ཨུ་རུ་སུའི་དམག་དཔུང་གི་དམག་སྤྱི་ཞིག་མོ་སི་ཁོའི་གྲོང་མིའི་ཐོག་ཁང་གི་འབར་གས་ཁྲོད་རྐྱེན་ལམ་དུ་ཤོར་ཡོད་ཅིང་། གཞུང་ཕྱོགས་ཀྱིས་དེའི་ངོ་བོ་འཇིགས་སྐུལ་འཇབ་རྒོལ་ཡིན་པར་གཏན་འཁེལ་བྱས།
ཚེས17ཉིན། ཨུ་རུ་སུའི་རྒྱལ་ཕྲན་མཉམ་འབྲེལ་མྱུལ་ཞིབ་ཨུ་ལྷན་གྱིས་སྤྱི་ཚོགས་འབྲེལ་བའི་སྨྱན་སྦྱོར་ཐོག་གནས་ཚུལ་སྤེལ་ནས། ཨུ་རུ་སུའི་དྲག་ཆས་སྟོབས་ཤུགས་ཁྱབ་འགྱེད་དང་། རྫས་འགྱུར། སྐྱེ་དངོས་འགོག་སྲུང་དཔུང་སྡེའི་དམག་སྤྱི་དང་ཀྲུང་ཅང་དམག་དཔོན་ཅི་ལི་ལུའོ་ཧྥུའུ་མོ་སི་ཁོའི་གྲོང་མིའི་ཐོག་ཁང་གི་འབར་གས་ཁྲོད་རྐྱེན་ལམ་དུ་ཤོར་ཡོད་ཅེས་བརྗོད།
2024ལོའི་ཟླ12པའི་ཚེས17ཉིན། ཨུ་རུ་སུའི་རྒྱལ་ས་མོ་སི་ཁོའི་གྲོང་མིའི་ཐོག་ཁང་གི་འབར་གས་བྱ་ཡུལ་དུ་ལས་དོན་པས་བརྟག་དཔྱད་བྱེད་བཞིན་པ།
2024ལོའི་ཟླ12པའི་ཚེས17ཉིན། ཨུ་རུ་སུའི་རྒྱལ་ས་མོ་སི་ཁོའི་བཀག་སྡོམ་བྱས་པའི་འབར་གས་ཐོན་ཡུལ་གྱི་གྲོང་མིའི་ཐོག་ཁང་།
གནས་ཚུལ་སྤེལ་བར་གཞིགས་ན། འདྲེད་པང་ཐོག་བཞག་པའི་འབར་གས་དངོས་པོ་ལས་འབར་གས་ཐོན་པ་ཡིན་ལ། ཅི་ལི་ལུའོ་ཧྥུའུ་ཡི་ལས་རོགས་ཤིག་ཀྱང་འབར་གས་ཁྲོད་རྐྱེན་ལམ་དུ་ཤོར་ཡོད། ཨུ་རུ་སུའི་རྒྱལ་ཕྲན་མཉམ་འབྲེལ་མྱུལ་ཞིབ་ཨུ་ལྷན་གྱིས་འབར་གས་དེ་ཉེས་དོན་གྱོད་ཁོངས་སུ་བཅུག་པ་དང་འབྲེལ། དོན་རྐྱེན་དེའི་ངོ་བོ་འཇིགས་སྐུལ་འཇབ་རྒོལ་ཡིན་པར་གཏན་འཁེལ་བྱས།
ཅི་ལི་ལུའོ་ཧྥུའུ་མ་ཤི་གོང་གི་ཚེས16ཉིན་ཡུག་རེན་བདེ་འཇགས་ཅུས་ཀྱིས་ཅི་ལི་ལུའོ་ཧྥུའུ་ལ་ཡུག་རེན་གྱི་ས་ཁོངས་སུ་བཀག་སྡོམ་ལས་འགལ་བའི་རྫས་འགྱུར་མཚོན་ཆ་གཞི་ཁྱོན་ཆེན་པོས་སྤྱོད་པའི་དོགས་པ་ཡོད་པའི་སྐྱོན་འདོན་ཞུ་གཏུག་བྱས་པ་དང་འབྲེལ། ཁོར་དམག་འཁྲུག་གི་ཉེས་པ་བསགས་ཡོད་ཅེས་བརྗོད། གཞན་ཡང་ཧྥ་རན་སེ་གསར་འགྱུར་ཁང་གིས་ཡུག་རེན་བདེ་འཇགས་ཅུས་ཀྱི་ནང་ཁུལ་མི་སྣའི་ཆ་འཕྲིན་དྲངས་ནས་གནས་ཚུལ་སྤེལ་བར་གཞིགས་ན། ཅི་ལི་ལུའོ་ཧྥུའུ་ཤི་བ་དེ་ནི་ཡུག་རེན་བདེ་འཇགས་ཅུས་ཀྱིས་ལག་ལེན་བསྟར་བའི“དམིགས་བསལ་གྱི་བྱ་སྤྱོད”ཅིག་རེད།
ཨུ་རུ་སུའི་ཕྱི་འབྲེལ་པུའི་མགྲིན་ཚབ་པ་ཀྲ་ཧཱ་ལུའོ་ཝ་ཡིས་སྤྱི་ཚོགས་འབྲེལ་བའི་སྨྱན་སྦྱོར་ཐོག ཅི་ལི་ལུའོ་ཧྥུའུ་འཚོ་བཞུགས་སྐབས་ཨ་རིས་ཡུག་རེན་དུ་སྤེལ་བའི་སྐྱེ་དངོས་ཚོད་ལྟ་ཁང་གི་བྱེད་སྒོ་རབ་དང་རིམ་པ་ཐེར་འདོན་བྱེད་པ་སོགས་ལ་གཞོལ་ཡོད་ཅེས་བརྗོད།
ཨུ་རུ་སུའི་རྒྱལ་ཁབ་ཀྱི་གྲོས་ཚོགས（གྲོས་ཚོགས་འོག་མ）ཀྱི་རྒྱལ་སྲུང་ཨུ་ལྷན་གྱི་ཀྲུའུ་ཞི་ཁའར་ཐཱ་པོ་ལུའོ་ཧྥུའུ་ཡིས། ཉེས་གསོག་པ་གང་དུ་གནས་ཀྱང་འཚོལ་ཐུབ་རྒྱུ་མ་ཟད་བཅའ་ཁྲིམས་ཀྱི་ཆད་པ་ཕོག་རྒྱུ་རེད་ཅེས་བརྗོད།
རྩོམ་སྒྲིག་པ། མང་ག་མཚོ།
