ཇུ་ཐིག་ཅེས་པ་ནི་འདི་འདྲ་ཞིག་རེད་འདུག

         ཇུ་ཐིག་ལ་བརྟེན་ནས་མོ་འདེབས་སྤྱད་ཀྱི་མོ་ཆས་སྣ་ཚོགས་ལ་གོ་དགོས་པ་ཞིག་དང་། ཇུ་ཐིག་ལ་བརྟེན་ནས་མོ་འདེབས་པའི་འབྲས་བཤད་ཀྱི་མོ་གཞུང་ལ་གོ་དགོས་པ་ཞིག་བཅས་ཡོད། དཔེར་ན། བྱ་དྲུག་ལ་བརྟེན་ནས་མོ་འདེབས་པའི་ཡོ་བྱད་ཕྲེང་རྡོག་དྲུག་ཡོད་པ་དེ་ལས། ཕྲེང་རྡོག་ཁྲ་བོས་སྐྱ་ཀ་དང་། སྔོ་སངས་ཀྱིས་ཕུག་རོན། ལྗང་ཁུས་ནེ་ཙོ། ནག་པོས་ཕོ་རོག དཀར་པོས་ཁྲུང་ཁྲུང་། སེར་པོས་ངང་པ་མཚོན་པ་ཡིན་ཟེར་བའི་ཕྲེང་རྡོག་ལྕགས་སྐུད་ཐོག་བརྒྱུས་པ་ཞིག་དང་། དེའི་མོ་གཞུང་བཅས་ཀྱང་མཐོང་མྱོང་བ་དེ་ཇུ་ཐིག་གི་གྲས་ཤིག་ཡིན་ཚོད་འདུག《རྦ་བཞེད》ཀྱི་ནང་རྒྱལ་པོ་ཁྲི་སྲོང་ལྡེ་བཙན་གྱི་བློན་པོ་སང་ཤིས་དང་རྦ་གསལ་སྣང་གཉིས་ཐང་གི་གོང་མར་མཚམས་འདྲི་ཞུ་བར་བཏང་སྐབས་གོང་མའི་མདུན་དུ་ཇུ་ཞག་ལ་བརྟེན་ནས་མོ་འདེབས་མཁན་གྲྭ་པ་དེ་འདྲ་ཡོད་ལུགས་བཤད་འདུག་པ་རྒྱ་ནག་གི་བོན་པོའི་རིགས་ཤིག་ཡིན་ནམ་བརྟག ཇུ་ཐིག་ལ་བརྟེན་ནས་མོ་འདེབས་པའི་གཞུང་དེང་སང་མཐོང་རྒྱུ་ཡོད་པ་ནི་སྡེ་དགེ་མི་ཕམ་རིན་པོ་ཆེའི་གསུང་འབུམ་པོད[ཇ]པའི་ནང《ཞང་ཞུང་སྲིད་པ་འཕྲུལ་གྱི་ཇུ་ཐིག་གི་དཔྱད་དོན་སྣང་གསལ་སྒྲོན་མེ》ལེ་ཚན་གཉིས་ལ་ཤོག་གྲངས༤༢༧ཙམ་ཡོད་པ་དེར་གཟིགས།