—— སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱས་ནས་ཡོམ་འགོག་གེགས་སེལ་གྱི་དམག་འཐབ་དྲག་པོར་རྒྱལ་ཁ་མཐའ་གཅིག་ཏུ་ལེན་རྒྱུའི་སྐོར་གྱི་གླེང་ཐེངས་གཉིས་པ།
གཞིས་རྩེ་གྲོང་ཁྱེར་དིང་རི་རྫོང་གི་ས་ཡོམ་གྱི་གནོད་འཚེར་ཏང་ཀྲུང་དབྱང་དང་། རྒྱལ་ཡོངས་མི་དམངས། བོད་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་བཅས་ཀྱིས་སེམས་ཁྲལ་ཆེན་པོ་བྱེད་བཞིན་ཡོད། ས་ཡོམ་བརྒྱབ་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག བོད་རང་སྐྱོང་ལྗོངས་ཏང་ཨུད་ཀྱིས་བཀོད་སྒྲིག་མྱུར་པོ་དང་བྱ་སྤྱོད་འཕྲལ་མར་སྤེལ་ནས་ཡོམ་འགོག་གེགས་སེལ་ལས་དོན་སྤེལ་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཕྲལ་མ་ཉིད་དུ་མཛུབ་སྟོན་གལ་ཆེན་དང་བླང་བྱ་ཁ་གསལ་བཏོན་གནང་བ་དང་། དེ་རྗེས་ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ལྷན་གྱི་ཚོགས་འདུ་གཙོ་སྐྱོང་གནང་ནས། ཡོམ་འགོག་གེགས་སེལ་ལས་དོན་ལ་ཞིབ་འཇུག་བཀོད་སྒྲིག་གནང་བ་དང་འབྲེལ་གསུང་བཤད་གལ་ཆེན་ཡང་གནང་བ་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་གསུང་བཤད་གལ་ཆེན་གྱིས་ང་ཚོས་ཡོམ་འགོག་གེགས་སེལ་ལས་དོན་ཡག་པོ་སྒྲུབ་པར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད།
ལས་དོན་ཁག་སྔར་བས་ཞིབ་ཚགས་བསྒྲུབས་ནས་མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་བའི་འདུ་ཤེས་མངོན་པར་བྱེད་དགོས། མི་སྣ་འཚོལ་སྐྱོབ་བྱེད་སྐབས་ཁུག་གསེང་སྟོང་གསུམ་མ་ལུས་པ་དང་། གནས་གཅིག་ཀྱང་མ་ལུས་པ། མི་གཅིག་ཀྱང་མ་ལུས་པ་བཅས་བྱེད་པ་ནས་ཚན་རིག་དང་མཐུན་པའི་སྒོ་ནས་ཆེད་ལས་ཀྱི་རོགས་སྐྱོབ་སྟོབས་ཤུགས་བཀོད་སྒྲིག་བྱེད་པ་དང་རྨས་མ་ནུས་ཤུགས་ཡོད་རྒུས་སྐྱོབ་བཅོས་བྱེད་པའི་བར་དང་དེ་ནས