བོད་ཤོག་བཟོ་སྟངས་དང་དེའི་རྒྱུ་ཆ་སོགས་བཤད་པ།
སྤེལ་དུས 2018-03-08
ཡོང་ཁུངས། ངེད་དྲ་བ།
རྩོམ་པ་པོ། རྡོ་རྗེས་བསྒྲིགས།
དེ་ཡང་བོད་ཀྱི་བཟོ་ཤེས་བོད་ཤོག་གླེང་བ་ལ་ཐོག་མར་བོད་ཤོག་ནི་དུས་ནམ་ཞིག་བྱུང་བ་དང་། དེའི་རྒྱུ་ཆ་དང་བཟོ་ཁྱད། ཤོག་བུ་སྦང་འདོན་བྱེད་ཐབས། བོད་ཤོག་གི་དམིགས་བསལ་ཁྱད་ཆོས། ཐོན་ཁུང་ས་གནས་སོགས་བཤད་པ་ལ། དང་པོ་སྤྱིར་བཟོ་རྩལ་ནི་མིའི་རིགས་ཀྱི་གསར་གཏོད་བྱས་པའི་ཤེས་རིག་ལོ་རྒྱུས་ཐོག་གི་གྲུབ་འབྲས་གལ་ཆེན་ཞིག་ཀྱང་ཡིན། མིའི་རིགས་ཀྱི་བྱ་དངོས་གང་དང་གང་ཡིན་རུང་དུས་ཡུན་རིང་པོའི་འཚོ་བའི་ཐོན་སྐྱེད་དང་ཉམས་མྱོང་ལས་བྱུང་བ་དང་། ཤོག་བཟོའི་ལག་ཤེས་ཡང་དེ་ལས་མ་འདས་པར་མིའི་རིགས་ཀྱི་ཐུན་མོང་མ་ཡིན་པའི་ཤེས་རིག་དང་འཚོ་བའི་ཐོན་སྐྱེད་ལ་ནུས་པ་ཐོན་པའི་ལག་ཆ་གལ་ཆེན་ཞིག་ཏུ་གྱུར་བ་མ་ཟད། དེ་དག་ནི་མིའི་རིགས་ཀྱི་ཤེས་རིག་ལོ་རྒྱུས་གོང་མཐོར་ཕྱིན་པའི་ནང་མེད་དུ་མི་རུང་བའི་གྲུབ་ཆ་གལ་ཆེན་ཞིག་ཏུ་གྱུར་ཡོད།
དགོས་སུ་བོད་ནི་ཤེས་རིག་དང་ལག་རྩལ་གང་གི་ཆ་ལ་ལོ་རྒྱུས་དུན་ཡུན་རིང་བ་རིག་གཞུང་འོད་སྟོང་འཕྲོ་བའི་མི་རིགས་ཤིག་ཡིན་པས། ཤོག་བུ་བཟོ་བའི་ལག་རྩལ་དེ་ཡང་གནའ་དུས་ནས་ཤེས་རིག་དར་ཁྱབ་བྱུང་བ་ནས་རིམ་བཞིན་བྱུང་ཏེ། འདི་ནས་ཡར་འདེད་པའི་ལོ ༡༨༠༣༣ སྤྱི་ལོ་སྔོན་གྱི་ལོ ༡༦༠༡༦ ལོར་ཞང་བོད་མཐོ་སྒང་འདིར་གཡུང་དྲུང་བོན་གྱི་སྟོན་པ་གཤེན་རབ་ཀྱི་སྐབས་ནས་ཤོག་བཟོའི་ལག་ཤེས་ཡོད་པ་མ་ཟད། སྟོན་པའི་བཀའ་རྟེན་གསུང་རབ་རྣམས་འབྲི་ཀློག་འདོན་གསུམ་གྱི་ལམ་ནས་འཛིན་སྐྱོང་བྱས་ཡོད་པ་སྟེ། སྟོན་པ་ཉིད་ཀྱི་གསུང་བའི་བཀའ ༼ གསེར་འོད་ནོར་བུ་འོད་འབར ༽ ལས་མཐིང་ཤོག་སྔོན་པོ་གཡུ་མདོག་དག་ལ་ནི། སེར་འབར་རིན་ཆེན་གསེར་གྱི་བྲིས་ན་སུ། ཞེས་དང་མཚར་ཤོག་དམར་པོ་བྱུ་རུའི་མདོག་འདྲ་ལ། སྔོ་འབར་རིན་ཆེན་གཡུ་ཡི་བྲིས་ན་སུ། ཞེས་དང་དཀར་གསལ་མདངས་ལྡན་དུང་ཤོག་དག་ལ་ནི། མཚར་དཀར་དང་ནི་རྒྱ་སྣག་དག་ལ་ཡང་། རིན་ཆེན་བཟང་དྲུག་སྨན་སྤོས་བྲིས་ན་སུ། ཞེས་པ་སོགས་ལས་ཤོག་བུའི་རྒྱུ་ཆ་དང་ཁ་དོག་ཧ་ཅང་མང་པོ་ཡོད་པ་མཚོན་ཡོད།
བོད་རྒྱལ་ཐོག་མ་གཉའ་ཁྲི་བཙན་པོས་གཤེན་ནམ་མཁའ་སྣང་བའི་འདོག་ཅན་ལ་སྤྱི་སྤུངས་གཡུང་དྲུང་བོན་སྐོར་ཞུས་ནས་སྤྱོད། དེའི་སྲས་མུ་ཁྲིའི་སྤྱི་སྤུང་བོན་རྣམས་ཟབ་པར་དགོན་ནས་གླེགས་བམ་རྣམ་བསེའི་སྒྲོམ་བུར་སྦས་པ་སོགས་ལ་གཞིག་ནས། བོད་རྒྱལ་གནམ་གྱི་ཁྲི་བདུན་ནས་གྲི་གུམ་གྱི་ཚེ་སྟོད་ཡན་ཆད་དུ་བོན་གྱི་གསུང་རབ་རྣམས་གླེགས་བམ་ཡི་གེའི་ལམ་ན་དྲངས་པ་ཤ་སྟག་ཡིན་པ་སོ། བོད་རྒྱལ་བརྒྱད་པ་གྲི་གུམ་གྱི་དུས་སུ་བོན་རེ་ཞིག་སྣུབ་པས། བོན་གྱི་གཤེན་པོ་རྣམས་ཀྱིས་གོང་གི་བོན་དཔེ་དང་གླེགས་བམ་རྣམས་ཤོག་བྲིལ་བྱས་ནས་གཏེར་དུ་སྦས་པ་དང་། ཤོག་བྲིལ་རྣམ་ཀྱི་ཁ་དོག་དང་ཚད་གཞི་ཡིག་འཕྲིན་སོགས་གཏེར་སྦས་འགྲེལ་ཡིག་དང་གཏེར་རྟགས་རི་མོ་བཅས་ད་ལྟའི་དཔེ་རྙིང་རྣམས་སུ་གསལ་པོར་འཁོད་ཡོད་པ་སྟེ། སྤ་གྲོའི་དུང་ཤོག་འབྲི་འཚམ་ཤོག་སེར་ཟང་ཟང་གི་མཚར་ཤོག་སོགས་ཡོད་སྟེ། དཔེར་ན་ཞལ་བཟང་བྲག་ནས། ཤོག་དྲིལ་དམར་སྐྱ་མདའ་ཚད་གཅིག་ལ། ཞེང་ལ་སོར་བརྒྱད་ཡོད་པ་ལ། སྔ་གཏོ་ལ་ཡིག་ཕྲེང་བཞི་བཅུ་ཞེ་གསུམ། ཕྱི་ལྟོ་ལ་བརྒྱ་དང་སུམ་ཅུ་རྩ་གསུམ་ཡོད་པ་ལ། ཞལ་བཤུས་པ་ལ་དག་པར་གཏུགས་སོ་ཞེས་པ་སོགས་ལས་གསལ།
