ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལས་སྟེགས་གསར་པ་སྤྱོད་འགོ་ཚུགས།
སྤེལ་དུས 2024-09-27
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཀྲུང་གོའི་བོད་ལྗོངས་དྲ་བའི་འཕྲིན། ཟླ9པའི་ཚེས20ཉིན། མིག་སྔར་རྒྱལ་ནང་གི་འཛུགས་སྐྲུན་རྒྱ་ཁྱོན་ཆེ་ཤོས་དང་མཐོ་ཚད་མཐོ་ཤོས་ཀྱི་ས་མཐོའི་ལས་སྟེགས་ཏེ་བོད་ལྗོངས་ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལས་སྟེགས་གསར་པ་དངོས་སུ་སྤྱོད་འགོ་ཚུགས། སྟེགས་བུ་གསར་པ་དེ་ན་ནིང་ལོ་མཇུག་ཏུ་བེད་སྤྱོད་གཏོང་འགོ་ཚུགས་པའི་རྒྱུག་ལམ་གཉིས་པ་དང་ཟུང་འབྲེལ་བྱས་ཏེ་ལྷ་ས་གོང་དཀར་རྒྱལ་སྤྱིའི་གནམ་ཐང་གི་འགྲོ་སྐྱོད་ནུས་པ་ཆེ་རུ་ཤུགས་ཆེན་འགྲོ་རྒྱུ་ཡིན་པ་དང་། དེས་སླད་ཕྱིན་གནམ་ཐང་དེའི་མི་ཐེངས་ཁྲི1200ཡི་དགོས་མཁོ་སྐོང་ཐུབ་རྒྱུ་རེད།
ལས་སྟེགས་གསར་པ་སྤྱོད་འགོ་ཚུགས་པའི་མཛད་སྒོ་གཉེར་བའི་ཡུལ་དངོས།
ལས་སྟེགས་དེ་གནམ་ཐང་གི་བདེ་འཇགས་འཁོར་རྒྱུག་གི་གཙོ་གནད་དེ་ཡིན། དེས་གནམ་གྲུ་འཕུར་སྐྱོད་དང་། འབབ་པ། ས་ངོས་སུ་འཁོར་སྐྱོད་བཅས་བྱེད་རིང་གི་དོ་དམ་དང་བཀོད་འདོམས་ལས་དོན་གྱི་འགན་འཁུར་གྱི་ཡོད་པས་གནམ་ཐང་གི“མིག”དང“ཀླད་ཆེན”ལྟ་བུ་རེད། ལྷ་ས་གོང་དཀར་རྒྱལ་སྤྱིའི་གནམ་ཐང་གི་མཐོ་ཚད་སྨི55.6དང་། འཛུགས་སྐྲུན་རྒྱ་ཁྱོན་སྨི་ངོས་གྲུ1684.5ཡོད། དེའི་ནང་དོ་དམ་ཚོད་འཛིན་ཁང་གི་རྒྱ་ཁྱོན་སྨི་ངོས་གྲུ86ཡོད། དོ་དམ་ཚོད་འཛིན་ཁང་གི་བཞུགས་གནས་དང་། གྲ་སྒྲིག་དོ་དམ་བཞུགས་གནས། ས་ངོས་དོ་དམ་བཞུགས་གནས། བརྡ་ཁྱབ་མཐུན་སྦྱོར་བཞུགས་གནས། འཕུར་སྐྱོད་གཞི་གྲངས་ཐག་གཅོད་བཞུགས་གནས་སོགས་དོ་དམ་བཞུགས་གནས11བཀོད་སྒྲིག་བྱས་ཡོད། དེའི་ནང་འཕྲིན་གཏོང་དང་། ཕྱོགས་སྟོན། ལྟ་ཞིབ། གནམ་གཤིས་སོགས་རྩེར་སོན་ལག་རྩལ་འདུས་ནས་ཚད་མཐོའི་རང་འགུལ་ཅན་དང་རིག་ནུས་ཅན་མངོན་འགྱུར་བྱུང་ཡོད། མཁྲེགས་ཆས་དང་མཉེན་ཆས་ཐད་ནས་གཞུང་ལས་ཀྱི་ཁོར་ཡུག་ཧ་ཅང་ལེགས་སུ་ཕྱིན་ཏེ། དོ་དམ་ཚོད་འཛིན་མི་སྣས་མཁའ་དབྱིངས་དོ་དམ་གྱི་ཞབས་ཞུའི་ནུས་པ་ཆེ་རུ་དང་དང་དུ་ལེན་པའི་ནུས་པ་ཆེ་རུ་ཤུགས་ཆེན་འགྲོ་རྒྱུ་དང་། གནམ་ཐང་འཁོར་སྐྱོད་ཀྱི་འགན་སྲུང་ནུས་པ་དང་ལས་ཕྱོད་ཆེ་རུ་ཤུགས་ཆེན་འགྲོ་རྒྱུ་རེད།
བོད་ལྗོངས་ལྷ་ས་གོང་དཀར་རྒྱལ་སྤྱིའི་གནམ་ཐང་གི་ལས་སྟེགས་གསར་པ།
ལས་གྲྭ་དེར་ཁྱོན་མ་དངུལ་སྒོར་ཁྲི9559བཏང་བ་དང་། 2023ལོའི་ཟླ་དང་པོའི་ཚེས6ཉིན་ལས་འགོ་ཚུགས་ཤིང་། ཆུ་དཔྱད་ས་གཤིས་ཀྱི་ཆ་རྐྱེན་རྙོག་འཛིང་ཆེ་བ་དང་། མཐའ་འཁོར་གྱི་སྒྲིག་བཀོད་སྤོ་སྒྱུར་གྱི་དོན་ཚན་དཀའ་བ། འགག་རྩའི་ལམ་རྒྱུད་ཀྱི་ལས་ཀ་མང་བ་སོགས་ཀྱི་དཀའ་ངལ་མང་པོ་ཁྱད་བསད་བྱས་ཏེ2023ལོའི་ཟླ8པའི་ཚེས5ཉིན་སྒྲོམ་སྟེགས་ཀྱི་གཙོ་གཟུགས་མཐོ་ཤོས་ལེགས་གྲུབ་བྱུང་བ་དང་། 2024ལོའི་ཟླ6པའི་ཚེས18ཉིན་མེ་ཟོན་ཞིབ་བཤེར་རྩིས་ལེན་བྱུང་བ་དང་། ཟླ6པའི་ཚེས27ཉིན་ལས་མཇུག་བསྒྲིལ་ནས་ཞིབ་བཤེར་རྩིས་ལེན་བྱས་པ་དང་ཁྱོན་དུས་ཡུན་ཉིན427འགོར་ཡོད་པ་རེད།
ལས་མིས་ལས་སྟེགས་གསར་པར་ལས་ཀ་བྱེད་བཞིན་པ།
