ཀྲུང་གོའི་བོད་ལྗོངས་དྲ་བའི་འཕྲིན། ལྷ་སའི་མེ་འཁོར་འབབ་ཚུགས་སུ་སྐད་གྲགས་མེད་ཀྱང་ལེགས་སྐྱེས་འབུལ་མཁན་གྱི་ཚོགས་པ་ཞིག་ཡོད། ཁོང་ཚོ་ནི་ལྕགས་ལམ་སྐྱེལ་འདྲེན་མ་ལག་ནང་གི་རྒྱབ་ཕྱོགས་ཀྱི་དཔའ་བོ་སྟེ། ལག་ཏུ་བརྡ་རྟགས་གློག་སྒྲོན་དང་དར་ཆ་ཐོགས་ནས་ལོ་འཁོར་མོར་འགྲོ་འོང་བྱེད་པའི་མེ་འཁོར་དུ་འཛུལ་ཏེ་ཚ་གདུག་དང་གྲང་ངར་ཁྱད་བསད་བྱེད་བཞིན་ཡོད། དཀའ་སྡུག་སྣ་ཚོགས་ཀྱི་ཉམས་སད་བརྒྱུད་རླུང་འཚུབ་དང་དྲག་ཆར། གྲང་ངར་དང་ཚ་གདུག་གང་ཞིག་ཡིན་ནའང་། ཁོང་ཚོ་དབྱར་དུས་སུ་རྔུལ་ཆུ་བཞུར་བ་དང་། ཆར་དུས་སུ་ལུས་ཡོངས་རློན་པར་གྱུར་པ། རླུང་ལྡང་དུས་ཐལ་རྡུལ་གྱིས་ཁེངས་པ། དགུན་དུས་སུ་ལུས་ཡོངས་བ་མོས་ཁེངས་ཀྱི་ཡོད་པས། ཁོང་ཚོ་ནི་མེ་འཁོར་སྟེང་མེད་དུ་མི་རུང་བའི་མེ་འཁོར་བཀོད་གཏོང་ཚོགས་ཆུང་རེད།
མེ་འཁོར་ས་ཚིགས་ཀྱི་ལས་རེས་པས་མེ་འཁོར་བཀོད་གཏོང་དཔོན་ལ་བཀོད་གཏོང་གི་འཆར་གཞི་བརྒྱུད་བསྒྲགས་བྱེད་བཞིན་པ།
མེ་འཁོར་བཀོད་གཏོང་ཚོགས་ཆུང་གི་ལས་ཀ་དཀའ་ཚེགས་ཧ་ཅང་ཆེ་ཞིང་། ཚ་བ་ཆེ་བའི་གནམ་གཤིས་ཡིན་ནའང་འདྲ། གྲང་ཟུག་ཆེ་བའི་གནམ་གཤིས་ཡིན་ནའང་འདྲ། ཚང་མ་མཐོངས་ཡངས་ཁོར་ཡུག་ཏུ་ཡར་འཛེགས་མར་བབས་བྱེད་དགོས་པ་དང་། ལྕགས་ཀྱུ་འཐེན་པ། ལྕགས་ཀྱུ་རྒྱག་པ་སོགས་ཀྱི་ལས་ཀ་བྱེད་དགོས་ཀྱི་ཡོད། གནས་འདིའི་དྲོད་ཚད་དམའ་བ་དང་གསོ་རླུང་མི་འདང་བའི་དབང་གིས་འགུལ་སྐྱོད་རེ་རེ་ནི་བདེ་ཐང་ས་ཁུལ་ལས་མང་བའི་ལུས་ཤུགས་ཟད་གྲོན་ཡོད། ཀན་སུའུ་ནས་ཡོང་བའི་མེ་འཁོར་གཏོང་མཁན་ལིའུ་ཞུའེ་ཀུའེ་ཡིས“ས་མཐོར་ལས་ཀ་བྱེད་པ་ནི་དངོས་གནས་ལས་སླ་པོ་ཞིག་མིན། འོན་ཀྱང་ང་ཚོའི་ལས་ཀ་དེས་མེ་འཁོར་གྱི་དུས་ཚོད་གནད་ལ་འཁེལ་བ་དང་བདེ་འཇགས་དང་འབྲེལ་བ་ཡོད་པ་སོགས་བསམ་བློར་འཁོར་སྐབས་སེམས་ཤུགས་ཆེན་པོ་སྐྱེས་ཀྱི་འདུག”ཅེས་བཤད།
