ཀྲུང་གོའི་བོད་ལྗོངས་དྲ་བའི་འཕྲིན། ཟླ12པའི་ཚེས21ཉིན་ནས་ཚེས25ཉིན་བར་བོད་ལྗོངས་གཞིས་རྩེ་གྲོང་ཁྱེར་རྣམ་གླིང་རྫོང་གིས“དགུན་དྲོད་ཀྱི་ཕྱག་རྟགས། སྐྱིད་པའི་ཤངས་པ”བརྗོད་དོན་གཙོ་བོར་བྱས་པའི་བྱེད་སྒོ་རབ་དང་རིམ་པ་སྤེལ་ཏེ། དམིགས་ཡུལ་ནི་ཤངས་པའི་ཁྱད་ཆོས་ལྡན་པའི་ཡིད་དབང་འཕྲོག་ཤུགས་མངོན་པ་བརྒྱུད། “ཤངས་པའི་རིག་གནས་ཡུལ་སྐོར”སྤུས་རྟགས་དར་སྤེལ་གཏོང་བ་དང་དཔལ་འབྱོར་གྱི་གསོན་ཤུགས་རྒྱུན་མཐུད་ཆེ་རུ་གཏོང་བ། རྣམ་གླིང་གི་དཔལ་འབྱོར་དང་སྤྱི་ཚོགས་དར་རྒྱས་གོང་འཕེལ། མི་དམངས་བདེ་སྡོད་ལས་བརྩོན་གྱི་རྣམ་པ་གང་ལེགས་མངོན་པ། རྣམ་གླིང་རྫོང་གི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་ཆེད་ཡིན།
ལྷ་མོ་འཁྲབ་བཞིན་པ།
འགོ་ཚུགས་མཛད་སྒོར་ཤངས་པ་ལྷ་མོ་དང་སྐྱོར་མོ་ལུང་ལྷ་མོ། རྒྱལ་མཁར་ལྷ་མོ་སོགས་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་རིག་གནས་དང་དེ་བཞིན་གེ་སར་གཏམ་བཤད། ཐོབ་རྒྱལ་གཞས་ཆེན་སོགས་རྣམ་གླིང་རྫོང་ཤངས་པ་སྒྱུ་རྩལ་ལྟེ་གནས་སུ་འཁྲབ་སྟོན་བྱས་པ་རེད། དེ་དང་ཆབས་ཅིག་གཙོ་གཉེར་ཕྱོགས་ཀྱིས་ད་དུང་མངོན་མིན་རིག་གནས་ཤུལ་བཞག་སྤེལ་རེས་བཞུགས་མོལ་ཚོགས་འདུ་སྒྲིག་འཛུགས་བྱས་ནས་སྔར་བས་དར་སྤེལ་དང་རྒྱུན་འཛིན་བྱས་ཏེ་ས་ཁོངས་ཀྱི་རིག་གནས་སྤེལ་རེས་དང་དར་རྒྱས་འཕེལ་རྒྱས་ཀྱི་ལེའུ་གསར་པ་གཏོད་པ་རེད།
བྱེད་སྒོ་གཉེར་བའི་རིང་རྣམ་གླིང་རྫོང་ཤངས་པ་སྒྱུ་རྩལ་ལྟེ་གནས་དང་། ཞིང་ཚོང་ཁྲོམ་ར་གསར་པ། ཨེ་མ་ཞང་སོགས་སུ་རིག་རྩལ་འཁྲབ་སྟོན་དང་། ཤངས་ཆུ་རོང་གི་དངོས་ཟོག་བརྗེ་རེས་འདུ་ཚོགས། “དགུན་དུས་ཀྱི་དྲོ་སྐྱིད་དྲུག་སྐྱེལ་བའི”ཤེས་དཔལ་ལག་ལེན་བྱེད་སྒོ། རྙིང་ཚབ་གསར་བརྗེའི་བྱེད་སྒོ། མངོན་མིན་རིག་གནས་ཤུལ་བཞག་འགྲེམས་སྟོན། སྐོར་བྲོའི་ཞབས་བྲོ། ལས་བྱེད་པ་དང་མང་ཚོགས་ཀྱི་དགུན་དུས་ལུས་རྩལ་འགྲན་ཚོགས། ཨེ་མ་ཞོག་ཁོག་ཞིམ་ཟས་ཉམས་ལེན། ཡིག་གཟུགས་རི་མོའི་བརྩམས་ཆོས་འགྲེམས་སྟོན། ཁྲུང་ཁྲུང་སྐེ་ནག་པར་ལེན་ཉམས་ལེན་འགྲེམས་སྟོན་སོགས་ཡན་ལག་བྱེད་སྒོ་རབ་དང་རིམ་པ་བསྟུད་མར་སྤེལ་བ་རེད།
