བརྗིད་ཆགས་གཟི་འོད་འབར་བའི་ཕོ་བྲང་པོ་ཏ་ལ།
ཕོ་བྲང་པོ་ཏ་ལ་རྒྱ་བསྐྱེད་པའི་ཚུལ་གྱི་ལྡེབས་རིས།
བོད་གནའ་རབས་ཀྱི་ཁང་བའི་བཟོ་བཀོད་ནི་རིག་གནས་ཀྱི་ཁེབས་རྒྱ་ཡངས་ཤིང་ལག་ལེན་གྱི་ཁྱོན་རྒྱ་ཆེ་བའི་བཅུ་ཕྲག་རིག་པའི་གནས་ཀྱི་གྲུབ་ཆ་ཞིག་ཡིན་ལ། དེ་ནི་འགྲོ་བ་མིའི་རིགས་ཀྱི་དཔལ་ཡོན་འཕེལ་རྒྱས་བྱུང་བའི་ལོ་རྒྱུས་ཆུ་རྒྱུན་རིང་མོའི་ཁྲོད་ཕ་མེས་ཡང་མེས་ཀྱི་ཐུན་མོང་གི་བློ་གྲོས་ཀྱི་རྩལ་ལས་བྱུང་བའི་ཁར། ལོ་རྒྱུས་དང་དུས་རབས་ཀྱི་ཚོད་བརྒམ་ལས་རིམ་བཞིན་འཕེལ་རྒྱས་བྱུང་བ་ཞིག་ཡིན། དེས་བོད་མི་རིགས་ཀྱི་འགྲན་ཟླ་བྲལ་བའི་བློ་གྲོས་དང་། དཔའ་མཛངས་ཀྱི་སྙིང་སྟོབས། རིག་གནས་ཀྱི་ཉིང་བཅུད་བཅས་མཚོན་ཐུབ་ཅིང་། 《དག་ཡིག་གསར་བསྒྲིགས》ལས། ཁང་བ་ནི་མིའི་འདུག་གནས་སམ་དངོས་རྫས་འཇོག་སའི་རྩིག་དངོས་ཀྱི་མིང་ཞེས་འགྲེལ་ཡོད་མོད། ཀུན་གྱིས་མཁྱེན་གསལ་ལྟར་ཐ་དད་ཀྱི་མི་རིགས་ལ་སོ་སོར་དབང་བའི་སྲོལ་རྒྱུན་རིག་གནས་དང་ཐུན་མོང་མ་ཡིན་པའི་ཁྱད་ཆོས་ཤིག་མཆིས། དེ་བས་བཟོ་བཀོད་རིག་གནས་ལ་མི་རིགས་སོ་སོའི་རྟགས་མཚན་ཞིག་ཡོད་ཅིང་ཐུན་མོང་གི་སྤྱི་ཚོགས་རྒྱབ་ལྗོངས་དང་། འཚོ་སྡོད་བྱེད་པའི་ཁོར་ཡུག རིག་གནས་དང་སེམས་ཁམས་ཀྱི་ཁྱད་ཆོས་ལས་རིམ་གྱིས་མི་རིགས་ཀྱི་བཟོ་བཀོད་གྲུབ་པ་རེད། བོད་གནའ་རབས་ཀྱི་ཁང་བའི་བཟོ་བཀོད་ཀྱི་ཁྱབ་ཁོངས་དེ་རིག་གནས་སྒྱུ་རྩལ་དང་འབྲེལ་བ་དམ་ཟབ་ཡོད་པ་ལས་གཞན་ལོ་རྒྱུས་རིག་པ་དང་། མཛེས་དཔྱོད་རིག་པ། སེམས་ཁམས་རིག་པ། སྤྱི་ཚོགས་རིག་པ་སོགས་རིག་ཚན་མང་པོའི་བར་ཡང་འབྲེལ་བ་ཡོད་པ་རེད། བོད་ལུགས་ཁང་བའི་བཟོ་བཀོད་ལ་སྤྱི་ཚོགས་ཕན་ནུས་ཀྱི་ཐད་ནས་དགར་ན་དགོན་སྡེའི་བཟོ་བཀོད་དང་། ཕོ་བྲང་གི་བཟོ་བཀོད། དམངས་ཀྱི་སྡོད་ཁང་གི་བཟོ་བཀོད་བཅས་རིགས་གསུམ་དུ་འདུས། བོད་གནའ་རབས་ཀྱི་ཁང་བའི་བཟོ་བཀོད་ལ་ལོ་རྒྱུས་རིག་གནས་རྒྱབ་ལྗོངས་ངེས་ཅན་ཞིག་ལྡན་པ་སྟེ། གཅིག་ནས་ཁང་བའི་བཟོ་བཀོད་དང་རྒྱན་སྤྲས་སྒྱུ་རྩལ་ལ་བརྟན་གཡོ་སྣོད་བཅུད་མཛེས་པར་བྱེད་པའི་དགེ་མཚན་དོད་པོ་ལྡན་ལ། དུས་ཡུན་ངེས་ཅན་ཞིག་གི་སྐབས་ཀྱི་ལོ་རྒྱུས་དང་རིག་གནས་ཀྱི་ཆ་འཕྲིན་ཕུན་སུམ་ཚོགས་པ་ཞིག་བརྒྱུད་སྒྲོག་བྱེད་བཞིན་ཡོད། ཡང་གཅིག་ནས་ཁང་བའི་བཟོ་བཀོད་དང་རྒྱན་སྤྲས་ཀྱི་རྣམ་པ་དང་སྒྲིག་གཞིས་ཁང་བའི་བཟོ་བཀོད་ཀྱི་ཁྱད་ཆོས་དང་གྲུབ་གཟུགས་ཀྱི་ཁྱད་ཆོས་མངོན་པར་མཚོན་ཐུབ་གཤིས། བོད་གནའ་རབས་ཀྱི་ཁང་བའི་བཟོ་བཀོད་ཀྱང་དེ་ལས་མ་འདས་པར་གཟི་དཔལ་འབར་བའི་རྒྱན་སྤྲས་མཛེས་རིས་དང་ལྐོག་གྱུར་གྱི་གཟིགས་དབྱིབས་ཁྲོད་རང་མི་རིགས་ཀྱི་རྫོངས་སྟུག་པོའི་ཆོས་ལུགས་རིག་གནས་དང་། དུས་རབས་ཀྱི་འཕོ་འགྱུར། འཚོ་བའི་དཔེ་རིས་དག་གཡའ་དག་པའི་མེ་ལོང་ཇི་བཞིན་མངོན་པར་མཚོན་ཐུབ།
