ཀྲུང་གོའི་བོད་ལྗོངས་དྲ་བའི་འཕྲིན། ཟླ10པའི་ཚེས19ཉིན། བྲག་གསུམ་མཚོའི་རྐང་ཐང་སྒར་འཛོམས་སྐབས་གཉིས་པ་བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་ཀོང་པོ་རྒྱ་མདའ་རྫོང་བྲག་གསུམ་མཚོའི་མཛེས་ལྗོངས་ཁུལ་དུ་འགོ་ཚུགས་པ་རེད། ཐེངས་འདིའི་བྱེད་སྒོ་དེ་བོད་རང་སྐྱོང་ལྗོངས་ལུས་རྩལ་ཅུས་དང་ཉིང་ཁྲི་གྲོང་ཁྱེར་མི་དམངས་སྲིད་གཞུང་གིས་གཙོ་གཉེར་བྱས་ཤིང་། དེའི་དམིགས་ཡུལ་ནི་རྐང་ཐང་དང་། རི་འཛེགས། སྒར་རྒྱག་པ། འཕྱོ་སྐྱོད་སོགས་ཕྱི་རོལ་ལུས་རྩལ་གྱི་རྣམ་པ་བརྒྱུད་ཡུལ་སྐོར་བ་ཚོ་བྲག་གསུམ་མཚོའི་རང་བྱུང་མཛེས་ལྗོངས་ཁུལ་དུ་ཁྲིད་དེ། སྤྱི་དམངས་ཀྱིས་རང་བྱུང་ཁོར་ཡུག་ལ་སྲུང་སྐྱོང་བྱེད་པའི་འདུ་ཤེས་ཟབ་ཏུ་གཏོང་བ་དང་། སྐྱེ་ཁམས་ཡུལ་སྐོར་འཕེལ་རྒྱས་ལ་སྐུལ་འདེད་བཏང་ནས་མི་དང་རང་བྱུང་ཁམས་ཞི་མཐུན་མཉམ་གནས་ཡོང་བར་བྱས་ཡོད།
བྲག་གསུམ་མཚོའི་རྐང་ཐང་སྒར་འཛོམས་སྐབས་གཉིས་པའི་འགོ་ཚུགས་མཛད་སྒོའི་ཡུལ་དངོས།
དུས་ཡུན་ཉིན་གཉིས་ཀྱི་འདུ་ཚོགས་ནང་། ཡུལ་སྐོར་བ་ཚོས་རྐང་ཐང་ཚོགས་ཆུང་དང་སྒར་སྡོད་ཚོགས་ཆུང་། རི་འཛེགས་ཚོགས་ཆུང་བཅས་རང་མོས་ངང་འདེམས་ཆོག་ཅིང་། ཚོགས་ཆུང་མི་འདྲ་བར་སོ་སོའི་ཁྱད་ཆོས་ལྡན། རྐང་ཐང་ཚོགས་ཆུང་ལ་ལམ་ཐག་ཕྱེད་ཀའི་ཚོགས་ཆུང（20km）དང་བརྒྱུད་རིམ་ཧྲིལ་པོའི་ཚོགས་ཆུང（42km）དབྱེ་ཡོད། དེའི་ནང་ཞུགས་མཁན་ཚོས་བྲག་གསུམ་མཚོའི་མཚོ་སྐོར་ལམ་དུ་བསྐྱོད་སྐབས་གཡས་ངོགས་ཀྱི་མཛེས་སྡུག་ལྡན་པའི་རི་ཆུ་དང་གཡོན་ངོགས་ཀྱི་གདོད་མའི་ནགས་ཚལ་མྱོང་རོལ་བྱེད་ཐུབ་པ་མ་ཟད། གྱེན་འཛེག་མང་པོ་མེད་པས་ས་མཐོར་རྐང་ཐང་སྐྱོད་སའི་སྒོ་འཛུགས་ལམ་ཐིག་ཅིག་རེད། རི་འཛེག་ཚོགས་ཆུང་གིས་ཉིན་དང་པོར་ས་བབ་མཐོ་ཚད་རྒྱ་མཚོའི་ངོས་ལས་སྨི4564ཡོད་པའི་སར་འཛེགས་ནས་སྒར་བརྒྱབ་སྟེ་རྒྱང་ལྟ་བྱས་ཚེ་བརྗིད་ཆགས་ཉམས་དགའ་བའི་གངས་རི་དང་དེའི་བརྒྱན་དུ་འགྱུར་བའི་སྔོ་ཞིང་དྭངས་བའི་མཚེའུ་དག་མིག་ལམ་དུ་མངོན་ཐུབ། འདུ་ཚོགས་ཀྱི་ཉིན་དང་པོའི་ཕྱི་རོལ་ལུས་རྩལ་གྱི་བྱེད་སྒོ་མཇུག་འགྲིལ་རྗེས། རྐང་ཐང་ཚོགས་ཆུང་དང་སྒར་སྡོད་ཚོགས་ཆུང་ནང་ཞུགས་མཁན་ཚང་མས་བྲག་གསུམ་མཚོའི་ངོགས་ཀྱི་བྱེ་ཐང་དུ་སྒར་བརྒྱབ་སྟེ། སྐར་ཚོགས་འོག་གི་རོལ་དབྱངས་འདུ་ཚོགས་དང་མེ་ཕུང་མཚན་ཚོགས་ཀྱི་སྒོར་གཞས་ལ་མྱོང་རོལ་བྱེད་ཆོག
