ཝུའུ་དབྱིང་ཅེས་ཆན་ཀྲི་མིན་བཅས་པ་དང་བཞུགས་མོལ་གནང་བ།
སྤེལ་དུས 2020-10-27
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ཉེ་ཆར། ལྗོངས་ཏང་ཨུད་ཀྱི་ཧྲུའུ་ཅི་ཝུའུ་དབྱིང་ཅེས་ལྷ་སར་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིའི་ཏང་ཙུའི་ཧྲུའུ་ཅི་དང་ཏུང་ཧྲི་ཀྲང་ཆན་ཀྲི་མིན་དང་བཞུགས་མོལ་གནང་ནས་འོད་ཤུགས་ཐོན་ཁུངས་གསར་སྤེལ་མཉམ་ལས་མུ་མཐུད་གཏིང་ཟབ་ཏུ་གཏོང་རྒྱུར་སྤེལ་རེས་ཟབ་མོ་གནང་བ་རེད།
ལྗོངས་ཏང་ཨུད་ཀྱི་རྒྱུན་ཨུ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཅང་ཅེ་དང་། ལྗོངས་ཏང་ཨུད་ཀྱི་རྒྱུན་ཨུ་དང་དྲུང་ཆེ་ལིའུ་ཅང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རེན་ཝུའེ་བཅས་ཀྱིས་ལྷན་དུ་བཞུགས་མོལ་གནང་བ་རེད།
ཝུའུ་དབྱིང་ཅེས་ཆན་ཀྲི་མིན་དང་བཅས་པ་བོད་དུ་རྟོག་ཞིབ་གནང་བར་ཕེབས་པར་དགའ་བསུ་ཞུས་པ་དང་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིས་ལོ་མང་རིང་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལེགས་སྐྱེས་ཕུལ་བར་ཐུགས་རྗེ་ཆེ་ཞུས་པ་རེད། ཁོང་གིས་ད་ཐེངས་ཏུང་ཧྲི་ཀྲང་ཆན་ཀྲི་མིན་གྱིས་རུ་ཁག་གི་སྣེ་ཁྲིད་དེ་བོད་དུ་རྟོག་ཞིབ་ལས་དོན་སྤེལ་བ་དང་བྱ་སྤྱོད་དངོས་ལ་བརྟེན་ནས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་ལག་བསྟར་དོན་འཁྱོལ་བྱས་པ་དེ་ཐོག་ནས་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིས་བོད་ཀྱི་ལས་དོན་ལ་ཚད་མཐོའི་མཐོང་ཆེན་དང་ལྗོངས་ཡོངས་ཀྱི་མི་དམངས་ལ་བརྩེ་སེམས་ཟབ་མོ་འཆང་བ་གང་ལེགས་མཚོན་ཡོད་ཅེས་བསྟན་གནང་བ་རེད།
ཝུའུ་དབྱིང་ཅེས་བསྟན་གནང་དོན། དུས་ཡུན་རིང་པོའི་ནང་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱས་ཏེ་བོད་ཀྱི་འཛུགས་སྐྲུན་ལ་རྒྱབ་སྐྱོར་ཧུར་ཐག་བྱས་པ་དང་ལྗོངས་ཡོངས་ཀྱིས་ནུས་རྒྱུ་གཙང་མ་དང་ལྗང་མདོག་ཐོན་ལས་འཕེལ་རྒྱས་གཏོང་རྒྱུར་རམ་འདེགས་བྱས་པས་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་ཁྲིད་ནུས་ལྡན་ཐུབ་ཡོད། བོད་ཀྱི་འོད་ཤུགས་དང་ཆུ་ནུས་སོགས་ནུས་རྒྱུ་གཙང་མ་ཕུན་སུམ་ཚོགས་པ་དང་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིས་ནུས་རྒྱུ་གཙང་མའི་ལག་རྩལ་ཞིབ་སྤེལ་དང་བཀོལ་སྤྱོད་སོགས་ཁྱབ་ཁོངས་མང་པོར་ལེགས་ཆ་མངོན་གསལ་དོད་པོ་ཡོད་པས་ཕྱོགས་གཉིས་པོས་མཉམ་ལས་བྱས་ཏེ་འཕེལ་རྒྱས་གཏོང་བར་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད། བོད་རང་སྐྱོང་ལྗོངས་ཀྱིས་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སི་དང་ནུས་རྒྱུ་གསར་སྤེལ་བེད་སྤྱོད་གཏོང་བའི་ཁྲོད་མཉམ་ལས་དམ་ཟབ་བྱས་ཏེ་ཕུན་སུམ་ཚོགས་པའི་ཐོན་ཁུངས་ལེགས་ཆ་དེ་དག་དཔལ་འབྱོར་ལེགས་ཆ་དང་འཕེལ་རྒྱས་ཀྱི་སྒུལ་ནུས་གསར་པར་ཏན་ཏིག་འགྱུར་ཐོག་མི་རིགས་ཁག་གི་མང་ཚོགས་ལ་ཐོན་ཁུངས་གསར་སྤེལ་དང་ཐོན་ལས་འཕེལ་རྒྱས་ཁྲོད་ནས་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟབ་ཏུ་གཏོང་འདོད་ཡོད། རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིས་སྔར་རྒྱུན་བཞིན་བོད་ཀྱི་ནུས་རྒྱུའི་ཁྱབ་ཁོངས་ཀྱི་བྱ་གཞག་འཕེལ་རྒྱས་ལ་སེམས་ཁུར་བྱས་ནས་སྣོད་བཅུད་སྲུང་སྐྱོང་དང་། བྱེ་ཐང་ཅན་བཅོས་སྐྱོང་། ཕྱུགས་རྩྭ་འདེབས་འཛུགས། ནུས་རྒྱུ་གཙང་མའི་དྲོད་རླངས་མཁོ་འདོན། རིག་སྟོབས་བོད་སྐྱོར་སོགས་ཐད་རྒྱབ་སྐྱོར་བྱེད་ཤུགས་ཆེ་རུ་བཏང་སྟེ་དུས་རབས་གསར་པའི་བོད་ཡུན་རིང་བདེ་འཁོད་དང་སྤུས་ཚད་ལེགས་པའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་རེ་བ་ཡོད།
ཆན་ཀྲི་མིན་གྱིས་རྒྱལ་ཁབ་གློག་ཤུགས་མ་འཇོག་ཚོགས་པ་ཚད་ཡོད་ཀུང་སིའི་འཕེལ་རྒྱས་གནས་ཚུལ་དང་མཉམ་ལས་ཁ་ཕྱོགས་ངོ་སྤྲོད་མདོར་བསྡུས་གནང་སྟེ་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་ལག་བསྟར་ནན་ཏན་བྱས་ནས་ཀྲུང་དབྱང་ཁེ་ལས་ཀྱི་སྤྱི་ཚོགས་ཀྱི་འགན་འཁྲི་ལག་བསྟར་བྱེད་པ་དང་། སྣོད་བཅུད་རིག་ལྡན་ནུས་རྒྱུ་འཛུགས་སྐྱོང་ལ་སྐུལ་འདེད་ཧུར་ཐག་གཏོང་བ། ནུས་རྒྱུ་གསར་པ་གསར་སྤེལ་དང་ཁྱབ་གདལ་ཏན་ཏིག་གཏོང་བ། ནུས་རྒྱུ་གཙང་མ་དང་དཔལ་འབྱོར་འཕེལ་རྒྱས་དང་། དམངས་འཚོ་ལེགས་གཏོང་། སྣོད་བཅུད་སྲུང་སྐྱོང་སོགས་ཁྱབ་ཁོངས་མཐུན་སྦྱོར་འཕེལ་རྒྱས་ལ་སྐུལ་འདེད་ཟམ་མི་ཆད་པར་བཏང་ནས་མང་ཚོགས་དེ་བས་མང་བར་ཕན་པ་ཐོབ་པར་བྱ་རྒྱུ་ཡིན་ཞེས་བརྗོད་པ་རེད།
རྩོམ་སྒྲིག་པ། སངས་སྐྱབས།
