“ཚེ་གང་བོ་མེས་རྒྱལ་གྱི་མཐའ་མཚམས་སྲུང་བའི་ལས་ལ་གཞོལ་རྒྱུ་ཡིན”ཅེས་པའི་ཡིག་འབྲུ་དེ་དག་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་ཁང་དམར་རྫོང་སྟག་པ་གྲོང་ཚོའི་རི་ལྡེབས་སུ་མངོན་གསལ་དོད་ཅིང་། དེ་ནི་ཉིང་རུ་མཐའ་མཚམས་མངགས་གཏོང་ཁང་གི་མཐའ་སྲུང་མི་དམངས་ཉེན་རྟོག་པ་ཡོངས་ཀྱི་སེམས་གཏིང་གི་སྐད་ཆ་ཞིག་རེད་ལ། མཐའ་སྲུང་བ་ཚང་མའི་བརྗིད་ཉམས་ལྡན་པའི་དམ་བཅའ་ཞིག་ཀྱང་རེད།
བོད་ལྗོངས་མཐའ་མཚམས་སྤྱི་ཁྱབ་ཞིབ་བཤེར་ས་ཚིགས་ཉིང་རུ་མཐའ་མཚམས་མངགས་གཏོང་ཁང་གི་ཁོངས་སུ་གནས་པའི་སྟག་པ་གྲོང་ཚོར་ས་བབ་མཐོ་ཚད་རྒྱ་མཚོའི་ངོས་ལས་སྨི5109ཡོད་ཅིང་། དེ་ནི་ཁོངས་གཏོགས་ཁུལ་གྱི་མངགས་གཏོང་ཁང་དང་བར་ཐག་རིང་ཤོས་ཀྱི་གྲོང་ཚོ་ཞིག་རེད། དེ་གར་དགུན་དུས་ལྷགས་པ་ཆེ་བ་དང་གངས་ཆེན་པོ་འབབ་ཀྱི་ཡོད་ལ། དྲོད་ཚད་དམའ་ཤོས-20℃ཙམ་ཟིན་གྱི་ཡོད།
ཉིང་རུ་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས“ཚེ་གང་བོ་མེས་རྒྱལ་གྱི་མཐའ་མཚམས་སྲུང་བའི་ལས་ལ་གཞོལ་རྒྱུ་ཡིན”ཞེས་པའི་ཡི་གེ་དང་མཉམ་པར་རྒྱག་བཞིན་པ།
ཉེན་རྟོག་པའི་རླངས་འཁོར་མངགས་གཏོང་ཁང་ནས་དལ་བུར་ཐོན་ཏེ་རི་ལམ་ཀྱག་ཀྱོག་བརྒྱུད་མུ་མཐུད་མདུན་ཕྱོགས་སུ་སྐྱོད་བཞིན་མཆིས། ལམ་གཡས་གཡོན་དུ་མཐོ་ཞིང་བརྗིད་ཆགས་པའི་གངས་རི་དང་རི་མཐོ་གཡང་གཟར་ཡོད་ལ། འཁོར་འོག་གི་ས་རྡོའི་ལམ་ཀྱག་ཀྱོག་ཆེ་ཞིང་ཁོད་སྙོམས་པོ་མེད་པས་རླངས་འཁོར་འཁྲུག་ཆེ་བའི་ལམ་བུའི་ཐོག་དཀའ་ཚེགས་ཆེན་པོས་མདུན་སྐྱོད་བྱེད་དགོས་ཀྱི་ཡོད། རླངས་འཁོར་ནང་གི་མི་དམངས་ཉེན་རྟོག་པ་རེན་ཞའོ་མིང་སྒེའུ་ཁུང་ཕྱི་རོལ་གྱི་གངས་རིར་ལྟ་བཞིན་སེམས་ནང་སྔར་གྱི་གནས་ཚུལ་མང་པོ་ཞིག་དྲན། 