དེ་རྗེས་བོད་རྒྱལ་སྲོང་བཙན་སྒམ་པོའི་སྐུ་དུས་སུ་ཡང་ཤོག་བཟོའི་ལག་རྩལ་རྒྱུན་མཐུད་དང་ཡར་རྒྱས་ཕྱིན་ཡོད་པ་སྟེ། རྒྱལ་པོ་སྲོང་བཙན་སྒམ་པོའི་སྐབས་ཐང་རྒྱལ་རབས་ཀྱི་གོང་མ་ཐང་ཐེ་ཙུང་ལ་རྒྱ་བཟའ་ཀོང་ཇོ་བཙུན་མོར་སློང་སྐབས་བཀའ་ཤོག་གི་ཡིག་གེ་རྒྱ་ཡིག་ཐོག་བྲིས་ནས་བསྐུར་ཡོད་པའི་གནས་ཚུལ། བཀའ་ཆེམས་ཀ་ཁོལ་མ་ལས ༼བཀའ་ཤོག་གི་སྒྲོམ་བུ་གསུམ་བསགས་ནས༽ ཞེས་པ་དང་། ཡང་ ༼རྒྱ་ནག་སྟོང་ཁུན་གྱི་སྐད་དང་ཡི་གེ་མཐིང་ཤོག་ལ་གསེར་གྱི་བྲིས་ནས་འདུག་པ༽ ཞེས་སོགས་འཁོད་ཡོད་པར་བརྟག་ནས་སྐབས་དེར་བོད་དུ་ཤོག་བུ་བཟོ་བའི་ལག་རྩལ་དར་ཟིན་པ་མཚོན་ཡོད། ད་དུང་རྒྱལ་པོ་ཁྲི་སྲོང་ལྡེ་བཙན་གྱི་དུས་སུ་བོད་དུ་ཤོག་བཟོའི་ལག་རྩལ་དར་ཁྱབ་ཆེན་པོ་ཕྱིན་ཡོད།
སྤྱི་ལོའི་དུས་རབས་བརྒྱད་པ་ནས་བཟུང་རྒྱ་གར་ནས་བོད་དུ་བསྒྱུར་བའི་ཆོས་གཞུང་གི་གསུང་རབ་ཚང་མ་ཤོག་བྲིལ་བྱས་ནས་ཡིག་འབྲུ་དགུ་སྟོང་དྲུག་རྒྱ་ལ་བམ་པོ་གཅིག་དུ་བརྩི་བ་དང་། ཡིག་འབྲུ་ཡང་ཆེན་པོ་མ་ཏོག་ཆུང་ཆུང་འབྲི་མི་ཆོག་པའི་བཀའ་སོགས་ཡོད་པ་མ་ཟད། རྒྱལ་པོའི་ལས་དོན་གལ་ཆེའི་རིགས་བཀའ་གཙིགས་ཤོག་བུའི་ཐོག་བྲིས་ནས་བང་མཛོད་དུ་བཞག་པའི་ལོ་རྒྱུས་སོགས་ཡོད་པ་མ་ཟད། བོད་དུ་རང་ཡུལ་གྱི་རྒྱུ་ཆ་བེད་སྤྱད་དེ་ཐུན་མོང་མ་ཡིན་པའི་བོད་ཤོག་ཐོན་སྐྱེད་བྱེད་ཤུགས་ཆེ་རུ་ཕྱིན་པ་དང་། བོད་ཀྱི་སྤྱི་ཚོགས་དཔལ་འབྱོར་དང་རིག་གནས་ཀྱི་དགོས་མཁོ་དང་བསྟུན་ནས་བོད་ཤོག་ཐོན་སྐྱེད་ལ་རིམ་བཞིན་འཕེལ་རྒྱས་ཆེན་པོ་བྱུང་ནས། ཤེས་རིག་དང་ལོ་རྒྱུས་ལ་ཤུགས་རྐྱེན་གཏིང་ཟབ་ཐེབས་ཡོད། གཉིས་པ་བོད་ཤོག་གི་རྒྱུ་ཆ་དང་བཟོ་ཁྱད། ཤོག་བུ་བཟོ་བའི་རྒྱུ་ལ་རབ་འབྲིང་ཐ་གསུམ་ཡོད་པ་ལས་རབ་ནི་ཤོག་ལྡུམ་དུང་ལོ་མ་ཡིན་པ་དང་། དེ་ལ་ཡང་རབ་འབྲིང་ཐ་གསུམ་ཡོད་པ་སྟེ། རབ་ནི་ས་ནག་དང་ཤུག་ཁྲོད་སོགས་རྫ་དང་བྲག་མེད་པའི་སར་སྐྱེས་པ་དེ་ཡིན། འབྲིང་ནི་བྱེ་མ་དང་