ལྷོ་ཁ་དང་ཧུའུ་ནན་གཉིས་ནས་གཅིག་ནི་གཉན་ཆེན་ཐང་ལའི་རི་རྒྱུད་ཀྱི་ལྷོ་ཕྱོགས་སུ་གནས་པ་དང་། གཅིག་ནི་ཏུང་ཐིང་མཚེའུའི་ལྷོ་ཕྱོགས་སུ་ཡོད། དེ་གཉིས་དབར་བར་ཐག་སྤྱི་ལེ3000ལྷག་ཙམ་ཡོད་པ་དང་ས་བབ་མཐོ་ཚད་སྨི3000ལྷག་ཙམ་གྱི་ཧེ་བག་ཡོད། མ་གཞི་རི་ཆུ་ཁྲི་སྟོང་གི་བར་ཐག་ཆོད་ཀྱང“ཧུའུ་ནན་དང་བོད་ལྗོངས་ཁྱིམ་ཚང་གཅིག་ལྟར་བརྩེ་བའི”སྤུན་ཟླའི་བརྩེ་དུང་ཟབ་མོ་དེར་ལོ་རྒྱུས་ཡུན་རིང་ལྡན་ཡོད།
1994ལོར་ཀྲུང་དབྱང་གིས་བོད་ལྗོངས་ལ་ཁ་གཏད་རོགས་སྐྱོར་བྱ་རྒྱུའི་གཏན་འབེབས་གལ་ཆེན་བྱས་ཏེ“ཁག་བགོས་འགན་འཁུར་དང་། ཁ་གཏད་རོགས་སྐྱོར། དུས་བཀག་རེས་མོས”བཅས་ཀྱི་རོགས་སྐྱོར་བྱེད་སྟངས་གཏན་འཁེལ་བྱས་ཡོད། ཀྲུང་དབྱང་གི་གཅིག་གྱུར་བཀོད་སྒྲིག་གཞིར་བཟུང་ནས་ཧུའུ་ནན་གྱིས་ལྷོ་ཁ་ས་ཁུལ（2016ལོར་ཧྲན་ལྷོ་ས་ཁུལ་མེད་པ་བཟོས་ནས་ས་ཁུལ་རིམ་པའི་ལྷོ་ཁ་གྲོང་ཁྱེར་ལ་ཁ་གཏད་རོགས་སྐྱོར་བྱས་པ་དང་དེའི་རྨང་གཞིའི་ཐོག་ཧུའུ་ནན་ཞིང་ཆེན་ཏང་ཨུད་དང་ཞིང་ཆེན་སྲིད་གཞུང་གིས་ཁྲང་ཧྲ་དང་། ཀྲུའུ་ཀྲོའུ། ཡུའེ་དབྱང་། ཁྲང་ཏེ་བཅས་གྲོང་ཁྱེར4ཡིས་ལྷོ་ཁ་གྲོང་གྱི་གོང་དཀར་དང་། གྲ་ནང་། ཟངས་རི། ལྷུན་རྩེ་བཅས་རྫོང4ལ་ཁ་གཏད་རོགས་སྐྱོར་བྱ་རྒྱུའི་བཀོད་སྒྲིག་བྱས་པ་རེད།
ལོ30ཡི་རིང་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ཐོག་མཐའ་བར་གསུམ་དུ“ཀྲུང་དབྱང་གི་མངགས་བཅོལ”བློ་ལ་བརྟན་པོར་ངེས་ནས“ལྷོ་ཁའི་དགོས་མཁོ”ལ་དོ་སྣང་བྱེད་པ། “ཧུའུ་ནན་གྱི་ནུས་པ”བཏོན་ནས་མ་དངུལ་གཏོང་ཤུགས་ཆེ་རུ་གཏོང་བ་ནས་འགྲོ་འོང་དང་སྤེལ་རེས། མཉམ་འདྲེས་ལ་ཤུགས་སྣོན་རྒྱག་པ་དང་། ཐོན་ལས་དཔལ་འབྱོར་འཕེལ་རྒྱས་ལ་རོགས་སྐྱོར་བྱེད་པ་ནས་རིག་སྟོབས་ཀྱི་བོད་སྐྱོར་ཕན་ནུས་ཆེ་རུ་གཏོང་བ། དམངས་འཚོ་བདེ་རྩ་ལེགས་སུ་གཏོང་བ་ནས་མཐའ་མཚམས་ས་ཁུལ་འཛུགས་སྐྲུན་ལ་རོགས་སྐྱོར་བྱས་ནས་རྒྱུན་འཁྱོངས་ལྷོད་མེད་དང་། སྙིང་རུས་གཏན་འཁྱོངས། སེམས་ནུས་ཡོད་རྒུ་བཏོན་པ་བཅས་བྱས་ཏེ་ལྷོ་ཁར་རྒྱབ་སྐྱོར་དང་རོགས་རམ་བྱས་ཡོད།
ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་བོད་ལྗོངས་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ལག་བསྟར་གཏིང་ཟབ་བྱས་ཏེ་འགག་སྒྲོལ་དཀའ་སེལ་དང་མཐུན་སྒྲིལ་འབད་འཐབ་བྱས་ནས་བོད་སྐྱོར་ལས་དོན་ཁག་ལ་ཕན་འབྲས་གསར་པ་ཐོབ་རྒྱུར་རྒྱུན་ཆད་མེད་པར་སྐུལ་འདེད་བཏང་སྟེ་ལྷོ་ཁ་ཡུན་རིང་བདེ་འགོད་དང་སྤུས་ཚད་མཐོ་བའི་འཕེལ་རྒྱས་ལ་ནུས་པ་གལ་ཆེན་བཏོན་པ་དང་ལེགས་སྐྱེས་གལ་ཆེན་ཕུལ་ཡོད།