མཁར་ལ་སྔ་བ་ཕོ་བྲང་ཡུམ་བུ་བརླ་སྒང་།
བསྐྱར་དུ་བཞེངས་པའི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་།
དེ་ཡང་བོད་གནའ་རབས་ཀྱི་ཁང་བའི་ལོ་རྒྱུས་ནི་ཤིན་ཏུ་རིང་ལ་ཏུན་ཧོང་ཡིག་རྙིང་ལས་རྒྱལ་ཕྲན་ཡུལ་ཡུལ་ན། ཡུལ་ཆབ་ཀྱི་ཡར་འགོ། མཁར་ཁྱུང་ལོང་དངུལ་མཁར་ནང་ན། རྒྱལ་པོ་ལུག་སྙ་ཤུར། ཞེས་དང་། མཁར་མྱང་རོ་ཤམ་པོ་དགུ་རྩེག་ལང་ལང་གི་ནང་ན། ཞེས་པ་སོགས་ལས་བོད་ཁང་གི་ཐོག་མ་མཁར་རམ་ཕོ་བྲང་གི་ལོ་རྒྱུས་ནི་ཁྲི་བདུན་གོང་སྟེ་རྒྱལ་ཕྲན་སིལ་མའི་སྐབས་ནས་ཀྱང་ཡོད་པ་དངོས་སུ་གསལ་བ་དང་། བོད་ཀྱི་མཁར་ལ་སྔ་བ་ཕོ་བྲང་ཡུམ་བུ་བརླ་སྒང་མ་བརྩིགས་སྔོན་གྱི་ལོ་ངོ་སྟོང་ཕྲག་གསུམ་ཡས་མས་སུ་རྡོ་མཁར་བརྩིག་སྲོལ་ཡོད་པར་སེམས་ཏེ། ལྷག་པར་དུ་ཆབ་མདོ་ཁ་རུབ་ནས་རྙེད་པའི་ཁང་ཤུལ་ལ་བརྟགས་ཚེ་བོད་ཁང་ལ་ལོ་ངོ་ལྔ་སྟོང་ལྷག་གི་ལོ་རྒྱུས་ལྡན་པ་དངོས་ཡོད་ཀྱིས་ར་སྤྲོད་བྱས་ཡོད་པ་སྟེ། ཁ་རུབ་གནའ་ཤུལ་ནི་བོད་ཡུལ་མཐོ་སྒང་ནས་རྙེད་པའི་གདོད་མའི་གྲོང་ཚོའི་མཁར་ཤུལ་དང་པོ་དེ་རེད། དེ་སྔོག་འདོན་བྱས་པ་བརྒྱུད་པུར་ཁང་ནི་ས་དོང་བྲུས་ཏེ་དོང་གི་ལྡེབས་ངོས་ཀྱི་ཕྱོགས་བཞིར་རྡོ་ཡི་རྩིག་པ་བརྩིགས་ནས་འདུག པུར་ཁང་དེའི་རིགས་མང་ཆེ་བ་གྲུ་བཞི་ནར་མོའི་དབྱིབས་ཅན་ཡིན་ཞིང་། པུར་ཁང་གི་ས་ངོས་དང་པུར་སྒྲོམ་གྱི་ཕྱི་ནང་གང་སར་ངོས་སྙོམས་ལ་སྲ་ཞིང་མཁྲེགས་པའི་ཨར་ཀ་མཐུག་པོ་བཏིངས་འདུག གཞན་ཡང་པུར་ཁང་ལ་སྒོ་དང་། ཐེམ་པ། རྡོ་སྐས་སོགས་ཡོད་པ་ནི་བཀོད་པ་ཁང་ཁྱིམ་དང་མཚུངས་པར་འདུག་ཕྱིར། བོད་ཀྱི་མེས་པོ་རྣམས་ལ་མི་ལོ་ལྔ་སྟོང་ཡར་སྔོན་ནས་སྡོད་ཁང་བཟོ་སྐྲུན་གྱི་ནུས་པ་དང་ལག་རྩལ་དར་ནས་འདུས་སྡོད་ཀྱི་འཚོ་བར་རོལ་ཡོད་པ་རྟོགས་ཐུབ། ཡང་བོད་གནའ་རབས་ཀྱི་ཁང་བར་སྤྱིའི་ཆ་ནས་དབྱེ་ན་གསོན་པོ་གནས་སའི་ཁང་བཟང་དང་གཤིན་པོ་སྦེད་སའི་བང་སོ་བཅས་རིགས་དཀར་ནག་གཉིས་སུ་ཕྱེས་ཡོད་པ་ལས། གསོན་པོ་གནས་སའི་བོད་ཁང་གི་ཐོག་མ་ནི་རྡོ་མཁར་རམ་ཕོ་བྲང་ཡིན་ཞིང་དེ་ཡི་ལོ་རྒྱུས་རྒྱབ་ལྗོངས་ཀྱང་དམག་འཁྲུགས་ཏེ་དགྲ་བོའི་གླགས་འོག་ཏུ་མི་ཚུད་པའི་ཆེད་དུ་ཕྱོགས་བཞི་མེ་ལོང་ལྟར་གསལ་བའི་རི་བོའི་སྤོ་རུ་བཞེངས་པ་སོགས་སྔོན་