀྱི་ཧ་ཅང་སྟོབས་ཆེ་བའི་གསོན་ཤུགས་མངོན་པ་བཅས་ཡིན་པས་མི་དམངས་འཐུས་ཚོགས་ཀྱི་ལས་དོན་ལ་ཤུགས་སྣོན་རྒྱག་པ་དང་ལེགས་སུ་གཏོང་བ་དང་། མི་དམངས་འཐུས་མི་ཚོགས་ཆེན་གྱི་ལམ་ལུགས་དུས་བསྟུན་མདུན་སྐྱོད་ལ་སྐུལ་འདེད་གཏོང་བ། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་ལ་སྐུལ་འདེད་གཏོང་བ་བཅས་ཀྱི་ཐད་ལམ་ལུགས་ཀྱི་འགན་ལེན་ནུས་པ་ཆེན་པོ་འདོན་རྒྱུ་རེད།
འཐུས་མི་ཚོས་མགྲིན་གཅིག་ཏུ་གསུངས་དོན། རྒྱལ་ཡོངས་མི་དམངས་འཐུས་ཚོགས་ཀྱི་རྩ་འཛུགས་ཀྱི་ཁྲིམས་སྲོལ་དང་གྲོས་དོན་སྒྲིག་སྲོལ་བཟོ་བཅོས་བྱས་རྗེས་རང་ཉིད་ཀྱིས་སྣེ་ཁྲིད་དེ་སློབ་སྦྱོང་དང་གོ་བ་ལེན་རྒྱུའི་འགན་འཁྲི་དང་འོས་འགན་ཡོད་པས་རིམ་ཁག་རྩ་འཛུགས་དང་ལས་བྱེད་པ་དང་མང་ཚོགས་ཁྲོད་སྒྲོག་འགྲེལ་དང་བརྒྱུད་བསྒྲགས་རྒྱ་ཁྱབ་བྱེད་པ་དང་ལས་ཀའི་ལག་ལེན་ཁྲོད་བློ་རྩེ་གཅིག་སྒྲིམ་གྱིས་ལག་བསྟར་དོན་འཁྱོལ་བྱ་རྒྱུ་ཡིན།
རྩོམ་སྒྲིག་པ། སངས་སྐྱབས།
