འདི་ལོ་བོད་ཀྱི་སྨན་བཅོས་འགན་བཅོལ་སྐོར་ལ་གཏམ་བཟང་འདི་དག་འདུག
སྤེལ་དུས 2021-01-27
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
ཉེ་ཆར་གསར་འགོད་པར་བོད་རང་སྐྱོང་ལྗོངས་ཀྱི་ཚོགས་འདུ་གཉིས་ནས་ཤེས་རྟོགས་བྱུང་བར། 2021ལོར་བོད་ལྗོངས་ཀྱི་སྨན་བཅོས་འགན་བཅོལ་ལ་འགྱུར་ལྡོག་ཆེན་པོ་འདི་དག་ཡོང་རྒྱུ་རེད་འདུག
སྨན་བཅོས་འགན་བཅོལ་གྱི་ལམ་ལུགས་དང་མ་ལག་སྔར་བས་འཐུས་སྒོ་ཚང་དུ་གཏོང་རྒྱུ།
《སྨན་བཅོས་འགན་བཅོལ་ལམ་ལུགས་སྒྱུར་བཅོས་ཟབ་གཏོང་སྐོར་གྱི་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བསམ་འཆར》དང《སྨན་བཅོས་འགན་བཅོལ་གྱི་ཐེབས་རྩ་ལྟ་འདོམས་ལམ་ལུགས་དང་མ་ལག་སྒྱུར་བཅོས་ལ་སྐུལ་འདེད་གཏོང་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གི་མཛུབ་ཁྲིད་བསམ་འཆར》སློབ་སྦྱོང་ལག་བསྟར་བྱེད་རྒྱུར་དམ་འཛིན་ཡག་པོ་བྱས་ནས་བོད་ལྗོངས་ཀྱིས་ཞིབ་ཕྲའི་ལག་བསྟར་བསམ་འཆར་གང་མགྱོགས་འདོན་རྒྱུ་རེད། བོད་ལྗོངས་ཀྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་རྒྱལ་ཁབ་ཀྱི་གཟིགས་སྐྱོང་སྲིད་ཇུས་དོན་འཁྱོལ་ཡག་པོ་དང་། གཞི་རྩའི་སྨན་བཅོས་འགན་བཅོལ་གྱི་ཐེབས་རྩ་དང་སྨན་བཅོས་རོགས་སྐྱོབ་ཀྱི་མ་དངུལ་ལ་སྤྱི་འདོམས་ཀྱིས་བེད་སྤྱོད་ཡག་པོ་བྱེད་རྒྱུ།
སྨན་བཅོས་འགན་བཅོལ་ནང་གི་སྨན་རྫས་དོ་དམ་ལས་དོན་ལ་མུ་མཐུད་ཤུགས་སྣོན་རྒྱག་རྒྱུ།
བོད་ལྗོངས་ཀྱི་མི་རིགས་ཀྱི་སྨན་རྫས་དང་། སྨན་བཅོས་སྒྲིག་གཞིའི་སྦྱོར་རྟ། ཀྲུང་ལུགས་གསོ་རིག་གི་བཏུང་བྱ་དང་རིལ་བུ་བཅས་ཀྱི་སྨན་རྫས་དཀར་ཆག་སྟབས་བསྟུན་ལེགས་སྒྲིག་བྱས་ཏེ་ཆ་རྐྱེན་དང་མཐུན་པའི་བོད་སྨན་གཏན་འབེབས་ལྟར་རྒྱལ་ཁབ་ཀྱི་སྨན་བཅོས་འགན་བཅོལ་གྱི་དཀར་ཆག་ནང་འཇུག་རྒྱུར་བརྩོན་ལེན་དང་རྒྱབ་སྐྱོར་ཧུར་ཐག་བྱེད་རྒྱུ། སྨན་བཅོས་འགན་བཅོལ་གྱི་གཏོང་སྤྲོད་བྱེད་སྟངས་ལ་སྒྱུར་བཅོས་བྱེད་རྒྱུར་སྐུལ་འདེད་ཧུར་ཐག་བཏང་ནས་བོད་ལྗོངས་ཀྱི་དོན་དངོས་དང་ཟུང་འབྲེལ་བྱས་ཏེ་ས་ཁོངས་ཀྱི་རྩིས་རྒྱག་སྟངས་ཀྱི་བསྡོམས་འབོར་སྔོན་རྩིས་དང་ནད་རིགས་ཀྱི་ཚད་གཞི་དང་མཐུན་པའི་གྲོན་དངུལ་འཇལ་བའི་རྒྱལ་ཁབ་ཀྱི་ཚོད་ལྟའི་ལས་དོན་ལག་བསྟར་བྱེད་རྒྱུ།
སྨན་བཅོས་འགན་བཅོལ་གྱི་ཞབས་ཞུའི་ཆུ་ཚད་སྔར་བས་མཐོ་རུ་གཏོང་རྒྱུ།
སྨན་བཅོས་འགན་བཅོལ་གྱི་སྤྱི་པའི་ཞབས་ཞུ་ཚད་གཞི་ཅན་དང་ཚད་ལྡན་ཅན་ལ་སྔར་བས་སྐུལ་འདེད་ཧུར་ཐག་གཏོང་བ་དང་། ལྗོངས་ཡོངས་སུ་གཅིག་གྱུར་གྱི་སྨན་བཅོས་འགན་བཅོལ་གྱི་སྲིད་དོན་ཞབས་ཞུའི་རྣམ་གྲངས་དང་ལས་སྒྲུབ་ཀྱི་ཕྱོགས་སྟོན་ཕྱོགས་ཡོངས་ནས་ལག་ལེན་བསྟར་ནས། ཞབས་ཞུའི་རྣམ་གྲངས་དྲ་ཐོག་ནས་གཉེར་རྒྱུར་མགྱོགས་མྱུར་སྐུལ་འདེད་གཏོང་བ་དང་། ལས་སྒྲུབ་ཀྱི་དཔུང་ཁག་འཛུགས་སྐྱོང་ལ་ཤུགས་སྣོན་བརྒྱབ་ནས་དུས་རབས་གསར་པའི་སྨན་བཅོས་འགན་བཅོལ་གྱི་སྤྱི་པའི་ཞབས་ཞུའི་དགོས་མཁོ་དང་འཚམ་པའི་ཆེད་ལས་དཔུང་ཁག་ཅིག་གཏོད་རྒྱུ་དང་། ཁོངས་གཏོགས་ཀྱི་ལས་རིགས་སྤྱོད་ཚུལ་འཛུགས་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ་དང་། “ལེགས་ཉེས་ཀྱི་གདེང་འཇོག”ལམ་ལུགས་ལག་ལེན་ཧུར་ཐག་བསྟར་བ། ལས་རིགས་སྤྱོད་ཚུལ་འཛུགས་སྐྱོང་གི་ཆེད་དོན་གདེང་འཇོག་གཏིང་ཟབ་སྤེལ་བ། གདེང་འཇོག་བྱས་འབྲས་སྤྱོད་ཤུགས་ཆེ་རུ་གཏོང་བ། ལས་རིགས་སྤྱོད་ཚུལ་འཛུགས་སྐྱོང་གི་ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ཏེ། སྨན་བཅོས་འགན་བཅོལ་གྱི་སྤྱི་པའི་ཞབས་ཞུའི་འདུ་ཤེས་དང་། ལམ་ལུགས། སྤྱོད་ཚུལ་བཅས་ཕྱོགས་ཡོངས་དང་གཏིང་ཟབ་པའི་སྒྱུར་བཅོས་དང་གསར་གཏོད་བྱེད་རྒྱུར་སྐུལ་འདེད་བཏང་ནས། 2021ལོའི་ལོ་མཇུག་གོང་ཞིང་ཆེན་བརྒལ་ནས་ས་ཆ་གཞན་དུ་སྨན་བཅོས་བྱས་པའི་རིན་པ་གཞི་རྩའི་ཆ་ནས་ཐད་ཀར་རྩིས་ཞུ་ཐུབ་པ་བྱེད་རྒྱུ།
རྩོམ་སྒྲིག་པ། བདེ་སྒྲོལ།