འགྲོ་འོང་དང་སྤེལ་རེས། མཉམ་འདྲེས་བཅས་ལ་སྐུལ་འདེད་བཏང་བ།
ད་ལོའི་ལོ་སྟོད་དུ་ཧུའུ་ནན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་བཅུ་པས“ཧུའུ་ནན་དང་ལྷོ་ཁ·སྐལ་བཟང་མེ་ཏོག་བཞད་པའི”ཧུའུ་ནན་དང་བོད་ལྗོངས་ཀྱི་གཞོན་ནུ་ལོ་ཆུང་གི2024ལོའི་དགུན་སྒར་གཉེར་བ་རེད། ལྷོ་ཁ་གྲོང་ཁྱེར་གྱི་སློབ་ཆུང་གསུམ་པའི་སློབ་མ་བྱམས་པ་དབང་སྒྲོན་གྱིས་དུས་ཡུན་ཉིན་དགུ་ཡི་ཞིབ་འཇུག་སློབ་སྦྱོང་བྱེད་སྒོའི་ནང་ཞུགས་ནས་རླབས་ཆེན་མི་སྣའི་ཕ་ཡུལ་འཚོལ་ཞིབ་དང་། མེས་རྒྱལ་གྱི་འཕེལ་རྒྱས་མྱོང་རོལ་བྱེད་པ། ཧུའུ་ནན་གྱི་རིག་གནས་མྱོང་རོལ་བྱེད་པ་བཅས་ཀྱི་ཐོག་ནས་ཁོ་མོར་བག་ཆགས་ཟབ་མོ་བཞག་པ་ནི་ཧུའུ་ནན་གྱི་གྲོགས་པོ་ཆུང་ཆུང་མི་ཉུང་བ་ཞིག་དང་གྲོགས་པོ་སྒྲིག་པ་དེ་རེད།
ཁྲང་ཧྲ་རུ“ཧུའུ་ནན་དང་ལྷོ་ཁ·སྐལ་བཟང་མེ་ཏོག་བཞད་པའི”དགུན་སྒར་བྱེད་སྒོ་སྤེལ་མཁན་ཧུའུ་ནན་དང་བོད་ལྗོངས་ས་གནས་གཉིས་ཀྱི་སློབ་མས་དྲན་རྟེན་པར་རྒྱག་བཞིན་པ།
“ལེ་དབར་སྟོང་ཕྲག་བརྒལ་ནས་ཧུའུ་ནན་དང་བོད་ལྗོངས་ས་ཁུལ་གཉིས་ཀྱི་སློབ་གྲོགས་དབར་འགྲོ་འོང་དེ་བས་མང་བ་བྱུང་བ་དང་ས་མཐོའི་ཕྱི་རོལ་གྱི་འདུ་འཛི་མཐོང་བྱུང་། སླད་ཕྱིན་ངས་དེ་བས་འབད་བརྩོན་ཆེན་པོས་སློབ་སྦྱོང་བྱས་ཏེ་ཕ་ཡུལ་ཧུའུ་ནན་ལྟར་མཛེས་སྡུག་ལྡན་པ་ཞིག་ཏུ་བསྐྲུན་རྒྱུ་ཡིན”ཞེས་བྱམས་པ་དབང་སྒྲོན་གྱིས་བཤད།
བྱེད་སྒོའི་ནང་སྔ་རྗེས་སུ་ཧུའུ་ནན་དང་བོད་ལྗོངས་ཀྱི་སློབ་ཆུང་སློབ་མ120ལྷག་ཙམ་ཆ་སྒྲིག་བྱས་ནས་ས་གནས་གཉིས་ཀྱི་ཕྲུ་གུའི་མཛའ་གྲོགས་ཀྱི་ས་བོན་བཏབ་ཡོད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་རྒྱུར་དམིགས་ནས་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ལས་སྟེགས་གསར་གཏོད་བྱས་ཏེ“ངའི་ཧྲའོ་ཧྲན་དུ་བསྐྱོད་པའི”གསར་བརྗེའི་ཞིབ་འཇུག་སློབ་སྦྱོང་དང་། “མེ་ཏོག་མཉམ་བཞད། ཧུའུ་ནན་དང་བོད་ལྗོངས་དབར་གྱི་བརྩེ་བ་ཟབ་པའི”རིག་གནས་སྤེལ་རེས་གསར་རྩོམ་མུ་མཐུད་བྱས་པ་དང་། ཡར་ལུང་གསར་བརྗེའི་གཏམ་རྒྱུད་བསྡུ་རུབ་སོགས་སྤུས་རྟགས་ཀྱི་བྱེད་སྒོ་རབ་དང་རིམ་པ་མུ་མཐུད་སྤེལ་ནས་མི་རིགས་མཐུན་སྒྲིལ་གྱི་མེ་ཏོག་སྔར་བས་བཀྲགས་མདངས་ཆེ་བར་བཞད་ཡོད།
