པེ་ཅིང་གྲོང་ཁྱེར་གྱིས་ཚོགས་སྒྲིག་རྣམ་པའི་སློབ་གསོའི་བོད་སྐྱོར་ལས་དོན་ཁྱབ་གདལ་བཏང་བ།
སྤེལ་དུས 2018-06-25
ཡོང་ཁུངས། བོད་ལྗོངས་རླུང་འཕྲིན།
རྩོམ་པ་པོ། སྒྲོལ་མས་བསྒྲིགས།
བོད་ཀྱི་ལས་དོན་སྐོར་གྱི་ཀྲུང་དབྱང་གི་བཞུགས་མོལ་ཚོགས་འདུ་ཐེངས་དྲུག་པ་འཚོགས་རྗེས་སློབ་གསོ་པུའུ་སོགས་པུའུ་དང་ཨུ་ཡོན་ལྷན་ཁང་བཞིས་མཉམ་འབྲེལ་ཐོག་ཚོགས་སྒྲིག་རྣམ་པའི་སློབ་གསོའི་ཤེས་ལྡན་པའི་བོད་སྐྱོར་ལས་ཀའི་ལག་བསྟར་ཇུས་གཞི་བཟོས་ཏེ། ཚོགས་སྒྲིག་རྣམ་པའི་སློབ་གསོའི་བོད་སྐྱོར་ལས་དོན་ཁྱབ་གདལ་བཏང་བ་རེད།
སྤྱི་ལོ་2014ལོའི་ཟླ་བ་བརྒྱད་པར། པེ་ཅིང་གྲོང་ཁྱེར་གྱིས་ལྷ་ས་པེ་ཅིང་ཚོད་ལྟའི་སློབ་འབྲིང་ལ་ཁག་དང་པོའི་བོད་སྐྱོར་དགེ་རྒན་50མངགས་གཏོང་བྱས་ཏེ། ཚོགས་སྒྲིག་རྣམ་པའི་སློབ་གསོའི་བོད་སྐྱོར་ལས་དོན་སྤེལ་འགོ་ཚུགས་པ་དང་། སྤྱི་ལོ་2017ལོའི་ཟླ་བ་བརྒྱད་པར་པེ་ཅིང་གྲོང་ཁྱེར་གྱིས་ཚོགས་སྒྲིག་རྣམ་པའི་སློབ་གསོའི་བོད་སྐྱོར་བྱེད་ཁོངས་དེ་ལྷ་སའི་པེ་ཅིང་ཚོད་ལྟའི་སློབ་འབྲིང་ཁོ་ནར་རོགས་སྐྱོར་བྱེད་པ་ནས། ལྷ་སའི་པེ་ཅིང་ཚོད་ལྟའི་སློབ་འབྲིང་དང་ལྷ་ས་པེ་ཅིང་སློབ་འབྲིང་སོགས་སློབ་གྲྭ་བཞིར་རོགས་སྐྱོར་བྱེད་པའི་བར་རྒྱ་སྐྱེད་བཏང་སྟེ། སློབ་ཆུང་དང་དམའ་རིམ་སློབ་འབྲིང་། མཐོ་རིམ་སློབ་འབྲིང་། ལས་རིགས་སློབ་གསོ་སོགས་ལ་ཁྱབ་ཐུབ་པ་བྱས་ཡོད།
ཚོགས་སྒྲིག་རྣམ་པའི་སློབ་གསོའི་བོད་སྐྱོར་ལས་དོན་སྤེལ་བ་བརྒྱུད་བསམ་ཕྱོགས་དང་སློབ་གཉེར་བྱེད་སྟངས་གསར་པ་ལྷ་སའི་རོགས་སྐྱོར་བྱེད་ཡུལ་སློབ་གྲྭ་ཁག་ལ་ཁྱབ་སྤེལ་བཏང་སྟེ། རོགས་སྐྱོར་བྱེད་ཡུལ་སློབ་གྲྭར་དོ་དམ་ལམ་ལུགས་ལེགས་སུ་དང་སློབ་གཉེར་སྤུས་ཚད་ལེགས་སུ་གཏོང་རོགས་བྱས་པ་མ་ཟད། ས་ཆ་དེ་གའི་དགེ་རྒན་གྱི་སློབ་ཁྲིད་བྱེད་སྟངས་ལེགས་སུ་ཡང་གཏོང་རོགས་བྱས་ཡོད། དེ་དང་ཆབས་ཅིག་པེ་ཅིང་གྲོང་ཁྱེར་གྱིས། རྒྱང་འཁྲིད་སློབ་གསོའི་ཐད་ཀྱི་སྤུས་ལེགས་ཐོན་ཁུངས་ལ་གང་ལེགས་བརྟེན་ནས་ཅིང་བོད་སྤུས་ལེགས་སློབ་གསོའི་ཐོན་ཁུངས་མཉམ་འགུལ་མཉམ་རོལ་ལས་གཞི་ལག་བསྟར་བྱེད་རྒྱུར་སྐུལ་འདེད་བཏང་བ་དང་། ས་ཆ་གཉིས་ཀྱིས་དྲ་རྒྱ་བརྒྱུད་མཉམ་འགུལ་གྱི་དཔེ་སྟོན་སློབ་ཁྲིད་དང་མཉམ་སྡེབ་སློབ་དཔྱོད། རིགས་གཅིག་མཁས་པའི་འཆད་འཁྲིད་སོགས་བྱས་པས་པེ་ཅིང་དང་ལྷ་སའི་སློབ་གྲྭས་དུས་གཅིག་ཏུ་སློབ་ཁྲིད་ཐུབ་པ་བྱུང་ནས། དོ་དམ་ཆུ་ཚད་མཐོ་རུ་དང་སློབ་ཁྲིད་སྤུས་ཚད་ལེགས་སུ་གཏོང་བའི་དམིགས་ཚད་སྒྲུབ་རྒྱུར་སྐུལ་འདེད་ཐེབས་པ་རེད།