1988ལོར་སྐྱེས་པའི་ཁོང་ཉིང་རུ་མཐའ་མཚམས་མངགས་གཏོང་ཁང་དུ་སླེབས་ནས་ད་བར་ལོ8སོང་ཡོད་ཅིང་། འདུ་འཛི་ཆེ་བའི་ཕ་ཡུལ་ནས་ཐག་རིང་གི་ལས་ཁུངས་དེར་ཐོག་མར་འབྱོར་སྐབས་ཁོང་གི་སེམས་ནང་དུའང་ཐེ་ཚོམ་དང་དཀའ་སྡུག་ཚད་མེད་བྱུང་ཡོད། འོན་ཀྱང་ལོ8ཀྱི་རིང་ཁོང་གིས་ལས་དོན་དེའི་དོན་སྙིང་དང་རིན་ཐང་རིམ་བཞིན་ཤེས་ཡོད། ཁོང་གིས“ད་ཆ་སྐོར་ཞིབ་བྱེད་པར་ཡོང་དུས་རི་སྟེང་གི་ཡིག་འབྲུ་དེ་དག་མཐོང་སྐབས་ལུས་ཡོངས་སུ་སྟོབས་ཤུགས་འཕེལ་གྱི་འདུག་ལ། ཚེ་གང་བོ་ལས་དོན་འདི་བསྒྲུབ་རྒྱུ་བྱུང་བ་ནི་ཅི་འདྲའི་བླ་ན་མེད་པའི་ལས་འགན་ཞིག་ཡིན་པའི་མྱོང་ཚོར་ཡོང་གི་འདུག”ཅེས་བཤད་པ་དང་། ཉིང་རུ་མཐའ་མཚམས་མངགས་གཏོང་ཁང་གི་སུའོ་ཀྲང་ཀྲང་ཝུའེ་ཀྲུང་གིས“ང་ཡང་ལས་ཁུངས་འདིར་ཐོག་མར་འབྱོར་ནས་ཡིག་འབྲུ་དེ་དག་མཐོང་སྐབས་ངས་ལོ་བཅུ་གྲངས་རིང་མཐའ་མཚམས་སྲུང་བའི་ལས་ལ་གཞོལ་རིན་ཆོག་འདུག་སྙམ་བྱུང”ཞེས་བཤད།
ཉེན་རྟོག་རླངས་འཁོར་ལ་ཆུ་ཚོད་གཅིག་ཙམ་བསྐྱོད་རྗེས་གཞི་ནས་རྐང་ཐང་སྐོར་གཡེང་བྱེད་སར་འབྱོར། མི་དམངས་ཉེན་རྟོག་པ་ཚོ་རླངས་འཁོར་ནས་བབས་ཏེ་གྱོན་ཆས་ལེགས་པར་གྱོན་རྗེས་གཡང་གཟར་གྱི་རི་ལྡེབས་བརྒྱུད་གྱེན་དུ་འཛེགས་འགོ་ཚུགས། དེ་གར་ས་བབ་སྨི་ལྔ་སྟོང་ལྷག་ཙམ་ཡོད་པས་གོམ་གང་སྤོ་བར་དཀའ་ཚེགས་ཧ་ཅང་ཆེ་ལ། གྲང་རླུང་ནི་སྤུ་གྲི་ངར་མ་ཞིག་ལྟར་ཁོང་ཚོའི་གདོང་ལ་ལྡང་བས་གདོང་འཁྱགས་ནས་དམར་པོར་གྱུར་ཡོད། “དགུན་དུས་སྐོར་གཡེང་བྱེད་སྐབས་གྲང་རླུང་ལྡང་ནས་རུས་པར་ཡང་ན་ཟུག་གཏོང་སྲིད་པས། གྱོན་གོས་མཐུག་པོ་ག་ཚོད་གྱོན་ཀྱང་སྐར་མ་བཅུ་ཡང་མ་འགོར་བར་འཁྱགས་ཀྱི་ཡོད། སྐོར་གཡེང་ལམ་བུར་སྐྱོད་སྐབས་ཁྱེད་ཀྱིས་གཞི་ནས་འཁྱགས་ཏེ་གདོང་ལ་གྲི་བཙུགས་པའི་ཚོར་སྣང་ཡོང་སྲིད་ཅེས་པ་དེ་གང་འདྲ་ཞིག་ཡོད་པ་ཤེས་སྲིད”ཅེས་མངགས་གཏོང་ཁང་གི་མི་དམངས་ཉེན་རྟོག་པ་ཙོའུ་ཙུང་ཡིའུ་ཡིས་བཤད།
ཉིང་རུ་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་རི་སྐེད་དུ་སྐོར་གཡེང་བྱེད་བཞིན་པ།