ལྷ་ས་ནས་ཉིང་ཁྲིའི་བར་གྱི་ལྕགས་ལམ་ཤར་གཏོང་ཐུབ་རྗེས། རྙོག་འཛིང་ཆེ་བའི་ས་དབྱིབས་དང་དཀའ་ཚེགས་ཆེ་བའི་མེ་འཁོར་བཀོད་གཏོང་གི་ལས་དོན་སྤེལ་སྐབས་ཀྱི་སྐྱེལ་འདྲེན་ཐོན་སྐྱེད་ཀྱི་དགོས་མཁོ་དང་འཚམ་ཆེད། ལྷ་སའི་མེ་འཁོར་འབབ་ཚུགས་ཀྱིས་འཁོར་སྐྱོད་རླངས་འཁོར་བཀོད་གཏོང་གི་ལས་དོན་སྤེལ་ནས་ལས་འགན་གྱི་གལ་ཆེ་ཆུང་དང་དལ་བྲེལ་ལ་གཞིགས་ཏེ་གང་དུ་དགོས་མཁོ་ཡོད་ན་དེར་སྐྱོད་ཀྱི་ཡོད། མེ་འཁོར་བཀོད་གཏོང་ཚོགས་ཆུང་གི་མི་སྣས་རྒྱུན་ཆད་མེད་པར་རང་གི་ལས་བྱའི་རྩལ་ནུས་མཐོར་འདེགས་གཏོང་བཞིན་ཡོད། ཁོང་ཚོས་ས་བབ་མཐོ་བའི་ས་ཁུལ་དུ་མེ་འཁོར་བཀོད་གཏོང་གི་དམིགས་བསལ་སྒྲིག་སྲོལ་སློབ་སྦྱོང་གཏིང་ཟབ་བྱས་ཏེ་རིགས་པའི་གཞུང་ལུགས་སློབ་སྦྱོང་དང་ལད་ཟློས་ནང་སྦྱོང་བྱས་པ་བརྒྱུད་གཟར་ཚད་མི་འདྲ་བ་དང་འཁྱོག་ལམ་མི་འདྲ་བའི་འོག་མེ་འཁོར་བཀོད་གཏོང་གི་རྩལ་ནུས་རྒྱུས་མངའ་ལོན་པ་བྱས་པ་རེད། དོན་དངོས་ཀྱི་བྱ་བའི་ཁྲོད། ཁོ་ཚོས་ཧ་ཅང་ནན་ཏན་དང་ཉམས་མྱོང་ཕུན་སུམ་ཚོགས་པའི་སྒོ་ནས་མེ་འཁོར་བཀོལ་སྤྱོད་བྱེད་ཀྱི་ཡོད། ཁོང་ཚོས་ད་དུང་ས་བབ་མཐོ་བའི་ས་ཁུལ་དུ་ཐོན་སྲིད་པའི་ཐོལ་བྱུང་གནས་ཚུལ་དཔེར་ན། གངས་ལྷགས་དང་འདམ་རྡོའི་ཆུ་རུད་སོགས་རང་བྱུང་གནོད་འཚེར་དམིགས་ནས་འཕྲལ་སྡོམ་སྔོན་ཇུས་ཞིབ་ཕྲ་བཟོས་པ་རེད། དུས་བཀག་ལྟར་འཕྲལ་བསྟུན་ནང་སྦྱོང་བྱས་ནས་ཛ་དྲག་ཆེ་བའི་གནས་ཚུལ་འོག་གི་འགྱུར་འབྱུང་མྱུར་ཚད་དང་ཐག་གཅོད་བྱེད་ནུས་ཆེ་རུ་གཏོང་པ་རེད། ནང་སྦྱོང་བྱེད་རིང་། བཀོད་གཏོང་ཚོགས་ཆུང་གི་མི་སྣས་འཁོར་རིགས་འཁོར་ལམ་ལས་བྲལ་བ་དང་བརྡ་རྟགས་ལ་སྐྱོན་ཤོར་བ་སོགས་ཀྱི་གནས་ཚུལ་ལད་ཟློས་བྱས་ནས་རོགས་སྐྱོབ་སྒྲིག་ཆས་བེད་སྤྱོད་བྱེད་སྟངས་བྱང་ཆུབ་པ་དང་གཞོགས་འདེགས་ཀྱིས་དམག་འཐབ་བྱེད་པའི་ནུས་པ་ཆེ་རུ་གཏོང་གི་ཡོད།
མེ་འཁོར་བཀོད་གཏོང་དཔོན་དང་མེ་འཁོར་བཀོད་གཏོང་ཁ་ལོ་བས་གློག་གསལ་མིན་ཚོད་ལྟ་བྱེད་བཞིན་པ།
བྱང་ཤར་ནས་ཡོང་བའི་མེ་འཁོར་བཀོད་གཏོང་དཔོན་ཀྲང་ཞུའེ་ཧྥུང་གིས“ས་མཐོར་མཁའ་རླུང་ཧ་ཅང་ཉུང་པས་དེ་ནི་མི་མངོན་པའི་དགྲ་བོ་དང་འདྲ་བ་དང་། དབུགས་རྔུབ་གཏོང་དཀའ་བ་དེ་ནི་ང་ཚོ་མེ་འཁོར་བཀོད་གཏོང་ཚོགས་ཆུང་གི་ལས་ཀའི་ངོས་ནས་བརྗོད་ན་འགྲན་སློང་ཆེན་པོ་ཞིག་རེད”ཅེས་བཤད། ས་མཐོའི་ཁོར་ཡུག་དང་སྔ་ཙམ་འཕྲོད་པར་བྱ་ཆེད། ཁོང་ཚོས་གཟུགས་པོར་མི་འཕྲོད་པར་བཟོད་བསྲན་བྱས་ནས་རང་ངོས་ཀྱི་གནས་བབ་ལེགས་སྒྲིག་གང་ཐུབ་བྱེད་ཀྱི་ཡོད། གོམ་པ་དལ་མོའི་ངང་སྤོ་འགོ་བཙུགས་ཏེ་རིམ་བཞིན་ལུས་སྦྱོང་བྱེད་ཚད་མང་དུ་བཏང་ནས་ས་མཐོ་མི་འཕྲོད་པ་ལས་བྱུང་བའི་འགལ་རྐྱེན་རིམ་བཞིན་ཁྱད་བསད་བྱེད་ཀྱི་ཡོད།
དགུན་དུས་ཀྱི་མེ་འཁོར་བརྗེ་བའི་ལས་ཀའི་ཁྲོད་འགྲན་སློང་ཆེ་ཤོས་ཤིག་ནི་སྒྲིག་ཆས་སྤྱོད་མི་ཐུབ་པ་དེ་རེད། གྲང་ངར་ཆེ་བའི་མཁའ་རླུང་གིས་འཁོར་རིགས་ཀྱི་བཀག་གཏོང་སྒྲིག་ཆས་དང་འབྲེལ་མཐུད་ལྷུ་ལག་སོགས་གངས་འཁྱགས་ཀྱིས་བསྡམས་ཀྱི་ཡོད། མེ་འཁོར་བཀོད་གཏོང་ཚོགས་ཆུང་གི་ལས་དོན་མི་སྣས་དུས་ཚོད་མང་པོ་སྤྱད་དེ་གངས་འཁྱགས་གཙང་སེལ་བྱས་ནས་སྒྲིག་ཆས་རྒྱུན་གཏན་ལྟར་འཁོར་སྐྱོད་ཐུབ་པ་བྱེད་ཀྱི་ཡོད།
མེ་འཁོར་བཀོད་གཏོང་དཔོན་གྱིས་འབྲེལ་མཐུད་བྱེད་མཁན་གྱི་མི་སྣར་འཆར་གཞི་བརྒྱུད་བསྒྲགས་བྱེད་བཞིན་པ།