ལོ30ཡི་རིང་། ཧུའུ་ནན་དང་བོད་ལྗོངས་ས་ཆ་གཉིས་དབར་འགྲོ་འོང་དང་སྤེལ་རེས་ ཐེངས410ལྷག་ཙམ་བྱས་པ་དང་། མི་ཐེངས6400ལྷག་ཙམ་ཟིན་ཡོད། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ཏང་སྲིད་དཔེ་སྟོན་སྣེ་ཁྲིད་མཐའ་འཁྱོངས་བྱས་ཏེ། ཏང་སྲིད་འགོ་ཁྲིད་ཕན་ཚུན་འཚམས་འདྲི་བྱེད་མང་དུ་ཕྱིན་པ་དང་ཧུའུ་ནན་བོད་ལྗོངས་ས་གནས་གཉིས་ཀྱི་ཏང་སྲིད་ཕན་ཚུན་འཚམས་འདྲི་བྱེད་ཐེངས3500ལྷག་ཙམ་ཟིན་པས་ཧུའུ་ནན་དང་བོད་ལྗོངས་ས་གནས་གཉིས་ཀྱི་མི་རིགས་ཁག་གི་མི་དམངས་ཀྱི་བརྩེ་སེམས་སྔར་བས་ཟབ་ཏུ་ཕྱིན་པ་དང་བློ་སེམས་སྔར་བས་དམ་དུ་ཕྱིན་ཡོད།
བསམ་ནོར་དོན་གྲུབ་ནི་ལྷུན་རྩེ་རྫོང་གི་ད་ལོ་ཁྲང་ཏེར་ལས་ཞུགས་བྱེད་མཁན་ཁག་དང་པོ་དེ་ཡིན་པ་རེད། ད་ལོའི་ཟླ5པར་ཁྲང་ཏེ་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་དོན་ཚོགས་ཆུང་གི་འབྲེལ་མཐུད་མཐུན་སྦྱོར་འོག་ལྷུན་རྩེ་རྫོང་གི་ཞིང་འབྲོག་པ་དང་མཐོ་སློབ་སློབ་ཐོན་སློབ་མ22ཀྱིས་ཁྲང་ཏེ་རུ2024ལོའི་ཁག་དང་པོའི་ལྗོངས་ཕྱི་རོལ་གྱི་ལས་ཞུགས་དང་འགྲོ་འོང་དང་སྤེལ་རེས། མཉམ་འདྲེས་བཅས་ཀྱི་བྱེད་སྒོ་སྤེལ་བ་རེད། ད་ཐེངས་ཀྱི་བྱེད་སྒོའི་ཐོག་བསམ་ནོར་དོན་གྲུབ་ཀྱིས་ས་གནས་དེ་གའི་ཁེ་ལས་དང་ལས་ཞུགས་ལྟ་སྦྱོང་རྟེན་གཞིར་ལྟ་སྐོར་བྱས་པ་དང་འབྲེལ་གདན་ཞུ་བྱས་པ་བརྒྱུད་ཕྱིར་ཚོང་ལས་གནས་ཀྱི་ལས་ཀ་ཞིག་རག་ཡོད་པ་རེད། “ཀུང་སིས་ཚོད་ལྟའི་དུས་ཡུན་བརྒྱུད་མི་དགོས་པར་ང་ཚོ་ཐད་ཀར་བསྡུས་པ་མ་ཟད། ད་དུང་ཉལ་ཁང་ཡང་མཁོ་འདོན་བྱས་བྱུང། ཟླ་རེར་གཞི་རྩའི་གླ་ཕོགས་སྒོར5000སྤྲོད་ཀྱི་ཡོད། ཆ་རྐྱེན་ཡག་པོ་དེ་འདྲ་ཡོད་པས་ང་རང་ལོ་ན་གཞོན་པའི་སྐབས་དང་བསྟུན་ནས་ཚོད་ལྟ་ཞིག་བྱེད་རྒྱུའི་སེམས་ཐག་བཅད་པ་ཡིན”ཞེས་བསམ་ནོར་དོན་གྲུབ་ཀྱིས་བཤད།
ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ཐབས་ལམ་མང་པོའི་ཐོག་ནས་ལས་ཞུགས་བོད་སྐྱོར་བྱས་ཏེ། ལྷོ་ཁའི་མཐོ་སློབ་ཀྱི་སློབ་ཐོན་སློབ་མ་དང་ཞིང་འབྲོག་མང་ཚོགས་འཚར་ལོངས་དང་ཤེས་ལྡན་མི་སྣར་འགྱུར་བའི་སྟེགས་བུ་མཁོ་འདོན་བྱས་ཤིང་། དུས་མཚུངས་སུ་ཁོང་ཚོ་ཧུའུ་ནན་དང་བོད་ལྗོངས་ས་གནས་གཉིས་ཀྱི་དཔལ་འབྱོར་རིག་གནས་སྤེལ་རེས་དང་མི་རིགས་མཉམ་འདྲེས་ལ་སྐུལ་འདེད་གཏོང་བའི་འབྲེལ་ཐག་ཅིག་ཏུ་གྱུར་ཡོད། ཉེ་བའི་ལོ་ཤས་རིང་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ཧུའུ་ནན་ཞིང་ཆེན་ནང་གི་ལས་ཞུགས་ལས་གནས་ཁྲི1.8ལྷག་ཙམ་བསྡུ་རུབ་བྱས་པ་དང་། ལས་ཞུགས་གདན་ཞུའི་བྱེད་སྒོ་ཁག་ཐེངས27སྤེལ་བ། ཧུའུ་ནན་དུ་ཧུའུ་ནན་དུ་བཅའ་སྡོད་ལྷོ་ཁ་གྲོང་ཁྱེར་གྱི་ལས་ཞུགས་བོད་སྐྱོར་འབྲེལ་གཏུག་ས་ཚིགས1དང་། ལས་ཞུགས་ལས་གཏོད་རྟེན་གཞི8དང་། ལས་ཞུགས་ལྟ་སྦྱོང་རྟེན་གཞི1བཅས་བཙུགས་ནས་ལྷོ་ཁའི་མང་ཚོགས400ལྷག་ཙམ་ཧུའུ་ནན་དུ་ལས་ཞུགས་ལས་གཏོད་བྱེད་པར་རོགས་རམ་བྱས་ཡོད།
དམངས་འཚོར་ཕན་འདགས་ནས་ཐོན་ལས་དར་རྒྱས་གཏོང་བ།
དབྱར་ཁའི་མཚན་མོར་ལྷོ་ཁ་གྲོང་ཁུལ་དུ་ཧུའུ་ནན་ལམ་ཆེན་ཐོག་རླངས་འཁོར་ཕར་འགྲོ་ཚུར་འོང་བྱེད་པ་དང་ཁྲོམ་གཞུང་གཅིག་གི་བར་མཚམས་ཆད་པའི་ལྷོ་ཁ་གྲོང་ཁྱེར་ལུས་རྩལ་ཐང་དུ་མི་ཚོགས་ཀྱིས་ཁེངས་ཤིང་འཁྲུག་ཆ་དོད་པོ་ཡོད། ལོ46ལ་སླེབས་པའི་ཉི་མ་ཚེ་རིང་གིས“ལུས་རྩལ་ཐང་གིས་གྲོང་མིར་ལུས་སྦྱོང་དང་སྤྲོ་གསེང་བྱ་ཡུལ་ཡག་པོ་ཞིག་མཁོ་འདོན་བྱས་ཡོད་པས་སྦྱོང་བརྡར་བྱ་ཡུལ་ཡག་ཤོས་ཤིག་རེད”བཤད།
ཧུའུ་ནན་གྱིས་ཁ་གཏད་བོད་སྐྱོར་བྱས་ཚུན་ཧུའུ་ནན་ལམ་ཆེན་དང་ལྷོ་ཁ་གྲོང་ཁྱེར་ལུས་རྩལ་ཐང་ཚུད་པའི“ཧུའུ་ནན་གྱི་རྟགས་ཚན”གྱི་རོགས་སྐྱོར་རྣམ་གྲངས་ཁག་གཅིག་གིས་ས་གནས་དེ་གའི་ལས་བྱེད་པ་དང་མང་ཚོགས་ཀྱི་འཚོ་བའི་སྤུས་ཚད་མཐོ་རུ་ཕྱིན་པ་མ་ཟད། ལྷོ་ཁ་འཕེལ་རྒྱས་འགྲོ་བར་ཡང་སྐུལ་འདེད་བཏང་ཡོད། བསྡོམས་རྩིས་བྱས་པར་གཞིགས་ན། ལོ30ཡི་རིང་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་འབྲེལ་ཐག་གི་ནུས་པ་བཏོན་ཏེ་རྣམ་གྲངས་མ་དངུལ་འབྲེལ་མཐུད་བརྩོན་ལེན་བྱེད་ཤུགས་རྒྱུན་ཆད་མེད་པར་ཆེ་རུ་བཏང་ནས་རིམ་རྩིས་བྱས་ན་རོགས་སྐྱོར་མ་དངུལ་དང་དངོས་ཟོག་སྒྲིག་ཆས་སྒོར་དུང་ཕྱུར27.01ཟིན་པ་དང་རྣམ་གྲངས536ལག་བསྟར་བྱས་ཡོད།
