ཟླ་10པའི་ཚེས་12ཉིན་ནི་འཛམ་གླིང་གྲུམ་ནད་ཉིན་མོ་ཡིན་ཞིང་། གྲུམ་ནད་ནི་གྲུམ་ནད་སྣ་ཚོགས་ཀྱི་སྤྱི་མིང་ཡིན་ལ། དེ་ནི་རྒྱུན་མཐོང་གི་གཅོང་ནད་གྱི་ནད་རིགས་ཤིག་ཡིན། བསྡོམས་རྩིས་བྱས་པར་གཞིགས་ན། འཛམ་གླིང་ཡོངས་སུ་གྲུམ་ནད་ཕོག་པའི་ནད་པ་དུང་ཕྱུར་3.55ཡོད། དོ་སྣང་བྱེད་དགོས་པ་ཞིག་ནི་གྲུམ་ནད་ནི་རྒན་རྒོན་གྱི་ནད་མིན་ལ། ན་ཚོད་མི་འདྲ་བའི་མི་ཚང་མར་ནད་འདི་ཕོག་ཉེན་ཡོད།
གྲུམ་ནད་ནི་རྒན་རྒོན་གྱི་ནད་མིན་ཞིང་། སྨན་བཅོས་བྱེད་པར་དུས་ཚོད་ཡག་ཤོས་དམ་འཛིན་བྱེད་དགོས།
ཤེས་རྟོགས་བྱུང་བར་གཞིགས་ན། གྲུམ་ནད་ལ་ཁྱོན་སྡོམ་རིགས་100ལྷག་ཙམ་ཡོད་པའི་ནང་། མང་ཤོས་ནི་རུས་ཚིགས་གྲུམ་ནད་དང་། གྲང་གྲུམ། དྲེག་ནད་རང་བཞིན་གྱི་གྲུམ་ནད་བཅས་ཡིན། གྲུམ་ནད་ཀྱི་ཁྱད་ཆོས་ནི་རུས་ཚིགས་ན་བ་དང་སྐྲངས་པ། རེངས་པོར་གྱུར་པ། འགུལ་སྐྱོད་ལ་ཚོད་འཛིན་ཐེབས་པ་སོགས་ཡིན་ཞིང་། ནད་རྒྱུ་མི་འདྲ་བའི་གྲུམ་ནད་མི་ཚོགས་ཁྲོད་དུ་ཕོག་ཚད་ཀྱང་འདྲ་ཡི་མེད།
རུས་ཚིགས་གྲུམ་ནད་དེ་དར་མ་དང་རྒན་རྒོན་ཚོའི་ཁྲོད་འབྱུང་སླ་བ་དང་། ལོ་65ཡན་གྱི་མི་ཚོགས་ཁྲོད་50%ལ་རུས་ཚིགས་གྲུམ་ནད་ཕོག་ཡོད།
གྲང་གྲུམ་ནི་ལོ་ཚོད་གང་རུང་དུ་ཕོག་པ་དང་། སྐྱེས་པ་དང་བུད་མེད་ལ་ཕོག་པའི་བསྡུར་ཚད་1:3ཡིན།
ལོ་45ཡན་གྱི་སྐྱེས་པ་ནི་དྲེག་ནད་རང་བཞིན་གྱི་གྲུམ་ནད་ཕོག་མང་བའི་མི་ཚོགས་ཡིན།
སྨན་བཅོས་མི་སྣས་མི་རྣམས་ཀྱིས་གྲུམ་ནད་དེ་རྒན་རྒོན་གྱི་ནད་ལ་རྩི་བཞིན་ཡོད་མོད། དོན་དངོས་སུ་ལོ་ཚོད་ཡོད་ཚད་དང་། ཐ་ན་བྱིས་པ་ལའང་ནད་འདི་ཕོག་སྲིད་པའི་དྲན་སྐུལ་བྱས་ཡོད་ཅིང་། རིགས་གཅིག་མཁས་ཅན་གྱིས་ཀྱང་རུས་ཚིགས་ན་བ་དང་རེངས་པོར་གྱུར་པ་སོགས་ཀྱི་ནད་རྟགས་ཐོན་ཚེ་དོགས་ཟོན་ཆེན་པོ་བྱེད་དགོས་པའི་དྲན་སྐུལ་བྱས་འདུག
རྒྱལ་སའི་གསོ་རིག་སློབ་ཆེན་གྱི་ཞོར་གཏོགས་པེ་ཅིང་བདེ་ཐང་སླར་གསོའི་སྨན་ཁང་གི་རུས་ནད་ཚན་ཁག་གི་ཀྲུའུ་རེན་དབྱང་ཧྭ་ཆིང་གིས། གློ་བུར་དུ་རུས་ཚིགས་དེ་འདྲ་བདེ་པོ་མེད་པའམ་རུས་ཚིགས་རེངས་པོར་གྱུར་བ་ཚང་མ་གྲུམ་ནད་ཀྱི་ཐོག་མའི་ནད་རྟགས་ཡིན་ཞེས་དང་། རུས་ཚིགས་རྒྱུན་དུ་ན་བ་དང་མི་བདེ་བ་ནི་གྲུམ་ནད་ཀྱི་མངོན་ཚུལ་ཞིག་ཡིན་པས། སྔ་མོ་ནས་སྨན་པར་བསྟེན་དགོས་པའི་སྐོར་བརྗོད་ཡོད།
འབྲེལ་ཡོད་དཔྱད་ཡིག་ཏུ་མངོན་པ་ལྟར་ན། རང་རྒྱལ་དུ་གྲུམ་ནད་འབྱུང་ཚད་13%ཡིན་ཞིང་། གྲུམ་ནད་ཀྱིས་དབང་བོ་སྐྱོན་ཅན་དུ་འགྱུར་ཚད་50%ལས་བརྒལ་ཡོད་པ་དང་། ནད་པའི་རང་རྐྱ་འཕེར་བའི་ནུས་པ་དང་ངལ་རྩོལ་ནུས་པར་ཤུགས་རྐྱེན་ཚབས་ཆེན་ཐེབས་ཀྱི་ཡོད། རིགས་གཅིག་མཁས་ཅན་གྱིས་ནད་ཕོག་པའི་ཐོག་མའི་ལོ་གཉིས་རིང་སྨན་བཅོས་ཡག་པོ་བྱ་རྒྱུ་ནི་གྲུམ་བུའི་ནད་ཀྱིས་དབང་པོ་སྐྱོན་ཅན་དུ་མི་འགྱུར་བའི་འགག་རྩ་ཡིན་པ་བརྗོད་ཡོད།
གྲུམ་ནད་ཕོག་མཁན་ན་གཞོན་ཅན་དུ་འགྱུར་བའི་འཕེལ་ཕྱོགས་མངོན་གསལ་ཡིན་པ་དང་།
དེ་ནི་འཚོ་བའི་གོམས་གཤིས་ངན་པ་འདི་དག་དང་འབྲེལ་བ་ཡོད།
སྨན་དོན་མི་སྣས་བསྟན་པར། ཉེ་བའི་ལོ་ཤས་རིང་། རང་རྒྱལ་དུ་གྲུམ་ནད་ཕོག་མཁན་ན་གཞོན་ཅན་དུ་འགྱུར་བའི་འཕེལ་ཕྱོགས་མངོན་གསལ་དོད་པོ་ཡིན་པ་དང་། དེ་ནི་ན་གཞོན་ཚོའི་འཚོ་བའི་གོམས་གཤིས་ངན་པ་དང་འབྲེལ་བ་དམ་ཟབ་ཡོད།
དྲོ་བཅོས་ལ་དོ་སྣང་མི་བྱེད་པ་སྟེ། གྲང་རླུང་ཁྲོད་རྐང་ཚིགས་དང་རྐང་རྒྱབ་ཕྱིར་མངོན་པ་སོགས་ཀྱིས་འདྲེད་སྐྱིའི་ཚ་ནད་དང་པུས་མོའི་གྲུམ་ནད་སོགས་སློང་སླ་བ་དང་། དེ་བཞིན་རྒྱུན་དུ་རྟིང་མཐོའི་ལྷམ་གྱོན་པ་ཡིས་པུས་ཚིགས་བརྡར་ཟད་ཐེབས་ཀྱི་ཡོད།
སྦྱོང་བརྡར་མི་འདང་བ་སྟེ། གཞུང་ལས་ཁང་དུ་ལས་ཀ་ལས་མཁན་མང་ཆེ་བ་ལས་ཀར་འགྲོ་འོང་བྱེད་སྐབས་རླངས་འཁོར་དང་གློག་སྐས་ལ་སྡོད་པ་དང་། གཟའ་མཇུག་ཏུ་ལས་ཀ་འཕར་མ་བྱེད་པའམ་ཡང་ན་ཉལ་ནས་འདུག་པ་ལས་སྦྱོང་བརྡར་བྱེད་པ་ཧ་ཅང་ཉུང་བས། རུས་པ་དང་། ལྷུ་ཚིགས། ཤ་གྲིམ་བཅས་སྟོབས་ཚད་འདང་གི་མེད་ལ། རྒྱགས་པ་ཚོ་ནི་དེ་བས་ཀྱང་དེ་ལྟར་ཡིན།
ད་དུང་འགུལ་སྐྱོད་ཚུལ་དང་མི་མཐུན་པས་རྨས་སྐྱོན་བཟོ་བ་དང་། ཚོད་འཛིན་མེད་པའི་རི་འཛེག་གིས་ཕྲུམ་རུས་ལ་བརྡར་ཟད་ཐེབས་ཀྱི་ཡོད།
གཞན་ཡང་གཞོན་ནུ་ལོ་ཆུང་ཚོས་དུས་ཡུན་རིང་པོར་ལས་བྱ་འབྲི་སྐབས། སྒལ་གཞུང་ལ་གནོན་ཤུགས་ཆེ་བས་རུས་ཚིགས་ལ་རྨས་སྐྱོན་ཕོག་གི་ཡོད།
རྩོམ་སྒྲིག་པ། སྣང་རྡོར།