སྒྲ་སྙན་དཀྲོལ་གཏོང་བྱེད་པའི་ཐད་ལའང་ཤེས་བྱ་མང་པོ་འདུག གཟིགས་དང་།

         སྟོད་གཞས་ནང་མ་དཀྲོལ་གཏོང་བྱེད་སྐབས་སྒྲ་སྙན་ནི་སྒྲ་གདངས་དམའ་བའི་ཁོངས་སུ་གཏོགས་ཤིང་། དེས་སྒྲ་དམའ་སར་འཁོར་བ་དེ་ཆུ་ནང་ཉ་འཁྱུག་པ་ལྟ་བུ་དང་། དལ་ཆིན་ནི་སྒྲ་གདངས་འབྲིང་བའི་རོལ་ཆ་ཞིག་ཡིན་པས། དེའི་སྒྲ་བར་ལ་རི་དྭགས་རི་ལྡེབས་སུ་རྒྱུ་བ་ལྟ་བུ། ཡང་ཆིན་གྱིས་མཐོ་དམའ་བར་གསུམ་ལ་རམ་འདེགས་སྐོར་སྐྱོད་བྱེད་པ་ནི་ནམ་མཁར་བྱ་ལྡིང་བ་ལྟ་བུ་ཡིན།

         སྒྲ་སྙན་སོགས་ཀྱིས་སྟོད་གཞས་དང་ནང་མ་དཀྲོལ་སྐབས་གཏན་འཇགས་རང་བཞིན་གྱི་གོམས་སྲོལ་རགས་ཙམ་ཡོད་པ་སྟེ། སྤྱིར་སྟོད་གཞས《ཟླ་བའི་གཞོན་ནུ》ཡང་ན་ནང་མ《བཀྲ་ལ་ཤིས་པ》དེ་རོལ་ཚན་དང་པོར་འཇོག་ཅིང་། སྐབས་རེ་སྟོད་གཞས《ཟླ་བའི་གཞོན་ནུ》རོལ་ཚན་དང་པོ་དང་ནང་མ《བཀྲ་ལ་ཤིས་པ》རོལ་ཚན་གཉིས་པར་འཇོག་པ་དང་། སྐབས་རེ་དེ་གཉིས་གོང་དང་ལྡོག་པར་གནས། དེའི་རྗེས་རོལ་དབྱངས་གང་གཏོང་རང་མོས་ཡིན་ཞིང་། འཁྲབ་སྟོན་གྱི་མཇུག་མར་སླེབས་སྐབས་སྤྱིར་སྟོད་གཞས《ཨ་ཇོ་བཀྲ་ཤིས》རོལ་ཚན་མཐའ་མར་གཏོང་སྲོལ་ཡོད། དེ་ཡང་བཀྲ་ཤིས་པའི་སྒོ་ནས་མཚམས་བཞག་པ་དང་སྤྲོ་སྣང་ངང་འཁྲབ་སྟོན་ལེགས་སྒྲུབ་བྱུང་བ་མཚོན།

         《བོད་ལྗོངས་དམངས་སྲོལ་ཉིང་བཏུས》དང《སྒྲ་སྙན་བློ་གསར་འཇུག་སྒོ》ལས་བཏུས།

རྩོམ་སྒྲིག་པ། སྣང་རྡོར།