གོང་དཀར་རྫོང་གོ་ཆེ་གྲོང་ཚོར་དེ་སྔ་གཞི་རིམ་བཅོས་སྐྱོང་དང་། ཐུན་མོང་དཔལ་འབྱོར། མི་སྡོད་ཁོར་ཡུག་སོགས་ཀྱི་གནད་དོན་གྱིས་རྐྱེན་པས་འབྲེལ་ཡོད་དཔྱད་ཞིབ་གྲུབ་འབྲས་ཐོག་མཐའ་བར་གསུམ་དུ་ཡག་པོ་མེད་པ་རེད། 2023ལོའི་ལོ་འགོར་ཁྲང་ཧྲ་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་དོན་ཚོགས་ཆུང་གིས་གྲོང་ཚོའི“ཨུ་ལྷན་གཉིས”ཚན་ཁག་དང་གྲོང་ཚོར་བཅའ་སྡོད་ལས་དོན་རུ་ཁག་དང་མཉམ་འབྲེལ་བྱས་ཏེ། གྲོང་ཚོ་དང་དུད་ཚང་དུ་བསྐྱོད་དེ་གྲོང་མིའི་མོས་མཐུན་བྱེད་ཚད90%ཡན་ཟིན་པའི་སྔོན་འགྲོའི་ཆ་རྐྱེན་འོག མི་སྡོད་ཁོར་ཡུག་དང་གཞི་རིམ་གྱི་རྨང་གཞི་མཐོ་རུ་གཏོང་བའི་དམངས་ཕན་རྣམ་གྲངས་རབ་དང་རིམ་པ་ལག་བསྟར་བྱས་པ་རེད།
རྨང་གཞིའི་སྒྲིག་བཀོད་དང་། བོད་སྐྱོར་ཐོན་ལས། ཁོར་ཡུག་བཅོས་སྒྲིག་བཅས་ཀྱི་རྣམ་གྲངས་ཁག་གཅིག་གཅིག་རྗེས་གཉིས་མཐུད་ངང་དོན་འཁྱོལ་བྱས་ཏེ། ཕན་འབྲས་ཐོན་པ་དང་བསྟུན་ནས་ལོ་གཅིག་ལྷག་ཙམ་གྱི་དུས་ཚོད་ནང་གྲོང་ཚོའི་དུད་ཚང་ཚང་མར“སྒེའུ་ཁུང་ཕྱེ་ནས་ལྗོན་ཤིང་མཐོང་བ”བྱས་པ་དང་། ཐུན་མོང་དཔལ་འབྱོར་གྱིས་ཞིང་འབྲོག་པའི་ལོ་རེའི་མི་རེའི་ཆ་སྙོམས་ཡོང་འབབ་ཁེ་གཙང་སྒོར་ཁྲི2ལས་བརྒལ་རྒྱུར་རོགས་རམ་བྱས་པ། ཏང་རྩ་འཛུགས་ཀྱི་སྣེ་ཁྲིད་དང་ཏང་ཡོན་གྱི་གདོང་ལེན་དཔེ་བཟང་གི་ནུས་པ་ཆེས་ཆེར་ཆེ་རུ་ཕྱིན་ཡོད།
གོ་ཆེ་གྲོང་ཚོའི་ཏང་སྤྱི་ཁྱབ་ཀྲི་པུའུ་ཡི་ཧྲུའུ་ཅི་སངས་རྒྱས་གྱིས“བོད་སྐྱོར་ལས་དོན་ཚོགས་ཆུང་གིས་མ་དངུལ་དང་རྣམ་གྲངས་ཐད་ཤུགས་སྣོན་བརྒྱབ་པ་མ་ཟད། ཁོང་ཚོས་དམངས་ལ་དགོས་མཁོ་ཡོད་པའི་ལས་ཀའི་འདུ་ཤེས་ལ་བརྟེན་ནས། མང་ཚོགས་ཀྱི་ཁས་ལེན་བྱེད་ཚད་མཐོ་རུ་ཕྱིན་པ་དང་མང་ཚོགས་ཀྱི་ངར་ཤུགས་རང་ཤུགས་སུ་ཆེ་རུ་ཕྱིན་ཡོད”ཅེས་བཤད།
ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་དང་མང་ཚོགས་ཀྱི་དགོས་མཁོ་དང་རེ་སྒུག་ལ་དམིགས་ཏེ། བོད་སྐྱོར་རྣམ་གྲངས་ཀྱི་མ་དངུལ90%ཡན་གཞི་རིམ་དང་དམངས་འཚོའི་ཁྱབ་ཁོངས་སུ་གཏོང་རྒྱུ་མཐའ་འཁྱོངས་བྱས་ནས་མང་ཚོགས་ཀྱིས་མཛེས་སྡུག་ལྡན་པའི་འཚོ་བར་རེ་སྨོན་བྱེད་པའི་གོམ་སྟབས་སྔར་བས་སྟོབས་ལྡན་དུ་གྱུར་ཡོད།
གྲ་ནང་རྫོང་རྔ་སྒྲ་ཞང་ནི་ཡར་ཀླུང་གཙང་པོའི་བྱང་ངོགས་ཀྱི་བྱེ་འབུར་ས་ཁུལ་དུ་གནས་པ་དང་། ས་རྒྱུ་ཞན་པའི་བྱེ་ས་དེ་ད་ཆ་སྐྱེ་སྟོབས་ཀྱི་དཔལ་འབར་བའི་སྐྱེ་ལྡན་སྔོ་ཚལ་དང་ཤིང་ཏོག་གྱི“ནོར་གཞོང”ཞིག་ཏུ་གྱུར་པ་སུས་ཀྱང་བསམ་མྱོང་མེད་པ་ཞིག་རེད། ལྗང་མདོག་འབྱུང་ཁུངས་ཀྱི་སྐྱེ་ལྡན་སྔོ་ཚལ་དང་ཤིང་ཏོག་ཐོན་སྐྱེད་རྟེན་གཞིའི་འགན་འཁུར་བ་ལི་ཏུང་ཕིང་