་གནོད་འཚེ་ཕོག་པའི་མང་ཚོགས་དྲོད་སྲུང་གུར་ནང་སྡོད་རྒྱུ་ཡོད་པ་དང་། ཆུ་ཁོལ་འཐུང་རྒྱུ་ཡོད་པ། ཁ་ལག་ཚ་པོ་ཟ་རྒྱུ་ཡོད་པ། དྲོ་སོབ་སོབ་ངང་མཚན་མོ་སྐྱེལ་ཐུབ་པ། བརྩེ་བ་ཟབ་མོ་ཚོར་ཐུབ་པ་བཅས་ཚང་མ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མི་དམངས་ལ་བདེ་སྐྱིད་སྐྲུན་པའི་སྲིད་དོན་ལས་རྗེས་ཀྱི་ལྟ་བ་བརྟན་པོར་བཙུགས་པ་དང་རང་རྟོགས་ངང་ལག་ལེན་བསྟར་བའི་ཐད་ཀའི་མཚོན་ཚུལ་ཞིག་རེད། མང་ཚོགས་ཀྱི་ལས་དོན་ནན་ཏན་དང་ཞིབ་ཚགས་ཀྱིས་ཡག་པོ་བསྒྲུབས་ནས་དུས་དང་རྣམ་པ་ཀུན་ཏུ་མང་ཚོགས་ཀྱི་བདེ་སྡུག་སེམས་ལ་འཇོག་པ་དང་། ཏང་ཡོན་ལས་བྱེད་པས་མང་ཚོགས་ཀྱི་ཕྱོགས་སུ་ལངས་ནས་གནད་དོན་ལ་བསམ་གཞིག་བྱེད་པར་ཁྲིད་སྟོན་བྱེད་པ། བརྩེ་སེམས་ཟབ་མོས་མང་ཚོགས་ཀྱིས་དོ་སྣང་ཆེ་ཤོས་བྱེད་པ་དང་མང་ཚོགས་ལ་འཕྲལ་མཁོ་ཆེ་ཤོས་ཡིན་པའི་དོན་དངོས་ཀྱི་གནད་དོན་ཐག་གཅོད་བྱེད་རོགས་བྱས་ནས་གནོད་འཚེ་ཕོག་པའི་མང་ཚོགས་ཀྱི་གཞི་རྩའི་འཚོ་བ་སེམས་ནུས་ཡོད་རྒུས་འགན་ལེན་བྱེད་དགོས། སྨན་བཅོས་ཞབས་ཞུ་ཞིབ་ཚགས་སྤེལ་ཏེ་སྤུས་ལེགས་ཀྱི་སྨན་བཅོས་ཐོན་ཁུངས་གཅིག་སྡུད་བྱེད་པ་དང་། ཚན་རིག་དང་མཐུན་པའི་སྒོ་ནས་ཆེད་ལས་རོགས་སྐྱོབ་སྟོབས་ཤུགས་བཀོད་སྒྲིག་བྱེད་པ། སྐོར་སྐྱོད་སྨན་བཅོས་དང་འགོ་ནད་ལྟ་ཞིབ་ཚད་ལེན་ལ་ཤུཌ་སྣོན་རྒྱག་པ། གེགས་ཁུལ་གྱི་ཁོར་ཡུག་འཕྲོད་བསྟེན་བཅོས་སྒྲིག་སོགས་ཀྱི་ལས་དོན་ལ་གོ་རིམ་ལྡན་པའི་ངང་སྐུལ་འདེད་གཏོང་བ། སེམས་གསོ་གཏོང་བའི་ཞབས་ཞུ་རྒྱུན་མཐུད་སྤེལ་བ་བཅས་བྱས་ནས་ནུས་ཤུགས་ཡོད་རྒུས་མང་ཚོགས་ཀྱི་ལུས་སེམས་བདེ་ཐང་སྲུང་སྐྱོང་བྱེད་དགོས།
