ཝང་ཅུན་ཀྲེང་གིས་ལྷ་སའི་རིམས་འགོག་ལས་དོན་ལ་ནན་བཤད་གལ་ཆེན་གནང་འདུག
སྤེལ་དུས 2022-08-19
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་ཝང་ཅུན་ཀྲེང་གིས་ཉིན་གསུམ་བསྟུད་མར་ལྷ་སའི་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་རིམས་ནད་སྔོན་འགོག་དང་ཚོད་འཛིན་གྱི་ལས་དོན་དོན་འཁྱོལ་བྱས་ཚུལ་ལ་ཞིབ་བཤེར་དང་ལྟ་སྐུལ་མཛུབ་ཁྲིད་གནང་བར་ཕེབས་ཡོད། ཚེས16ཉིན་གྱི་སྔ་དྲོར། ལྷ་སའི་རིམས་ནད་སྔོན་འགོག་དང་ཚོད་འཛིན་ལས་དོན་གྱི་ཆེད་དོན་ཚོགས་འདུ་གཙོ་སྐྱོང་གནང་ནས་ལྷ་སའི་རིམས་ནད་སྔོན་འགོག་དང་ཚོད་འཛིན་གྱི་ལས་དོན་ལ་ཞིབ་འཇུག་དང་བཀོད་སྒྲིག་གནང་བ་རེད། ཁོང་གིས་ནན་བཤད་གནང་དོན། རིམས་ནད་སྔོན་འགོག་དང་ཚོད་འཛིན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་རབ་དང་རིམ་པའི་དགོངས་དོན་ལག་བསྟར་གཏིང་ཟབ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་བོད་རང་སྐྱོང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ནས། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཡག་པོ་སྒྲུབ་པའི་ཧ་ཅང་གལ་ཆེའི་རང་བཞིན་ལ་ངོས་འཛིན་གཏིང་ཟབ་བྱས་ཏེ། མང་ཚོགས་ཀྱི་འཚོ་བར་ཐུགས་ཁུར་དང་། ལས་དོན་གྱི་ཆུ་ཚད་མཐོ་རུ་གཏོང་བ། གཙོ་གནད་མངོན་གསལ་དོད་པ། སྟོབས་ཤུགས་གཅིག་ཏུ་སྒྲིལ་བ། རིགས་དབྱེའི་མཛུབ་ཁྲིད། གནད་སྨིན་སྔོན་འགོག་ཚོད་འཛིན། གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས། སྔོན་འགོག་དང་ཚོད་འཛིན་གྱི་བྱེད་ཐབས་ཁག་དོན་འཁྱོལ་ཏན་ཏིག་དང་ཞིབ་ཚགས་བཅས་བྱས་ཏེ། རིམས་ནད་གང་མགྱོགས་ཚོད་འཛིན་བྱས་ནས་མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་སྲུང་སྐྱོང་མཐའ་གཅིག་ཏུ་བྱེད་དགོས།
ཚོགས་ར།
ལྷ་ས་གྲོང་ཁྱེར་དུ་ཞིབ་བཤེར་དང་ལྟ་སྐུལ་མཛུབ་ཁྲིད་གནང་རིང་ཤེས་རྟོགས་བྱུང་བའི་གནད་དོན་དང་བཀོད་སྒྲིག་བྱས་པའི་ཞིབ་ཕྲའི་ལས་དོན་ལ་དམིགས་ཏེ། ཝང་ཅུན་ཀྲེང་གིས་དོན་གནད་ཁག་གི་དག་ཐེར་གནས་ཚུལ་དང་དོན་འཁྱོལ་གྱི་འཕེལ་རིམ་བཀའ་འདྲི་ཞིབ་ཕྲ་གནང་ནས། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཁག་སྤེལ་ཚུལ་གྱི་སྙན་སེང་གསན་པ་དང་ཞིབ་ཕྲའི་ཐག་གཅོད་བྱེད་ཐབས་ཞིབ་འཇུག་དང་གཏན་འཁེལ་གནང་བ་རེད། ཁོང་གིས་ནན་བཤད་གནང་དོན། གནད་དོན་གྱི་སྟོན་ཕྱོགས་དང་། དམིགས་ཚད་ཀྱི་སྟོན་ཕྱོགས། གྲུབ་འབྲས་ཀྱི་སྟོན་ཕྱོགས་བཅས་མཐའ་འཁྱོངས་ཀྱིས་རང་འགན་ཐེག་པ་ཁུར་ལེན་དང་གནད་དོན་ལ་ཐད་ཀར་གཏུག་ཕོད་པ་བྱས་ནས་རིམས་འགོག་གི་དམག་འཐབ་ཁྲོད་ཧེ་བག་འཚོལ་བ་དང་། སྐྱོན་ཆ་སེལ་བ། སྦྱོང་བརྡར་དང་ལག་ལེན་ཁྲོད་དུ་སྤྱོད་ཚུལ་དང་འཇོན་ཐང་ལ་ཞིབ་དཔྱད་ཐུབ་པར་བྱེད་དགོས།
ཝང་ཅུན་ཀྲེང་གིས་ནན་བཤད་གནང་དོན། ལས་དོན་གྱི་གཙོ་གནད་མངོན་གསལ་དོད་པ་དང་། རིམས་ནད་ཀྱི་ཉེན་ཁའི་རིམ་པ་ཚན་རིག་དང་མཐུན་པའི་སྒོ་ནས་དབྱེ་བ། ཁུལ་དབྱེ་རིམ་དབྱེའི་སྒོ་ནས་གནད་སྨིན་སྔོན་འགོག་དང་ཚོད་འཛིན་བྱེད་པ། སྟོབས་ཤུགས་གཅིག་སྒྲིལ་གྱིས་གཙོ་གནད་ས་ཁོངས་ལ་དམིགས་པ་བཅས་བྱས་ནས། སྤྱི་ཚོགས་ཐོག་གཙང་བཟོའི་དམིགས་ཚད་གང་མགྱོགས་མངོན་འགྱུར་ཡོང་བ་བྱེད་དགོས། ཉིང་སྐྱུར་བརྟག་དཔྱད་ལས་ཕྱོད་མཐོ་པོའི་སྒོ་ནས་སྤེལ་རྒྱུར་སྐུལ་འདེད་བཏང་སྟེ་བྱེད་ཐབས་སྣ་ཚོགས་སྤྱད་ནས། ཉིང་སྐྱུར་བརྟག་དཔྱད་བྱེད་ནུས་ཆེ་རུ་དང་བརྟག་དཔྱད་དང་། བརྒྱུད་སྐྱེལ། ལོགས་བཀར་བཅས་ཀྱི་མྱུར་ཚད་མགྱོགས་སུ་བཏང་སྟེ། ལེབ་བཤེར་རྣམ་པའི་གྲལ་བཤེར་བྱས་ནས་ཉེན་ཁ་ཡོད་པའི་མི་སྣ་ལོགས་བཀར་འཇོག་དགོས་རིགས་ཚང་མ་ལོགས་བཀར་བྱེད་དགོས། སྤྱི་ཚོགས་ཀྱི་དོ་དམ་ཚོད་འཛིན་ལག་བསྟར་ནན་པོ་བྱས་ནས། དྲ་མིག་ཅན་གྱི་ལམ་སྲོལ་གྱི་ནུས་པ་འདོན་སྤེལ་གང་ལེགས་བྱེད་པ་དང་། རིམས་ནད་སྔོན་འགོག་གི་འགོག་སྲུང་འཛིང་རགས་བརྟན་པོ་ཞིག་མཐའ་གཅིག་ཏུ་བསྐྲུན་པ། མི་སྣ་འགྲོ་འོང་བྱེད་ཚད་སྔར་བས་ཉུང་དུ་གཏོང་བ། ཕན་ཚུན་འགོ་བའི་ཉེན་ཁ་ཆུང་དུ་གཏོང་བ་བཅས་བྱེད་དགོས། དེང་རབས་ཀྱི་ཚན་རིག་ལག་རྩལ་གྱི་བྱེད་ཐབས་སྤྱོད་པ་དང་། ཚན་རིག་དང་མཐུན་པའི་གནད་སྨིན་སྔོན་འགོག་དང་ཚོད་འཛིན་གྱི་བྱེད་ཐབས་ལག་ལེན་བསྟར་བ། རིམས་ནད་རིག་པའི་བརྟག་དཔྱད་ཁུངས་བཤེར་གྱི་ལས་དོན་ཡག་པོ་སྤེལ་བ་བཅས་བྱས་ཏེ། གཏན་ཁེལ་ནད་དཔེ་དང་རྟགས་མེད་ནད་དུག་འགོས་པར་ཕྱོགས་ཡོངས་ནས་རྗེས་སྙེག་ཁུངས་འདེད་བྱས་ནས་འགུལ་སྐྱོད་གནས་ཚུལ་ཞིབ་ཕྲ་གསལ་རྟོགས་བྱེད་པ་དང་ཕྱོགས་ཡོངས་ནས་འབྲེལ་འདྲིས་དམ་ཟབ་ཡོད་མཁན་དང་གཞན་བརྒྱུད་འབྲེལ་འདྲིས་ཡོད་མཁན་ཚོད་འཛིན་ནན་པོ་བྱས་ཏེ་རིམས་ནད་མཆེད་ལམ་འགོག་ཆེད་འདེགས་སྐྱོར་ནུས་ལྡན་བྱེད་དགོས།
