ཀྲུང་གོའི་བོད་ལྗོངས་དྲ་བའི་འཕྲིན། ད་ལོའི་ལོ་གསར་གྱི་སྐབས་སུ་བོད་ལྗོངས་ནགས་ཚལ་མེ་གསོད་སྤྱི་ཁྱབ་རུ་ཁག་ཉིང་ཁྲི་ཉིང་ལག་རུ་ཁག་བྲག་ཡིབ་ཆུས་རུ་འབྲིང་གི་རུ་མི་ཚོས་སྔར་བཞིན་ལས་གནས་བརྟན་སྲུང་བྱས་ཡོད། ཁྱིམ་མི་ལྷན་འཛོམས་ཀྱི་བདེ་སྐྱིད་ལྡན་པའི་དུས་སྐབས་འདིར་ནགས་ཚལ་མེ་གསོད་རུ་མི་ཚོས་ལྗང་མདོག་གི་སྐྱེ་ཁམས་དང་ཁྱིམ་ཚང་ཁྲི་སྟོང་མང་པོའི་གློག་དང་མེའི་བདེ་འཇགས་ལ་སྲུང་སྐྱོབ་བྱེད་བཞིན་ཡོད།
གནམ་གང་དགོང་མོར་མེ་འགོག་སྐོར་གཡེང་བྱེད་པ།
མེ་འགོག་རུ་མིས་གནམ་གང་དགོང་མོར་ས་ལ་ཆུ་གཏོར་བཞིན་པ།
ལོ་ངོ་མང་པོའི་རིང་ལ་རུ་འབྲིང་གི་མེ་གསོད་རུ་མིའི་སེམས་སུ་ཉིང་ཁྲི་ནི་ཁོ་ཚོའི་ཕ་ཡུལ་གཉིས་པ་ལྟ་བུ་ཡིན་པ་དང་། ལྗང་མདོག་གི་མཚོ་མོ་ནི་ཁོང་ཚོའི་ཁྱིམ་ཚང་ལྟ་བུ་ཡིན་པར་འདོད་ཡོད། གང་དུ་དགོས་མཁོ་ཡོད་ན་དེ་གར་མེ་གསོད་པའི་གཟུགས་བརྙན་མཐོང་ཐུབ་ལ། གང་དུ་ཉེན་ཁ་ཡོད་ན་ཁོ་ཚོ་དེ་རུ་ཐོན་ཡོད།
ནམ་རྒྱུན་དང་འདྲ་བར། གནམ་གང་སླེབས་སྐབས་ཡང་ཁོ་ཚོ་ཞོགས་པའི་མལ་ལས་ལངས་པའི་ཅོང་བརྡ་དང་འགྲོགས་ནས་གཉིད་ལས་སད་ཅིང་། གྱོན་པ་གོན་པ་དང་། གྲལ་སྒྲིག་པ། མཉམ་དུ་ཚོགས་པ། མི་གྲངས་རྩི་བ་སོགས་བརྒྱུད་རྗེས། གདོང་པ་འཁྲུད་པ་དང་། ཁང་པའི་ཕྱི་ནང་ལ་གཙང་སྦྲ་བྱས་ཤིང་། འདི་ལྟར་ཁོ་ཚོས་རང་ཉིད་ཀྱི་ཁྱད་ཆོས་ལྟར་སོ་སོར་དབང་བའི་གནམ་གང་གི་ཉིན་མོ་བསུས་པ་རེད།
མེ་གསོད་སྦྱོང་བརྡར་བྱེད་པ།
མེ་འགོག་ཞིབ་བཤེར་བྱེད་པ།
“ཏིར། ཏིར། ཏིར། ” བྲེལ་འཚུབ་འདུ་ཚོགས་ཀྱི་དུང་བརྡའི་སྒྲ་གསལ་ལ་ཐུང་བ་དེ་གྲགས་རྗེས། རུ་མི་ཡོངས་ཀྱིས་སོ་སོའི་ལག་ནང་གི་ལས་ཀ་མཚམས་བཞག་ཏེ། དྲག་ཆས་སྤྲས་ནས་ལྷན་དུ་འདུས་ཤིང་། འཕྲལ་དུ་མེ་སྐྱོན་འགོག་པའི་སྦྱོང་བརྡར་བྱས་པ་རེད།