སློབ་སྟོན་པ་ཧྲེན་མའོ་ཕིང་ཉམས་མྱོང་ཕུན་སུམ་ཚོགས་པ་མ་ཟད་དེ་རུ་རྒྱུས་མངའ་ཧ་ཅང་ཆེ་བས་དཔུང་རུའི་མདུན་དུ་བསྐྱོད་ཅིང་། ཁོང་གིས“རྐང་འོག་གི་རྡོ་ཟགས་སྲིད་པས་ཚང་མས་གཟབ་གཟབ་བྱེད་དགོས”ཞེས་དབུགས་ཤུགས་ཆེན་ཧལ་བཞིན་རྒྱབ་ཏུ་ཡོད་པའི་འཐབ་གྲོགས་ཚོར་དྲན་སྐུལ་བྱེད་ཀྱི་ཡོད། གསོ་རླུང་མི་འདང་བའི་དབང་གིས་ཁོང་གི་དྲན་སྐུལ་དག་འུར་འུར་དུ་ལྡང་བཞིན་པའི་གྲང་རླུང་དང་འགྲོགས་ཏེ་ཚང་མའི་རྣ་ལམ་དུ་ཐོས།
སླར་ཡང་མདུན་ཕྱོགས་སུ་བསྐྱོད་སྐབས་རིང་ཚད་སྨི100ལྷག་ཙམ་དང་གཟར་ཚད་ཏུའུ60ཙམ་ཡོད་པའི་རི་ལྡེབས་ཤིག་མིག་མདུན་དུ་མངོན། “གཅེན་གཅུང་ཚོ། ཤུགས་རྒྱོབ། ཚང་མས་ཕན་ཚུན་རོགས་རམ་བྱེད་དགོས”ཞེས་ཚང་མས་ལག་གདང་སྦྲེལ་ནས་ཀྱག་ཀྱོག་གི་རི་ལམ་ཐོག་དཀའ་ཚེགས་ཆེན་པོས་མདུན་སྐྱོད་བྱས་པ་དང་། ཆུ་ཚོད་གཅིག་ལྷག་ཙམ་དཀའ་ངལ་ཁྱད་བསད་ཀྱིས་མདུན་སྐྱོད་བྱས་མཐར་སྐོར་ཞིབ་རུ་ཁག་གི་རུ་མི་ཚོ་གཞི་ནས་རི་རྩེར་འབྱོར། སྐབས་དེར་སྐར་ལྔའི་དར་དམར་ལྷབ་ལྷུབ་ཏུ་གཡོ་བཞིན་གངས་རི་དང་དགུང་སྔོན་དག་གཅིག་ལ་གཅིག་རྒྱན་གྱིས་མཛེས་སྡུག་ལྡན་པའི་རི་མོ་ཞིག་གྲུབ་ཡོད་ལ། མི་དམངས་ཉེན་རྟོག་པ་ཚོའང་རི་རྩེར་ཁ་ཁུ་སིམ་པོར་ལངས་ཏེ་རྒྱལ་དར་ལ་ལྟ་བཞིན་སེམས་ནང་སྤོབས་སེམས་ཀྱིས་ཁེངས།
ཉིང་རུ་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་བདེ་བླག་ངང་སྐོར་ཞིབ་བྱས་ནས་རི་རྩེར་འབྱོར་བ།
མངགས་གཏོང་ཁང་དུ་ལོག་པའི་ལམ་བར་དུ“ཚེ་གང་བོ་མེས་རྒྱལ་གྱི་མཐའ་མཚམས་སྲུང་བའི་ལས་ལ་གཞོལ་རྒྱུ་ཡིན”ཞེས་པའི་ཡིག་འབྲུ་དེ་དག་ཉི་འོད་འོག་དེ་བས་བཀྲག་མདངས་འཚེར་ལ། དེས་མི་དམངས་ཉེན་རྟོག་པ་ཚོའི་བློ་སྟོབས་ཀྱིས་ཁེངས་པའི་གདོང་གི་རྒྱན་དུ་གནས། དེ་དུས་མཐའ་མཚམས་སྲུང་བའི་དོན་སྙིང་དེ་བས་ཁ་གསལ་ཞིང་གཏིང་ཟབ་ངང་ཚོར་ཐུབ།