གིས2019ལོར་སྲིད་ཇུས་ཀྱི་ལྕག་སྐུལ་དང་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གི་གདན་ཞུས་འོག་རྔ་སྒྲ་ཞང་ལ་མ་དངུལ་གཏོང་འགོ་ཚུགས་པ་དང་ལོ་ཤས་རིང་འབད་བརྩོན་བྱས་པ་བརྒྱུད། ད་ལོའི་དུས་ཚིགས་དང་པོར་རྟེན་གཞིའི་འདམ་རྩྭ་ཕྱིར་ཚོང་བྱེད་ཚད་སྒོར་ཁྲི380ཟིན་ཡོད་ཅེས་ངོ་སྤྲོད་བྱས་པ་རེད། རྟེན་གཞིས་རྔ་སྒྲ་གྲོང་ཚོའི་ས་ཆ་འཁོར་རྒྱུག་བྱས་པས་ལོ་ལྟར་གྲོང་ཚོའི་མཉམ་སྡེབ་ཀྱི་ཡོང་འབབ་སྒོར་ཁྲི3འཕར་བ་མ་ཟད། ད་དུང་གྲོང་མི11ལ་ཡུན་རིང་ལས་ཀ་བྱེད་དུ་བཅུག་པ་དང་ཉིན་རེར་ཆ་སྙོམས་གྲོང་མི20ནས50བར་དུས་ཡུན་ཐུང་ངུའི་ལས་ཀ་བྱེད་དུ་བཅུག་པ་རེད།
ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གི་ཚོང་འགུགས་ཞབས་ཞུའི་ལམ་སྲོལ་འཐུས་སྒོ་ཚང་བར་བརྟེན་ཉེ་བའི་ལོ་ཤས་རིང་ཧྭ་ཡུས་གཏེར་ལས་དང་ཧྭ་ཤིན་ཨར་འདམ་སོགས་ཐོན་ལས་ཀྱི་འབྲེལ་བ་ཆེ་བ་དང་། ཁྱབ་འགྱེད་ནུས་པ་ཆེ་བ། སྐུལ་ཁྲིད་ནུས་པ་ཆེ་བ་བཅས་ཀྱི་ཐོན་ལས་རྣམ་གྲངས་ཁག་གཅིག་ནང་འདྲེན་བྱས་པ་དང་། ལྷོ་ཁའི་ནུས་རྒྱུ་གཙང་མའི་སྒྲིག་ཆས་བཟོ་སྐྲུན་ཐོན་ལས་གླིང་དང་། གོང་དཀར་ས་མཐོའི་བཟའ་བཅའ་ལས་སྣོན་ཐོན་ལས་གླིང་། གྲ་ནང་གཙང་པོའི་བྱང་རྒྱུད་ཀྱི་རྒྱལ་ཁབ་རིམ་པའི་དེང་རབས་ཞིང་ལས་ཐོན་ལས་དཔེ་སྟོན་གླིང་སོགས་ཁྱད་ལྡན་ཐོན་ལས་གླིང་ཁག་གཅིག་ཆགས་པར་སྐུལ་འདེད་བཏང་ཡོད།
རིག་སྟོབས་རོགས་སྐྱོར་གྱི་ཕན་ནུས་ཆེ་རུ་གཏོང་དགོས།
ལོ30ཡི་རིང་ཧུའུ་ནན་གྱི་བོད་སྐྱོར་ལས་བྱེད་པ་ཁག10པ་དང་ལས་རིགས་ཁག་གི་ཆེད་ལས་ཤེས་ལྡན་མི་སྣ་ཁྱོན་མི1194ཡིས་ཧྲན་ནན་ལ་རོགས་སྐྱོར་བྱས་ཤིང་། ཁོང་ཚོའི་སེམས་ཀྱི་གཏིང་ནས་ལྷོ་ཁ་ནི་སྔ་ས་ནས་དེའི་ཆེད་དུ་འབད་འཐབ་བྱེད་སའི་ཕ་ཡུལ་གཉིས་པ་ཞིག་ཏུ་གྱུར་ཡོད།
2022ལོའི་ལོ་མཇུག་ཏུ། ཧུའུ་ནན་དུ་ལྷན་སྐྱེས་སྙིང་ནད་གཤགས་བཅོས་ལེགས་གྲུབ་བྱུང་བའི་བསྟན་འཛིན་ལྷག་ཚེ་དང་བསྟན་འཛིན་བསམ་སྐྱིད་ཀྱིས་ད་ཆ་ཕྲུ་གུ་གཞན་དང་འདྲ་བར་རྒྱུན་གཏན་གྱི་འཚོ་བ་སྐྱེལ་བ་དང་སློབ་སྦྱོང་བྱེད་བཞིན་ཡོད། གཤགས་བཅོས་བྱས་རྗེས་བསྐྱར་དུ་འཚམས་འདྲི་བྱེད་སྐབས་ཕྲུ་གུ་དང་ནང་མིས་བོད་སྐྱོར་ལས་བྱེད་པར་ཐུགས་རྗེ་ཆེ་ཡང་ཡང་ཞུ་བཞིན་ཡོད། ཧུའུ་ནན་བོད་སྐྱོར་སྤུས་རྟགས་རྣམ་གྲངས་ལས་བྱུང་བའི་ལྷན་སྐྱེས་རང་བཞིན་གྱི་སྙིང་ནད་ཕོག་པའི་བྱིས་པར་རིན་མི་དགོས་པར་བརྟག་དཔྱད་དང་སྐྱོབ་བཅོས་རྣམ་གྲངས་དེ་ད་བར་བསྟུད་མར་ལོ12སྤེལ་བ་དང་ཁྱོན་ཕྲུ་གུ་སྟོང་ཕྲག་ཁ་ཤས་ལ་བརྟག་དཔྱད་བྱས་པའི་ནང་ལྷན་སྐྱེས་རང་བཞིན་གྱི་སྙིང་ནད་ཕོག་པའི་བྱིས་པ84དང་མི་ཐེངས97ཧུའུ་ནན་དུ་སྐྱོབ་བཅོས་བྱེད་པར་བསྐྱོད་ཡོད།