ཟི་ལིང་ནས་ཡིན་པའི་མེ་འཁོར་བཀོད་གཏོང་དཔོན་སུང་གོ་ཐིང་གིས་བཞད་གད་ཀྱི་སྒོ་ནས“དགུན་དུས་ཁ་བ་འབབ་སྐབས་རྫི་མ་དཀར་པོ་དཀར་རྐྱང་ལ་གྱུར་བ་དང་། དབུགས་གཏོང་ཐེངས་རེར་ཁ་རླངས་དཀར་པོ་འཕྱུར་གྱི་ཡོད”ཅེས་བཤད། ཁོང་ཚོས་མེ་འཁོར་བཀོད་གཏོང་གི་ལྭ་བ་གྱོན་པ་དང་། སྐེད་པར་ཉེན་སྲུང་སྒྲོག་ཐག་བཅིངས་པ། ལག་ཏུ་སྐུད་མེད་ལག་སྒུལ་མཚེ་འཕྲིན་ཁྱེར་ནས་འཆར་གཞི་དང་ལེན་དང་། མེ་འཁོར་ཞིབ་བཤེར། གློག་སྒོ་བཀག་འགོག ལྕགས་ལྷམ་ཕྱིར་འཐེན། སྐུད་མེད་མེ་འཁོར་བཀོད་གཏོང་བཅས་ཚད་ལྡན་ཅན་གྱི་རྣམ་པ་མངོན། བརྡ་རྟགས་གློག་སྒྲོན་འོག་ཁོང་ཚོའི་གཟུགས་བརྙན་ལྕགས་ལམ་གྱི་ཐོག་ཕར་འགྲོ་ཚུར་འོང་བྱེད་པ་དང་། སྐད་གསང་མཐོན་པོའི་བཀའ་བརྡ་དེ་གྲང་ངར་ཆེ་བའི་མཚན་མོའི་མཁའ་དབྱིངས་སུ་གྲགས། གྲང་རླུང་ལྡང་ནས་གདོང་སྐྲངས་སྦོས་ཐེབས་པ་དང་རྐང་ལག་འཁྱགས་ནས་སྦྲིད་ནའང་ཁོང་ཚོས་སྔར་བཞིན་མེ་འཁོར་གཏོང་བའི་ལས་འགན་ཚང་མ་བསྒྲུབས་ནས་མེ་འཁོར་རེ་རེ་བཞིན་བདེ་འཇགས་ངང་ཐག་རིང་དུ་བསྐྱོད་རྒྱུའི་འགན་ལེན་བྱེད་ཀྱི་ཡོད།
ཁོང་ཚོ་ནི་ལྕགས་ལམ་ལས་གཉེར་བ་ཕལ་བ་ཞིག་ཡིན་མོད། འོན་ཀྱང་ཁོང་ཚོའི་བྱ་གཞག་ནི་རླབས་ཆེན་ཞིག་རེད། ཁོང་ཚོའི་ནུས་ཤུགས་ཀྱིས་ས་མཐོའི་ལྕགས་ལམ་ཤར་གཏོང་ལ་འགན་ལེན་དང་འགྲུལ་པ་བདེ་འཇགས་ངང་ཕྱིར་སྐྱོད་དང་དངོས་ཟོག་དུས་ཐོག་ཏུ་སྐྱེལ་འདྲེན་འགན་ལེན་བྱས་པ་རེད། ཁོང་ཚོའི་སྙིང་སྟོབས་ནི་ས་མཐོའི་ཐོག་ནམ་ཡང་མི་ནུབ་པའི་ལམ་སྟོན་སྒྲོན་མེ་དང་འདྲ་བར་ལྕགས་ལམ་སྐྱེལ་འདྲེན་གྱི་མདུན་སྐྱོད་ལམ་བུ་གསལ་བར་བྱེད་པ་དང་མི་དེ་བས་མང་བས་ལྕགས་ལམ་བྱ་གཞག་འཕེལ་རྒྱས་ཆེད་འབད་འཐབ་ཧུར་ཐག་བྱེད་པར་སྐུལ་ལྕག་གཏོང་བཞིན་ཡོད།
