ལྕགས་ལམ་སྡེ་ཚན་གྱིས་དྲ་ལམ་ཚོང་དོན་ལ་རོགས་འདེགས་ཧུར་ཐག་བྱས།
སྤེལ་དུས 2024-11-11
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཀྲུང་གོའི་བོད་ལྗོངས་དྲ་བའི་འཕྲིན། ཟླ11པའི་ཚེས8ཉིན་གསར་འགོད་པས་ཀྲུང་གོ་ལྕགས་ལམ་མཚོ་བོད་ཚོགས་པ་ཚད་ཡོད་ཀུང་སིའི་ལྷ་ས་འབབ་ཚུགས་ནས་ཤེས་རྟོགས་བྱས་པར། ཟླ11པའི་ཚེས1ཉིན་དུས་ཡུན་ཉིན20རིང་གི“བཅུ་གཅིག་ཟུང”གི་དྲ་ཐོག་ཉོ་སྒྲུབ་དུས་ཀྱི་ལྕགས་ལམ་མྱུར་འདྲེན་ཞབས་ཞུ་དངོས་སུ་སྤེལ་འགོ་ཚུགས། ཟླ11པའི་ཚེས3ཉིན་ནས་བཟུང་ལྷ་ས་མེ་འཁོར་འབབ་ཚུགས་ཀྱི་དངོས་ཟོག་ཐུམ་སྒྲིལ་གྱི་གྲངས་འབོར་རིམ་བཞིན་མང་དུ་ཕྱིན་ཡོད། “བཅུ་གཅིག་ཟུང”རིང་གི་དྲ་ཐོག་ཚོང་དོན་གྱི་རྫོགས་ལྡན་གཟའ་འཁོར་རིང་ལྕགས་ལམ་གྱི་མྱུར་སྐྱེལ་དངོས་ཟོག་མགྱོགས་མྱུར་སྐྱེལ་འདྲེན་ཐུབ་པ་འགན་ལེན་བྱ་ཆེད། ལྷ་ས་མེ་འཁོར་འབབ་ཚུགས་དང་ཀྲུང་གོ་ལྕགས་ལམ་མྱུར་འདྲེན་གྱི་ལྷ་ས་ཡན་ལག་ཀུང་སི། བོད་སྐྱོད་མེ་འཁོར་སོགས་དབར་འབྲེལ་བ་དམ་ཟབ་བྱས་ཏེ། སྐྱེལ་འདྲེན་གྱི་ཇུས་གཞི་ཞིབ་ཚགས་བཟོ་བ་དང་ལས་གནས་ཁག་གི་འགན་འཁྲིའི་ལས་བགོས་ཁ་གསལ་བཟོས་ནས་བདེ་འཇགས་འགན་ལེན་དང་། དངོས་ཟོག་དབོར་འདྲེན་དོ་དམ། རླངས་འཁོར་ནས་འབེབས་བླུགས་སོགས་ཀྱི་ལྷུ་ཚིགས་ཐད་ཤུགས་སྣོན་བརྒྱབ་ནས་དངོས་ཟོག་ཚང་མ་བདེ་འཇགས་དང་མགྱོགས་མྱུར་ངང་ཟོག་བདག་གི་ལག་ཏུ་འབྱོར་ཐུབ་པ་བྱ་རྒྱུ་རེད།
ཀྲུང་གོ་ལྕགས་ལམ་མྱུར་བགྲོད་སྐྱེལ་འདྲེན་གྱིས“བཅུ་གཅིག་ཟུང”དྲ་ཐོག་ཉོ་སྒྲུབ་ལ་ཞབས་འདེགས་ཞུ་བཞིན་པ།