དངོས་ཟོག་སྤེལ་རེས་ཚོང་འདུས་གཉེར་ཡུལ།
ས་གནས་དེ་གའི་མང་ཚོགས་ཀྱིས་དངོས་ཟོག་སྤེལ་རེས་ཚོང་འདུས་ཡུལ་དངོས་སུ་དངོས་ཟོག་ཉོ་བཞིན་པ།
རྣམ་གླིང་རྫོང་འཕེལ་རྒྱས་བསྒྱུར་བཅོས་དང་དཔལ་འབྱོར་ཆ་འཕྲིན་ཚོང་དོན་ཅུས་ཀྱིས་སྒོར་ཁྲི50བཏང་ནས“བདེ་སྐྱིད་ལྡན་པའི་རྣམ་གླིང་། འཛད་སྤྱོད་ལོངས་སྤྱོད”བྱེད་སྒོ་སྤེལ་ཏེ། རྣམ་གླིང་རྫོང་གི་ཚོང་ཁང་དང་། བཟའ་བཏུང་། ཕྱུགས་ལས་ཐོན་རྫས། ཚགས་ཤ། ལུག་ཤ་སོགས་ཚོང་ཟོག་རིགས་ཀྱི་ཁྱབ་ཁོངས་ལ་དམིགས་ནས་སྣ་མང་ཕུན་སུམ་ཚོགས་པའི་བྲིན་ཚོང་བྱེད་སྒོ་སྤེལ་ནས་མང་ཚོགས་ཀྱི་རང་གཤིས་ཅན་དང་སྣ་མང་ཅན་གྱི་འཛད་སྤྱོད་དགོས་མཁོ་དང་འཛད་སྤྱོད་སྤྲོ་སེམས་སྔར་བས་སྐོང་ཐུབ་པ་དང་། ཁྲོམ་རའི་བྱེད་སྒོ་དང་འཛད་སྤྱོད་ཀྱི་མི་མངོན་པའི་སྟོབས་ཤུགས་ཐོན་ནས་སྤྱི་ཚོགས་དཔལ་འབྱོར་བརྟན་པོའི་ངང་འཕར་རྒྱུར་སྐུལ་འདེད་གཏོང་བ། མི་དམངས་མང་ཚོགས་ཀྱི་ཐོབ་ཚོར་དང་བདེ་སྐྱིད་ཚོར་སེམས་ཆེ་རུ་བཏང་ཡོད།
ལས་བྱེད་པ་དང་མང་ཚོགས་ཀྱིས་དགུན་དུས་ལུས་རྩལ་འགྲན་ཚོགས་ཀྱི་ཡུལ་དངོས་སུ་ཐག་འཐེན་འགྲན་བསྡུར་བྱེད་བཞིན་པ།
ད་ཐེངས་ཀྱི་བྱེད་སྒོ་ནི་རྣམ་གླིང་རྫོང་གི་རིག་གནས་ཡུལ་སྐོར་བྱ་གཞག་གི་ཚོགས་འདུ་གཟབ་རྒྱས་ཤིག་ཡིན་པ་མ་ཟད། རྣམ་གླིང་རྫོང་གི་འཕེལ་རྒྱས་གྲུབ་འབྲས་འགྲེམས་སྟོན་བྱེད་པའི་སྐར་ཁུང་གལ་ཆེན་ཞིག་ཡིན་པས། རྣམ་གླིང་རྫོང་ལ་རིག་གནས་རྒྱུན་འཛིན་གསར་གཏོད་དང་། ཡུལ་སྐོར་ཐོན་ལས་རིམ་སྤོར། དཔལ་འབྱོར་དང་སྤྱི་ཚོགས་འཕེལ་རྒྱས་སོགས་ཐད་སྒུལ་ཤུགས་ཆེན་པོ་བསྣན་ཏེ། ཡུལ་སྐོར་བ་དང་མ་རྩ་འཇོག་མཁན་དེ་བས་མང་བ་རྣམ་གླིང་རྫོང་དུ་བསྐྱོད་ནས་གནས་འདིའི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་དང་མི་མངོན་པའི་སྟོབས་ཤུགས་མྱོང་ཚོར་ཐུབ་ཡོད།