གྱི་རྒྱལ་པོ་རྣམས་ཀྱི་མཁར་ཤུལ་ལ་ལན་གཅིག་བལྟས་པས་རྟོགས་ཐུབ། རྒྱལ་པོ་སྲོང་བཙན་སྒམ་པོའི་སྐབས་ནས་བཟུང་བོད་ཁང་ནི་རི་རྩེའི་ཕོ་བྲང་ནས་དམངས་ཕལ་བའི་སྡོད་ཁང་དུ་བསྒྱུར་མགོ་བརྩམས་ཤིང་བསྒྱུར་མཁན་ལ་ཡང་བཙན་པོའི་དགུང་བློན་བཞི་ཡི་ཡ་གྱལ། འཕྲུལ་བློན་མཛངས་མི་བདུན་གྱི་ལྔ་པ། སྙགས་ཁྲི་བཟང་ཡང་སྟོན་ཡིན་པ《ཆོས་འབྱུང་མཁས་པའི་དགའ་སྟོན》ལས། འདི་ཉིད་མཛངས་པའི་ལས་སུ་རི་ཁྱིམ་ཀླུངས་སུ་ཕབ། སྤོ་མཐོ་མཁར་དུ་བརྩིགས་ནས་གྲོང་ཁྱེར་བཅོས། འདི་ཡན་བོད་ཀྱི་ཁང་ཁྱིམ་རི་ལ་ཡོད། དེའི་ཕྱིར་བོད་ཀྱི་མཛངས་མི་ལྔ་པ་ཡིན། ཞེས་པ་ལྟར་རོ། གཞན་རྒྱལ་པོ་སྲོང་བཙན་སྒམ་པོའི་དུས་སུ། མཐའ་འདུལ་ཡང་འདུལ་གྱི་ལྷ་ཁང་ཕོན་ཆེན་བཞེངས་པའི་ཁྲོད། ད་ལྟ་གནས་པའི་ལྷ་ཁང་མང་པོར་བརྐོས་དཀྲོལ་གྱིས་བརྒྱན་པ་མཇལ་རྒྱུ་ཡོད། ཁྱད་པར་ལྷ་ལྡན་གཙུག་ལག་ཁང་ལ་ཀ་བ་སེང་མགོ་ཅན་དང་འབྲུག་མགོ་ཅན་སོགས་བརྐོས་པ་མཐོང་རྒྱུ་ཡོད་པ་མ་ཟད། གདུང་མ་དང་གཞུའི་ལྡེབས་ལ་བརྐོས་དཀྲོལ་ལག་རྩལ་སྤྱད་ནས་རོ་སྒྲུང་དང་དམངས་ཁྲོད་ཀྱི་སྒྲུང་གཏམ་སྣ་ཚོགས་བརྐོས་ཡོད་པས་སྐབས་དེ་དུས་ནས་བོད་དུ་ཁང་བའི་བཟོ་བཀོད་ལག་རྩལ་ཤིན་ཏུ་དར་ཡོད་པ་མ་ཟད་ཆུ་ཚད་ཀྱང་ངེས་ཅན་ཞིག་ཏུ་སླེབས་པ་མཚོན་ཡོད། །
བོད་གནའ་རབས་ཀྱི་ཁང་བ་དག་ནི་ས་རྡོ་ཤིང་གསུམ་གྱིས་གྲུབ་པ་ཤ་སྟག་ཡིན་ལ། བོད་ཁང་གི་ཕྱི་ཁོག་གཙོ་བོ་རྡོ་རྩིག་དང་གྱང་གཉིས་ཏེ། གྱང་རྡུང་བའི་ཐོག་མར་གྱང་གི་རྨང་གཞི་བརྟན་པོ་ཞིག་འཛུགས་དགོས་ཤིང་། ཁང་བ་རྒྱག་ཡུལ་གྱི་ས་དཔྱད་ལ་གནམ་གྱི་དབྱིབས་དང་། རི་དཔྱད། ཆུའི་རྒྱུ་ཕྱོགས། ཤིང་གི་སྐྱེ་སྟངས། ཉི་ཟླ་འཆར་ནུབ་སོགས་ལ་བརྟག་པ་སྔོན་དུ་སོང་ནས་ཁང་བ་ཆེ་ཆུང་ཇི་ལྟར་འདོད་པའི་ས་ཐིག་ལེགས་པར་བཏབ་པ་ནས་རྨང་གཞི་སོགས་བཏིང་ནས་གྱང་བརྡུང་བ་སོགས་བྱེད་པ་ཡིན་མོད། རྨང་དེ་ནི་ཁང་རྩིག་དུ་མའི་རྐང་ཡིན་པས་བརྟན་པོ་དང་སྲ་མོ་ཡིན་དགོས་ཕྱིར། རྡོ་རྩིག་གཞན་གྱི་རྩིག་པ་དང་འདྲ་བའི་བརྩིགས་ངོས་འཇམ་པོ་དང་བལྟ་ས་མཛེས་པོ་དེ་གཙོ་བོ་མིན་ལ། གནད་འགག་ནི་རྡོ་རྒྱུ་སྲ་རླིང་སྟེང་། རྡོ་མཐུད་དང་རྡོ་གཟེབ། རྡོ་རྩལ་རྒྱག་སྟངས་ལ་གཟབ་སྟེ་ས་སྟེང་གི་ཡན་དུ་འདོམ་ཕྱེད་ཙམ་བརྩིག་དགོས་ཤིང་། ས་སྟེང་དུ་བརྩིགས་པ་དེ་ནི་གྱང་ལ་ཆུས་མི་གནོད་པའི་ཆེད་དུ་ཡིན་ལ། བོད་ཀྱི་རྡོ་རྩིག་ལག་རྩལ་ནི་འཛམ་གླིང་གི་ཆེས་ཕུལ་དུ་བྱུང་བ་རང་ཡིན་ཞིང་། འབུར་དུ་ཐོན་པའི་ཁྱད་ཆོས་ཤིག་ཡོད་པ་ནི་ནང་རོལ་ནས་སྐྱ་རྩིག་པའི་ལག་རྩལ་དེ་ཡིན་ལ། ཐ་ན་གདོད་མའི་རྒྱུ་ཆ་སྟེ་བརྐོས་ཡོང་བའི་འཇིམ་པ་དང་རི་ནས་འཁྱེར་ཡོང་བའི་རྡོ་བཅས་བཀོལ་ནས་ལས་སྣོན་ཅི་ཡང་བྱེད་མི་དགོས་པར་ཁང་བ་བཟོ་ཐུབ་པ་ཡིན།
