རྡོ་རྐོས་ཀྱི་དོན་འགའ་ཞིག་ལ་དཔྱད་པ།
སྤེལ་དུས 2017-08-30
ཡོང་ཁུངས། ཀྲུང་གོའི་བོད་ཀྱི་དྲ་བ།
རྩོམ་པ་པོ། ནོར་བུས་བསྒྲིགས།
རང་རེའི་མེས་པོ་རྣམས་ཀྱིས་ཆེས་སྔ་མོ་ཞིག་ནས་རྡོ་བཟོ་དང་རྡོ་རྐོས་ཀྱི་ལག་རྩལ་ལ་དབང་འབྱོར་བས།བོད་ཀྱི་རྒྱལ་བོ་ཐོག་མ་གཉའ་ཁྲི་བཙན་པོའི་རིང་ལ་ཕོ་བྲང་ཡུམ་བུ་བླ་མཁར་བརྩིགས།ལྷ་ཐོ་ཐོ་རི་གཉན་བཙན་གྱི་དུས་སུ་རྩིག་བཟོ་ཙམ་དུ་མ་ཟད་རྡོ་རྐོས་ཀྱི་ལག་རྩལ་ཡང་མི་དམན་པ་ཞིག་དར་ནས་རྡོ་ལ་མཆོད་རྟེན་བརྐོས་པ་སོགས་བཤད་མོད། སྤྱིར་བཙན་པོའི་དེའི་སྐུ་རིང་ལ་ནང་བ་སངས་རྒྱས་ཀྱི་བསྟན་པ་དབུ་བརྙེས་པའི་རྟེན་འབྲེལ་དུ་ནམ་མཁའ་ནས་གསེར་གྱི་མཆོད་བརྟེན་སོགས་བབས་པར་ཅི་ཡིན་མཁྱེན་ནས། མིང་གཉན་པོ་གསང་བ་ཞིག་བཏགས་ཚུལ་ཡོངས་གྲགས་ཡིན་པས།མཆོད་རྟེན་ཞེས་པའི་ཐ་སྙད་དེ་དང་ནང་བ་སངས་རྒྱས་པའི་སྐུ་གསུང་ཐུགས་རྟེན་གྱི་མཆོད་རྟེན་གཉིས་དོན་གཅིག་མིན་དང་། མི་གཅིག་ན་དེས་མཚོན་བྱ་དང་དབྱིབས་ཇི་ལྟ་བུ་ཞིག་ཡིན་པ་སོགས་དཔྱད་གཞི་ཞིག་ཏུ་སྣང་མོད་ཀྱང་།དེའི་གོང་ནས་བོད་ལ་རྡོ་རྐོས་ཀྱི་ལག་རྩལ་མི་དམན་པ་ཞིག་ཡོད་པ་ནི་བསྙོན་དུ་མེད་དོ།།
དེ་ལྟར་བོད་དུ་རྡོ་རྐོས་ཀྱི་ལག་རྩལ་དར་སྔ་ཞིང་།ཆོས་རྒྱལ་གོང་མ་རྣམས་ཀྱིས་བསྐུལ་མ་ལ་བརྟེན་ནས་སྔར་ཡོད་བཟོ་རྩལ་གྱི་རྨང་གཞིའི་སྟེང་གོང་དུ་སྤེལ་བ་དང་།རྒྱ་ནག་དང་བོལ་བོ་སོགས་ནས་ལག་ཤེས་བཟོ་བ་བཀུག་སྟེ་ལག་རྩལ་བསླབ་ཏུ་བཅུག་པ་དང་།རྐོས་ལ་སོགས་པའི་ཤེས་བྱ་སྦྱོང་མཁན་མང་པོ་ཆད་མངགས་བྱས་ཏེ་མི་རིགས་གཞན་གྱི་ཤེས་རིག་བོད་དུ་དྲངས་པ།ཡིན་ཏན་ཅན་ལ་བྱ་དགའ་དང་བཀུར་བསྟི་བྱས་པ་སོགས་ཀྱི་བྱ་ཐབས་དང་།རང་རེའི་མེས་པོ་རྣམས་ཀྱིས་རྣམ་དཔྱོད་དང་བརྩོན་འགྲུས་ལ་བརྟེན་ནས།རྐོས་བཟོ་སྤྱི་དང་ཁྱད་པར་རྡོ་རྐོས་ཀྱི་ལག་རྩལ་འཕེལ་རྒྱས་མི་དམན་པ་ཞིག་བྱུང་ཞིང་།དེ་ལས་བྱུང་བའི་གསུང་རྟེན་རྡོ་འབུམ་