ས་དམར་གཡམ་པའི་ནང་དུ་སྐྱེས་པ་ནི་རྒྱུ་སྲ་ཞིང་ཚོས་དཀའ་བ་ཁ་དོག་སེར་བ་ཡིན་པས་དེ་དང་། ཐ་མ་ནི་ཤུན་པ་མཐུག་ཅིང་འབུ་ཡོད་པ་ཡིན་པར་བཤད་དོ། ལྡུམ་བུ་ལེགས་པར་བཏུས་ནས་ས་རྡུལ་བཀྲུ་བཤལ་དང་ཕྱི་ཤུན་བྲད་བརྡར་བྱས་ཏེ་སྙིང་པོ་བླངས། བྱ་རྡོ་བསྲེགས་པ་ཆུ་འཁྱག་ཏུ་འཕངས་ཏེ་དཀྲུགས་ལ་གར་སླ་དར་བ་ཙམ་བྱས་པ་དེ་ལྕེ་ཐོག་ཏུ་བླུགས་ན་རྒྱ་ཚྭ་ལྟར་འབིགས་པ་ནི་ལེགས་པའི་རྟགས་ཏེ། ལམ་དུ་མ་སོང་ན་ངར་མི་འབྱུང་ངོ་། དེ་ཉིད་གྲུངས་གཞུག་སྙིགས་མ་མེད་པའི་ཁུ་བའི་ནང་དུ་ཤོག་ལྡུམ་བཙོའོ། དེ་ལྟར་མ་གྲུབ་ན་ཐལ་ཁུའི་ནང་དུ་བཙོས་ཀྱང་ཆོག་ལ། ཚོས་ནས་རྡོ་གཏུན་དུ་བརྡུང་ནས་ཟན་ལྟར་གྱུར་མཐར་ཆུ་དང་བཅས་མདོང་མོའི་ནང་བསྲུབས་པས་སྐྱོམ་དེ་ཤོག་ཁ་རེའི་ཚད་ཆ་མཉམ་པར་བགོ དེ་ནས་རྫིང་སོགས་ཆུ་འཁྱིལ་གཙང་མའི་ནང་དུ་ཤོག་བྲེ་ཞེས་ཤོག་ཁ་ཆེ་ཆུང་གང་འདོད་པའི་ཚད་ཅན་གྱི་ཤིང་སྒམ་གྱི་ཁེབས་གཅོད་མཐིལ་མེད་པ་ལྟ་བུ་གྲུ་བཞི་སྤྲས་པའི་ཕྱོགས་གཅིག་ཏུ་སང་རས་སམ་དར་སྲབ་ཞིང་འཇམ་པ་ཚགས་ལྟ་བུ་དེའི་ནང་དུ་བླུགས་ལ་མ་ཡོ་བ་རྫིང་ཆུའི་སྟེང་དུ་བཙག་དཀྲུགས་བྱས་ཟིན་པ་དང་བླངས་ཏེ། སྐམ་དུ་བཅུག་ནས་གྲུབ་པའོ། ཆུར་བཙག་དཀྲུག་བྱེད་པར་ཤོག་བྲེ་ཡོ་ན་ཤོག་བུར་སྲབ་མཐུག་འགྲོ་ཉེན་ཆེ་ཞིང་། ཆ་སྙོམས་པར་དཀྲུགས་ཤིང་ཆུ་ལས་བླང་དུས་མ་གཟབ་ན་བུག་རྡོལ་འབྱུང་ཉེན་དང་། ཤོག་ལྡུམ་མ་ཚོས་ན་དུལ་དཀའ་བ་དང་། གཏུན་བརྡུང་གིས་མ་དུལ་ན་འཇམ་པོ་མི་འོང་བ་དང་། རྡོ་གཏུན་སྲ་མཁྲེགས་དང་གཙང་མ་མིན་ན། ཤོག་མདོག་མི་གཙང་བ་སོགས་འབྱུང་བས་འདི་དག་ལ་གཟབ་གལ་ཆེ་བར་བཤད།