ད་ལོ34ལ་སླེབས་པའི་གྲ་ནང་རྫོང་གི་ཞིང་པ་ཚེ་རིང་སྒྲོལ་མ་ས་གནས་དེ་གའི་ཞིང་ལས་རྣམ་གྲངས་ནང་ཞུགས་ནས་འདེབས་འཛུགས་མཁས་ཅན་ཞིག་ཏུ་གྱུར་པ་དང་ཟླ་རེའི་གླ་ཕོགས་སྒོར5000ལྷག་ཙམ་ཟིན་གྱི་ཡོད། ཚེ་རིང་སྒྲོལ་མས“དེ་སྔ་གྲོང་མིས་ནས་དང་གྲོ་ཁོ་ན་རྨོ་འདེབས་བྱེད་པ་མ་ཟད་རང་མཁོ་རང་འདང་ཙམ་ལས་ཡོང་གི་མེད། ད་ཆ་རྫོང་ནང་ལོ་ལྟར་ཧུའུ་ནན་ནས་ཡོང་བའི་ལག་རྩལ་མི་སྣས་ཡུལ་མི་ཚོར་སྔོ་ཚལ་དང་ཤིང་ཏོག་འདེབས་འཛུགས་ཀྱི་ལག་རྩལ་སློབ་ཁྲིད་བྱེད་ཀྱི་ཡོད། ལག་རྩལ་ཞིག་ཤེས་ནས་ཡོང་འབབ་མང་དུ་ཕྱིན་ཡོད”ཅེས་བཤད། ཧུའུ་ནན་ཞིང་ཆེན་གྱིས་བོད་སྐྱོར་ལས་བྱེད་པ་དང་ཤེས་ལྡན་མི་སྣའི་ནུས་པ་འདོན་སྤེལ་གང་ལེགས་བྱས་ཏེ་གཞི་ཁྱོན་རྒྱུན་ཆད་མེད་པར་ཆེ་རུ་གཏོང་བ་དང་། གྲུབ་ཆ་ལེགས་སྒྱུར། བྱེད་སྟངས་གསར་གཏོད་བཅས་བྱས་པས་ད་བར་ཆེད་ལས་ལག་རྩལ་ཤེས་ལྡན་མི་སྣ565ལྷོ་ཁ་ས་གནས་ཁག་ཏུ་བསྐྱོད་དེ་ས་གནས་དེ་གའི་ལས་བྱེད་པ་དང་མང་ཚོགས་དང་མཉམ་དུ་མཛེས་སྡུག་ལྡན་པའི་འཚོ་བ་སྐྱེལ་རྒྱུར་འབད་བརྩོན་བྱས་ཡོད།
2023ལོར་ལྷོ་ཁ་གྲོང་ཁྱེར་སློབ་ཆུང་གསུམ་པའི“རྒྱུགས་ཆུང”སླར་ཡང་གྲོང་ཁྱེར་ཐད་གཏོགས་སློབ་གྲྭའི་ཨང་དང་པོར་སླེབས་ཤིང་། སློབ་གྲྭའི་དགེ་སློབ་ཚོས་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས“བོད་སྐྱོར་སྔོན་ལ་སློབ་གསོར་རོགས་སྐྱོར”མཐའ་འཁྱོངས་བྱས་པར་བསྔགས་བརྗོད་བྱས་པ་རེད། མིག་སྔའི་བར་ཧུའུ་ནན་ཞིང་ཆེན་གྱིས་རིམ་རྩིས་བྱས་ན་ཁག12ལ་དགེ་རྒན234བཏང་བ་དང་རྣམ་གྲངས་མ་དངུལ་སྒོར་དུང་ཕྱུར3.7བཏང་བས“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལ་གྲུབ་འབྲས་གཡུར་དུ་ཟ་བ་ཐོབ་ཡོད།
ལོ30ཡི་རིང་། ཧུའུ་ནན་ཞིང་ཆེན་གྱིས་སྨན་བཅོས་ཚོགས་སྒྲིག་ཆུང་ཆུང་དང་། ཚོང་འགུགས་ཚོགས་སྒྲིག་ཆུང་ཆུང་། ཡུལ་སྐོར་ཚོགས་སྒྲིག་ཆུང་ཆུང་། སྡོད་ཁང་འཛུགས་སྐྲུན་ཚོགས་སྒྲིག་ཆུང་ཆུང་། གྲོང་ཁྱེར་དོ་དམ་ཚོགས་སྒྲིག་ཆུང་ཆུང་སོགས་ཚོགས་སྒྲིག་ཚོགས་པ་སྣ་ཚོགས་ཀྱི་བོད་སྐྱོར་ཕན་ནུས་ཤུགས་ཆེན་བཏོན་ནས་མཉེན་གཤིས་བོད་སྐྱོར་ལ་སྐུལ་འདེད་ཤུགས་ཆེན་བཏང་སྟེ། ལྷོ་ཁ་འཕེལ་རྒྱས་ལ་རིག་སྟོབས་ཀྱི་འདེགས་སྐྱོར་ནུས་ལྡན་མཁོ་འདོན་བྱས་ཡོད།