ཀང་པོ་ཉི་ཁྲི་ཕྱོགས་ཀྱི་བཙན་མཁར་ཟུར་མང་ཅན་གྱི་ཤུལ།
བོད་གནའ་བོའི་རྩིག་བཟོ་ལས་བསྐྲུན་པའི་རྩེ་མོ་མཁའ་ལ་བསྙེགས་པའི་བཙན་རྫོང་།
སྤྱིར་བོད་གནའ་རབས་ཀྱི་ཁང་བའི་དབྱིབས་ལ་ཕུག་པ་སྒོང་གཟུགས་མ་དང་། ཕུག་པ་ཐལ་མོའི་ཕྱག་རྒྱ་ཅན་དང་། གྲུ་བཞི་གཡུང་དྲུང་མ་དང་། ཁང་བཟང་ལུག་མགོ་མ། ཆོས་འབྱུང་གཟུགས་ཅན་སོགས་མང་པོ་ཡོད་པ་དང་། ཁང་བའི་བཟོ་བཀོད་ལག་རྩལ་ཐད་ཆེ་ས་ནས་དགོན་པ་དང་། ཕོ་བྲང་། སྤྱིར་བཏང་གི་སྡོད་ཁང་བཅས་བཟོ་དབྱིབས་ཁག་གསུམ་དུ་དབྱེ་ན་འགྲིག་ཅིང་། དགོན་པའི་བཟོ་ཁྱད་ནི་སངས་རྒྱས་ཆོས་ལུགས་ཀྱི་འདུལ་བའི་གཞུང་ལས་གསུངས་པ་ལྟར་དབུས་སུ་འདུ་ཁང་དང་། སྦུག་ཏུ་གཙང་ཁང་། ཞེས་པ་ལྟར། འདུ་ཁང་ངམ་གཙུག་ལག་ཁང་ལ་བཞེངས་སྔ་བ་སྲོང་བཙན་སྒམ་པོའི་དུས་ཀྱི་ཁྲ་འབྲུག་སྒྲོལ་མ་ལྷ་ཁང་དང་། ལྷ་ལྡན་གྱི་ར་ས་འཕྲུལ་སྣང་གི་གཙུག་ལག་ཁང་། རྒྱ་སྟག་ར་མོ་ཆེ་སོགས་མཐའ་འདུལ་དང་ཡང་འདུལ་གྱི་གཙུག་ལག་ཁང་བརྒྱ་རྩ་བརྒྱད། བཙན་པོ་ཁྲི་སྲོང་ལྡེ་བཙན་སྐབས་ཀྱི་བསམ་ཡས་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གླིང་བཞི་གླིང་ཕྲན་ཇོ་མོ་གླིང་གསུམ་དང་བཅས་པ། ཁྲི་རལ་པ་ཅན་གྱི་སྐབས་བཞེངས་པའི་འུ་ཤིང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་སོགས་དུ་མ་མཆིས་ཤིང་། དེ་དག་གི་སྤྱིའི་བཀོད་པ་ལ། འཆམ་ར། ཀུན་དགའ་ར་བ། རྡོ་སྐས། ཕྱིའི་སྒོ་ཆེན་གྱི་ཁྱམས། ཚོམས་ཆེན་སྒོ་ཁྱམས། ཕྱིའི་སྐོར་ཁང་། གློ་འབུར་གྱི་ཁྱམས། ཚོམས་ཆེན། སྒོ་སྟེང་བསིལ་ཁང་། བླ་ཆེན་གྱི་གཟིམ་ཤག མགོན་ཁང་ངམ་སྲུང་མ་ཁང་། གསེར་ཁང་ངམ་ལི་མ་ལྷ་ཁང་། དཔེ་མཛོད་ཁང་། རྒྱ་མཐོང་། རྒྱབ་ཏུ་ལྷ་ཆེན་ཁང་། ལོགས་སུ་རུང་ཁང་། མཛོད་ཁང་། གཉེར་ཁང་། བཤད་གྲྭ། སྒྲུབ་གྲྭ། གྲྭ་ཤག་བཅས་དང་། སྒོ་འཕྱོར་གྱི་སྟེང་རབ་གསལ་དང་གཞན་རྣམས་ལ་སྒེ་ཁུང་ཆེ་ཆུང་སྣ་ཚོགས། དེ་མིན་དཀར་གསལ་སེང་གཡབ་ལ་ཀ་རིང་དང་དེའི་མཐར་ཀ་ཐུང་། རྩིག་ལྡེབས་སུ་སངས་རྒྱས་བྱང་སེམས་ཀྱི་སྐུ་བརྙན་དང་། གཏམ་རྒྱུད་སྣ་ཚོགས་ཀྱི་རི་མོ་། སྒོ་འཕྱོར་འོག་རྒྱལ་ཆེན་སྡེ་བཞི་དང་། སྲིད་པ་འཁོར་ལོ། འདུལ་བའི་དཔེ་རིས་སོགས་ཀྱི་ལྡེབས་བྲིས། ཀ་སྟེང་དུ་ཤིང་བརྩེགས་རིམ་པ་བཅུ་གསུམ་ཡོད་པའི་མཛེས་རྒྱན་ལ་བྱ་འབྲུག