ལོ་སྟོད་དུ་བོད་ལྗོངས་ཀྱི་སྔོ་ཚལ་འདེབས་ཁྱོན་མུའུ་ཁྲི37ལས་བརྒལ་བ།
སྤེལ་དུས 2024-08-20
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཉེ་ཆར། གསར་འགོད་པས་བོད་རང་སྐྱོང་ལྗོངས་ཞིང་ལས་གྲོང་གསེབ་ཐིང་ནས་ཤེས་རྟོགས་བྱས་པར་གཞིགས་ན། 2024ལོ་ནས་བཟུང་བོད་ལྗོངས་ཀྱིས་སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་བཏང་ནས། ཁྲོམ་ར་ཁྲིད་སྟོན་དུ་བྱེད་པ་དང་། ཚན་རྩལ་འདེགས་སྐྱོར་བྱས་ཏེ་དྲོད་ཁང་ཆེན་པོའི་དཔལ་འབྱོར་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་རྒྱུར་ནུས་ཤུགས་ཡོད་རྒུས་སྐུལ་འདེད་བཏང་བ་དང་། དྲོད་ཁང་ཆེན་པོའི་རྒྱ་ཁྱོན་རྒྱུན་ཆད་མེད་པར་ཆེ་རུ་ཕྱིན་པ་དང་འདེབས་འཛུགས་སྣ་ཁ་རྒྱུན་ཆད་མེད་པར་མང་དུ་ཕྱིན་ཡོད། ད་ལོའི་ལོ་སྟོད་དུ་ལྗོངས་ཡོངས་ཀྱི་སྔོ་ཚལ་འདེབས་འཛུགས་རྒྱ་ཁྱོན་མུའུ་ཁྲི37.72ཟིན་པ་དང་སྔོ་ཚལ་ཐོན་ཚད་ཏུན་ཁྲི24.95ཟིན་ཡོད།
ལྗོངས་ཡོངས་ཀྱི་བེད་མེད་དྲོད་ཁང་སླར་གསོ་དང་བེད་སྤྱོད་ལ་མུ་མཐུད་སྐུལ་འདེད་གཏོང་བའི་ཐད་དུ། བོད་ལྗོངས་ཀྱིས་ལས་ཀའི་ཇུས་གཞི་པར་འགྲེམས་བྱས་ཏེ་ལྗོངས་ཡོངས་ཀྱི་བེད་མེད་སྔོ་ཚལ་སྒྲིག་བཀོད་ཀྱི་གྲངས་འབོར་དང་། ངོ་བོ། རྒྱ་ཁྱོན། བེད་མེད་དུ་ལུས་པའི་རྒྱུ་རྐྱེན་སོགས་ལ་སྔར་བས་ཞིབ་མཆན་བཀོད་པ་དང་། དག་ཐེར་ལས་དོན་ལ་མུ་མཐུད་སྐུལ་འདེད་བཏང་བ་རེད། ཟླ6པའི་ཚེས30ཉིན་བར་ལྗོངས་ཡོངས་ཀྱིས་བེད་མེད་དྲོད་ཁང་མུའུ638སླར་གསོ་བེད་སྤྱོད་བྱས་ནས་ལེགས་གྲུབ་ཟིན་ཚད70%ཟིན་ཡོད།
སྔོ་ཚལ་གྱི་སྒྲིག་ཆས་འཛུགས་སྐྲུན་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བའི་ཐད་དུ། 