“ལམ་གཉིས”སྐོར་གྱི་བགྲོ་གླེང་ཚོགས་འདུ་སི་ཁྲོན་དུ་འཚོགས་པ།
སྤེལ་དུས 2024-09-27
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཀྲུང་གོའི་བོད་ལྗོངས་དྲ་བའི་འཕྲིན། ཟླ9པའི་ཚེས21ཉིན“‘ལམ་གཉིས’ཀྱི་སྙིང་སྟོབས་རྒྱུན་འཛིན་དར་སྤེལ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བའི་རིག་གཞུང་བགྲོ་གླེང་ཚོགས་འདུ”སི་ཁྲོན་ཡུལ་སྐོར་སློབ་གླིང་དུ་འཚོགས་ཤིང་། ཀྲུང་གོའི་བོད་ལྗོངས་ཆ་འཕྲིན་ལྟེ་གནས་དང་། བོད་རང་སྐྱོང་ལྗོངས་རིག་དངོས་སྤྱི་ཁྱབ་ཅུས། སི་ཁྲོན་སློབ་ཆེན། ཁྲུང་ཆིང་འགྲིམ་འགྲུལ་སློབ་ཆེན་སོགས་མཐོ་སློབ་དང་ཞིབ་འཇུག་སྒྲིག་གཞི་མང་པོའི་ཆེད་མཁས་པ་དང་མཁས་དབང70ལྷག་ཙམ་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་ལས་དོན་ལ་ཤུགས་སྣོན་རྒྱག་པ་དང་ལེགས་སུ་གཏོང་རྒྱུའི་སྐོར་གྱི་དགོངས་པ་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་ནས “ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་རྒྱུ”དང“‘ལམ་གཉིས’ཀྱི་སྙིང་སྟོབས་རྒྱུན་འཛིན་དར་སྤེལ་གཏོང་བའི”བརྗོད་དོན་གཙོ་བོར་དམིགས་ནས་བགྲོ་གླེང་བྱས་ཏེ་བསམ་བློ་བརྗེ་རེས་དང་ཐུན་མོང་ངོས་འཛིན་གཅིག་ཏུ་བསྡུས་ཡོད། སི་ཁྲོན་ཡུལ་སྐོར་སློབ་གླིང་ཏང་ཨུད་ཀྱི་ཧྲུའུ་ཅི་གཞོན་པ་དང་སློབ་སྤྱི་ཝང་ཁྲོན་བགྲོ་གླེང་ཚོགས་འདུར་ཞུགས་པ་དང་འབྲེལ་ཤིས་ཚིག་ཀྱང་བསྒྲོན་པ་རེད།
བགྲོ་གླེང་ཚོགས་འདུའི་ཡུལ་དངོས།
བགྲོ་གླེང་ཚོགས་འདུའི་ཡུལ་དངོས།
ཝང་ཁྲོན་གྱིས་ཤིས་ཚིག་སྒྲོན་སྐབས། རིག་གཞུང་སྤེལ་རེས་དང་བསམ་བློའི་བརྗེ་རེས་ལས་ཐུན་མོང་གི་ངོས་འཛིན་གཅིག་ཏུ་བསྡུས་ནས། ཁྲོན་བོད་གཞུང་ལམ་དང་མཚོ་བོད་གཞུང་ལམ་འདི་ཉིད་ཐོག་མཐའ་བར་གསུམ་དུ་མི་རིགས་མཐུན་སྒྲིལ་གྱི་ལམ་བུ་དང་དཔལ་ཡོན་ཡར་ཐོན་གྱི་ལམ་བུར་འགྱུར་རྒྱུར་སྔར་བས་སྐུལ་འདེད་གཏོང་བ་དང་མི་རིགས་ཁག་གི་སྤུན་ཟླའི་ཐུན་མོང་ཕྱུག་འགྱུར་ལམ་བུར་རིག་སྟོབས་ཀྱི་རྒྱབ་སྐྱོར་བྱ་རྒྱུའི་རེ་སྒུག་ཡོད་ཅེས་བཤད།
བགྲོ་གླེང་ཚོགས་འདུའི་ཐོག ལྷོ་ནུབ་འགྲིམ་འགྲུལ་སློབ་ཆེན་མར་ཁེ་སི་རིང་ལུགས་སློབ་གླིང་གི་དགེ་རྒན་ཆེན་མོ་བ་ཧོ་ཝུའེ་དང་ཞི་ཧྭ་སློབ་ཆེན་གྱི་དགེ་རྒན་ཆེན་མོ་བ་ཝུའུ་ཧུའེ་རུང་གིས་བརྗོད་དོན་གཙོ་བོའི་གཏམ་བཤད་གནང་བ་མ་ཟད། ཆེད་མཁས་པ་དང་མཁས་དབང70ལྷག་ཙམ་གྱིས་ཚོགས་ཆུང་ཁག་བགོས་ཀྱི་གཏམ་བཤད་ཀྱང་སྤེལ་ནས། ཁྲོན་བོད་གཞུང་ལམ་དང་མཚོ་བོད་གཞུང་ལམ་བཟོ་སྐྲུན་དང་བདག་སྐྱོང་གི་ལོ་རྒྱུས་དང་ད་ལྟའི་གནས་ཚུལ། “ལམ་གཉིས”སྙིང་སྟོབས་ཀྱི་ནང་དོན་དང་དེ་བཞིན་དུས་རབས་གསར་པར་རྒྱུན་འཛིན་དར་སྤེལ། དེ་བཞིན་ལམ་རྒྱུད་ས་ཁོངས་ཀྱི་ཡུལ་སྐོར་འཕེལ་རྒྱས་ལ་སྐུལ་འདེད་དང་། མི་རིགས་ཁག་འགྲོ་འོང་དང་སྤེལ་རེས། མཉམ་འདྲེས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བ་སོགས་ཐད“ལམ་གཉིས”སྙིང་སྟོབས་ཀྱི་རིན་ཐང་གལ་ཆེན་བཅས་ལ་དམིགས་ནས་བགྲོ་གླེང་གཏིང་ཟབ་བྱས་པ་རེད།
ད་ཐེངས་ཀྱི་བགྲོ་གླེང་ཚོགས་འདུ་ནི་སི་ཁྲོན་ཡུལ་སྐོར་སློབ་གླིང་གིས་གཙོ་གཉེར་བྱས་པ་དང་། སི་ཁྲོན་ཡུལ་སྐོར་སློབ་གླིང་མར་ཁེ་སི་རིང་ལུགས་སློབ་གླིང་། སི་ཁྲོན་ཡུལ་སྐོར་སློབ་གླིང་ཞིང་ཆེན་ཡོངས་ཀྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བའི་ཞིབ་འཇུག་རྟེན་གཞི། སི་ཁྲོན་གསར་བརྗེའི་རིག་གནས་ཡུལ་སྐོར་ཞིབ་འཇུག་ལྟེ་གནས། ཁྲེང་ཏུའུ་གྲོང་ཁྱེར་གྲོང་ཁྱེར་ཆེ་གྲས་ཀྱི་ཞིབ་ཚགས་ཅན་གྱི་བཅོས་སྐྱོང་ཞིབ་འཇུག་རྟེན་གཞི་བཅས་ཀྱིས་གཉེར་འགན་འཁུར་བ་ཞིག་རེད།
