ཀྲུང་གོའི་བོད་ལྗོངས་དྲ་བའི་འཕྲིན། ཟླ8པའི་ཚེས29ཉིན་བོད་རང་སྐྱོང་ལྗོངས་ནག་ཆུ་གྲོང་ཁྱེར་དུ2024ལོའི་མི་རིགས་མཐུན་སྒྲིལ་ཡར་ཐོན་དྲིལ་བསྒྲགས་བྱེད་སྒོའི་ཟླ་ཁོངས་ཀྱི་འགོ་ཚུགས་མཛད་སྒོ་འཚོགས་པ་རེད། ནག་ཆུ་གྲོང་ཨུད་ཀྱི་ཧྲུའུ་ཅི་ཀྲོང་ཅིན་སུང་མཛད་སྒོར་ཞུགས་པ་དང་འབྲེལ་གསུང་བཤད་ཀྱང་གནང་བ་རེད། གྲོང་ཨུད་ཀྱི་ཧྲུའུ་ཅི་གཞོན་པ་ཧྲི་ཀྲང་བཀྲ་ཤིས་རྡོ་རྗེ་དང་། གྲོང་ཨུད་ཀྱི་རྒྱུན་ཨུ་དྲིལ་བསྒྲགས་པུའུ་ཡི་པུའུ་ཀྲང་ཀྲོའུ་ཆིང་ཁོ། གྲོང་ཨུད་ཀྱི་རྒྱུན་ཨུ་དང་། རྒྱུན་ལས་ཧྲི་ཀྲང་གཞོན་པ། འཐབ་ཕྱོགས་གཅིག་གྱུར་པུའི་པུའུ་ཀྲང་བཅས་འགན་འཁུར་གནང་མཁན་ལི་མེང་དང་། ཧྲི་ཀྲང་གཞོན་པ་བསོད་ནམས་ཚེ་རིང་བཅས་བྱེད་སྒོར་ཞུགས་པ་རེད།
འགོ་འཛུགས་མཛད་སྒོའི་ཐོག་ཀྲོང་ཅིན་སུང་སོགས་ཀྱིས་ཚོགས་ཞུགས་འཐུས་མིར《ཀྲུང་ཧྭ་མི་རིགས་གཅིག་མཐུན་ཚོགས་པའི་སྤྱི་བཤད》སོགས་དཔེ་དེབ་ཕུལ་བ་དང་། ཚང་མས་དེའི་དགོངས་དོན་དང་ངོ་བོ་སློབ་སྦྱོང་གཏིང་ཟབ་བྱེད་དགོས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་རྒྱུ་དེ་དུས་རབས་གསར་པའི་ནག་ཆུའི་ལས་དོན་ཁག་གི་གཙོ་ཐིག་ཏུ་འཛིན་རྒྱུ་མཐའ་འཁྱོངས་བྱས་ཏེ“ལས་གྲྭ་ཆེན་པོ་བཞི”དང“བྱ་སྤྱོད་དྲུག”ལག་ལེན་བསྟར་ནས་སྤྱི་ཚོགས་རིང་ལུགས་དེང་རབས་ཅན་གྱི་ནག་ཆུ་གསར་པ་འཛུགས་སྐྲུན་བྱ་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུའི་ལྕག་སྐུལ་བྱས་པ་རེད།
འགོ་ཚུགས་མཛད་སྒོའི་ཡུལ་དངོས།
བྱེད་སྒོའི་ཡུལ་དངོས་སུ་མི་རིགས་མཐུན་སྒྲིལ་ཤེས་བྱའི་བྱ་དགའ་སྤྲོད་པའི་འགྲན་རྩོད་བྱེད་སྒོ་སྤེལ་ནས་མང་ཚོགས་དེའི་ནང་ཞུགས་པའི་སྤྲོ་སེམས་ཆེ་རུ་ཕྱིན་པ་དང་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཏང་གི་མི་རིགས་རིགས་པའི་གཞུང་ལུགས་དང་སྲིད་ཇུས་ཤེས་བྱ་ཤེས་རྟོགས་བྱེད་ཚད་སྔར་བས་ཆེ་རུ་ཕྱིན་པ་རེད། ཡུལ་དངོས་ནས་ད་དུང་འགོ་ཚུགས་མཛད་སྒོར་ཞུགས་མཁན་འབྲོག་པ་མང་ཚོགས་ལ་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སྦྱར་ཡིག་བྲིས་པའི་ཨ་ཅོར་དང་། སྨྱུག་ཤུག ཆུ་ཕོར་བཅས་དང་དེ་བཞིན་དྲིལ་བསྒྲགས་ལག་དེབ་དང་དྲིལ་བསྒྲགས་ཤོག་བྱང་སོགས་སྤྲད་པ་རེད།
《ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ》ཞེས་པའི་གར་ཆུང་འཁྲབ་བཞིན་པ།
《རྒྱལ་དར་འོག་གི་འབྲོག་པ》ཞེས་པའི་ཞབས་བྲོ་འཁྲབ་བཞིན་པ།
འགོ་འཛུགས་མཛད་སྒོ་མཇུག་འགྲིལ་རྗེས་གསེར་རྙེད་ཆུས་རིག་རྩལ་ཚོགས་པས་ཡུལ་དངོས་ཀྱི་ལྟད་མོ་བ་ཚོར་ནག་ཆུ་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་གྱི་བརྗོད་དོན་གཙོ་བོའི་གླུ་དབྱངས《ང་ཚོའི་མཛེས་སྡུག་ལྡན་པའི་བྱང་ཐང》དང《རྒྱལ་དར་འོག་གི་འབྲོག་པ》སོགས་ངོ་མཚར་ཆེ་བའི་རིག་རྩལ་འཁྲབ་སྟོན་རབ་དང་རིམ་པ་འཁྲབ་སྟོན་བྱས་པ་རེད། དེའི་ནང《བྱང་ཐང་གི་ཕྲུ་གུ》ཞེས་པའི་ནང་ཐུན་མོང་མ་ཡིན་པའི་བོད་རིགས་ཞབས་བྲོའི་ཁྱད་ཆོས་ལ་བརྟེན་ནས་ནག་ཆུ་ས་མཐོའི་བརྗིད་ཉམས་ལྡན་པའི་རྣམ་པ་དང་མི་དམངས་ཀྱི་དཔའ་ཉམས་མཚོན་པར་བྱས་ཡོད། གར་ཆུང《ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ》ཞེས་པའི་ནང་གསོན་ཉམས་དོད་པའི་གཏམ་རྒྱུད་ཀྱི་བྱུང་རིམ་དང་ལྷག་བསམ་ཟོལ་མེད་ཀྱི་བརྩེ་དུང་མཚོན་པར་བྱས་ཏེ། ཀྲུང་ཧྭ་མི་རིགས་སྣ་མང་གཞི་གཅིག་ཏུ་འགྱུར་བའི་རིག་གནས་ཀྱི་ནང་དོན་དང་མི་རིགས་ཁག་དབར་གྱི་ཉ་ཆུ་ལྟར་ཟབ་པའི་མཛའ་བརྩེ་འགྲེལ་བཤད་གཏིང་ཟབ་བརྒྱབ་ཡོད། ཡུལ་དངོས་སུ་འཁྲུག་ཆ་ཧ་ཅང་དོད་པོ་ཡོད་པ་དང་ནག་ཆུ་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་གྱི་རྣམ་པ་བཟང་པོ་གང་ལེགས་མངོན་ཡོད།
རྩོམ་སྒྲིག་པ། དཔལ་གཡང་།