ཕྱོགས་བཞི་མཚམས་བརྒྱད་ནས་ཡོང་བའི་རྐང་ཐང་སྐྱོད་མཁན་ཚོས་བྲག་གསུམ་མཚོའི་མཛེས་ལྗོངས་ཁུལ་དུ་དགའ་སྤྲོའི་ངང་བསྐྱོད་བཞིན་པ།
སི་ཁྲོན་དར་རྩེ་མདོ་ནས་ཡོང་པའི་བློ་བཟང་ཟླ་བ་ནི་ཐེངས་འདིའི་བྱེད་སྒོར་གདན་ཞུ་བྱས་པའི་སྐུ་མགྲོན་གྱི་གྲས་ཤིག་ཡིན་ཞིང་། ཐད་གཏོང་བ་གྲགས་ཅན་ཞིག་ཡིན་པའི་ཁོང་གིས་ངོ་མཚར་ཆེ་བའི་བྱེད་སྒོའི་བརྒྱུད་རིམ་ཧྲིལ་པོར་ཟིན་ཐོ་མང་པོ་བཀོད་ཡོད། ཁོང་གིས“ཉིན་དང་པོར་ཆུ་ཚོད4ལྷག་ཙམ་ནང་རྐང་ཐང་སྤྱི་ལེ20བསྐྱོད་རྗེས། ཚང་མས་མཉམ་དུ་སྒར་བརྒྱབ་ནས་སྡོད་པ་དང་མེ་ཕུང་མཚན་ཚོགས་ལ་མྱོང་རོལ་བྱས་པ་ཡིན། དགོང་མོ་དྲག་ཆར་བབས་ཀྱང་ཆར་པའི་ཁྲོད་ཞབས་བྲོ་འཁྲབ་པས་ཧ་ཅང་སྐྱིད་པོ་བྱུང་། ཉིན་གཉིས་པར་ཆེད་མཁས་དགེ་རྒན་དང་མཉམ་དུ་བྲག་གསུམ་མཚོའི་གྲགས་ཅན་སྲོལ་རྒྱུན་རྣམ་གྲངས་ཏེ་མཚོ་ཐོག་འཕྱོ་སྐྱོད་ལུས་རྩལ་ཉམས་ལེན་བྱས་པ་ཡིན། རྣམ་གྲངས་དེ་ངས་རྩེད་ཐེངས་དང་པོ་ཡིན་པས་སེམས་འགུལ་ཆེན་པོ་ཐེབས་བྱུང”ཞེས་བཤད།
རུ་མི་ཚོས་མཚོ་ཐོག་འཕྱོ་སྐྱོད་རྣམ་གྲངས་ནང་ཞུགས་བཞིན་པ།
འདུ་ཚོགས་ཀྱི་ལག་བསྟར་ཚན་པ་ཡིན་པའི་ཉིང་ཁྲིའི་བྲག་གསུམ་མཚོའི་ཕྱི་རོལ་ལུས་རྩལ་ཚད་ཡོད་ཀུང་སིའི་སྤྱི་ཁྱབ་ཅིང་ལི་ཧྲེན་ཞའོ་ཐིང་གིས་ངོ་སྤྲོད་བྱས་པར་གཞིགས་ན། ཐེངས་འདིའི་བྱེད་སྒོ་དེ་སྐབས་དང་པོ་དང་བསྡུར་ན་བཀྲག་མདངས་འཚེར་ས་བཞི་ཡོད་པ་སྟེ། གཅིག་ནི་རི་འཛེག་ཚོགས་ཆུང་མང་དུ་བཏང་ཞིང་། རི་འཛེག་པ་བརྒྱུད་སྤྱི་དམངས་ཚོར་བྲག་གསུམ་མཚོར་ཐུར་ལྟ་བྱེད་སའི་ལྗོངས་གཟིགས་སྟེགས་བུ་ཞིག་མཁོ་འདོན་བྱས་ཐུབ་པ་དང་། གཉིས་ནི་ཆེད་མཁས་པས་བགྲོ་གླེང་འདུ་ཚོགས་ཤིག་དམིགས་སུ་བཙུགས་ནས་ཆེད་མཁས་པའི་མཐོང་སྣང་ཐོག གནས་དེ་གའི་ཁྱད་ལྡན་ཡུལ་སྐོར་ལས་རིགས་མཉམ་གྲོས་བྱས་ཏེ་ལེགས་ལྡན་འཕེལ་རྒྱས་ལ་སྐུལ་འདེད་བཏང་རྒྱུ། གསུམ་ནི་པར་རིས་འགྲེམས་སྟོན་གྱིས་བྲག་གསུམ་མཚོ་དང་འབྲེལ་བ་ཡོད་པའི་སྤུས་ལེགས་བརྩམས་ཆོས་འགྲེམས་སྟོན་བྱས་ཏེ་ཡུལ་སྐོར་བ་ཚོའི་མིག་གི་ལོངས་སྤྱོད་དུ་བྱ་རྒྱུ། བཞི་ནི་འཕྱོ་སྐྱོད་དང་མཚོ་ཐོག་གྲུ་ཤིང་མྱོང་རོལ་སོགས་ཀྱི་བྱེད་སྒོ་ཚུད་པའི་མཚོ་ཐོག་རྣམ་གྲངས་མང་དུ་བཏང་ནས། ཡུལ་སྐོར་བ་ཚོས་མཚོ་ངོས་ཀྱི་མཛེས་ལྗོངས་དང་ཉེ་བཅར་ཐུབ་སྟེ་མཛེས་སྡུག་ལྡན་པའི་བྲག་གསུམ་མཚོ་དངོས་སུ་མྱོང་ཚོར་ཐུབ་པ་བྱ་རྒྱུ་བཅས་རེད།