སྦྱོང་བརྡར་བརྡ་ཁྱབ་བཏང་བའི་གནས་ཚུལ་ལ་གཞིགས་ཏེ། ཁོ་ཚོས་ལས་འགན་སྒྲུབ་པའི་ཁྱབ་ཁོངས་དང་། ས་དབྱིབས། ས་ངོས་ཀྱི་ཁྱད་ཆོས་སོགས་དང་ཟུང་འབྲེལ་བྱས་ཏེ། སྒྲིག་ཆས་དང་ལག་ཆ་སོགས་ལུགས་དང་མཐུན་པར་རླངས་འཁོར་དུ་བཞག་ནས། གོ་རིམ་ལྡན་ཞིང་གྲ་དག་པའི་སྒོ་ནས་རླངས་འཁོར་དུ་འཛེག་རྗེས་གཏན་ཁེལ་བྱས་པའི་ལས་འགན་ས་ཁོངས་ཀྱི་ཕྱོགས་སུ་སོང་། སྦྱོང་བརྡར་མཇུག་རྫོགས་རྗེས་རུ་མི་རྣམས་ཀྱིས་ཁོ་ཚོའི་ལོ་གསར་གྱི་དུས་ཆེན་ལ་གྲ་སྒྲིག་བྱས་པ་རེད།
གནས་སྐབས་མེ་འགོག་ཞིབ་བཤེར་ས་ཚིགས་བཙུགས་པ།
ལོ་གསར་གྱི་ཟ་མ།
མུན་རུབ་ལ་ཉེ་བའི་སྐབས་སུ་ལྒང་ཞུ་མཁའ་ལ་བཏེགས་ཤིང་། བཅུད་ལྡན་ཟས་རིགས་སྣ་ཚོགས་ཀྱི་གནམ་གང་གི་ཟ་མ་བསྒྲིགས་པ་དང་། ཚང་མས་མཐའ་ནས་བསྐོར་ཏེ་བཟའ་བཅའི་བྲོ་བ་ལོངས་སུ་སྤྱོད་བཞིན་ནགས་ཚལ་མེ་གསོད་དཔུང་ཁག་གི་ཁྱིམ་ཚང་ཆེན་མོའི་དྲོ་སྐྱིད་ཉམས་སུ་མྱངས་པ་རེད།
ལོ་གསར་གནམ་གང་དགོང་མོའི་ཟ་མ་ཟས་ཚར་རྗེས། རུ་འབྲིང་གིས་སྐོར་ཞིབ་ཡན་ལག་རུ་ཁག་བཏང་སྟེ་གནད་འགག་གི་ལམ་མདོ་སོ་སོར་གནས་སྐབས་མེ་འགོག་ཞིབ་བཤེར་ས་ཚིགས་བཙུགས་ཤིང་། སྣུམ་སྣོན་ས་ཚིགས་ཀྱི་ཉེ་འཁོར་དུ་སྐོར་གཡེང་ཚོ་ཆུང་མངགས་པ་དང་། མེ་གསོད་ཆུ་འཁོར་སྤྱད་དེ་ཉེ་འཁོར་གྱི་གཙོ་གནད་ནགས་ཁུལ་དུ་ཆུ་གཏོར་ནས་བརླན་པར་བྱས་པ་དང་། མེ་སྐྱོན་འབྱུང་བའི་རྐྱེན་ངན་ཆུང་ས་ནས་མེད་པར་བཏང་ལ། མི་དམངས་མང་ཚོགས་ཀྱིས་བདེ་འཇགས་དང་དགའ་འཛོམས་ཀྱི་ལོ་གསར་གནམ་གང་དགོང་མོ་ཞིག་རོལ་ཐུབ་པར་འགན་ལེན་བྱས་པ་རེད།
རྩོམ་སྒྲིག་པ། བདེ་སྒྲོལ།
