ཚེས4ཉིན། ནོར་སྲིད་པུའུ་སོགས་སྡེ་ཚན་མང་པོས་རྒྱལ་ཁབ་ཀྱི་སློབ་རོགས་དངུལ་བུན་གྱི་འབྲེལ་ཡོད་སྲིད་ཇུས་ལེགས་སྒྲིག་དང་འཐུས་ཚང་དུ་གཏོང་རྒྱུའི་སྐོར་གྱི་བརྡ་ཐོ་བཏང་ཡོད། ཁྱིམ་ཚང་གི་དཔལ་འབྱོར་ལ་དཀའ་ངལ་ཡོད་པའི་མཐོ་སློབ་ཀྱི་སློབ་མར་རྒྱབ་སྐྱོར་བྱེད་ཤུགས་སྔར་བས་ཆེ་རུ་གཏོང་རྒྱུ་དང་། སློབ་མའི་དངུལ་བུན་གཡར་བའི་དགོས་མཁོ་དེ་བས་ལེགས་པའི་ངང་སྐོང་རྒྱུ། སློབ་མའི་དཔལ་འབྱོར་གྱི་ཁུར་པོ་ཡང་དུ་གཏོང་རྒྱུ་བཅས་ཀྱི་ཆེད་དུ། རྒྱལ་ཁབ་ཀྱི་སློབ་རོགས་དངུལ་བུན་སྲིད་ཇུས་ཀྱི་འབྲེལ་ཡོད་དོན་ཚན་ལེགས་སྒྲིག་དང་འཐུས་ཚང་དུ་གཏོང་རྒྱུ་ཡིན་པ་རེད། བརྡ་ཐོའི་ཞིབ་ཕྲའི་ནང་དོན་ནི་གཤམ་གསལ་ལྟར་ཏེ།
རྒྱལ་ཁབ་ཀྱི་སློབ་རོགས་དངུལ་བུན་གྱི་གྲངས་བཅད་མཐོ་རུ་གཏོང་རྒྱུ།
2024ལོའི་སྟོན་དུས་ཀྱི་སློབ་སྐབས་ནས་བཟུང་། ཉིན་གང་ལམ་ལུགས་ཀྱི་སྤྱིར་བཏང་དངོས་གཞིའི་ཚན་ཁག་དང་ཆེད་སྦྱོང་ཚན་ཁག་གི་སློབ་མ（ཤེས་རམས་པའི་ཡོན་གནས་གཉིས་པ་ལེན་པའི་སློབ་མ་དང་། མཐོ་རིམ་ལས་རིགས་སློབ་གྲྭའི་སློབ་མ། མཐོ་སློབ་གྲ་སྒྲིག་འཛིན་གྲྭའི་སློབ་མ་བཅས་ཚུད་ཡོད། གཤམ་ལའང་དེ་མཚུངས་ཡིན） མི་རེས་སློབ་རོགས་དངུལ་བུན་རེ་ཞུ་བྱེད་པའི་གྲངས་བཅད་དེ་ལོ་རེར་སྒོར16000ལས་མི་བརྒལ་བ་ནས་སྒོར20000ལས་མི་བརྒལ་བའི་བར་མཐོ་རུ་གཏོང་རྒྱུ།
ཉིན་གང་ལམ་ལུགས་ཀྱི་ཞིབ་འཇུག་སློབ་མ་མི་རེས་སློབ་རོགས་དངུལ་བུན་རེ་ཞུ་བྱེད་པའི་གྲངས་བཅད་དེ་ལོ་རེར་སྒོར20000ལས་མི་བརྒལ་བ་ནས་སྒོར25000ལས་མི་བརྒལ་བའི་བར་མཐོ་རུ་གཏོང་རྒྱུ།
སློབ་མས་རེ་ཞུ་བྱེད་པའི་རྒྱལ་ཁབ་ཀྱི་སློབ་རོགས་དངུལ་བུན་དེ་སྔོན་ལ་སློབ་གྲྭར་སྡོད་རིང་གི་སློབ་ཡོན་དང་ཉལ་ཁང་གི་རིན་པ་སྤྲོད་པར་སྤྱོད་དགོས་པ་དང་། ལྷག་མ་རྣམས་སློབ་མའི་རྒྱུན་གཏན་གྱི་འཚོ་བའི་གྲོན་དངུལ་ཁ་གསབ་བྱེད་པའི་ཐད་སྤྱོད་ཆོག