་དང་། པད་མ། ནོར་བུ་སོགས་ཀྱི་མཛེས་རིས་འབྲི་སྲོལ། གྱང་སྟེང་དུ་སྤེན་བད་ལ་གསེར་ཟངས་ཀྱི་སྤེན་རྒྱན། ཡང་ཐོག་རྩེར་རྒྱ་ཕིབས་སམ་གན་ཇི་ར། རྩིག་ཟུར་དུ་སྲུང་མ་ཁག་གི་རྟེན་ཐུག་དང་། གསེར་ཟངས་སམ་རས་ཀྱི་རྒྱལ་མཚན། གདུང་ཁེབས་ལ་རྡོ་རྗེའི་ར་བ། རིན་པོ་ཆེ་གྲོལ་བ་ཅན་ནམ་མུ་ཏིག་དཀར་པོའི་ཕྲེང་བ་འབུར་མ། པདྨ་གེ་སར་ཁ་པདྨའི་འདབ་མ་གསེར་ཤན་ཅན། ལྕམ་བཀག་ལ་ཤིང་ལོ་པ་ཏྲ། གནམ་གཅལ་ལ་དཀྱིལ་འཁོར། མཐོང་གྲོལ་མཆོད་རྫས་སོགས་བཀོད་པ་སྣ་ཚོགས་སོ། བོད་བཟོ་སྐྲུན་གྱི་ཕུད་དང་རྒྱན་ལྟ་བུའི་ཕོ་བྲང་གི་བཟོ་ཁྱད་ལ་གསང་བ་བླ་ན་མེད་པའི་དཀྱིལ་འཁོར་གྱི་འགྲོས་དང་ཡོངས་སུ་མཐུན་པའི་ཕོ་བྲང་པོ་ཏ་ལ་དང་། མངའ་རིས་ཀྱི་གུ་གེའི་ཕོ་བྲང་སོགས་ཡོད་ཅིང་། དེ་དག་གི་འོག་ཁང་དུ་མཛོད་ཁང་དང་། བར་ཁང་དུ་ལས་ཁུངས་དང་ལས་བྱེད་མི་སྣའི་སྡོད་ཤག སྟེང་ཐོག་ཏུ་གཙོ་བོའི་བཞུགས་གནས་དང་མཆོད་ཁང་སོགས་ཡོད། འོག་ཁང་ལ་རླུང་འགྲོ་ཕྱི་དོག་ལ་ནང་ཡངས་པ་ཞིག་གམ་རྒྱུག་ཁྲ་བསྒར་བའི་སྒེ་ཁུང་ཆུང་ཆུང་རེ་ཟུང་། སྟེང་ཁང་རྣམས་ལ་སྒེ་ཁུང་རིམ་བཞིན་ཆེ་རུ་བཏང་ནས་དཀར་གསལ་ཆེ་ལ་ཐོག་བརྩེགས་མང་པོ་ཡོད་པ་རྣམས་ཕལ་ཆེར་འོག་ཁང་ཤུར་ཡིན། སྟེང་ཁང་རྣམས་ལ་ཤིང་བཟོ་རིམ་བཞིན་ཇེ་ལེགས་དང་། ལྷག་པར་ཚོམས་ཆེན་ནམ་གཟིམས་ཆུང་ལྟ་བུར་ཀ་གདུང་དང་། སྒོ་སྒེ་ཁུང་སོགས་ལ་པད་ཆོས་དང་རྒྱན་རིས་བརྐོས་དཀྲོལ་བྱེད་སྲོལ། གོང་ལར་སྤེན་རྩེག་དང་། སྟེང་དུ་གན་ཇི་ར་དང་ཐུག་རྒྱན་སོགས་དགོན་པ་དང་འདྲ་རུང་ཕོ་བྲང་ལ་དར་ལྕོག་འཛུགས་སྲོལ་ཡོད། གཞིས་ཁང་དང་། སྒེར་ཁག་གི་ཁང་པ་སོགས་ཀྱི་ཁང་བཟོ་ནི་ཕོ་བྲང་གི་བཟོ་ཁོངས་སུ་གཏོགས་ཤིང་། བོད་ཁམས་ཡོངས་སུ་ཁང་བའི་འཛུགས་སྐྲུན་ཡོངས་སུ་སྨིན་པའི་དུས་རིམ་ནི་ཡོན་རྒྱལ་རབས་རྗེས་སུ་ཕོ་བྲང་པོ་ཏ་ལ་རྒྱས་སྐྲུན་བྱས་པ་དེ་ཡིན་ཞིང་། ཕོ་བྲང་པོ་ཏ་ལ་ནི་བོད་ཁུལ་ཡོངས་ཀྱི་ཁང་བའི་འཛུགས་སྐྲུན་གྱི་འཐུས་ཚབ་ཡིན་ལ། འཛམ་གླིང་དུ་རྒྱ་མཚོའི་ངོས་ལས་མཐོ་ཚད་ཆེས་མཐོ་བའི་ཕོ་བྲང་གི་འཛུགས་སྐྲུན་ཡིན་ཞིང་། དེ་ཡིས་འཛམ་གླིང་རྡོ་ཡི་འཛུགས་སྐྲུན་གྱི་སྟོང་ཆ་ལ་ཁ་གསབ་བྱས་ཡོད་པ་དང་། ཕོ་བྲང་པོ་ཏ་ལ་ནི་གཞི་བྲག་རིའི་སྟེང་དུ་ཁྲོ་ཆུ་བླུགས་ཤིང་རྡོ་བརྩིགས་ཏེ་རྨང་བཏིང་ཐོག