གཅན་ཚའི་ཁང་སྟོན་དང་གཉེན་སྟོན།

དང་པོ།   ཁང་སྟོན།

 

           དང་པོ་ཉིད་ནས་བོད་རང་ལ་སྟོན་མོ་མང་པོ་ཡོད་པ་བདེན་མོད། འོན་ཀྱང་དེ་དག་ནི་བོད་རང་གི་སྲོལ་རྒྱུན་དངོས་དང་བོད་མི་རང་གི་ལུགས་དང་མཐུན་པའི་སྟོན་མོ་ཤ་སྟག་ཡིན།གནའ་དང་པོ་བོད་མི་རང་གིས་ཁང་བ་གསར་བ་ཞིག་ལས་ཚར་རྗེས། གཟའ་སྐར་འཕྲོད་སྦྱོར་ཡག་པའི་ཉིན་ཞིག་འདེམས་ནས་ཉིན་དེར་སྣོད་ཅ་ལག་སོགས་ཁང་བ་གསར་བ་ནང་དུ་འཇོག་པ་དང་། དེ་རྗེས་ཡང་བསྐྱར་ཉིན་བཟང་སྐར་བཟང་ཞིག་འདེམས་ནས་ཁྱིམ་མི་དག་ཁང་བ་གསར་བའི་ནང་དུ་བསྣུར་བ་ཡིན།ཉིན་དེར་ཆ་རྐྱེན་ཡོད་ཚེ་རང་གི་ཤ་ཉེ་འབྲེལ་རྣམས་བོས་ནས་ཁང་བ་གསར་བའི་ནང་ནས་ཚར་ཇའམ་ཚས་ཇ་ལྡུད་པ་ཡིན། དེ་ནི་བོད་རང་གི་ཁང་སྟོན་ཡིན། ཡིན་ཡང་དེང་གི་ཆར་དེ་ལས་འདས་ཏེ་བོད་རང་ལ་ཁང་སྟོན་ཟེར་བའི་སྲོལ་རྒྱུན་གསར་བ་ཞིག་དར་ཡོད་པ་རེད། གཅན་ཚ་ས་ཁུལ་ལ་མཚོན་ན་དེ་དར་དུ་འཇུག་མཁན་ནི་གཅན་ཚ་ན་བྱ་བ་ལས་བཞིན་པའི་གཅན་ཚའི་བོད་རིགས་ལས་བྱེད་པ་དག་ཡིན། དེ་དག་གིས་དེང་གི་ཁང་སྟོན་གྱི་སྲོལ་ཀ་འདི་ས་གང་ཞིག་ནས་ཁྱེར་ཡོང་བ་ང་རང་ལ་བཤད་ཀྱི་མེད། རང་ཉིད་ཀྱིས་ལྟ་ཚུལ་ལ་འདི་ནི་དོན་དངོས་དང་མཐུན་པའི་ཁང་སྟོན་ཞིག་མིན་པ་འདྲ། དེ་ནི་ཐོག་མར་གཅན་ཚ་ལ་ཁང་སྟོན་འདི་དར་དུ་འཇུག་མཁན་པའམ་བྱེད་མཁན་པ་དེས་རང་གི་གཉེན་ཉེ་འབྲེལ་དང་དེ་ལས་སྤུན་ཟླ་དག་དང་། ད་དུང་ལས་གྲོགས་མང་པོ་ལ་སོགས་པས་རང་ལ་དངོས་རྫས་དང་ལེགས་སྐྱེས་སྒོར་མོ་འབུལ་དུ་འཇུག་ཆེད་ཁང་བ་ལ་ཁ་གཡར་ནས་སྟོན་མོ་ཞིག་བྱས་པ་འདྲ། དེ་ནས་བཟུང་གཅན་ཚ་ནས་ཚར་རྒྱུ་མེད་པའི་ཁང་སྟོན་ཞིག་གིས་འགོ་བརྩམས་པ་རེད།དོན་ངོ་མར་ཁང་སྟོན་བྱེད་པ་ནི་དེང་སང་གཙོ་བོ་ཁྱིམ་ཚང་དེས་ཡོང་སྒོ་བཙལ་སྤྱད་ཅིག་ཏུ་གྱུར་དང་འགྱུར་བཞིན་འདུག