མེ་འཁོར་འགན་གཙང་གི་སྐྱེལ་འདྲེན་བདེ་འཇགས་ཐད། ལྷ་སའི་མེ་འཁོར་འབབ་ཚུགས་ཀྱི་མེ་འཁོར་འགན་ལེན་ཚོགས་ཆུང་གིས་མེ་འཁོར་འགན་གཙང་གི་མེ་འཁོར་འབབ་ཚུགས་སུ་སྐྱོད་པར་འཕྲུལ་བཤེར་བྱེད་ཚད100%ཟིན་པ་དང་། ལས་ཀའི་ཉམས་མྱོང་ཕུན་སུམ་ཚོགས་པའི་བདེ་འཇགས་ཞིབ་བཤེར་མི་སྣ་བཀོད་སྒྲིག་བྱས་ནས་ལས་གནས་གཉིས་སུ་ལས་ཀ་བྱེད་དུ་བཅུག་པ་མ་ཟད། འཁོར་ཁང་གི་ལས་བྱེད་པས་ཀྱང་ཡུལ་དངོས་སུ་ལྟ་འདོམས་བྱེད་ཀྱི་ཡོད། དངོས་ཟོག་འདྲུད་བྱའི་འཁོར་ལོའི་བདག་སྐྱོང་ལ་ཤུགས་སྣོན་བརྒྱབ་ནས་ཉིན་རེར་འདྲུད་བྱའི་འཁོར་ལོ་དང་འདྲུད་འཁོར། གྲུ་ཐོག་གི་པང་ལེབ་སོགས་སྒྲིག་ཆས་ལ་རྩིས་སྤྲོད་རྩིས་ལེན་གྱི་ཞིབ་བཤེར་བྱེད་དགོས་པ་དང་། ཞིབ་བཤེར་བདག་སྐྱོང་གི་ཟིན་ཐོ་ཞིབ་ཕྲ་བྲིས་ནས་འདྲུད་བྱའི་འཁོར་ལོ་རྣམས་རྒྱུན་གཏན་ལྟར་བེད་སྤྱོད་ཐུབ་པ་བྱས་ཏེ་དངོས་ཟོག་འབབ་ཚུགས་ནས་འགྲོ་འོང་བྱེད་པར་སྟབས་བདེ་བསྐྲུན་དགོས།
གནད་འཁེལ་སྐྱེལ་འདྲེན་ནུས་པ་ཆེ་རུ་གཏོང་བའི་ཐད། “བཅུ་གཅིག་ཟུང”རིང་མེ་འཁོར་འབབ་ཚུགས་སུ་འབྱོར་བའི་དངོས་ཟོག་མང་དུ་ཕྱིན་པའི་དོན་དངོས་ལ་དམིགས་ཏེ། ལྷ་སའི་མེ་འཁོར་འབབ་ཚུགས་ཀྱི་འགན་ལེན་ཚོགས་ཆུང་གིས་རླངས་འཁོར་ནས་ཅ་ལག་འབེབས་མཁན་སྒྲིག་འཛུགས་བྱས་ཏེ་དངོས་ཟོག་དུས་ཐོག་ཏུ་འབྱོར་བ་དང་། སྒྲུག་པ། ལེན་པ་བཅས་ཀྱི་ལམ་ལུགས་ལག་བསྟར་བྱས་པ་རེད། སྐྱེལ་འདྲེན་གྱི་ཚད་གཞི་ནན་པོར་གཞིགས་ནས་དབོར་སྐབས་ཡིད་གཟབ་བྱེད་པ་དང་། ག་ལེར་ལེན་པ་དང་འཇོག་པ། དབོར་སྐབས་ངེས་པར་དུ་ལེགས་པར་འཇོག་པ་དང་། གོ་རིམ་ལྡན་པའི་ངང་ཞིབ་བཤེར། གཙོ་གནད་རྩིས་སྤྲོད་བཅས་བྱེད་དགོས་པའི་བླང་བྱ་བཏོན་ཡོད། མེ་འཁོར་འཁོར་སྐྱོད