རྡོ་རིམ་པ་དང་ཨར་ཀ་རིམ་པ་བྱས་ནས་བཞེངས་པ་ཡིན་ལ། དེ་རང་བྱུང་ས་གཡོ་དང་ཆར་རླུང་དྲག་པོ་གང་གིས་ཀྱང་མ་གནོད་པར་སྲ་ཞིང་བརྟན་ལ་བརྗིད་ཆགས་པར་གནས་པ་ལས་ཕོ་བྲང་པོ་ཏ་ལ་ནི་སྲ་ཞིང་མཁྲེགས་པ་ཞིག་ཡིན་པ་ཤེས་ཐུབ་པའོ། སྤྱིར་བཏང་མང་ཚོགས་ཀྱི་སྡོད་ཁང་ཚང་མ་ནི་ས་རྡོའི་ཁང་པ་རེད། ཁང་པའི་བརྩེགས་དང་པོའི་འོག་ལ་ཕྱུགས་ཟོག་བཙུད་པ་དང་། བརྩེགས་དང་པོར་སྒྱེད་པུ་ཐབ་ཀ་བཙུགས་ཏེ་ཟ་བཏུང་གཡོས་སྦྱོར་བྱེད་ས་བྱེད། བརྩེགས་གཉིས་པར་ཉལ་ཤག་དང་བང་མཛོད། བརྩེགས་གསུམ་པར་མཆོད་ཁང་བཅས་འདུག བར་ཐོག་དང་སྟེང་ཐོག་རྣམས་བཟོ་བཀོད་མཛེས་ལ་དཀར་ཆ་གང་དོད་ཐོག་ཤིང་ཆར་ཡང་རྒྱན་རིས་ཐུང་ཟད་རྒྱག་སྲོལ་ཡོད།།
བོད་ཀྱི་ཁྱད་ཆོས་ཀྱིས་ཕྱུག་པའི་རྒྱན་སྤྲས་སྒྱུ་རྩལ།
བོད་ཀྱི་ཁྱད་ཆོས་ཀྱིས་ཕྱུག་པའི་རྒྱན་སྤྲས་སྒྱུ་རྩལ།
སྤྱིའི་ཆ་ནས་ཚོན་རྩིའི་ཐད། འོག་ཁང་གི་སྒོ་དང་སྒེ་ཁུང་མ་གཏོགས་ཚོན་གཏོང་གི་མེད། སྟེང་ཁང་རྣམས་ལ་ཚོན་རྩི་མཛེས་རིས་སྣ་ཚོགས་གཏོང་བ་སྟེ། དཔེར་ན་ཕོ་བྲང་ངམ་གཞིས་ཁང་སོགས་ཀྱི་ཚོམས་ཆེན་དང་། གཟིམས་ཆུང་གཙོ་བོ་སོགས་ཀྱི་རྩིག་ལྡེབས་དང་། ཤིང་ཆར་མཛེས་རིས་སྣ་ཚོགས་དང་། བར་ཁྱམས་ལྟ་བུར་སྤྱིར་བཏང་གི་ཚོན་རྩི་གཏོང་གི་ཡོད། ལྷ་ཁང་ངམ་དགོན་པ། བླ་བྲང་སོགས་ལ་ཚོས་གཞི་དམར་སེར་ཤས་ཆེ་བ་དང་། ཁྱིམ་པའི་ཁང་པར་ཚོས་གཞི་སྔོ་ལྗང་ཤས་ཆེ་རུང་ཚོམས་ཆེན་དང་། མཆོད་ཁང་ལ་ཚོན་རྩི་དམར་སེར་ཁོ་ན་གཏོང་གི་ཡོད། རྩིག་ལྡེབས་ཀྱི་ཚོན་རྒྱས་བསྡུས་སྣ་ཚོགས་དང་ཐོག་མཚམས་སུ་ཤམ་བུ་དང་། རྩིག་པའི་ཕྱེད་ཡོལ་ཙམ་ནས་དམར་སྔོ་ལྗང་གསུམ་གྱི་སྐེད་རིས། གཤམ་དུ་ཐང་གཤམ་ཞེས་དམར་པོའམ་རྒྱ་སྨུག་གཏོང་གི་ཡོད།
གཙོས་གསེར་མཁར་དགུ་ཐོག
གཟི་འོད་འབར་བའི་གཙུག་ལག་ཁང་གི་གསེར་གྱི་རྒྱ་ཕིབས།
ཨར་རྒྱག་རྒྱུ་ཆའི་ཐད་རྡོ་ཆེན་དང་། ཆུ་རྡོ། རྡོ་གཡམ། ཤིང་། ས། ས་དམར། བྱེ་མ། སྦ་དཀར། ཨར་ཀ་སོགས་དགོས་པ་དེ་དག་གི་འགྲོ་ཁུངས་ནི་རྡོ་ཆེན་གྱིས་ཕྱི་རྩིག་དང་། ས་དམར་གྱི་ཁོག་འདག སྦ་དཀར་དང་བྱེ་མ་བསྲེས་ནས་འཇམ་ཞལ། ས་དང་བྱེ་མ་བསྲེས་ནས་རྩུབ་ཞལ། ས་དམར་གྱིས་ཐོག་འདག་དང་འཐིལ་ཞལ་ཨར་ཀའམ། སྦ་དཀར་སྦ་སག་བསྲེས་པས་ཐོག་ཞལ་དང་། མཐིལ་ཞལ། ཉ་རྒྱབ། རྡོ་གཡམ་གྱིས་གོང་ལའི་ཆུ་འཛར། ས་ཕག་དང་། ཡང་ན་གླང་མ་ཤིང་གི་ཡལ་ག་ཀ་དབྲག་དབར་ལྷས་ནས་ཞལ་བ་བཏང་བའི་ཤག་མ་ཞེས་པའམ། པང་ལེབ་སོགས་ཀྱི་བར་བཅད། ཆུ་རྡོས་དྲལ་རྡོ་དང་རྩིག་འགྲམ་གྱི་ཆུ་ལེན། ཤིང་གིས་ཀ་གདུང་དང་། ལྕམ་དྲལ། སྒོ་སྒེ་ཁུང་གི་ཤིང་སངས་དང་རུ་གཞི་སོགས་བཟོ་གི་ཡོད།
ཡུལ་གྲུའི་ཁྱད་ཆོས་མངོན་པར་གསལ་བའི་བོད་ཁང་།
དམངས་ཀྱི་སྡོད་ཁང་གི་བཟོ་བཀོད།