 

           ཁང་སྟོན་བྱེད་མཁན་དཔོན་པོ་ཞིག་དང་རྒྱུ་ཅན་ངོ་ཅན་ཞིག་ཡིན་ཚེ།དེ་ཚང་གིས་ཁང་སྟོན་བྱེད་ཉིན་ཁང་སྟོན་བྱེད་སའི་ཟ་ཁང་དུ་མི་ཚོགས་ཀྱིས་ཁེངས་ནས་འདུག་ས་མི་རྙེད་པ་རེད། དེ་ལ་བལྟས་ན་ཡང་ཁང་སྟོན་ནི་ཡོང་སྒོ་དང་ལག་ཡོང་བཙལ་སྤྱད་འབའ་ཞིག་ཡིན་པ་མ་ཟད།ཁང་བདག་དཔོན་པོ་དང་།ངོ་ཅན་རྒྱུ་ཅན་དེ་དག་ལ་ངོ་འདྲི་བཅའ་བ་ཡིན་པའང་འདྲ། མི་ཚང་མས་ལད་ཟློས་བྱས་ནས་ལས་བྱེད་པ་ཞིག་ཡིན་ཚེ། ངེས་པར་དུ་ཐོག་ཁང་ཉོས་ནས་འགྲུབ་རྗེས་ཁང་སྟོན་ཞིག་བྱེད་དགོས་པ་ནི་དེང་སང་གི་སྲོལ་ཞིག་ཡིན་པར་ཆགས་འདུག

 

དོན་ངོ་མར་འདི་ནི་བོད་རང་གི་ལུགས་སྲོལ་བཟང་བོ་དང་མཐུན་པའི་ཁང་སྟོན་ཟེར་བ་དེ་ཡིན་ནམ།འདི་ལས་ཀྱང་ཕལ་ཆེར་བོད་མི་རང་གི་ཡུལ་སྲོལ་གོམས་འདྲིས་དང་རིང་དུ་བྲལ་བཞིན་པ་རྟོགས་ཐུབ།

 

གཉིས་པ། གཉེན་སྟོན།

 