དུང་ལོ་མ་ནི་ཤོག་བུ་སྲབ་མཐུག་གང་འདོད་བྱེད་པའི་རྒྱུ་ལས་མཆོག་ཏུ་བཤད་དོ། རྒྱུ་འབྲིང་པོ་ནི་ཨ་ག་རུའི་ཤུན་པ་སྟེ་སྔོ་བཤུས་བྱས་པའི་ཤུན་པའི་ནང་གི་བར་ཤུན་དེ་ཐོག་མར་ཡུད་ཙམ་བཙོས་ནས་ཁུ་བ་དབོ། གཞན་གྱི་བཙོ་བརྡུང་དཀྲུགས་བླུགས་ཐམས་ཅད་གོང་ལྟར་བྱ་ལ། འདིའི་ཁྱད་ཆོས་ནི་མཐུག་པོར་ལེགས་པས་གླེགས་བམ་འབྲི་གཞིར་མཆོག་ཏུ་བཤད་དོ། ཐ་མ་ནི་རེ་ལྕག་གི་རྩ་བ་སྟེ། འདི་ལས་བཟང་བ་བྱེ་མ་ས་འབོལ་དང་ས་ནག་སོགས་སྙི་སར་སྐྱེས་པའི་རེ་ལྕག་གི་རྩ་བ་བརྐོས་ནས་སྐོགས་དང་ནང་སྙིང་གཉིས་དོར་བའི་བར་ཤུན་རྒྱུས་པ་ལྟ་བུ་དེ་ཐལ་ཁུའི་ནང་དུ་བཙོས་པས་བལ་ལྟར་ལྷོད་པར་འོང་། དེ་ལ་དུག་ཡོད་པས་དུག་འདོན་ཨ་རུ་ར་ཐུམ་གཅིག་འདེབས། བརྡུང་དཀྲུགས་བླུགས་ཐམས་ཅད་གོང་ལྟར་ལ་འདི་གོང་གཉིས་ལྟར་རྒྱུ་བཟང་པོ་མི་འོང་ཡང་། དུག་ཡོད་པས་འབུ་སྲིན་གྱིས་གནོད་པ་མི་ཚུགས་པས་ཡུན་དུ་གནས་པར་མཆོག་ཏུ་བཤད་དོ།
ཤོག་བུ་ལེགས་པའི་ཚད་ནི། སྲབ་མཐུག་དང་བུག་རྡོལ་མེད་པ། ནག་དྲེགས་དང་འཛར་འཛོར་མེད་པ། དབུར་རྡོས་བརྡར་ན་ས་རྡོ་བའི་ར་རི་མེད་པ། འབོལ་ཞིང་དཀར་ཞད་ཆེ་ལ་ཁམས་འཛིན་པ་དེའོ། ཤོག་བུའི་ལག་ལེན་བྱེད་ཐབས་འདི་དག་གཙོ་བོ་སྔོན་གྱི་བོད་ཤོག་ས་མདོག་ཅན་དག་ཡིན་མོད། དེ་དག་ལ་རྒྱུ་མཉེན་ཞིང་སྲོག་སྲ་བ་འབོལ་ལ་སྣག་ལེགས་པར་འཛིན་པ། ཡུན་དུ་བལྟས་ཀྱང་མིག་ལ་གནོད་པ་མེད་པ། འབུ་སྲིན་གྱིས་གནོད་པ་ཆུང་ཞིང་མཐུག་པ་སོགས་གླེགས་བམ་འབྲི་གཞིའི་ཁྱད་ཆོས་མང་ལ། དེང་དུས་སུ་གོང་གི་ཤོག་བུའི་བཟོ་རྒྱུན་ཕལ་ཆེར་མེད་པ་དང་། རྒྱ་ནག་དང་ཕྱི་རྒྱལ་ནས་འབྱུང་བའི་ཤོག་བུའི་རིགས་མང་བས་ལག་ལེན་ཀྱང་ཤོག་བུ་སོ་སོའི་རྒྱུ་དང་ཁྱད་ཆོས་ལ་གཞིགས་ནས་གང་ལ་གང་འཚམས་སུ་བྱ་དགོས་པས་དཔྱད་གཞི་ཙམ་མོ། གསེར་བྲིས་དངུལ་བྲིས་ཀྱི་གཞི་མཐིང་ཤོག་བྱ་ཐབས་ལ། ནག་མཚུར་བགྲུངས་སུ་བཅུག་ནས་ས་རྡུལ་མ་སོང་བར་དྭངས་