བཟོ་རིགས་ཐད་ཤིང་བཟོ་དང་། རྡོ་བཟོ། ཞལ་དཔོན། ཚོན་པ། ལྕགས་བཟོ་སོགས་དགོས་ལ་ཁོང་ཚོར་ཡང་དབུ་ཆེན་དང་། དབུ་ཆུང་། དཀྱུས་མ། དམངས་རྒྱུག་སོགས་ཀྱི་དབྱེ་བ་ཡོད། ལས་ཀ་བྱེད་རིང་ཤིང་བཟོ་དབུ་ཆེན་གྱིས་བཟོ་སྐྲུན་འཆར་འགོད་དང་། བཀོད་འདོམས་བྱེད་ཅིང་། རྡོ་བཟོ་དབུ་ཆེན་གྱིས་ཤིང་བཟོ་དབུ་ཆེན་ལ་རམ་འདེགས་ཀྱིས་རྩིག་པའི་ཐིག་དང་འཕྱོང་འབེབས་བྱེད་པ། ཤིང་བཟོ་དབུ་ཆུང་གིས་ལས་ཡུལ་དངོས་ཀྱི་ཐོག་ཀ་གདུང་སོགས་ཀྱི་བཟོ་འདོན་སྒྲིག་སྦྱོར་བྱས་ཐོག་ཤིང་བཟོ་དཀྱུས་མ་ཚོའི་ལས་ཀར་བཀོད་པ་གཏོང་བ་སོགས་བྱེད། རྡོ་བཟོ་དབུ་ཆུང་ཚོས་རྩིག་ཟུར་སློང་བ་དང་། དཀྱུས་མ་ཚོའི་ལས་ཀར་ལྟ་ཞིབ་བྱེད་པ། ཤིང་བཟོ་དཀྱིས་མ་ཚོས་ཤིང་ལ་གཞོག་རྒྱག་པ་སོགས་བྱེད་ལ་རྡོ་བཟོ་དཀྱུས་མ་ཚོས་རྩིག་པ་རྩིག་པ་དང་། རྡོ་ལ་བཟོ་འདོན་པ་སོགས་བྱེད། དམངས་རྒྱུག་ནས་ས་རྡོ་དབོར་སྐྱེལ་དང་། རྩིག་རྨང་བྲུ་བ། སེང་རྡོ་རྒྱག་པ། རྡོ་སྲུབ་ཏུ་མིག་འདག་རྒྱོང་བ་སོགས་བྱེད་ཀྱི་ཡོད། ཞག་དཔོན་ནས་རྩིག་ལྡེབས་སུ་ལྡེབས་ཞལ་འཇམ་རྩུབ་དང་། སྒོ་དང་སྒེ་ཁུང་གི་གཡས་གཡོན་ནག་རྩི། མཐིལ་ཞལ་དང་། ཐོག་སྟེང་། ཉ་རྒྱབ་བཅས་ཀྱི་ཨར་ཀ་བཅོག་པ་སོགས་ཀྱི་འགན་འཁར་གྱི་ཡོད། ལྕགས་བཟོ་བས་སྒོའི་ཤན་དང་། མཛོ་སྣ་དང་དཀྲི་ལྕགས། སྒོ་འབོར་སོགས་བཟོ་བ། ཚོན་པས་ཤིང་ཚོན་དང་ལྡེབས་བྲིས། རྩིག་ཚོན་སོགས་གཏོང་གི་ཡོད། བོད་ཁང་གི་རྩིག་པའི་ཁྱད་ཆོས་གཙོ་བོ་ནི་རྩིག་རྨང་བྲུས་ནས་སེང་རྡོ་ཞེས་རྡོ་པང་འགྱོགས་ཙམ་ཞིག་གིས་བཅག་པས་རྩིག་རྨང་བརྟན་པ་དང་། རྩིག་པ་རྡོ་སྟར་རེ་ལོངས་མཚམས་སེང་རྡོ་རྡོ་ལག་པས་ཐེག་ཙམ་རེ་བརྒྱབ་སྟབས་རྩིག་པར་བབས་ཤོད་ཉུང་བ། ཅབ་ལེ་དང་སྲུབ་བཀག་གིས་རྡོ་ཆེན་བར་འཕྲེད་གཞུང་དུ་བཅུག་སྟབས་རྡོ་ཆེན་སྒྲོག་ཐེབས་ཀྱི་ཡོད། རྩིག་རྡོ་རྣམས་བསྙལ་ནས་རྩིག་སྟབས་ཕན་ཚུན་སྒྲོག་དམ་པ། རྡོ་ཆེན་ཕྱི་ནང་གཉིས་ཀྱི་བར་ཁོག་རྡོ་ཞེས་རྡོ་ཆེན་དང་། སིལ་ཧྲུག་ཅེས་རྡོ་ཧྲུག་འདམ་པའི་ཁར་བརྒྱབ་པ་དེས་རྩིག་པའི་ཁོག་པ་ཚགས་དམ་པ། གཤམ་ནས་སྟེང་བར་འཐེན་ཞེས་རྩིག་ཞིང་ཕྱི་ངོས་ནས་སྐུམ་པར་བརྟེན་འོག་གི་རྩིག་རྡོར་གནོན་ཤུགས་ཆུང་བ་བཅས་ཀྱི་ཁྱད་ཆོས་ཡོད། ཤིང་བཟོའི་ཐད་ཀ་སྟེང་དུ་གཞུ་ཆུང（སྤེ་ལོག）དང་། གཞུ། གདུང་མ། པད་ཆོས། ལྕམ། དྲལ་མ་སོགས་རིམ་བཞིན་བཏང་ནས་ཐོག་བཀབ་པ་དང་། ཀ་གདུང་ལ་ལར་སྐུ་བརྙན་དང་། དྲ་བ་དྲ་ཕྱེད་སོགས་ཀྱི་མཛེས་རིས་བརྐོས་དཀྲོལ་ཡང་བྱེད་ཀྱི་ཡོད། གཞུ་ཆུང（སྤེ་ལོག）རིལ་པོའམ་ཡང་ན་ཀ་བ་དང་གཞུ་ཆུང