           བོད་རང་གི་གཉེན་སྟོན་ནི་གནའ་ནས་བཟུང་མགོ་རྔ་ཡོད་པའི་བོད་རང་གི་དམངས་སྲོལ་དྲི་མ་མེད་པ་ཞིག་ཡིན། དེ་ནི་མི་རིགས་སུ་དང་སུ་ལའང་མེད་པའི་དམངས་སྲོལ་ཡག་པོ་ཞིག་ཡིན་པ་མ་ཟད།བོད་རང་གི་དམངས་ཁྲོད་དུ་དར་སྲོལ་ཆེ་བའི་རྩེད་མོའི་རྣམ་པ་གལ་ཆེན་ཞིག་ཀྱང་ཡིན། སྤྱི་ཚོགས་འགྱུར་བ་དང་བསྟུན་ནས་དུས་རབས་འགྱུར་བ།མི་འགྱུར་བ་བཅས་དེ་ལས་ལྷག་པར་བོད་མི་རྣམས་ཨ་གསར་ལ་དགའ་དྲགས་པས་བོད་རང་གི་རྩེད་མོའི་རྣམ་གྲངས་ཆེ་ཤོས་དང་། དམངས་སྲོལ་ཡག་པོ་འདི་འདོར་ཅི་ཐུབ་བྱས་ཏེ་དེང་གི་རྒྱ་མིའི་གཉེན་སྟོན་བྱེད་སྲོལ་འདི་དར་བ་རེད། འདི་ཡང་བོད་མི་ཚང་མར་ལེ་བདའ་བྱས་ན་མི་འགྲིག་པ་རེད།དེ་ཡང་རུས་རྐང་བོད་པ་ཡིན་ཟེར་བ་ལས་སེམས་སུ་བོད་མི་མེད་པ་དང་རྩ་ལམ་ན་བོད་མི་ཁྲག་རྒྱུན་བཞུར་གྱིན་མེད་པའི་གྲོང་ཁྱེར་གྱི་བོད་མིའི་མགོ་སྟོང་ལས་བྱེད་རྒན་གྲས་སྐོར་ཞིག་གིས་སྲོལ་དར་དུ་བཅུག་པ་ཡིན་པ་གདོན་མི་ཟ། དེ་དང་བསྟུན་ནས་བོད་མིའི་རང་གི་གཉེན་སྟོན་དེ་བོར་ནས་གྲོང་ཁྱེར་གྱི་ཟ་ཁང་ནས་ཁྱིམ་ཚང་དེའི་ཡོང་སྒོ་བཙལ་སྤྱད་ཀྱི་ལག་ཆ་རུ་གྱུར་ཡོད། དེང་སང་གི་གཉེན་སྟོན་ནི་ངོ་མ་ཡ་མཚན་རེད།གཉེན་སྟོན་བྱེད་ཚེ་ཕོ་མོ་ཕྱོགས་གཉི་གའི་མགྲོན་ལ་བོས་ནས་སྟོན་མོ་བཤམས་པ་དང་། ཡང་ན་ཕོ་མོ་ཕྱོགས་གཉི་གའི་རང་རང་ས་ནས་མགྲོན་འབོད་བྱས་ནས་སྟོན་མོ་བཤམས་པ་རེད། འདི་ལས་མཐོང་ཐུབ་པ་ནི་གཙོ་བོ་གཉེན་སྟོན་མིན་པར་མགྲོན་པོའི་ལག་གིས་ལེགས་སྐྱེས་ལ་རེ་བའི་སྟོན་མོ་ཡིན་པ་ལས་གཉེན་སྟོན་ཁོ་ན་མིན་པ་རེད། འདི་དང་འདི་ལྟ་བུ་ལས་བོད་མི་རང་གི་དམངས་སྲོལ་རང་གིས་བསྣུབས་ཀྱིན་འདུག ཐོག་མའི་གཉེན་སློང་གི་ཆོ་ག་དང་། བར་གྱི་ཨ་ཞང་དང་གཉེན་ཚང་གི་འབེལ་གཏམ་སོགས་ཀྱི་ལག་ལེན་ཆོ་ག་རྣམས། མཐའ་མར་དོན་ངོ་མའི་བོད་རང་གི་གཉེན་སྟོན་གྱི་ཆོ་གའི་ཡོ་ལང་རྣམས་ང་ཚོའི་མི་རབས་འདིས་རྩ་བརླག་ཏུ་བཏང་ཚར་འདུག དེ་བས་གྲོང་ཁྱེར་ན་བྱ་བ་ལས་བཞིན་པའི་བོད་རིགས་ལས་བྱེད་པ་རྣམས་ནི་བོད་མིའི་དམངས་སྲོལ་སྣུབ་པའི་གཏེ་བོ་དང་བོད་མིའི་སྐད་དང་ ཡི་གེའི་མི་མཁོ་བ་བཅས་ཀྱི་མཐའ་མར་བོད་མི་ཟེར་བའི་མིང་བརླགས་མཁན་གྱིས་ནག་ཚོགས་འབའ་ཞིག་གོ། མི་འགྱངས་བར་གཅན་ཚ་ནས་རླངས་འཁོར་ཉོས་ནས་རླངས་སྟོན་ཟེར་བའི་སྟོན་མོ་རྒྱ་ཆེན་བཤམས་ནས་མགྲོན་ཤོག་སྟེར་གྱི་ཡིན་པའང་འདྲའོ།།