བསིང་བྱ། ཐར་ནུའི་རླངས་པ་མིག་ཏུ་མ་སོང་བར་གདུས་པར་ཚ་ལ་བསྲེས་ཏེ་རས་ཚགས་ལ་བཙགས། དེ་གྲོ་ཆང་སྐྱུར་མོ་དང་བསྲེས་ཏེ་སྐོལ་བར། ཚ་ལ་དང་ནག་མཚུར་ཉུང་ཞིང་། གྲོ་ཆང་དང་ཐར་ནུ་མང་དགོས་ཏེ་ཚོད་ཟིན་པར་བྱ། ཤོག་སྐྱ་ལ་བྱུག་ནས་ཚོད་ལྟ་བྱེད་པར། ཤོག་བུ་ནག་ལོག་གེར་སོང་ན་ཚོས་པའི་ཚད་ཡིན་པས་ཐབ་ལས་བླངས་ཏེ་ཅུང་ཞིག་གྲང་ནས་དྲོ་འཇམ་ཙམ་སོང་བའི་ནང་དུ། དེང་གི་ཤོག་གུ་སྣ་ཐུང་རིགས་མ་ཡིན་པའི་བོད་ཤོག་སྤུས་ལེགས་པར་དྲངས་ཏེ་སྐམ་དུ་བཅུག དེ་ནས་ཨ་རུ་ར་འགའ་ཞིག་བརྡུངས་ཏེ་བཙོས་ནས་ཁུ་བ་རས་ཚགས་ལ་བཙགས་པར་ཤོག་བུ་དྲངས་པས་མཐོང་ཤོག་གྲུབ་ཅིང་། འདུལ་ཐབས་ཤོག་བུ་དཀྱུས་མའི་ལག་ལེན་ལྟར་བྱའོ། ཡང་རྒྱ་ནག་གི་ལུགས་སུ། མགྲོན་བུ་བསྲེགས་པ་ཞིབ་བཏགས་བྱས་པ་ལ། གྲོ་ཆང་དང་ཛཱ་ཏི་བཏབས་ཏེ་གདུས་པའི་ཁུ་བར་ཤོག་བཟང་དྲངས་པས་མཐིང་ཤོག་འབྱུང་ཞིང་། སྐམ་ནས་ཆགས་བྱས་ལ། ཨ་རུ་རའི་ཆུ་གོང་ལྟར་ལས་བཏོན་པར་བྱའོ། སོགས་མཐིང་ཤོག་བཟོ་བའི་ལག་ཤེས་མང་དུ་འབྱུང་ཡང་ལག་ལེན་སྟབས་བདེ་གཉིས་ཙམ་བྲིས་པའོ། གསུམ་པ་ཤོག་བུ་སྦང་འདོན་བྱེད་ཐབས་ནི། བག་ཆུ་སླ་བཙོས་དྭངས་མ་བོང་ཆེ་བར་བྱ་དེ་ལ་དར་བ་མ་བཏགས་པ་བག་ཆུའི་བཞི་ཆ་ཙམ་བཏང༌། སྤྱིན་ཆུའི་དྭངས་མ་ཅུང་ཟད་བཏང༌། དེ་རྣམས་བསྲེས་ལ་དྲོ་འཇམ་ལ་བག་འདོན་བྱ་དགོས་ཏེ། ཧ་ཅང་ཚ་ཆེས་ན་ཤོག་བུ་འཚིག གྲང་ན་བག་ཆུ་མི་འགོ་བས་ཤོག་བུ་སྲ་འཐིང་མི་འོང༌། དེ་བས་ཚ་དྲོད་རན་པར་བྱ། རྫས་དེ་རྣམས་ཀྱི་ཡོན་ཏན་ནི། དར་བས་དཀར་ལ་དང་བ་འབྱུང་ཞིང་བག་ཆུ་སྲ་ལ་འབོལ་བ་འབྱུང༌། སྤྱིན་ཆུས་མཁྲེགས་ཤིང་མདངས་ལྡན་འོང་ཞིང་ཡི་གེ་མི་འབྱམས་པ་འོང༌། ཤིན་ཏུ་དཀར་པོར་འདོད་ན་ཀ་རག་བརྡར་བའི་ཁུ་བ་ཅུང་ཟད་བཏང་བས་ཤིན་ཏུ་ལེགས་པ་འབྱུང་