ལས་དོན་ཁག་སྔར་བས་ཞིབ་ཕྲ་བསྒྲུབས་ནས་ཚན་རིག་ལ་བརྩི་འཇོག་དང་རྗེས་དཔག་ལ་བརྩི་མཐོང་བྱེད་པའི་དམ་པ་དོན་གཉེར་གྱི་སྤྱོད་ཚུལ་མཚོན་པར་བྱེད་དགོས། གེགས་ཁུལ་ནི་ས་མཐོར་གནས་པ་མ་ཟད། དགུན་ཨ་རང་ད་རང་གི་དུས་ཀྱང་འཁེལ་བས། ཉེན་སེལ་རྒུད་སྐྱོབ་དང་། མང་ཚོགས་བཀོད་སྒྲིག དངོས་ཟོག་སྐྱེལ་འདྲེན། གེགས་རྗེས་བསྐྱར་སྐྲུན་སོགས་ཀྱི་ལས་དོན་ཁག་ལ་སྔར་བཞིན་གྲང་ངར་ཆེ་ཞིང་གསོ་རླུང་དཀོན་པ་དང་ཡོམ་འཕྲོའི་ཉེན་ཁ་སོགས་ཀྱི་དཀའ་ངལ་མང་པོ་འཕྲད་བཞིན་ཡོད་ཅིང་། རྒྱུ་རྐྱེན་དེ་དག་ལས་ཡོམ་འགོག་གེགས་སེལ་ལས་དོན་སྤེལ་བར་དམིགས་བསལ་གྱི་བླང་བྱ་བཏོན་ཡོད། འགལ་རྐྱེན་སྣ་ཚོགས་ལ་བསམ་གཞིག་སྔར་བས་ལེགས་པར་བྱས་ཏེ་ལས་དོན་ཁག་སྔར་བས་ཞིབ་ཕྲ་བསྒྲུབས་ན་གཞི་ནས་ཡོམ་འགོག་གེགས་སེལ་ལ་སྐུལ་འདེད་བརྟན་པོ་གཏོང་ཐུབ། ཚན་རིག་དང་མཐུན་པའི་སྒོ་ནས་ཉེན་སེལ་རྒུད་སྐྱོབ་བྱེད་པ་དང་། ཡོམ་འཕྲོ་དང་རི་ཉིལ་བ་སོགས་ལ་ལྟ་ཞིབ་ཚད་ལེན་དང་སྔོན་བརྡ་གཏོང་བར་ཤུགས་སྣོན་རྒྱག་པ། གནམ་གཤིས་འགྱུར་ལྡོག་ལ་དོ་སྣང་ཆེན་པོ་བྱེད་པ། ས་གཤིས་གནོད་འཚེའི་མངོན་མེད་རྐྱེན་ངན་ཡོད་ས་ཡོངས་ཁྱབ་གྲལ་བཤེར་བཅས་བྱས་ཏེ་ཞོར་ཐོན་གནོད་འཚེ་སྔོན་འགོག་ནན་པོ་བྱེད་དགོས། ཆུ་དང་། གློག ལམ་སོགས་རྨང་གཞིའི་སྒྲིག་བཀོད་ལ་གཏོར་སྐྱོན་ཕོག་པ་རྣམས་ནུས་ཤུགས་ཡོད་རྒུས་མྱུར་བཟོ་བྱེད་པ་དང་གེགས་སེལ་སྟོབས་ཤུགས་དང་གེགས་སེལ་དགོས་མཁོ་ཚན་རིག་དང་མཐུན་པའི་སྒོ་ནས་བཀོད་གཏོང་བྱེད་པ་དང་ཡོམ་འགོག་གེགས་སེལ་གྱི་རླངས་འཁོར་དང་། དངོས་རྫས། མི་སྣ་བཅས་ཤར་སྐྱོད་ཐུབ་པའི་འགན་ལེན་བྱེད་དགོས།
ལས་དོན་ཁག་སྔར་བས་ཞིབ་ཕྲ་བསྒྲུབས་ནས་དངོས་ཐོག་བདེན་འཚོལ་དང་ཕུགས་ལ་དམིགས་པའི་འཕེལ་རྒྱས་ཀྱི་བསམ་གཞིག་གསལ་འགྲེལ་རྒྱག་དགོས། མིག་སྔར་ཡོམ་འགོག་གེགས་སེལ་ལས་དོན་དེ་གནོད་འཚེ་ཕོག་པའི་མང་ཚོགས་བཀོད་སྒྲིག་དང་གེགས་རྗེས་བསྐྱར་སྐྲུན་ལ་བསྒྱུར་ཡོད། ཕྱོགས་ཁག་གི་རོགས་སྐྱོབ་སྟོབས་ཤུགས་ཀྱིས་ཚ་ཚ་འུར་འུར་ངང་རོགས་སྐྱོབ་དང་