ལུས་རྩལ་འགྲན་ཚོགས་འདིའི་བྱ་དགའ་ཐོག་མ་ཀུའེ་ཀྲོའུ་ཡིས་བླངས་འདུག
སྤེལ་དུས 2024-11-25
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཀྲུང་གོའི་བོད་ལྗོངས་དྲ་བའི་འཕྲིན། ཟླ11པའི་ཚེས23ཉིན། སྐབས་བཅུ་གཉིས་པའི་རྒྱལ་ཡོངས་ཀྱི་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས（གཤམ་ལ་ལུས་རྩལ་འགྲན་ཚོགས་ཞེས་བསྡུ་རྒྱུ）འགོ་ཚུགས་མཛད་སྒོའི་རྗེས་ཀྱི་བྱ་དགའ་དང་པོ་དེ་གྲུ་གཟིངས་འབྲུག་མགོ་མའི་རྣམ་གྲངས་ཁྲོད་ཐོན་པ་དང་། གཟི་བརྗིད་མཚན་སྙན་དེ་ཀུའེ་ཀྲོའུ་རུ་ཁག་གིས་བླངས། མགྲོན་བདག་ཡིན་པའི་ཧའེ་ནན་རུ་ཁག་གིས་ཀྱང་རྣམ་གྲངས་དེའི་ཁྲོད་ནས་བྱ་དགའ་ཨང་དང་པོ་ཞིག་ཐོབ་སྟེ་སྐབས་འདིའི་ལུས་རྩལ་འགྲན་ཚོགས་ལ་འགོ་ཡག་པོ་ཞིག་བཙུགས་ཡོད།
གྲུ་གཟིངས་འབྲུག་མགོ་མའི་འགྲན་བསྡུར་བྱེད་བཞིན་པ།
དེ་ཉིན་གྲུ་གཟིངས་འབྲུག་མགོ་མའི་རྣམ་གྲངས་ཁྲོད་བྱ་དགའ་ཨང་དང་པོ6ཐོབ་པ་དང་། སྟོབས་ཤུགས་ཆེ་བའི་ཀུའེ་ཀྲོའུ་རུ་ཁག་ལ་སྨི1000གི་ཚད་ལྡན་གྲུ་གཟིངས་འབྲུག་མགོ་མའི་སྐྱེས་པ་དང་སྨི1000གི་གྲུ་གཟིངས་འབྲུག་མགོ་མ་ཆུང་བའི་སྐྱེས་པ་དང་། བུད་མེད། སྐྱེས་པ་དང་བུད་མེད་མཉམ་བསྲེས་ཚོགས་ཆུང་བཅས་ཀྱི་ཨང་དང་པོ4ཐོབ་ཡོད། མགྲོན་བདག་ཡིན་པའི་ཧའེ་ནན་རུ་ཁག་ལ་སྨི1000གི་ཚད་ལྡན་གྲུ་གཟིངས་འབྲུག་མགོ་མའི་བུད་མེད་ཚོགས་ཆུང་གི་ཨང་དང་པོ་ཐོབ་པ་དེ་ནི་ཧའེ་ནན་རུ་ཁག་གིས་ལུས་རྩལ་འགྲན་ཚོགས་ཀྱི་གྲུ་གཟིངས་འབྲུག་མགོ་མའི་རྣམ་གྲངས་ཁྲོད་ཐོབ་པའི་བྱ་དགའ་ཨང་དང་པོ་ཐོག་མ་དེ་རེད། སྨི1000གི་ཚད་ལྡན་གྲུ་གཟིངས་འབྲུག་མགོ་མའི་སྐྱེས་པ་དང་བུད་མེད་ཀྱི་མཉམ་བསྲེས་ཚོགས་ཆུང་གི་ཨང་དང་པོ་དེ་ཀོང་ཏུང་རུ་ཁག་ལ་ཐོབ་པ་རེད།
སྐབས་འདིའི་གྲུ་གཟིངས་འབྲུག་མགོ་མའི་རྣམ་གྲངས་དེ་ཧའེ་ནན་ཞིང་ཆེན་སན་ཡ་གྲོང་ཁྱེར་སན་ཡ་གཙང་པོར་གཉེར་ཡོད་ལ། ཕྱི་རོལ་གྱི་རྣམ་གྲངས་ལ་རང་བྱུང་ཆ་རྐྱེན་གྱི་ཤུགས་རྐྱེན་ཐེབས་སླ་མོ་ཡོད། སན་ཡ་གཙང་པོ་ནི་ཚྭ་ཆུ་དང་ཚྭ་མེད་ཆུའི་འདྲེས་མཚམས་སུ་ཆགས་པ་དང་། ཆུ་ལམ་དང་རྒྱ་མཚོའི་འདྲེས་མཚམས་སུ་མཚོ་རླབས་ཀྱི་ཤུགས་རྐྱེན་ཐེབས་པས་ཆུ་གནས་ལ་འགྱུར་ལྡོག་ཆེན་པོ་ཡོད། འོན་ཀྱང་གྲུ་གཟིངས་འབྲུག་མགོ་མའི་འགྲན་བསྡུར་གྱི་ཉིན་དང་པོར་བུད་མེད་ཀྱི་ཚད་ལྡན་གྲུ་གཟིངས་འབྲུག་མགོ་མའི་སྨི1000གི་གྲ་སྒྲིག་འགྲན་བསྡུར་བྱེད་འགོ་ཚུགས་མ་ཐག་འགྲན་རར་ལྷགས་པ་ཆེན་པོ་བརྒྱབ་པ་དང་། ལྷགས་པ་ཆེན་པོའི་ཤུགས་རྐྱེན་འོག་ཡུན་ནན་རུ་ཁག་གི་གྲུ་གཟིངས་འབྲུག་མགོ་མ་གྲུ་ལམ་ནས་བྲལ་ཏེ་གཡོན་ངོས་ཀྱི་འགྲན་ལམ་དུ་ཤོར་བས། འགྲན་ལམ་དེའི་ཧོ་ནན་རུ་ཁག་དང་ཉེ་འགྲམ་གྱི་ཧུའུ་ནན་རུ་ཁག་གི་གྲུ་གཟིངས་གཉིས་ཅུང་ཟད་རྡུང་ཡོད། ཐོལ་བྱུང་གནས་ཚུལ་འདི་ཐག་གཅོད་བྱས་རྗེས་སྐར་མ་བཅུ་ལྷག་ཙམ་གྱི་རྗེས་སུ་སླར་ཡང་འགྲན་བསྡུར་བྱེད་འགོ་ཚུགས་ཡོད།
ངོ་སྤྲོད་བྱས་པར་གཞིགས་ན། ཀུའེ་ཀྲོའུ་རུ་ཁག་དང་། ཀོང་ཏུང་རུ་ཁག ཧྥུ་ཅན་རུ་ཁག་བཅས་ནི་གྲུ་གཟིངས་འབྲུག་མགོ་མའི་རྣམ་གྲངས་ཀྱི་རུ་ཁག་སྟོབས་ཆེན་དག་ཡིན་ཞིང་། དེའི་ནང་ཀུའེ་ཀྲོའུ་རུ་ཁག་ལ་སྐབས་གོང་མའི་ལུས་རྩལ་འགྲན་ཚོགས་ཐོག་རྣམ་གྲངས་དེའི་བྱ་དགའ་ཨང་དང་པོ3ཐོབ་པ་དང་། ད་ལོ་ཀུའེ་ཀྲོའུ་རུ་ཁག་ནང་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་སྐྱེས་པའི་གྲུ་གཟིངས་འབྲུག་མགོ་མའི་འགྲན་བསྡུར་ཁྲོད་ཀྲུང་གོའི་རུ་ཁག་ལ་གསེར་གྱི་རྟགས་མ2དང་དངུལ་གྱི་རྟགས་མ1བླངས་རོགས་བྱེད་མཁན་གྱི་འགྲན་ཞུགས་པ་ཝང་ལེང་དང་། དབྱང་ཧའེ་ལུའེ། ཧྥེང་ཁྲའོ་ཁྲའོ་བཅས་ཡོད་པ་མ་ཟད། འཛམ་གླིང་ལེགས་སྐྱེས་འགྲན་བསྡུར་དང་། འཛམ་གླིང་བུམ་པ། ཨེ་ཤེ་ཡའི་ལེགས་སྐྱེས་འགྲན་བསྡུར་སོགས་རྒྱལ་སྤྱིའི་འགྲན་བསྡུར་ནང་ཞུགས་མྱོང་བའི་ཡོན་ཐའོ་སོགས་ཀྱང་ཡོད་པས་ཁོང་ཚོའི་རུ་ཁག་ལ་མི་རྣམས་ཀྱིས་དོ་སྣང་ཆེན་པོ་བྱེད་ཀྱི་ཡོད། སྐབས་གོང་མའི་ལུས་རྩལ་འགྲན་ཚོགས་ཀྱི་གྲུ་གཟིངས་འབྲུག་མགོ་མའི་འགྲན་བསྡུར་གྱི་ཡན་ལག་རྣམ་གྲངས18ཁྲོད་བྱ་དགའ་ཨང་གཉིས་པ4དང་བྱ་དགའ་ཨང་གསུམ་པ8ཐོབ་པའི་ཧའེ་ནན་རུ་ཁག་གིས་ད་ལོ་ཆེད་ལས་བུད་མེད་འགྲན་ཞུགས་པ་ཁག་གཅིག་བསྡུས་ཡོད་པས་དངོས་ཤུགས་ལ་སྣང་ཆུང་བྱེད་མི་རུང་བ་ཞིག་ཡོད།
སྨི1000གི་ཚད་ལྡན་གྲུ་གཟིངས་འབྲུག་མགོ་མའི་སྐྱེས་པའི་ཚོགས་ཆུང་གི་བྱ་དགའ་སྤྲོད་པའི་མཛད་སྒོ།
