ཀྲུང་གོའི་བོད་ལྗོངས་དྲ་བའི་འཕྲིན། ཟླ9པའི་ཚེས22ཉིན། སྐབས་གསུམ་པའི་རྗེ་འབུམ་སྒང་གི་བསམ་བློའི་ཕྱོགས་བསྡུས་དང་ཐི་ཧུའུ་རིག་གནས་ཡུལ་སྐོར་བཙུགས་ནས་ལོ་ངོ10འཁོར་བའི་མཉམ་སྤྱོད་ཚོགས་འདུ་ལྷ་ས་ཞི་བདེ་གླིང་གི་གནའ་བོའི་འདུ་ཁང་དུ་འཚོགས་པ་རེད།
ཚོགས་འདུའི་ཡུལ་དངོས།
རྗེ་འབུམ་སྒང་སྒྱུ་རྩལ་ལྟེ་གནས་ནི་བོད་ལྗོངས་ཀྱི་གནའ་བོའི་སྐྲུན་དངོས་སྲུང་སྐྱོང་རང་བཞིན་གྱི་སྒྱུར་བཀོད་བྱས་པ་ལས་གྲུབ་པའི་སྤྱི་པའི་རིག་གནས་ཡུལ་སྐོར་གྱི་བར་མཐོངས་ཐོག་མ་དེ་ཡིན་ཞིང་། དེས་གནའ་གྲོང་སྲུང་སྐྱོབ་དང་རིག་གནས་ཡུལ་སྐོར་མཉམ་འདྲེས་བྱ་རྒྱུར་ཐོག་མཐའ་བར་གསུམ་དུ་གཞོལ་ནས“རྗེ་འབུམ་སྒང་གི་བསམ་བློའི་ཕྱོགས་བསྡུས”ཀྱི་བྱེད་སྒོ་སྤེལ་ཞིང་། སྤྱི་ཚོགས་དང་རིག་གཞུང་ལས་རིགས་ཀྱིས་རིག་གནས་ཤུལ་བཞག་སྲུང་སྐྱོབ་དང་། གསོན་ཤུགས་འཕེལ་བ། དེ་བཞིན་རིག་གནས་ཡུལ་སྐོར་ས་ཁམས་རང་བཞིན་འཕེལ་རྒྱས་བཅས་ལ་ཞིབ་དཔྱད་བྱ་རྒྱུར་ཁྲིད་སྟོན་བྱེད་ཀྱི་ཡོད།
རྗེ་འབུམ་སྒང་སྒྱུ་རྩལ་ལྟེ་གནས་ཀྱི་དེ་སྔའི་སྐྲུན་དངོས་རྗེ་འབུམ་སྒང་ལྷ་ཁང་དེ་དུས་རབས19པའི་དུས་སྨད་དུ་སྐྲུན་འགོ་ཚུགས་ཤིང་། བོད་ལྗོངས་ཀྱི་སྐྲུན་དངོས་ཁྲོད་མཚོན་བྱེད་རང་བཞིན་ལྡན་པའི་ཕྱོགས་བསྡུས་དཀྱིལ་འཁོར་གྱི་གྲུབ་ཆ་ལྟར་བསྐྲུན་ཡོད་ལ། དེ་སྔ་ལྷ་སའི་གནའ་གྲོང་གི་མཚོན་རྟགས་རང་བཞིན་གྱི་སྐྲུན་དངོས་ཤིག་ཀྱང་ཡིན་པས། དེར་བོད་ལྗོངས་ཀྱི་སྒྱུ་རྩལ་དང་། འཛུགས་སྐྲུན། ལོ་རྒྱུས་བཅས་ཀྱི་སྙིང་བཅུད་བསྡུས་ཡོད། སྲིད་གཞུང་གིས་ཉམས་གསོ་བྱས་པ་དང་། ཐི་ཧུའུ་སྒྱུ་རྩལ་གྱིས་མ་དངུལ་དང་ནུས་ཤུགས་བཏོན་ཏེ་སྲུང་སྐྱོང་རང་བཞིན་གྱི་སྒྱུར་བཀོད་བྱས་པ་བརྒྱུད། 2021ལོའི་ཟླ7པར་རིན་མེད་ངང་སྤྱི་དམངས་ལ་སྒོ་ཕྱེ་འགོ་ཚུགས་ཡོད།
ལྷ་ས་གྲོང་ཁྱེར་རིག་གནས་དང་ཡུལ་སྐོར་ཅུས་ཀྱི་ཏང་ཙུའི་ཁོངས་མི་དང་ཅུས་ཀྲང་གཞོན་པ་ཡོན་ཉིང་གིས་གླེང་སྟེགས་ཀྱི་འགོ་ཚུགས་མཛད་སྒོའི་ཐོག་ཤིས་ཚིག་སྒྲོན་སྐབས། མི་རིགས་ཁག་གི་མཁས་དབང་མཉམ་འཛོམས་ཀྱིས་གྲངས་འཛིན་རིག་གནས་ཡུལ་སྐོར་འཕེལ་རྒྱས་དང་གནའ་གྲོང་སྲུང་སྐྱོབ་ཐད་ཐུན་མོང་གིས་གྲོས་བསྡུར་བྱས་ནས། མི་རིགས་ཁག་དབར་འགྲོ་འོང་དང་སྤེལ་རེས། མཉམ་འདྲེས་བཅས་ལ་སྐུལ་འདེད་ནུས་ལྡན་བཏང་སྟེ་རིག་གཞུང་ལས་རིགས་དང་། ལས་རིགས་གཞན་པ། གྲོང་མི་བཅས་ཀྱིས་གནའ་བོའི་སྐྲུན་དངོས་སྲུང་སྐྱོབ་དང་། གསོན་ཤུགས་འཕེལ་བ། གྲངས་འཛིན་རིག་གནས་ཡུལ་སྐོར་འཕེལ་རྒྱས་བཅས་ལ་ངོས་འཛིན་ཐུབ་ཚད་ཆེ་རུ་ནུས་ལྡན་གཏོང་རྒྱུ་རེད་ཅེས་བཤད།
ཚོགས་འདུའི་ཡུལ་དངོས།
2021ལོར་སྐབས་དང་པོའི“རྗེ་འབུམ་སྒང་གི་བསམ་བློའི་ཕྱོགས་བསྡུས”གཉེར་སྐབས་རྗེ་འབུམ་སྒང་སྒྱུ་རྩལ་ལྟེ་གནས་དངོས་སུ་སྤྱོད་འགོ་ཚུགས་པ་དང་ཏག་ཏག་འཁེལ་ཞིང་། ལོ་གསུམ་རིང་རྗེ་འབུམ་སྒང་སྒྱུ་རྩལ་ལྟེ་གནས་ཀྱིས་སྒྱུ་རྩལ་གྱི་འགྲེམས་སྟོན་གལ་ཆེན་ཐེངས11གཉེར་ཡོད་ལ། སྤྱི་པའི་སློབ་གསོ་དང་ཞིབ་སྦྱོང་ཡུལ་སྐོར་ལག་ལེན་གྱི་བྱེད་སྒོ་སྔ་རྗེས་སུ་ཐེངས་བརྒྱ་ལྷག་ཙམ་སྤེལ་ཡོད།
ལྷ་སའི་སྤྱི་པའི་རིག་གནས་སྒྱུ་རྩལ་སློབ་གསོ་ཞིབ་སྦྱོང་གི་སློབ་གྲྭ་འབྲིང་ཆུང་གི་ཕུལ་བྱུང་སློབ་མའི་འཐུས་མིར་གཟི་བརྗིད་མཚན་སྙན་ལག་ཁྱེར་སྤྲོད་བཞིན་པ།
ཐུགས་རྗེ་ཆེ་ཞུ་བའི་བརྒྱུད་རིམ་ཁྲོད་ཐི་ཧུའུ་རིག་གནས་ཡུལ་སྐོར་མཉམ་འབྲེལ་གྱི་སྲོལ་གཏོད་པ་ཧྥང་ཁུན་གྱིས། རིག་གནས་སྒྱུ་རྩལ་ལས་རིགས་ཁག་གི་གྲོགས་པོ་ཚོའི་སེར་སྣ་མེད་པའི་རྒྱབ་སྐྱོར་དང་སྒེར་སེམས་མེད་པའི་བསླབ་བྱའི་འོག་ཚོགས་པས་བོད་ལྗོངས་ཀྱི་སྲོལ་རྒྱུན་རིག་གནས་གསར་གཏོད་རང་བཞིན་གྱི་གཞན་སྒྱུར་དང་འཕེལ་རྒྱས་ཀྱི་ལོ་བཅུའི་དཔེ་མཚོན་ཞིག་འཚོལ་ཞིབ་ཐུབ་ཡོད་ཅེས་ངོ་སྤྲོད་བྱས་པ་དང་། ཁོང་གིས་འབྱུང་འགྱུར་ལོ་བཅུའི་ནང་རྗེ་འབུམ་སྒང་དང་ཐི་ཧུའུ་རིག་གནས་ཡུལ་སྐོར་གྱིས་རིག་གནས་སྲུང་སྐྱོང་དང་། གནའ་བོའི་སྐྲུན་དངོས་ལ་གསོན་ཤུགས་འཕེལ་བ། གྲངས་འཛིན་རིག་གནས་ཡུལ་སྐོར་གསར་གཏོད་བཅས་དང་འབྲེལ་བ་ཡོད་པའི་ཁྱབ་ཁོངས་ལས་བརྒལ་བའི་མཉམ་ལས་དང་སྤེལ་རེས་ལ་མུ་མཐུད་དོ་ཁུར་དང་སྐུལ་འདེད་བཏང་ནས། བོད་ལྗོངས་ཀྱི་རིག་གནས་རྒྱུན་འཛིན་གསར་གཏོད་དང་། མི་རིགས་མཐུན་སྒྲིལ། གནའ་བོའི་སྐྲུན་དངོས་སྲུང་སྐྱོབ། རིག་གནས་ཡུལ་སྐོར་ཐོན་ལས་སྐྱོན་བྲལ་དང་རྒྱུན་མཐུད་ཆོག་པའི་འཕེལ་རྒྱས་བཅས་འགྲོ་རྒྱུར་སྐུལ་འདེད་གཏོང་རྒྱུ་ཡིན་ཞེས་བཤད།
