བོད་ལྗོངས་གཞིས་རྩེར་སྟོན་བསྡུའི་བྲེལ་བ་ཆེ།
སྤེལ་དུས 2024-09-20
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
སྟོན་ཟླ་དགུ་པར། བོད་ལྗོངས་ཀྱི་འབྲུ་མཛོད་དུ་གྲགས་པའི་གཙང་ཁུལ་གྱི་ཞིང་ཐང་སེར་ཐིང་ངེར་གྱུར་ནས་སྟོན་གྱི་འབྲས་བུ་བསྡུ་བའི་དུས་བཟང་ཟིན་པ་དང་། གཞིས་རྩེ་གྲོང་ཁྱེར་གྱིས་སྟོན་བསྡུའི་ལས་དོན་མ་འཕྱུག་པ་བྱས་ཡོད། མྱང་ཆུ་གཙང་པོ་རྒྱུག་ཁུལ་གྱི་བསམ་གྲུབ་རྩེ་ཆུས་དང་། པ་སྣམ་རྫོང་སོགས་སུ་སྟོན་བསྡུའི་ལས་དོན་སྔོན་ལ་སྤེལ་འགོ་ཚུགས་ཡོད།
བསམ་གྲུབ་རྩེ་ཆུས་ཉི་རི་གཞུང་སྟག་རི་གྲོང་ཚོར། ཚད་གཞི་མཐོ་བའི་ཞིང་ཐང་ནང་སྙེ་མའི་མགོ་ལྕོག་ལྡེམ་ལྡེམ་བྱེད་པ་དང་། ཞིང་པ་བསོད་ནམས་ཚེ་རིང་གིས་བརྔ་བསྡུ་འཕྲུལ་འཁོར་ལ་བརྟེན་ནས་ལོ་ཏོག་བསྡུ་བཞིན་ཡོད། ཁོང་གིས་ད་ལོ་ཡང་བསྐྱར་ལོ་ལེགས་ཡོང་ངེས་རེད་ཅེས་བརྗོད་ཡོད།
པ་སྣམ་རྫོང་དཔའ་རྩལ་ཞང་དུ་ལོ་ཏོག་ཡོངས་སུ་སྨིན་ནས་རྒྱལ་ལམ་གཡས་གཡོན་གཉིས་སུ་སེར་མདོག་གི་མཛེས་རིས་ཤིག་གྲུབ་ཡོད། དཔའ་རྩལ་ཞང་བཙན་མཁར་གྲོང་ཚོར་འཕྲུལ་ཆས་ཅན་དང་ཕྱེད་འཕྲུལ་ཆས་ཅན་གྱི་བརྔ་བསྡུའི་ལས་དོན་སྤེལ་བཞིན་ཡོད་པ་དང་། རྫོང་ཞིང་འབྲོག་ཕྱོགས་བསྡུས་ཞབས་ཞུ་ལྟེ་གནས་ཀྱི་ཀྲུའུ་རེན་གཞོན་པ་བསྟན་འཛིན་ཡང་གཞུང་དོན་ཁང་ཞིང་ནང་དུ་སྤོས་ནས་བརྔ་བསྡུའི་ལས་དོན་ལ་མཛུབ་སྟོན་བྱེད་པར་སླེབས་ཡོད། ཁོང་གིས། སྟོན་བསྡུའི་ལས་དོན་འགོ་མ་ཚུགས་གོང་། ང་ཚོས་ཞིང་འཕྲུལ་མཉམ་ལས་ཁང་གི་ཞིང་འཕྲུལ་ཡོ་ཆས་ལ་ཉམས་གསོ་བྱས་པ་མ་ཟད། སྨིན་ཟིན་པའི་ལོ་ཏོག་བརྔ་བསྡུ་བྱས་ཡོད། ད་ལོ་རྫོང་ཧྲིལ་པོའི་ས་ཞིང་རྨོ་འདེབས་རྒྱ་ཁྱོན་མུའུ་ཁྲི12.74ཟིན་པ་ལས་སྔོན་དཔག་བྱས་ན་འབྲུ་རིགས་ཐོན་འབབ་ཏུན་ཁྲི5ཡན་ཐོན་རྒྱུ་རེད་ཅེས་བརྗོད་འདུག
2024ལོར། དཔའ་རྩལ་ཞང་གིས་མཉམ་ལས་ཁང་བཙུགས་ནས་གྲོང་མི་ཚོར་མཉམ་ལས་ཁང་གི་ཞིང་འཕྲུལ་སྤྱོད་རྒྱུ་བྱུང་བ་མ་ཟད། ཞང་དེ་ཡོངས་ཀྱི་ཞིང་དུད846ལ་ལོ་ལྟར་མ་རྐང་ནང་ཞུགས་པའི་ཁེ་སྤོགས་སྒོར1000ཙམ་རག་ཡོད།
དཔའ་རྩལ་ཞང་ནི་བོད་ལྗོངས་ཀྱི་ཞིང་ལས་དེང་རབས་ཅན་འཕེལ་རིམ་གྱི་བསྡུས་རིས་ལྟ་བུ་ཞིག་ཡིན། བོད་རང་སྐྱོང་ལྗོངས་ཞིང་ལས་དང་གྲོང་གསེབ་ཐིང་གི་གྲངས་གཞི་ལས་མངོན་པར་གཞིགས་ན། 2023ལོར་བོད་ལྗོངས་ཀྱི་འབྲུ་རིགས་རྨོ་འདེབས་རྒྱ་ཁྱོན་མུའུ་ཁྲི291.9ཟིན་པ་དང་། འབྲུ་རིགས་ཐོན་འབབ་ཏུན་ཁྲི108.87ཟིན་ཡོད། དེའི་ནང་ནས་ཀྱི་ཐོན་འབབ་ཏུན་ཁྲི84.36ཟིན་ཡོད། རིམ་རྩིས་བྱས་ན་ཚད་གཞི་མཐོ་བའི་ས་ཞིང་མུའུ་ཁྲི430བཟོས་པ་དང་། ནས་ཀྱི་སོན་བཟང་ཁྱབ་གདལ་གཏོང་ཚད་བརྒྱ་ཆ93ཟིན་པ། འབྲུ་རིགས་གཙོ་བོ་རྨོ་འདེབས་དང་བརྔ་བསྡུ་བྱེད་སྟངས་ཕྱོགས་བསྡུས་འཕྲུལ་ཆས་ཅན་དུ་འགྱུར་ཚད་བརྒྱ་ཆ71ཡན་ཟིན་ཡོད།