རྒྱལ་ཁབ་ཀྱི་སློབ་རོགས་དངུལ་བུན་གྱི་གྲངས་བཅད་ལེགས་སྒྲིག་བྱས་རྗེས། དམག་སྐུལ་དང་ལེན་བྱེད་མཁན་མཐོ་རིམ་སློབ་གྲྭའི་སློབ་མའི་སློབ་ཡོན་ཁ་གསབ་དང་། སློབ་ཡོན་ཐད་སྤྱོད་པའི་རྒྱལ་ཁབ་ཀྱི་སློབ་རོགས་དངུལ་བུན་ཚབ་འཇལ་དང་སློབ་ཡོན་ཆག་ཡང་དང་རྩ་ཆག་གཏོང་བའི་ཚད་གཞི། དེ་བཞིན་གཞི་རིམ་དུ་ལས་ཞུགས་བྱེད་མཁན་གྱི་སློབ་ཡོན་ཁ་གསབ་དང་སློབ་ཡོན་ཐད་སྤྱོད་པའི་རྒྱལ་ཁབ་ཀྱི་སློབ་རོགས་དངུལ་བུན་གྱི་ཚབ་འཇལ་ཚད་གཞི་རྣམས་དངོས་གཞིའི་ཚན་ཁག་དང་ཆེད་སྦྱོང་ཚན་ཁག་གི་སློབ་མ་རེར་ལོ་རེར་མཐོ་ཤོས་སྒོར20000ལས་མི་བརྒལ་བ་དང་ཞིབ་འཇུག་སློབ་མ་རེར་ལོ་རེར་མཐོ་ཤོས་སྒོར25000ལས་མི་བརྒལ་བའི་གཏན་འབེབས་ལྟར་དེ་མཚུངས་སུ་ལེགས་སྒྲིག་བྱ་རྒྱུ།
རྒྱལ་ཁབ་ཀྱི་སློབ་རོགས་དངུལ་བུན་གྱི་སྐྱེད་ཚད་ལེགས་སྒྲིག་བྱ་རྒྱུ།
རྒྱལ་ཁབ་ཀྱི་སློབ་རོགས་དངུལ་བུན་གྱི་སྐྱེད་ཚད་དེ་དུས་མཚམས་གཅིག་པའི་རིམ་པ་གཅིག་མཚུངས་ཀྱི་དངུལ་གཡར་ཁྲོམ་རའི་གོང་ཚད་རྒྱག་པའི་སྐྱེད་ཚད（LPR）ལས་གཞི་གནས60དམའ་རུ་གཏོང་རྒྱུ་དེ་དུས་མཚམས་གཅིག་པའི་རིམ་པ་གཅིག་མཚུངས་ཀྱི་དངུལ་གཡར་ཁྲོམ་རའི་གོང་ཚད་རྒྱག་པའི་སྐྱེད་ཚདLPRལས་གཞི་གནས70དམའ་རུ་གཏོང་རྒྱུར་ལེགས་སྒྲིག་བྱ་རྒྱུ་རེད། དེའི་གོངLPRཡི་འཕར་ཆག་ངེས་མེད་སྐྱེད་ཚད་དཔྱད་གཞིར་བྱས་པའི་རྒྱལ་ཁབ་ཀྱི་སློབ་རོགས་དངུལ་བུན་གྱི་གན་རྒྱ་བཞག་པ་རྣམས་གཉེར་འགན་འཁུར་མཁན་དངུལ་ཁང་གིས་དངུལ་བུན་གཡར་མཁན་སློབ་མ་དང་གྲོས་མོལ་བྱས་ནས། དེ་སྔའི་གན་རྒྱའི་སྐྱེད་ཚད་དེ་དུས་མཚམས་གཅིག་པའི་རིམ་པ་གཅིག་མཚུངས་ཀྱིLPRལས་གཞི་གནས70དམའ་རུ་གཏོང་རྒྱུར་ལེགས་སྒྲིག་བྱེད་ཆོག
བརྡ་ཐོ་འདི་དཔར་འགྲེམ་བྱས་ཉིན་ནས་བཟུང་ལག་བསྟར་བྱ་རྒྱུ་དང་། དེའི་གོང་གི་གཏན་འབེབས་ནང་བརྡ་ཐོ་འདི་དང་གཅིག་མཐུན་མིན་པ་རྣམས་བརྡ་ཐོ་འདི་གཞིར་བཟུང་ནས་ལེགས་སྒྲིག་བྱེད་དགོས། བརྡ་ཐོ་འདིའི་ནང་གཏན་འབེབས་བྱས་མེད་པའི་ནང་དོན་ཁག་དེ་སྔའི་སྲིད་ཇུས་ལྟར་ལག་བསྟར་བྱ་རྒྱུ་ཡིན་ཞེས་འཁོད་ཡོད།