ཝང་ཅུན་ཀྲེང་གིས་ནན་བཤད་གནང་དོན། མང་ཚོགས་ཀྱི་འཚོ་བར་སེམས་ཁུར་དང་ལས་དོན་གྲུབ་སྟངས་ལེགས་སུ་བཏང་སྟེ། སེམས་ནུས་གཅིག་སྒྲིལ་གྱིས་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ཐོབ་པ་བྱེད་དགོས། རིམས་འགོག་དངོས་ཟོག་འགན་སྲུང་གི་ལས་དོན་ཡག་པོ་བསྒྲུབས་ཏེ། རིམས་འགོག་དངོས་ཟོག་དང་འཚོ་བའི་དངོས་རྫས་མཁོ་སྤྲོད་དང་གྲབས་གསོག་ལ་ཤུགས་སྣོན་དང་། དངོས་ཟོག་བཀོད་གཏོང་ལ་ཤུགས་སྣོན། སྡེབ་སྐྱེལ་གྱི་བརྒྱུད་རིམ་ལེགས་སུ་གཏོང་བ། ཆ་འཕྲིན་མཉམ་སྤྱོད་ཀྱི་མཉམ་ལས་ལ་ཤུགས་སྣོན། དངོས་ཟོག་སྡེབ་སྐྱེལ་གྱི་འབྲེལ་ཐག་ཤར་གཏོང་བྱེད་པ། ཟོག་འགྲེམས་ཀྱི་འགག་གནད་སེལ་བ་བཅས་བྱས་ནས། སྔོན་འགོག་དང་ཚོད་འཛིན་གྱི་ལས་དོན་དང་མི་དམངས་མང་ཚོགས་ཀྱི་དགོས་མཁོ་ཡག་པོ་སྐོང་དགོས། ལོགས་བཀར་ས་ཚིགས་དང་སྒྲོམ་ཚང་སྨན་ཁང་འཛུགས་སྐྲུན་དང་དོ་དམ་བྱེད་ཤུགས་ཆེ་རུ་གཏོང་བ་དང་། དམིགས་འཛུགས་སྨན་ཁང་མང་དུ་གཏོང་བ། མི་རེར་ཇུས་གཞི་རེའི་སྨན་བཅོས་དང་དོ་དམ་ལག་ལེན་བསྟར་བ་བཅས་བྱས་ཏེ། ནུས་ཤུགས་ཡོད་རྒུས་སྐྱོབ་བཅོས་བྱས་ནས་སྔ་ཙམ་དྲག་སྐྱེད་ཡོང་བའི་འགན་ལེན་བྱེད་དགོས། མང་ཚོགས་ལ་ཞབས་འདེགས་ཞུ་བའི་འགན་སྲུང་ཡག་པོ་བྱེད་པ་དང་། མང་ཚོགས་ཀྱི་དགོས་མཁོ་གནད་སྨིན་ཁོང་དུ་ཆུད་པ། མང་ཚོགས་ཀྱི་རེ་ཞུར་དུས་ཐོག་ཏུ་ལན་འདེབས་པ། དེ་བས་མི་གཤིས་ཅན་གྱི་ཞབས་འདེགས་ཡག་པོ་ཞུ་བ་བཅས་བྱས་ཏེ། མང་ཚོགས་ཀྱི་གཞི་རྩའི་འཚོ་བ་འགན་སྲུང་ཡག་པོ་དང་བསམ་བློའི་སློབ་གསོ་ཡག་པོ་གཏོང་དགོས། ལྷག་དོན་དུ་དཀའ་ངལ་ཡོད་པའི་ཚོགས་སྤྱིའི་རིམས་ནད་སྔོན་འགོག་དང་ཚོད་འཛིན་ལས་དོན་ལ་དོ་ཁུར་བྱས་ནས་ཆ་འཕྲིན་དུས་ཐོག་ཏུ་རྗེས་སྙེག་དང་། སྐྱོབ་བཅོས་བྱ་ཡུལ་ལ་དུས་ཐོག་ཏུ་རོགས་སྐྱོབ། ལས་དོན་གོ་རིམ་ལྡན་པའི་ངང་སྤེལ་བ་བཅས་ཀྱི་འགན་ལེན་བྱས་ཏེ། རིམས་ནད་སྔོན་འགོག་དང་ཚོད་འཛིན་བྱེད་རིང་གི་དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བའི་དགོས་མཁོ་ནུས་ཤུགས་ཡོད་རྒུས་འགན་ལེན་བྱེད་དགོས། གཤམ་སྐྱོད་ལས་བྱེད་པ་དང་། སྡེ་ཁུལ་གྱི་ལས་དོན་མི་སྣ། དང་བླངས་པ་བཅས་ཀྱིས་རང་ངོས་ཀྱི་ལེགས་ཆ་འདོན་སྤེལ་བྱས་ནས་མང་ཚོགས་ཀྱི་བདེ་སྡུག་སེམས་ལ་བཅངས་ཏེ་བརྩེ་སེམས་ཟབ་མོས་དོ་དམ་དང་ཞབས་ཞུའི་ལས་དོན་ཡག་པོ་སྒྲུབ་དགོས།
ཝང་ཅུན་ཀྲེང་གིས་ནན་བཤད་གནང་དོན། འགོ་ཁྲིད་ལ་ཤུགས་སྣོན་བརྒྱབ་སྟེ་སྟོབས་ཆེའི་རྩ་འཛུགས་ཀྱི་ལེགས་ཆ་དེ་སྤུས་ཚད་མཐོ་བའི་རིམས་འགོག་གི་སྒུལ་ནུས་ཆེན་པོར་འགྱུར་བར་བྱེད་དགོས། སྤྱོད་ཚུལ་ལེགས་སུ་ཏན་ཏིག་གཏོང་བ་དང་། འགན་འཁྲི་ནན་དུ་གཏོང་བ། དཔོན་ཉམས་རིང་ལུགས་དང་ཕྱི་ཚུལ་རིང་ལུགས་ཁྱད་བསད་བྱེད་པ། འཐབ་ས་དང་པོར་བསྐྱོད་ནས་བཀོད་འདོམས་བྱེད་པ། སྒྲིག་འཛུགས་མཐུན་སྦྱོར་ལ་ཤུགས་སྣོན། སྔོན་འགོག་དང་ཚོད་འཛིན་གྱི་བྱེད་ཐབས་ཁག་དོན་འཁྱོལ་ནན་པོ་བཅས་བྱས་ནས། ལས་དོན་ཁག་དང་ལྷུ་ཚིགས་ཁག་ཏན་ཏིག་དང་ཞིབ་ཚགས་ངང་སྒྲུབ་དགོས། སྔར་ལས་ལྷག་པའི་སྒོ་ནས་རྒྱ་ཆེའི་ལས་བྱེད་པ་གཞི་རིམ་གྱི་འཐབ་ས་དང་པོར་བསྐྱོད་རྒྱུར་སྒྲིག་འཛུགས་དང་སྐུལ་སློང་བྱས་ཏེ། གཞི་རིམ་གྱི་གནས་ཚུལ་མཐིལ་རྟོགས་ཞིབ་ཚགས་བྱེད་པ་དང་དངོས་ཡོད་གནད་དོན་ཐག་གཅོད་བྱེད་རོགས་བྱས་ནས། ཐབས་ཇུས་བཀོད་སྒྲིག་ཁག་གཞི་རིམ་གྱི་བྱ་སྤྱོད་དངོས་ལ་ཏན་ཏིག་འགྱུར་བར་བྱེད་དགོས། བྱ་དགའ་ཆད་གཅོད་ཀྱི་ལམ་ལུགས་ནན་དུ་གཏོང་བ་དང་། དམག་འཁྲུག་སྐབས་ཀྱི་རྣམ་པ་རྒྱུན་འཁྱོངས། དམག་འཁྲུག་སྐབས་ཀྱི་སྒྲིག་ཁྲིམས་ལག་བསྟར་བཅས་བྱས་ཏེ། ལས་དོན་དངོས་ཀྱི་ཕན་འབྲས་ལ་བརྟེན་ནས་འགོ་ཁྲིད་ལས་བྱེད་པའི་འཇོན་ཐང་དང་ཆུ་ཚད་ལ་ཞིབ་དཔྱད་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་འཐབ་ས་དང་པོར་བྱས་རྗེས་མངོན་གསལ་དོད་པའི་ལས་བྱེད་པ་བློ་ཁོག་ཆེན་པོས་གནས་སྤོར་བཀོལ་སྤྱོད་བྱེད་པ་དང་། རིམས་ནད་སྔོན་འགོག་དང་ཚོད་འཛིན་གྱི་ལས་དོན་ཁྲོད་འགན་འཁྲི་ཡག་པོ་མི་འཁུར་མཁན་དུས་ཐོག་ཏུ་ལེགས་སྒྲིག་བྱེད་པ། འགན་འཛོལ་ཤོར་རིགས་ལ་འགན་འཁྲི་བདའ་འདེད་ནན་པོ་གཏོང་བ་བཅས་བྱེད་དགོས།
རྩོམ་སྒྲིག་པ། བདེ་སྒྲོན།