མཇུག་མཐུད་ཀྱི་ལས་དོན་སྒྲུབ་བཞིན་ཡོད་པ་དང་། དངོས་ཟོག་སྣ་ཚོགས་ས་གནས་ཁག་ནས་གེགས་ཁུལ་དུ་དབོར་བཞིན་ཡོད་པ། གཞི་རིམ་གྱི་ལས་བྱེད་པ་དང་མང་ཚོགས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་དང་ཕྱར་བ་གྲུ་འདེགས་ཀྱིས་རང་སྐྱོབ་བསྐྱར་སྐྲུན་བྱེད་བཞིན་ཡོད། བཀོད་སྒྲིག་འགན་སྲུང་ལས་དོན་ཡག་པོ་སྒྲུབ་པར་རྨང་གཞིའི་སྒྲིག་བཀོད་ཉམས་གསོའི་ལས་དོན་ལ་དམ་འཛིན་བྱས་ཏེ་སྒྲིག་བཀོད་དང་དངོས་ཟོག་སྣ་ཚོགས་སྒྲིག་སྦྱོར་བྱེད་པ་དང་། ཆུ་དང་། གློག འཕྲིན་གཏོང་། དྲོད་རླངས། གསང་སྤྱོད་བཅས་དང་དེ་བཞིན་རིམས་འགོག་དང་། མེ་ཟོན། བདེ་འཇགས་གློག་སྤྱོད་སོགས་ཀྱི་ལས་དོན་ཏན་ཏིག་དང་ཡག་པོ་སྒྲུབ་པ། གནོད་འཚེ་ཕོག་པའི་མང་ཚོགས་ཀྱི་ཟས་གོས་དང་། སྡོད་ས། སྨན་བཅོས་སོགས་ཀྱི་གཞི་རྩའི་དགོས་མཁོ་འགན་སྲུང་ཏན་ཏིག་བཅས་བྱས་ཏེ་གནོད་འཚེ་ཕོག་པའི་མང་ཚོགས་བདེ་འཇགས་དང་དྲོ་སོབ་སོབ་ངང་དགུན་ཁ་སྐྱེལ་ཐུབ་པའི་འགན་ལེན་བྱེད་དགོས།
ཡོམ་འགོག་གེགས་སེལ་གྱི་ལས་དོན་ཁག་སྔར་བས་ཞིབ་ཕྲ་སྒྲུབ་པ་དེའང་སྤྱོད་ཚུལ་ལེགས་སུ་གཏོང་བ་དང་དོན་འཁྱོལ་ལ་དམ་འཛིན་ནན་པོ་བྱེད་པའི་ལྡོག་མེད་ཀྱི་བླང་བྱ་ཞིག་རེད། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་ལ་བརྟེན་ནས་ཡོམ་འགོག་གེགས་སེལ་ལས་དོན་གྱི་སྤྱི་ཡོངས་ལ་གཅིག་འདོམས་བྱ་རྒྱུ་མཐའ་འཁྱོངས་བྱེད་པ་དང་། ཡོམ་འགོག་གེགས་སེལ་གྱི་སྙིང་སྟོབས་རླབས་པོ་ཆེ་དར་སྤེལ་གཏོང་བ། རྒྱུན་མཐུད་དམག་འཐབ་དང་སྙིང་རུས་གཏན་འཁྱོངས། ལས་དོན་སྔར་ལས་ཞིབ་ཕྲ་དང་ཏན་ཏིག་སྒྲུབ་པ་བཅས་བྱས་ཏེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཇི་མ་ཇི་བཞིན་དོན་འཁྱོལ་བྱས་ནས་ཡོམ་འགོག་གེགས་སེལ་གྱི་འགག་སྒྲོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས།