2024ལོར་བོད་ལྗོངས་ཀྱིས་རང་སྐྱོང་ལྗོངས་ཀྱི་སྤོ་སྒྱུར་གཏོང་སྤྲོད་མ་དངུལ་སྒོར་དུང་ཕྱུར1.31བཀོད་སྒྲིག་བྱས་ཏེ་ལྷ་ས་དང་། ལྷོ་ཁ། ཉིང་ཁྲི་བཅས་སུ་སྒྲིག་བཀོད་གསར་སྐྲུན་དང་དྲོད་ཁང་བསྒྱུར་བཀོད་རིམ་སྤོར་རྣམ་གྲངས་ལག་བསྟར་བྱས་ཏེ་རྟེན་གཞིའི་གཞི་ཁྱོན་ཅན་གྱི་འདེབས་འཛུགས་དང་། ཚད་ལྡན་ཅན་གྱི་ཐོན་སྐྱེད། ཚོང་ཟོག་ཅན་གྱི་ཐག་གཅོད། ཐོན་ལས་ཅན་གྱི་གཉེར་སྐྱོང་བཅས་ལ་མུ་མཐུད་སྐུལ་འདེད་བཏང་ཏེ་གྲ་ནང་རྫོང་གིས་བྱེ་ཐང་དང་རི་ཐང་དུ་བྱེ་ཐང་གི་སྒྲིག་བཀོད་ཞིང་ལས་འཕེལ་རྒྱས་གཏོང་རྒྱུའི་ཚོད་ལྟ་འཚོལ་ཞིབ་ལ་རྒྱབ་སྐྱོར་བྱས་ཡོད།
ལག་རྩལ་མཛུབ་ཁྲིད་ལ་ཤུགས་སྣོན་རྒྱག་པའི་ཐད། ཚན་རྩལ་གྲོང་གསེབ་ཏུ་ཁྱབ་གདལ་གཏོང་བའི་ལག་རྩལ་འགན་ལེན་ལམ་སྲོལ་གྱི་ནུས་པ་གང་ལེགས་བཏོན་ཏེ་ལག་རྩལ་ཆེད་མཁས་པ་དུས་ཐོག་ཏུ་མངགས་ནས་ཆུས་དང་། གྲོང་ཁྱེར། རྫོང་བཅས་རིམ་ཁག་ཞིང་ལས་ཚན་རྩལ་མི་སྣ་སྒྲིག་འཛུགས་བྱས་ཏེ་སྔོ་ཚལ་ཐོན་སྐྱེད་རྟེན་གཞིར་ཟབ་འཇུག་བྱས་ཏེ། སྔོ་ཚལ་ལྗང་མདོག་དང་སྟབས་བདེ་ཅན་གྱི་འདེབས་གསོ་དོ་དམ་ལག་རྩལ་བེད་སྤྱོད་ཁྱབ་གདལ་གཏོང་ཤུགས་ཆེ་རུ་བཏང་ནས་ལུད་དང་ཞིང་སྨན་ལུགས་མཐུན་སྤྱོད་པར་ཁྲིད་སྟོན་བྱས་ཏེ་སྔོ་ཚལ་གྱི་སྤུས་ཚད་མཐོ་རུ་བཏང་ཡོད།
ཁྲོམ་རའི་ལྟ་སྐུལ་དོ་དམ་ལ་ཤུགས་སྣོན་རྒྱག་པའི་ཐད་དུ། ཞིང་ལས་ཀྱི་མ་འཇོག་དངོས་རྫས་དོ་དམ་ནན་པོ་བྱེད་པ་དང་། དུག་ཤེས་ཆེ་བའི་ཞིང་སྨན་སྤྱོད་རྒྱུར་རྡུང་རྡེག་ནན་པོ་གཏོང་བ། ཐོན་རྫས་ཀྱི་སྤུས་ཚད་བདེ་འཇགས་ཁུངས་འདེད་ལམ་ལུགས་འཐུས་སྒོ་ཚང་དུ་གཏོང་བ། སྔོ་ཚལ་ཞིང་སྨན་ལྷག་ལུས་ཚད་གཞི་ལས་བརྒལ་བ་ཚོད་འཛིན་ནན་པོ་བྱེད་པ། སྔོ་ཚལ་ཐོན་རྫས་ཀྱི་སྤུས་ཚད་བདེ་འཇགས་འགན་ལེན་བཅས་བྱེད་པ། སྔོ་ཚལ་ཐོན་སྐྱེད་ཁེ་ལས་དང་འདེབས་འཛུགས་དུད་ཚང་གིས་སྔོ་ཚལ་གྱི“ཐོན་རྫས་གསུམ་དང་ཚད་གཞི་གཅིག”ཁས་ལེན་རེ་ཞུ་ཧུར་ཐག་བྱས་ནས་སྔོ་ཚལ་གྱི་སྤུས་ཚད་ལེགས་སུ་བཏང་ཡོད།
རྩོམ་སྒྲིག་པ། དཔལ་གཡང་།