སྟེ་མང་ན་ལྗིད་ཆེ་བར་འོང༌། བག་ཆུ་མང་ཆེ་ན་ཤོག་བུ་འཚིག་ཅིང་ཐིག་མི་ལེན་པ་འོང༌། སྤྱིན་ཆུ་གར་ཆེ་ན་ཤོག་བུ་གྱོང་ཞིང་སྣག་མི་ལེན་པ་འོང༌། དེས་ན་གོང་ལྟར་ཚོད་ཟིན་པར་བྱའོ། ཤོག་རྒྱུ་བཟང་ངན་དང་ཤོག་ལས་བཟང་ངན་གྱིས་ཤོག་བུ་སྣ་ཚོགས་འོང་སྟེ་དེ་ནི་ཤོག་བཟོའི་ཚུལ་ལས་ཤེས་སོ། དབུར་རྡོའི་ཁྱད་པར་ནི། དང་གིས་དབུར་ན་འཇམ་པོར་འོང་སྟེ་ཤོག་བུ་ཅུང་ཟད་སྔོན་པོར་འགྲོ རྡོ་ཡིས་དབུར་ན་ཤོག་བུ་འཚིག་ནས་འོང༌། མཆོང་གིས་དབུར་ན་རི་མོ་དོད། ལྕགས་སོགས་ཀྱིས་དབུར་ན་གཡའ་འོང༌། དེས་ན་གཟི་སེར་ཁྲས་དབུར་ན་མདོག་ལེགས་ཤིང་འཇམ་ཤོག་བུ་འབོལ་བར་འོང་བས་དེ་བཟང་ཞེས་སྔར་གྱི་བྲིས་མཁན་དག་གི་ཉམས་མྱོང་དུ་བཤད། དེ་ལྟར་མ་རྙེད་ན་རྭ་སོགས་ཀྱིས་རུང་ཙམ་དང༌། མ་ན་ཧོ་སོགས་རིན་ཆེན་མཁྲེགས་འཇམ་རྣམས་བཟང་ངོ༌། བརྡར་གདན་ཤིང་ལེབ་འཛེར་མ་དང་གས་ཆག་སོགས་མེད་པའི་སྲ་ཤིང་ལས་བྱས་པའི་ཤིང་ལེབ་རྒྱ་ཆེ་ཞིང་ངོས་འཇམ་པ། བརྟན་ཅིང་དྲི་མ་དང་བྲལ་བ་དེ་ཡིན་ལ། ཤོག་བུ་དབུར་བར་མཐའ་དབུས་ཐམས་ཅད་དུ་མ་ཁྱབ་པ་མེད་པར་ཤེད་རན་པར་ཕྱུང་ནས། ཡུན་དུ་དབུར་ན་ལེགས་ལ། དབུར་ངན་དབུར་དང་མཉེད་ངན་གྱི། །དཀྱིལ་ནས་འདུལ་བཞི་མཐའ་ནས་གྱོང་། ། ཟེར་བ་ཡོད་པས། དེ་ལྟར་མ་ཤོར་བ་གལ་ཆེའོ། བཞི་པ་ས་གནས་མང་པོ་ནས་ཤོག་བཟོའི་ལག་རྒྱུན་དར། ལོ་རྒྱུས་འཕེལ་རིམ་ཡུན་རིང་ནང་བོད་ཤོག་ལ་ཤར་གྱི་ཁམས་ཤོག་དང་། སྐྱིམས་སྟོང་ཤོག་བུ། ཀོང་པོའི་ཤོག་བུ། སྤོ་སྟོད་ཤོག་བུ། མོན་ཤོག སྙེ་ཤོག གཙང་ཤོག མངའ་རིས་ཀྱི་ཤོག་བུ་སོགས་བྱེ་བྲག་དུ་མ་ཐོན་མྱོང་ཡོད་ལ། ཐོན་ཡུལ་མི་འདྲ་བར་གཞིགས་ནས་སྤྱོད་སྒོ་ཡང་མི་འདྲ་བ་ཡོད།
དེ་སྔའི་བོད་ཤོག་བཟོ་གྲྭར་གཞུང་སྒེར་གཉིས་ཡོད་པའི་སྐྱིམས་སྟོང་བོད་ཤོག་བཟོ་གྲྭ་ནི་གཞུང་གིས་གཉེར་བ་ཞིག་ཡིན་ལ། དེ་ནས་ཐོན་པའི་ཤོག་བུ་རྩེ་གྲ་ཡིན་པས་ཆེད་དུ་དངུལ་ལོར་དང་། སྦྲག་འཛིན་བཟོ་བྱེད་དམ་བོད་ས་གནས་སྲིད་གཞུང་གི་ཡིག་ཤོག་བྱེད་ཀྱི་ཡོད། སྒེར་གཉེར་བཟོ་གྲྭ་ཕལ་ཆེར་དུད་ཚང་གཅིག་གམ་དུ་མ་མཉམ་འབྲེལ་གྱིས་བཙུགས་པ་ཞིག་རེད། མཚོ་སྣའི་ཤོག་བུ་ནི་ས་གནས་སྲིད་གཞུང་གི་ཡིག་ཤོག་ཡིན་པ་དང་། ཀོང་པོ་ཞོ་ཁ་ནས་ཐོན་པའི་ཤོག་བུ་ནི་འབྲི་ཤོག་དཀྱུས་མ་རེད། དྭགས་པོའི་ཤོག་བུ་ནི་ས་གནས་སྲིད་གཞུང་གི་བརྡ་ཁྱབ་དང་། ཁྲིམས་ཆོས། བཀའ་རྒྱ་སོགས་གལ་ཆེའི་ཡིག་ཆ་འབྲི་ས་རེད། གཙང་གི་ཤོག་བུ་ནི་གཙོ་བོ་བཀྲ་ཤིས་ལྷུན་པོ་དང་ས་སྐྱ་དགོན་པ་སོགས་ཀྱི་ཆོས་དཔེའི་དཔར་ཤོག་ལ་སྤྱོད་ཀྱི་ཡོད། ལྷོ་ཁའི་ཤོག་བུ་ནི་མཐུག་ལ་སྤུས་ཀ་ཅུང་ཞན་རུང་། སྣག་ཚ་ཐིམ་སླ་བས་བཀའ་བསྟན་འགྱུར་སོགས་ཆོས་དཔེའི་དཔར་ཤོག་དང་དགོན་སྡེ་ཁག་གི་ཐོ་ཡིག་འགོད་ས་སོགས་བྱེད་ཀྱི་ཡོད།
བོད་ཤོག་གི་དམིགས་བསལ་ཁྱད་ཆོས། བོད་ཤོག་ནི་ལོ་རྒྱུས་ཡུན་རིང་ལྡན་པའི་དམིགས་བསལ་ཐོན་ཟོག་ཅིག་ཡིན་ཞིང་། དེའི་ཁྱད་ཆོས་གཙོ་བོ་ནི་མཁའ་རླུང་སྐམ་ཤས་ཆེ་ཞིང་གསོ་རླུང་དཀོན་པའི་ཡུལ་ནས་ཐོན་པས་སྤྱིར་ན་བརླན་གཤེར་འགོག་ཐུབ་པ་དང་། ཤོག་བུའི་རྒྱུ་ཆར་དུག་གཡའ་ཡོད་པས་རུལ་དཀའ་ཞིང་འབུ་དང་བྱི་བ་སོགས་ཀྱིས་མི་ཟ་བ། སྐྱུར་གྱི་རང་བཞིན་མི་ལྡན་ཞིང་སྲ་ལ་མཉེན་པ་དང་ལྟེབས་རྩེག་རྒྱག་པ་དང་རེག་བརྡར་བྱས་རུང་རལ་དཀའ་བས་ཡུན་རིང་ཉར་ཚགས་བྱེད་ཐུབ། ཡི་གེ་གསལ་ལ་མི་རལ་བ། སྤོ་བདེ་ལ་ཉར་ཚགས་བྱེད་བདེ་བ། མཉེན་ལ་འཇམ་པ། སྣག་རྫོབ་མི་ཐེབས་པ། ཤོག་བུར་ཡུན་རིང་བལྟས་རུང་མིག་ལ་མི་གནོད་པ། ལྟེབས་ཉེས་མི་ཤོར་བ་དང་ཚོས་མི་ལོག་པ་སོགས་ཀྱི་ཁྱད་ཆོས་ཡོད། །