་ཀྱི་གནས་ཚུལ་གསལ་པོ་ཤེས་ཆེད། འགྲུལ་སྐྱེལ་འཁོར་ཁང་གིས་མེ་འཁོར་འབབ་ཚུགས་སུ་འབྱོར་བའི་མཐའ་སྣེའི་མ་ལག་ལ་བརྟེན་ནས་མེ་འཁོར་འབབ་ཚུགས་སུ་འབྱོར་བའི་གནས་ཚུལ་དང་ལམ་ཐིག་འགྱུར་བའི་ཆ་འཕྲིན་དུས་ཐོག་ཏུ་ཤེས་རྟོགས་བྱས་ཏེ་དངོས་ཟོག་ལམ་སེང་འབྱོར་བ་དང་། དབོར་བ། བླུག་པ། སྐྱེལ་འདྲེན་བཅས་བྱས་ནས་དུས་ཚོད་ཐུང་ཤོས་ནང་དབོར་ཐུབ་པ་བྱེད་ཀྱི་ཡོད།
ལྷ་ས་མེ་འཁོར་འབབ་ཚུགས་ཀྱི་ལས་དོན་པས་རྡོག་ཁྲེས་དབྱེ་འབྱེད་བྱེད་བཞིན་པ།
ཞབས་ཞུའི་སྤུས་ཚད་ལེགས་སུ་གཏོང་བའི་ཐད་བཟའ་བཅའ་དང་། ཞྭ་གོས་ལྷམ། ཡིག་ཆ། དངུལ་འཛིན། སྨན་རྫས་སོགས་རྒྱུན་མཐོང་གི་མྱུར་སྐྱེལ་དངོས་རྫས་ཕུད།“བཅུ་གཅིག་ཟུང”རིང་བོད་སྤོས་དང་། ཚགས་ཤ བོད་ཕག བོད་ལྗོངས་ཀྱི་བེ་ཤ་སོགས་བོད་ལྗོངས་ཀྱི་ཁྱད་ལྡན་ཐོན་རྫས་སྐྱེལ་འདྲེན་བྱེད་ཚད་ཀྱང་བྲིན་ཁ་རྒྱུག་པའི་ཚོང་ཟོག་ཏུ་གྱུར་ཡོད། དངོས་ཟོག་དུས་ཐོག་ཏུ་དབོར་ཐུབ་པའི་འགན་ལེན་བྱ་ཆེད། ལྷ་ས་ས་ཚིགས་ཀྱིས་ཧྲུན་ཧྥུང་དང་སྦྲག་སྲིད་སོགས་ས་གནས་དེ་གའི་མྱུར་སྐྱེལ་ཁེ་ལས་དང་འབྲེལ་གཏུག་མཉམ་ལས་བྱ་རྒྱུར་ཤུགས་སྣོན་བརྒྱབ་སྟེ། རྐང་འཛིན་མི་སྣ་བཀོད་སྒྲིག་དང་ཟོག་ཁུངས་སྒྲིག་འཛུགས་བྱེད་ཤུགས་ཆེ་རུ་བཏང་ནས་ནུས་ཤུགས་ཡོད་རྒུ་བཏོན་ཞིང་། ཁེ་ལས་ལ་སྡེབ་འབོར་སྐྱེལ་འདྲེན་ཞབས་ཞུ་མཁོ་འདོན་དང་སྐྱེལ་འདྲེན་གྱི་ཕྱོགས་གཉིས་ནས་བཀར་འཇུག་ཐད་གཏོང་ཐུབ་པ་བྱས་ཏེ། དངོས་ཟོག་འཁོར་རྒྱུག་གི་དུས་ཚོད་ཉུང་དུ་བཏང་ནས་གློག་རྡུལ་ཚོང་དོན་གྱི་དངོས་ཟོག་ཚང་མ་ཟོག་བདག་དང་ཚོང་ཤག་ལ་འཕྲལ་དུ་འབྱོར་ཐུབ་པའི་འགན་ལེན་བྱ་རྒྱུ་རེད།