་གི་བར་མཁྲེགས་ཤིང་ཞིག་གཏོང་གི་ཡོད་པ་ནི་ཀ་བའི་གཅེན་ཁར་སྣོན་ཤུགས་ཆུང་ཙམ་ཡོང་བའི་ཁྱད་ཡོད། ཡང་སྟེང་གི་གོང་ལའི་བད་ཕུར་གྱི་ཁ་ཤིང་ཡང་སྤེན་བད་ཡོད་ན་སྤེན་བད་ཀྱི་སྟེང་འོག་ལ་ཁྲིད་ཐོག་ཁ་ལ་སྐར་ཐིག་སྒོར་མོ་ཡང་བརྐོ་སྲོལ་ཡོད་པ་རེད། ཞལ་བར་རྩུབ་ཞལ་ཞེས་པ་དཀྱིས་མ་གསུམ་གཅིག་ལ་བྱེ་མ་གསུམ་གཉིས་བསྲེས་ནས་ཤིང་གི་སྡོད་པང་གིས་འཁོད་སྙོམ་བཟོ་བ་དང་། འཇམ་ཞལ་ཞེས་རྩུབ་ཞལ་གྱི་སྟེང་དུ་སྦ་དཀར་གསུམ་གཅིག་ལ་བྱེ་མ་གསུམ་གཉིས་བསྲེ་དགོས་ཡོད། ཐོག་འགེབས་སྟངས་ནི་ལྕམ་གྱི་སྟེང་དྲལ་མ་གཏོང་བ། དེ་ཡང་སྟེང་དྲལ་ཞེས་ཤིང་གི་ཡལ་གར་གཞོག་བརྒྱབ་ནས་སྒྲིག་པ་དང་། དྲལ་པང་ཞེས་པང་ལེབ། གཞན་ཡང་ཤིང་གི་གཤག་ཚལ་ཡང་གཏོང་གི་ཡོད། དེའི་སྟེང་དྲལ་རྡོས་མནན་ནས་ས་བཟང་བའི་ཐོག་འདག་དང་དེའི་སྟེང་ཨར་ཀ་གཅོག་དགོས་པ་བཅས་ཡིན། ཐོག་ཕུབ་ཉིན་བོད་ཚེས་གཅིག གཉིས། བརྒྱད། བཅུ་བཞི། ཉི་ཤུ། ཉེར་དྲུག་བཅས་ལ་དུས་ཚོད་སྐར་མ་ཆུ་ཚགས་ཡིན་པས་འཛེམས་དགོས་ཞེས་ཟེར་སྲོལ་ཡོད་པ་བཅས་བོད་གནའ་རབས་ཀྱི་ཁང་པའི་བཟོ་བཀོད་ཀྱི་ལག་རྩལ་ངོ་སྤྲོད་མདོར་བསྡུས་ཙམ་ཞིག་ཡིན།
ལར་བཤད་ན། མི་ལོ་སྟོང་ཕྲག་གཅིག་གི་སྔ་རོལ་དུ་མེས་པོ་རྣམས་ཀྱི་ངོ་མཚར་བའི་བཟོ་སྐྲུན་ལག་རྩལ་ལས་ཕོ་བྲང་པོ་ཏ་ལ་འཛམ་གླིང་གི་གཙུག་རྒྱན་དུ་བཞེངས་མྱོང་ལ། ཐ་ན་མི་ལོ་བརྒྱ་ཕྲག་དུ་མའི་གོང་རོལ་གྱི་གསེར་དངུལ་ཟངས་ལྕགས་བཙོ་སྦྱངས་དང་ལས་སྣོན་གྱི་ལག་རྩལ་རྣམས་ཀྱང་སྐབས་དེའི་མན་ཆིང་རྒྱལ་རབས་ཀྱི་ཆུ་ཚད་ལས་མི་དམན་ཞིང་། བོད་གནའ་རབས་ཀྱི་ཁང་བའི་བཟོ་བཀོད་ཀྱི་ཁྱབ་ཁོངས་སུ་ཤིང་རྐོས་ལག་ཤེས་དང་རྡོ་རྩིག་ལག་ཤེས། གྱང་རྡུང་བའི་ལག་ཤེས། རྡོ་མགར་ལག་ཤེས། ཨར་ཀ་བཟོ་བའི་ལག་ཤེས། ཞལ་འདག་བཟོ་བའི་ལག་ཤེས་སོགས་མི་རིགས་གཞན་ལ་ངོམ་དུ་ཆོག་པའི་རིག་གནས་ཀྱི་སྒྲོམ་གཞི་ཆེན་པོ་ཞིག་ཡོད་པས། ཁོ་བོ་ལྟ་བུས་གཏིང་ཟབ་ཅིང་རྒྱ་ཆེ་བའི་རིག་པའི་གནས་འདི་དག་ལ་གླེང་བརྗོད་བྱེད་པའི་གནས་མ་ཡིན་མོད། དེང་སྐབས་ཁང་བའི་བཟོ་བཀོད་སྐོར་གྱི་རིག་གནས་ལག་རྩལ་མང་པོ་ཞིག་ཀྱང་ཉམས་རྒུད་དུ་འགྲོ་བཞིན་ཡོད་པས་ན། ཡིད་འཇོག་བྱ་དགོས་པའི་གནས་ཡིན་སྙམ་སྟེ་ཁོ་བོས་འདིར་རྩོམ་ཐུང་ཅ་ཅོའི་ཚིག་གིས་སྤེལ་བ་འདི་མཁས་དབང་ལོ་རྒྱུས་སྨྲ་བ་རྣམས་ཀྱི་ཐུགས་ཀྱི་དྲན་སྐུལ་དུ་སྦྲན་པས་ཕྱིན་ཆད་བོད་ཁང་གི་ཐད་ཞིབ་འཇུག་དང་གདེང་འཇོག་ཡང་དག་པ་ཞིག་ཡོང་རྒྱུའི་རེ་བས་བྲིས་པ་རེ་ཞིག་རྫོགས་སོ། །
རྩོམ་སྒྲིག་པ།སྣང་རྡོར།