གྲངས་མེད་དང་། ཐུགས་རྟེན་ཟུང་མཁར་རྡོའི་མཆོད་རྟེན་སོགས་ཀྱི་བསྔགས་པར་འོས་པའི་དངོས་པོ་མི་ཉུང་བ་ཞིག་ཡོད།འོན་ཀྱང་རྡོ་སྐུ་བཟོ་བ་ལ་རྒྱ་ནག་ལྟ་བུའི་དར་རྒྱས་ཆེན་པོ་མ་བྱུང་སྟེ།དཔེར་ན།དེང་དུས་འཛམ་གླིང་ཐོག་གི་ཆེས་ཆེ་བར་བསྔགས་པའི་རྒྱ་ནག་ཆུའི་བྱམས་ཆེན་དང་།ཧོ་ནན་ཞིང་ཆེན་གྱི་སངས་རྒྱས་སྟོང་གི་བྲག་ཕུག་དང་།སི་ཁྲོན་ཞིང་ཆེན་གྱི་ཞབས་རྗེས་ཆེན་པོའི་བྲག་ཕུག་སོགས་མཚུངས་པའི་མཐོ་ཚད་དང་།རྒྱ་ཁྱོན།བཀོད་པ་དང་། སྐུ་གཟུགས་ཀྱི་ཉམས་དང་རྣམ་པ་སོགས་ཁྱད་དུ་འཕགས་པའི་རྡོའི་སྐུ་བརྙན་བོད་ལ་ཡོད་པ་མི་མཐོང་ཞིང་ལོ་རྒྱས་སོགས་སུའང་མི་གསལ་ལོ།།
འོ་ན་བོད་ཀྱི་གཟུགས་བཟོའི་ལག་རྩལ་གཞན་དག་དང་བཟོ་དངོས་ལག་རྩལ་ལ་དེ་མཚུངས་ཀྱི་འཕེལ་རྒྱས་མ་བྱུང་བའི་རྒྱུ་མཚན་ཅི་ཞིག་ཡིན་ནམ་སྙམ་ན།དེ་ལ་རྒྱུ་མཚན་གསུམ་ཙམ་ཡོད་པར་བསམ་ཏེ།གཅིག་ཏུ་བོད་ཀྱི་སངས་རྒྱས་བྱང་སེམས་ཀྱི་སྐུ་བརྙན་ཕལ་ཆེ་བ་རིན་པོ་ཆེའི་རིགས་ལས་བསྒྲུབས་ཤིང་ཐ་ན་འདམ་སྐུ་བཞེངས་པའི་རྒྱུ་ཡང་རིན་ཆེན་རིགས་དང་བཟང་སྨན་རྩ་ཆེན་རིགས་འདུལ་སྤྱོར་གྱི་ཕྱེ་མ་འདམ་དང་བསྲེས་ནས་བཞེངས་དགོས་ལ།རང་བྱོན་དང་མཁས་གྲུབ་སོགས་སྐྱེས་ཆེན་གྱི་ཕྱག་བཟོ་མ་ཡིན་པའི་རྡོ་སྐུ་ཙམ་ལ་རྟེན་འགངས་ཆེན་དུ་མི་བརྩི་བ་དང་།གཉིས་སུ་རྡོ་སྐུ་ནི་ཤིན་ཏུ་བྱ་དཀའ་སྟེ།སྤྱིར་བཏང་གི་རྡོ་སྐུ་ལ་དེ་ཙམ་གྱིས་ངལ་བ་བྱེད་དགོས་འདོད་མེད་པ་དང་།གསུམ་དུ་བོད་ཀྱི་རྟེན་ཐམས་ཅད་ལ།རྟེན་ལ་ནང་གཞུག་འབུལ་བའི་ལག་ལེན་ལས་འཆད་འགྱུར་བྱུང་། ནང་གཞུག་ཚད་དང་ལྡན་པ་རིང་བསྲེལ་ལྔ་ལ་སོགས་སྐུ་གསུང་ཐུགས་ཀྱི་རྟེན་དང་།གནས་སོ་སོའི་གཟུངས་དང་སྲོག་སྔགས་བཅས་ཆ་ཡོངས་སུ་ཚངས་བ་ཞིག་དགོས་མོད། རྡོ་སྐུ་རྐོས་པའི་རིགས་ལ་དེ་ལྟར་འབྱུང་དཀའ་བ་བཅས་ཀྱིས་མིན་ནམ་ཞེས་ཁོ་བོས་དཔྱད་དེ། གཟིགས་པ་པོ་རྣམས་ལ་གྲོས་སུ་འདེབས་ཡུལ་ཙམ་སྟོན་པའོ།།