དེ་དང་ཆབས་ཅིག་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་བརྟན་ལྷིང་སྲུང་སྐྱོང་སྐོར་གྱི་ཀྲུང་དབྱང་དང་རང་སྐྱོང་ལྗོངས་ཀྱི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱས་ཏེ་ལྷོ་ཁ་གྲོང་ཁྱེར་གྱི་ས་སྲུང་མཐའ་སྲུང་དང་མཐའ་མཚམས་དར་རྒྱས་དམངས་ཕྱུག་ཁྲོད་དུས་རབས་ཀྱི་འགན་འཁྲི་མངོན་པ་དང་མཐའ་མཚམས་དར་རྒྱས་དང་དམངས་ཕྱུག་གི་གྲོང་ཚོ་འཛུགས་སྐྲུན་ལ་སྐུལ་འདེད་ཧུར་ཐག་བཏང་ནས་ཡུལ་སྨད་ཞང་བོད་ཕག་གསོ་སྤེལ་དང་ཡུལ་སྨད་སྔོ་ཚལ་དྲོད་ཁང་སོགས་ཐོན་ལས་རོགས་སྐྱོར་རྣམ་གྲངས་ལག་ལེན་བསྟར་བ། དམག་དམངས་སློབ་ཆུང་དང་མཐའ་མཚམས་འཕྲོད་བསྟེན་ཁང་སོགས་སྤྱི་པའི་ཞབས་ཞུ་འཐུས་ཚང་དུ་བཏང་བ་རེད།
ཧུའུ་ནན་ཞིང་ཆེན་ཨུ་ལྷན་གྱི་ཧྲུའུ་ཅི་གཞོན་པ་དང་རྒྱུན་ལས་ཧྲི་ཀྲང་གཞོན་པ་པའེ་ཡུན་ཧྥུང་གིས་བོད་སྐྱོར་ལས་དོན་ནི་ཆབ་སྲིད་ཀྱི་ལས་འགན་གལ་ཆེན་ཞིག་ཡིན། ལོ30ཡི་རིང་ཧུའུ་ནན་ཞིང་ཆེན་ཨུ་ལྷན་དང་ཞིང་ཆེན་སྲིད་གཞུང་གིས་བོད་སྐྱོར་ལས་དོན་ལ་ཚད་མཐོའི་མཐོང་ཆེན་བྱས་ནས་ཤེས་ལྡན་མི་སྣ་དང་། ལག་རྩལ། མ་དངུལ། རྣམ་གྲངས་སོགས་ཀྱི་ཐད་ནས་ནུས་ཤུགས་ཡོད་རྒུས་བོད་སྐྱོར་ལས་དོན་ལ་རྒྱབ་སྐྱོར་བྱས་ཏེ་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དེ་ཧུའུ་ནན་ཞིང་ཆེན་གྱི་བོད་སྐྱོར་ལས་དོན་ཁག་ནང་དོན་འཁྱོལ་མཐར་ཕྱིན་བྱ་རྒྱུའི་འགན་ལེན་བྱས་ཡོད་ཅེས་བརྗོད།
པའེ་ཡུན་ཧྥུང་གིས་བོད་ལྗོངས་སུ་ལས་ཀ་བྱེད་སྐབས་དབྱང་རླུང་དཀོན་ཡང་སྙིང་སྟོབས་ལ་ཉམས་པ་མེད། གོམ་སྟབས་རྗེས་མར་ཧུའུ་ནན་ཞིང་ཆེན་བོད་སྐྱོར་ལས་དོན་རུ་ཁག་གིས་ཆབ་སྲིད་ཀྱི་གནས་བབ་མཐོ་རུ་བཏང་སྟེ། དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཁྱོན་ཡོངས་ནས་ལག་ལེན་མཐར་ཕྱིན་བསྟར་ནས་བོད་ལྗོངས་རྙིང་པའི་སྙིང་སྟོབས་དང“ལམ་གཉིས”ཀྱི་སྙིང་སྟོབས་རྒྱུན་འཛིན་ཤུགས་ཆེན་བྱས་ཏེ། བོད་སྐྱོར་གྱི་རྒྱང་ལམ་གསར་པར་མུ་མཐུད་ལྷོ་ཁའི་འཕེལ་རྒྱས་ཆེད་སྟོབས་ཤུགས་འདོན་རྒྱུ་ཡིན་ཞེས་བརྗོད།
