ཉིང་ཁྲིའི་ཁམ་བུའི་མེ་ཏོག་དུས་ཆེན་ཟླ4ཚེས2ཉིན་གཏོང་མཁན་རེད་འདུག

          ཚེས་26ཉིན། ཉིང་ཁྲི་གྲོང་ཨུད་ཀྱི་ཧྲུའུ་ཅི་གཞོན་པ་རྒྱུན་ལས་ཧྲི་ཀྲང་གཞོན་པ་ལིའུ་ཀོང་མིང་གིས་ཉིང་ཁྲིའི་ཁམ་བུའི་མེ་ཏོག་ཡུལ་སྐོར་རིག་གནས་དུས་ཆེན་སྐབས་18པའི་བཀོད་སྒྲིག་ཚོགས་འདུ་གཙོ་སྐྱོང་བྱས་ནས། ཁམ་བུའི་མེ་ཏོག་དུས་ཆེན་གྱི་བྱེད་སྒོའི་ཇུས་གཞིར་གྲོས་བསྡུར་ཞིབ་འཇུག་དང་འབྲེལ་ཡོད་ལས་དོན་བཀོད་སྒྲིག་བྱས་པ་རེད།
          རང་སྐྱོང་ལྗོངས་དང་ཉིང་ཁྲི་གྲོང་ཨུད་དང་གྲོང་ཁྱེར་སྲིད་གཞུང་གི་བཀོད་སྒྲིག་གཞིར་བཟུང་། ཟླ་4ཚེས་2ཉིན། བྲག་ཡིབ་ཆུས་ཀ་ལ་གྲོང་ཚོར་ཉིང་ཁྲིའི་ཁམ་བུའི་མེ་ཏོག་ཡུལ་སྐོར་རིག་གནས་དུས་ཆེན་སྐབས་18པ་གཉེར་རྒྱུ་ཡིན་པ་རེད།
          ཤེས་རྟོགས་བྱུང་བར་གཞིགས་ན། འདི་ལོའི་ཁམ་བུའི་མེ་ཏོག་དུས་ཆེན་དེ“མི་ཡུལ་གྱི་དག་པའི་ཞིང་ཁམས། མཛེས་སྡུག་གིས་ཕྱུག་པའི་ཉིང་ཁྲི”ཞེས་པ་བརྗོད་དོན་གཙོ་བོར་བྱས་ནས་རིག་རྩལ་འཁྲབ་སྟོན་བྱེད་སྒོ་སྤེལ་རྒྱུ་ཡིན་པ་ཕུད། ཟླ་3ཚེས་28ཉིན་ནས་ཟླ་4ཚེས་6ཉིན་བར་དུས་ཡུན་ཉིན་10ཡི་རིང་ཉིང་ཁྲིའི་ཁམ་བུའི་མེ་ཏོག་གི་དྲ་ཐོག་ནས“སྤྲིན་ཚོམ་གྱི་དཔྱིད་ཀའི་སྤྲོ་གསེང”བྱེད་སྒོ་སྤེལ་ནས། སྐབས་དེར་ཉིང་ཁྲི་གྲོང་ཁྱེར་གྱིས་ཉིང་ཁྲིའི་རིག་ལྡན་ཡུལ་སྐོར་ཆ་འཕྲིན་ལས་སྟེགས་དང་ཀྲུང་གོ་སྒུལ་བདེ་ཉིང་ཁྲི་ཡན་ལག་ཀུང་སིས་མཁོ་འདོན་བྱས་པའི་5Gའཕྲིན་གཏོང་ལག་རྩལ་སྤྱད་དེ། ཉིང་ཁྲིའི་ཡུལ་སྐོར་གཞུང་ཕྱོགས་སྐད་འཕྲིན་དང་། དཔོད་ཆུང་། དྲ་ཚུགས། འཁྱུག་དབྱིངས་བཅས་ཚང་མར་འཚོལ་ཞིབ་དང་སྦྲེལ་མཐུད་ཐུབ་པ་མ་ཟད། “ཉིང་ཁྲིའི་རིག་ལྡན་ཡུལ་སྐོར”གྱི་སྤྱི་རྟགས་དང་འཁྱུག་དབྱིངས་སོགས་ལས་སྟེགས་ཆེན་པོ་6ནས་ཉིང་ཁྲིའི་ཀ་ལ་ཁམ་བུའི་མེ་ཏོག་གྲོང་ཚོ་དང་། ཟུར་གསུམ་གྲོང་ཚོ། ཀླུ་ནང་རྒྱལ་སྤྱིའི་གྲོང་རྡལ་ཆུང་ངུ་བཅས་ཀྱི་གངས་རིའི་ཁམ་བུའི་མེ་ཏོག་གི་མཛེས་ལྗོངས་ཆུ་ཚོད་24ཡི་རིང་དུས་ཐོག་ཏུ་ཐད་གཏོང་བྱ་རྒྱུ་རེད་འདུག

རྩོམ་སྒྲིག་པ། བདེ་སྒྲོལ།